يا جماعه و الله تعبت خلاص من الشعور ده ..
دايما حاسس بخنقه طول الوقت و مش عارف اتعامل مع الناس و لا اتقبلهم ، دايما ببص للعالم بالنظره السوداوية ،
زهقت من الناس كلها .. دماغي هتنفجر من كتر ما انا بحسب كل كلمه و كل نظره ، مش عارف اتعامل زي بقيت الناس .. الناس كلها فهلويه و بتعرف تتعامل مع بعضها و انا مش فاهم حاجه
ممكن ارجع يومين ابقى متعافي شويه من الموضوع ده ، بس فتره التعافي مبتطولش و برجع تاني ، و بحس اني اتعلقت بأمل زائف
مش عارف هل قدرت أوصلكو الشعور اللي جوايا و لا لا ..
بس انا حاسس بحاجه زي الإغتراب الوجودي ، حاسس اني بتعلم اكون بني آدم ، القعده مع نفسي هي اللي بتريحني بس
و للاسف معيش فلوس اروح لدكتور نفسي
السلام عليكم، أولا ربنا يعينك وتمر الفترة دي على خير وترجع أفضل. هل النظرة السوداوية والمشاعر دي ظهرت مؤخرًا؟ هل بتتابع أخبار العالم ومتأثر باللي بيحصل فحاسس بيأس وقافل من الدنيا كلها؟ ولا مريت بفترة ضغوطات شديدة مقدرتش تنفس عنها والتراكمات وصلتك للمرحلة دي ولا أصلا الموضوع بقاله فترة طويلة؟ *** نفسك مرهقة ومستنزفة (أيا كان السبب اللي وصلك للمرحلة دي) ومفيش مشكلة إنك تنعزل وتفصل مع نفسك شوية عشان تتعافى. بس الفصلان مع نفسك الأفضل يكون من غير اجترار الأفكار السلبية والمشاعر السوداوية. حاول تخلي وقتك مع نفسك للتعافي وتبديل الأفكار السلبية، وإنك تعمل انشطة تساعدك على تحسين حالتك المزاجية. لو فيه إمكانية تسافر مكان جديد وتغير جو اعمل ده، أو شوف حاجة كانت بتسعدك زمان وارجع مارسها. *** الكتابة وسيلة جيدة لتفريغ مشاعرك وهتساعدك على التعافي إن شاء الله. ممارسة الامتنان عادة جميلة دخلها يومك وابدأ سجل كل يوم ولو على الأقل ٣ نعم تشكر ربنا عليهم أو حاجات حصلت في يومك وفرقت معك أو أسعدتك أو إنجاز عملته مهما كان صغير، ده هيخليك تركز على الإيجابيات ويقلل تركيزك على السلبيات والسوداوية. *** لا تضغط على نفسك أو تحس بالذنب إنك مش قادر تتعافى بسرعة أو تستمر في التعافي. وكمان، متحكمش إنك مختلف والناس كلها بتعرف تتعامل وأنت لأ، ناس كتير زيك، وناس كتير بسبب أوضاع العالم حاليا وقعوا في الإحباط والسوداوية وفقدان الأمل في الواقع والمستقبل، وكمان ناس كتير مش بتعرف تتعامل عادي، أنت بس بتحكم على الكل من نظرتك أنت واعتقادك الشخصي عن الآخرين. **** لو مقدرتش تغير الوضع بنفسك ومحتاج مختص يتابع معك ومشكلتك في الفلوس، ففيه خيارات مجانية زي الخط الساخن للأمانة العامة للصحة النفسية ( ١٦٣٢٨ ) وكان فيه مبادرة شيخ الأزهر للدعم النفسي للشباب وحل مشاكلهم على الخط الساخن ( ١٩٩٠٦) وبرضه المستشفيات الحكومية فيها أقسام نفسية بأسعار مخفضة. ده لو احتجت المساعدة بصورة ملحة أو لقيت الوضع زاد وبقى يؤثر بطريقة سيئة على جوانب حياتك المختلفة. ** استعن بالله وابدأ وإن شاء الله تمر الأزمة بسلام في أقرب وقت. بالتوفيق.
تم النشر الثلاثاء، ٤ أغسطس ٢٠٢٦
السلام عليكم اولا هي المشكله مش ان انت تروح لدكتور نفسي. انت تقدر تعالج نفسك بنفسك، وجود الناس يعني ان انت عايز تعمل علاقات وتبقى اجتماعي على فكره هي مش حاجه لذيذه. بس انت حابب تكون اجتماعي اول حاجه لازم تقرب من ربنا اولا. قربت من ربنا. في بقى انت ناس اصلا شبهك يعني انت هتلاقي في ناس شبهك كده بيحبوا يقعدوا لوحديهم بس انتوا الاثنين لو اتجمعتوا هتحبوا تقعدوا لوحديكم برضه. بس هتبقى القعده مريحه. مش لازم تتجمع بالناس اللي طباعها غير تطبعك ما انت مش هتستريح في القعده فهتكره الناس اكتر فحاول اقرب من الناس اللي شبهك في ناس بتحب العزله برضه بيصاحبوا ناس بيحب العزله بيسيبك بقى من نظره اني انا شايف الدنيا من جهه الظلام والدنيا دي سوده والناس مش كويسه ما علينا. احنا نشوف بقى للجانب الاحسن هنقرب من ربنا هنشوف حتى لو العزله. انا حابب العزله ما فيهاش مش حاجه وحشه على فكره العزلة برده حلوه بس اهم حاجه ان انت تعتزل صح ما تتجنبش الناس بتتكلمش معهم كده لو انت انسان بتعرف تفتح مواضيع فانت الحمد لله كده انت مش مريض نفسي. لان انت بتعرف تعدي. اما لو انت بقى معزول قوي كاره الناس كاره الدنيا جالك بيقول انتحاريه فانت كده بقى يعني هنتجه بقى للجانب النفسي اما انت على فكره كويس ما فيكش حاجه. انت بس زهقت من الروتين.
تم النشر الأربعاء، ٥ أغسطس ٢٠٢٦
من كان مع الله كان كل شي معه وان كان مع غير الله لم يكن معه شي
تم النشر الثلاثاء، ٤ أغسطس ٢٠٢٦
أخي، أنا أفهم تمامًا الشعور اللي بتصفه، وهو شعور ثقيل ومرهق جدًا. الإغتراب الوجودي ده مش مجرد "مزاج سيء"، ده إحساس عميق إنك مش قادر تندمج مع العالم من حواليك، وإن كل حاجة بتتطلب مجهود ذهني هائل عشان تفهمها أو تتعامل معاها. ده طبيعي إنك تتعب منه، وإنك تحس إن فترات الراحة القصيرة بترجعك لنفس الدائرة. أنت مش لوحدك في ده، ومش عيب إنك بتحاول تتعلم "تكون بني آدم" بطريقتك الخاصة. من منظور عملي، حاول تبدأ بخطوات صغيرة ومحددة عشان ما تحسش بالضغط. مثلاً، خصص وقت يومي قصير (حتى لو 15 دقيقة) تكتب فيه الأفكار اللي بتدور في دماغك بدون ما تحكم عليها، ده بيساعد على تفريغ الضغط الذهني ويخليك تشوف الأنماط اللي بتكرر. كمان، جرب تختار موقف واحد بسيط يوميًا تتعامل فيه مع شخص (زي تحية أو سؤال قصير) بدون ما تحلل كل كلمة أو نظرة، ولاحظ إن النتيجة مش دايمًا سلبية. ده مش هيغير كل حاجة فورًا، لكنه يبني ثقة تدريجية في قدرتك على التعامل. من الناحية الإيمانية، الشعور ده ممكن يكون فرصة للتأمل في معنى وجودك وعلاقتك بالله، فالقرآن بيذكرنا إن الإنسان مخلوق لعبادة وتأمل، وإن الوحدة مع النفس أحيانًا بتكون باب للتقرب. حاول تركز على أعمال صغيرة زي قراءة آيات تطمئن قلبك أو الدعاء بطلب الهداية والراحة، ده بيعطي إحساس بالغرض يقلل من السوداوية. أنت قادر تتجاوز ده خطوة بخطوة، ولو حسيت إن الأمر بيثقل عليك أكتر، ابحث عن أسئلة مشابهة على فدني عشان تشوف تجارب الآخرين وتستفيد من وجهات نظر إضافية. أنت مش لوحدك في الرحلة دي.
تم النشر الاثنين، ٣ أغسطس ٢٠٢٦
السلام عليكم ورحمه الله وبركاته عايزه ادي لحضرتك نصيحه بجد فادتني جدا جدا جدا انا كنت في الاول زي حضرتك كنت بحب الانعزال ما كنتش بحب اختلط بحد كانت النظره بتاذيني الكلمه كانت بتاذيني لكن مع الوقت اتعلمت ان انا ما اكونش ذكرى يعني ايه ذكرى يعني حضرتك يكون وجودك زي عدمك مع الناس اللي حواليك يعني ليه ما تختلطش باهلك ليه ما تختلطش باخوك او اختك ده مع الوقت بيخلي المشكله دي تتحل انا ما كنتش بحب الاختلاط ما كنتش بحب ان انا اقرب من اهلي كنت بشوف قعدتهم رخمه كنت بشوف قعده اي حد عموما رخمه لكن مع الوقت اتعلمت ان انا اقعد معاهم افهمهم يحكوا لي احكي لهم مشاكلي ويحكوا لي مشاكلهم بدأت ان انا اعود نفسي واكبر نفسي على ده لحد ما اتعودت ونصيحه مني اسمع نصائح الدكتور ابراهيم الفقي
تم النشر الثلاثاء، ٤ أغسطس ٢٠٢٦
نفسك والله
تم النشر الثلاثاء، ٤ أغسطس ٢٠٢٦
ركعتين لله و افتكر قول الله تعالي " إِنَّمَا النَّجْوَى مِنَ الشَّيْطَانِ لِيَحْزُنَ الَّذِينَ آمَنُوا وَلَيْسَ بِضَارِّهِمْ شَيْئًا إِلَّا بِإِذْنِ اللَّهِ وَعَلَى اللَّهِ فَلْيَتَوَكَّلِ الْمُؤْمِنُونَ" ف بس كده و احسن الظن بالله ف إنما هي ارزاق و لو اطلعت على الغيب لاخترت الواقع و لكن كل ما في الأمر إحسان الظن بالله اولا و اخيرا .. لأن الشيطان بيدخل للإنسان و يتمكن منه وقت حزنه أو وقت تشاؤمه و يأسه و يكرهه في الدنيا و كل حاجه ..ف المهم استعذ بالله من الشيطان الرجيم و احسن الظن و عارف انا شعورك 😂😅 دا لأني كنت فيه بس هقولك حاجه ممكن تعملها و صدقني هتجيب معاك نتيجه بس واحده واحده هتصلي كل يوم ركعتين لله قيام ليل و تشتكي لربنا و تقوله انا مش عارف اتعامل مع الناس و كل مره بغلط و .....و كمل و صدقني خلال كام يوم هتلاقي الموضوع فرق معاك و صلي ع النبي كتير و بعد ما الدنيا تفك إن شاء الله تعالي قولي 🌚
تم النشر الثلاثاء، ٤ أغسطس ٢٠٢٦
طبيعي كلنا عندنا نوع من انواع الرهاب في حياتنا بس صدقني حاول تتغلب على ده لان محدش مهتم بغيره حاول تختلط اعمل ذكريات ايامنا كلها ذكريات مش مستاهله اننا ننعزل ونفكر في كل حركه وكل نظره
تم النشر الثلاثاء، ٤ أغسطس ٢٠٢٦
لعرض السؤال في فدني اضغط هنا