كيف أتجاوز هذا الأمر وأتصرف بطريقة صحيحة فيه؟

Question

انا في سنه اولى جامعه عمري ما كلمت ولد بس بجد حسيت سنه أولى بدايه اللعنه كنت راجعه من الجامعه في أول أسبوع معرفش لا بنات ولا ولاد روحت صليت اتغديت ونمت زي كل يوم لكن موبايلي اتبعت عليها رساله قمت قفلت النت من غير ما ابص مين بعت رساله المهم قلقت فتحت الموبايل لقيته حد من علي جروب الدفعه داخل لي برايفت لا انا اعرفه ولا هو يعرفني كنت متضايقه جدا انه دخل لي ازاي يدخل لي بس لقيته بيسأل عن حاجه في الدراسه فقلت اشمعنا أنا في ناس كتير وفي ولاد معانا اشمعنا انا قالي اسمك اللي جى قدامي قمت دخلت عشوائي قلت تمام وساعدته وخلاص بعد كدا لقيته رخم كل شويه يبعت رساله لحد ما قالي انا ارتحتلك وحبيتك وكلام غريب استغربت ازاي دا كله في يوم لمجرد اني ساعدته بس وبتقولي بحبك!!! انا جالي ايرور لقيت بدأ يبعت يوم ورا يوم ويبعت قلوب قلتله مش بحب الأسلوب دا بلاش الاموجي وكلام من دا بدا يطلب مني صور ليا رفضت طبعا رفض تام قالي ذاتيه قلتله لاذاتيه ولا غيرها مستحيل ترضي اختك حد يقولها كدا محدش قلتله لو سمحت ما تبعتي ليا تاني كل شويه يبعت لحد فعلا انا وقتي كله ضاع مني بسببه انا مكنتش حباه هو كان كل يوم يبعت وعاوز يشوفني وفي المحاضرات يتصل يقولي انتي قاعده فين مكنتش برد علي مكالماته كان بيبعت واتس مردتش اعرفه انا مين لكنه عرف اسمي وانا منين انا ندمانه اني قلت حاجه زي كدا بس لما قلتلها كان بحسن نيه هو قالي منين هو فقلتله انا منين أنا في يوم قفلت منه قلتله احنا عيال وبطل هبل وحب اي اللي في يوم وتعرفني كمان بدا يحتاج عليا ابعت ريكورد ويسمع صوتي بجد انا هزقته ومرمطه بطريقه محدش يستحملها لكن هو لازقه اتصل رديت بس مكنتش اعرف انه هو أول اما عرفت قفلت فورا بدت يبعت عالواتس نفس الحاجات اللي بيعتها صورتك صوتك وكلام من دا قمت عملت له بلوك لاني تعبت ودا كان بيبعدني عن المذاكره الصلاه النوم على الرغم إني مش حابه اتكلم معاه بس لقيتني برد عليه عملت له بلوك من الواتس جالي من التليجرام تعبت بجد كان اكتر الوقت بعيط بالليل وقول يا رب مخنوقه دايما لقيته دخل لي من الواتس برقم تاني وبيقول لي انا في صيدله وشفتك وانتي داخله مبنى علاج وصاحبي معاكي في علاج وانتي لفتي نظري وخليت صاحبي يجيب رقمك واسمك ليا انا ساعتها اتأكدت انه الحيوان دا عملت له بلوك والادمن الكبار قالولي روحي للعميد فقلت انا هاتفي ببلوك علشان مأذيش حد حرام عليا بعد فتره لقيت واحد بنفس اسم الولد داخل ليا انستا وبيقول لي انتي وحشتيني وهاجي اتقدملك وعارف اسم مامتي واخواتي علي الرغم ان انا مش معرفه أسماء عيلتي لحد حتى صحباتي البنات ولقيته بيقولي انا جايلك الجامعه الصراحه كلمه جايلك الجامعه خوفتني لاني ساكنه في بلد تانيه بعيد عن عيلتي في غربه خفت يعملي حاجه ولقيته بيقولي انتي بتتقلي عليا انا هتواجهي بباكي ازاي بجد انا خفت من الكلمه دي هتواجهه بايه انا حتى عمري ما بنزل صوري ولا عملت حاجه غلط بجد شككني في أخلاقي ونفسي قعدت يومين مش باكل وبعيط وادعي ربنا يسترني على الرغم إني معملتش حاجه بس كان خوف وتقل على قلبي من يومها مستحيل بساعد حد أبدا ولا عاوزه اساعد بس انا خايفه لان الولد دا مسيره يعرفني لان احنا سوا اربع سنين والامتياز فهيعرفني وهيبقي معيا في المكان خايفه يقول لولاد الدفعه كلام وحش عني ويقول لهم اني كنت بكلمه اقسم بالله انا ما اتعديت حدودي بس بخاف يشوه سمعتي وانا محترمه اعمل اي خايفه اكمل في الجامعه بسببه

Accepted Answer

السلام عليكم ورحمه الله وبركاته أنت جميله وطيبه ولسه صغيره فخلينا نقول لك اللي انت ما تعرفيهوش عن النوعيه دي من الشخصيات هو كل اللي هو بيعمله ان هو بيلعب على الخوف بتاعك يخوفك بحاجه فده يخليكي تتصرفي بحاجه من اللي هو بيطلبها منك ما تتعامليش مع النوعيه دي بنفسك وخلي حد كبير هو اللي يتعامل مع الشخصيه دي تبلغي باباكي تبلغيه حد من اهلك وتقولي حصل واحد اثنين ثلاثه رغم ان انا عملت بلوك للشخص ده اكتر من مره لكن كل شويه بيلحقني بالشكل ده وتخلي بقى حد ياخذ الرقم بتاعه او هيقدروا ان هم بطريقه ما يقولوا له طب تمام تعال نتقابل رقمك او من اي حاجه ويقابلوه هم هيكونوا قادرين على التصرف. مع الشخصيه دي فما تتعبيش نفسك وما تخافيش من حاجه وما فيش حاجه انت تقلقي منها. ويكفي يعني يكفي انك تعملي كده سلمي الموضوع لحد كبير عشان انت مش هتعرفي تتصرفي لانه خبرتك في الحياه في التعاملات دي قليله.

Answer

السلام عليكم، أولا الموضوع سهل ومش محتاج منك كل القلق والرعب ده. أنتِ مشكلتك الأساسية في خوفك... خوفك من اللجوء لأهلك، وخوفك من نظرة الناس. خلي دائما خوفك الوحيد من ربنا، وطالما بينك وبين نفسك معملتيش أي غلط فخليكِ واثقة في نفسك حتى لو لا قدر الله حصل وشخص تبلى عليكِ (مش في المشكلة دي، في أي حاجة في الحياة عموما) متهتميش أبدا لكلام الناس وارفعي رأسك. اللي عاوز يتكلم ويألف كلام وحوارات هيألف ويصدق اللي عاوز يصدقه. فأنتِ قربي من ربنا ودايما رددي (حسبي الله ونعم الوكيل) قوليها من قلبك وبيقين وتصديق في كل كلمة منها وإن ربنا فعلا كافيكِ ووكيلك وهيكفيك شر أي شخص يحاول يؤذيك. ** الموضوع عامة وقف من 5 شهور فكفاية قلق، هو في الغالب لقى مفيش فايدة فراح يحاول يصطاد بنت تانية غيرك وفيه للأسف بنات كتيرة بتقع في الفخ ده فاحمدي ربنا إنه ثبتك وصرف عنك شره، وواظبي على الدعاء إنه يصرف شره وشر غيره عنك إن شاء الله. ** لو حصل ورجع يتكلم، اعملي بلوك من كل حاجة ومترديش خالص، وبعدها لما ترجعي البيت لو ساكنة بعيد اشتكي لوالدك أو أخ لك حتى لو أصغر منك، اشرحي لهم الموقف بصدق وحسسيهم إنك بتلجأي لهم عشان عارفة إنهم واثقين في أخلاقك ومتأكدة إنهم هيخافوا عليك ويحموك، لو اتصل خلي حد منهم يرد عليه ويهزقه وصدقيني هيخاف ويحرم. هو كان بيستغل خوفك وعدم فهمك، فبيقول لك محدش هيوصل لي ولا حد هيعرف يعمل لي حاجة، مع إن اتصال واحد بمباحث الانترنت سهل يوصلوا له ويأدبوه. *** بالنسبة لخوفك من مسألة خطيبك تقولي له إزاي بعد كده، فخطيبك أو الشخص اللي هيكون زوجك مستقبلا ملوش حق يعرف أو يحاسبك على حاجة من ماضيك (وأنتِ هنا مغلطتيش) ده حتى لو البنت كانت غلطت أو مرتبطة قبل كده، وده شرعًا مش كلام من عندي يعني. وربنا يصلح لك الحال ويبعد عنك شره وشر غيره. بالتوفيق.

Answer

خدي نفس عميق كده واهدَي، لأن اللي انتي فيه ده خوف واوهام مش حقيقة. الولد ده ماعملش حاجة حقيقية، لا لمسِك ولا أخد منك حاجة كله كلام ورسايل وخيال. النوع ده من الشباب بيعتمد على إن البنت تخاف، أول ما يشوف الخوف بيكبر يستقوى، وأول ما يشوف ثبات بيتلم ويمشي. وخليني أقولك الحقيقة من الآخر: ٩٠٪ من الشباب دول ابطال بالكلام بس، وقت الجد يقلبوا “بط بلدي” لأنهم عارفين إنهم غلطانين ومكشوفين. انتي مش مطالبة تبرري، ولا تردي، ولا تشرحي، ولا تثبتي حاجة. تجاهل تام + حظر + لا رد = هو اللي هيخاف مش انتي ولازم تعرفيه انك مش خايفه لو دخل كلمك تاني فيما بعد. كمان بلاش تخلي دماغك يوديك لسيناريوهات مرعبة، محدش يعرف يعمل حاجة ركزي في دراستك وحياتك واشغلي نف وانتي أقوى وأنضف من إن حد يخوفك بوهم. متقلقيش ولا تكبّري الموضوع، كله كان كلام بس ومفيش أي حاجة حقيقية تخوف. اشغلي وقتك بنفسك وبحياتك، أول ما تركزي على نفسك الخوف هيختفي لوحده 💙

كيف أتجاوز هذا الأمر وأتصرف بطريقة صحيحة فيه؟

نفسية

خوف

اجتماعية

سؤال من احد أعضاء فدني

تم النشر الأحد، ١٨ يناير ٢٠٢٦

5 إجابة

13 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك