سلامٌ عليكم
أنا تالته أزهر مخلصه من أيام المهم انا مايلة جدا لفكرة الشغل وبالذات العمل الحر وكدا بحاول اتعلم جرافيك ديزاينر وعاوزه اتعلم برمجة بالذات ويب سايت وبرضو هتعلم انجلش علشان الجامعة بإذن الله لأني علمي ويعتبر الكليات العلمية تدرس بالإنجلش ولو دخلت الكلية اللي نفسي فيها اللغه هتسهل عليا حاجات كتير وكدا كدا هتسهل سواء دخلتها او لا بس انا عندي ظن بربنا كبير جدا
وحاليا مشتركة في دورات دينية وفيه منهم اتنين مشرفه بتابع مع الطلاب واتنين تانيين طالبه وعلشان فيه محاضرات اتراكمت من اللي انا فيهم طالبه فترة الإمتحانات ف انا بحاول أخلص فيهم غير ان الصبح مطلوب مني شغل البيت وساعات بعمل النص علشان ألحق اعمل اي حاجه في الدورات والضهر فيه معلمة قرآن في زياره حاليا وانا بدالها اسبوع فبروح الكتاب وباجي العصر او بعد العصر وفي الوقت دا اللي هو المفروض فاضي ببقي مكسله اوي عملت جروب تليجرام Freelance work وفيه ميمبرز دلوقتي وهما تالته عام وقولتلهم بعد ما مادتكم تخلص نبدأ نتعلم مهارات لأن عاوزه حد يشجعني ونبدأ نتعلم من كانفا او اي ابلكيشن جرافيك او نشوف كورسات تانيه برضو للشغل بعد الإمتحان علطول
نزلت اتنين تيك توك واحد ليا والتاني اعمل حساب ك صانعة محتوي واعمل فلوس واجيب لاب وابدأ اتعلم اي حاجه تفيدني لأن مش معايا غير فون بس لقيت ان لا حتي القرآن قولت لأ انا مش هتاجر بالقرآن انا نيتي ربح ف مدخلش القرآن في حاجه زي دي حتي لو هاخد ثواب والمهم مسحتهم الإتنين علشان وقتي والفيس مش بفتحه ولو فتحته بقلب وخلاص بزهق ومش عاوزه اشوف اي حاجه ومش عاوزه اقفله في نفس الوقت وعموما كدا كدا لما المعلمة ترجع هيكون نفس النظام وغير ان كمان هاخد وقت علشان هحفظ قرآن لأن حاليا موقفه لحد ما هي تيجي فحد يقترح عليا اعمل اي او انظم وقتي ازاي واعمل كل دا في نفس الوقت واعمل شغل البيت كله مش نصه ولا حاجه وشكرا جدا مقدما 💗💗
السلام عليكم، أولا ربنا يوفقك ويقويك على الشغل على كل الاهداف اللي نفسك تحققيها. كويس إنك عاملة أهداف وفيه تصور في رأسك عاوزة تجتهدي عشانه، لكن المشكلة اللي ممكن تكون أكبر عائق دلوقتي هي إنك متقلة كتير على نفسك. كثرة الأهداف هتزود تشتتك وحيرتك ومش هتبقي عارفة تبدئي منين وهل الوقت هيكفي أو لا وإحساسك بالثقل ده هيخليك تسوفي من غير ما تاخدي بالك. **** فأول حاجة تعمليها إنك تقعدي مع نفسك وتحددي الأولويات في كل الأهداف دي. مينفعش تعملي كل حاجة في نفس الوقت، ومش كل الأهداف دي لها نفس الأهمية والأولوية. لو قعدتِ فكرتِ كويس ورتبتِ أفكارك وأهدافك هتلاقي فيه منها أهداف في الدرجة الأولى ولو عندك اختيار واحد بس هتتخلي عن كل الأهداف الباقية وتختاري الحاجة دي، وفيه حاجات هتلاقيها أقل أهمية أو مش عاجلة وممكن تؤجليها. ** أنصحك تقرأي أو تشوفي فيديو بيشرح (مصفوفة أيزنهاور) لتصنيف المهام ورتبي مهامك اليومية على أساسها. ** أيًا كان نظام التخطيط اللي هتتبعيه لازم تراعي أوقات نشاطك وطاقتك وتركيزك. المهام الصعبة خلي لها أكثر وقت بتكوني نشطة ومركزة. *** أنصحك تشوفي (نموذج عجلة الحياة المتوازنة) هيساعدك إن شاء الله تضعي أهدافك بتوازن بحيث تكون كل جوانب حياتك متوازنة وتشتغلي عليها واحدة واحدة بدون ما تثقلي على نفسك. ده فيديو عنها، وهتلاقي فيديوهات أكتر على اليوتيوب https://www.youtube.com/watch?v=PfT4mHLyYFk فيه أسئلة كتير على التطبيق بخصوص تنظيم الوقت والأهداف ممكن تاخدي منها نصائح أكتر، وربنا يوفقك.💚
تم النشر الخميس، ١٦ يوليو ٢٠٢٦
وعليكم السلام ورحمة الله، أول حاجة أحييكي على طموحك ونيتك الطيبة، وعلى إنك بتحاولي توازني بين الدين والتعلم والمسؤوليات البيتية. ده مش سهل، وإنك لسه مصرة رغم التراكم ده يدل على قوتك. ربنا يوفقك ويبارك في وقتك. عشان تستغلي الإجازة بطريقة عملية وما تتعبيش نفسك، ابدئي بترتيب أولويات واضحة: الدين أولاً (الدورات والقرآن)، ثم تعلم المهارات اللي هتفيدك في المستقبل (جرافيك وبرمجة وإنجليزي)، وبعدين شغل البيت. حاولي تعملي جدول يومي بسيط وثابت، مثلاً: الصبح بعد صلاة الفجر خصّصي ساعتين للدورات الدينية عشان تخلّصي التراكم، وبعدين ساعة أو ساعتين لشغل البيت كامل (قسميه على أيام الأسبوع عشان ما يبقاش ثقيل). الظهر بعد ما ترجعي من الكتاب، خدي راحة قصيرة ثم ساعة لتعلم الجرافيك أو البرمجة من خلال التطبيقات المجانية زي Canva أو موارد بسيطة على النت. وفي المساء، ركزي على الإنجليزي لمدة ساعة، وخصصي وقت ثابت يومياً لحفظ القرآن حتى لو صفحة واحدة. بالنسبة للجروب التليجرام، فكرة ممتازة عشان فيه تشجيع متبادل، لكن خلّيه يبدأ بخطوات صغيرة بعد الإجازة مباشرة عشان ما يضغطش عليكِ دلوقتي. وبالنسبة للتيك توك، قرارك الصحيح إنك ما تدخليش القرآن في الربح، ده يدل على وعيك. بدلها، ركزي على تعلم المهارات اللي هتجيب لكِ لاب توب بطريقة حلال زي الجرافيك أو البرمجة. لو حسيتِ بالكسل، غيّري المكان أو ابدئي بمهمة صغيرة جداً عشان تكسري الحاجز. وتذكري إن التوازن مش يعني تعملي كل حاجة يومياً بكمال، لكن الاستمرارية هي اللي بتفرق. جربي الجدول ده أسبوع وعدّليه حسب طاقتك. لو عايزة أفكار إضافية عن تنظيم الوقت، ابحثي عن أسئلة مشابهة على فدني عشان تشوفي تجارب بنات تانيين. ربنا يسهل عليكِ ويبارك في جهدك 💗
تم النشر الاثنين، ١٣ يوليو ٢٠٢٦
لعرض السؤال في فدني اضغط هنا