السلام عليكم ورحمه الله وبركاته
السلام عليكم، طيب حبيبتي، ده شخص واضح جدا إنه بيستغلك بحقارة ومش عاوز منك غير حاجة واحدة وأنتِ فعلا متفرقيش معه لا مشاعر ولا قلب ولا أنتِ كشخصك تفرقي معه ولا فارق معه أي إحساس بالذنب أو تأنيب الضمير، ومش بعيد يكون فيه بنات غيرك بيستغلهم بنفس الطريقة، سواء وأنتِ موجودة أو في الفترة اللي بيبعد فيها عنك. ومامته مش عرفت ولا حاجة، دي كلها حجج فارغة. وقت ما بيزهق بيبعد أو يتحجج ووقت ما بيحب يرجع عشان يستغلك بيرجع وهو عارف ومتأكد إنك ضعيفة قُدامه وهترجعي. *** اعتبري نفسك في حرب شرسة مع شيطان. مع شيطانين كمان على فكرة مش شيطان واحد... شيطان جن بيوسوس لك ويخليكِ تضعفي قُدام مشاعرك وتنسي كل حاجة وتروحي تقابليه، وشيطان إنس عرف يستغل مشاعرك واحتياجك العاطفي ويعلقك به عشان ياخد اللي عاوزه. *** لو عاوزة تخسري كل حاجة وأولهم نفسك وسمعتك فكملي معه. عاوزة مصلحتك اعملي المستحيل عشان تقطعي العلاقة دي وتبعدي عنه. ** أهم حاجة طبعا تتوبي لربنا عن اللي فات وتستعيني به يقويك على شيطانك وعلى ضعفك ويبعد أذى الشخص ده عنك ويكفيكِ شره، كرري كتير (حسبي الله ونعم الوكيل) *** انهي العلاقة دي تماما وخليكِ حاسمة في رفضك إنك ترجعي له مهما رجع أو حاول يستميلك بكلامه ومبرراته وفكري نفسك دايما بحقارته وبكل الأسباب اللي لازم تبعدي عشانها، خلي ربنا دايما قُدام عينيك وقت ما شيطانك يوسوس لك ترجعي وفكري في أهلك لو عرفوا وفي سمعتك. تخيلي أسوأ سيناريو ممكن يحصل لو الموضوع ده اتعرف وفكري في النتائج وخوفي نفسك وقت تحسي ضعفها. *** ويا ريت تحاولي تاخدي صورك وفيديوهاتك منه أو تخليه يحذفها ولو حاول في أي وقت يهددك تواصلي مع مباحث الإنترنت وهم يساعدوكِ. *** وأرجع وأؤكد عليكِ التوبة والاستعانة بالله و(حسبي الله ونعم الوكيل) باستمرار، وإن شاء الله ربنا يثبتك على التوبة والهداية ويبعد عنك شره وشر غيره.💚
تم النشر الثلاثاء، ١ سبتمبر ٢٠٢٦
يا بنت الناس فوقي واعرفي إن اللي بيبتزك وبيعاملك بالقطارة ويخليكي ترخصي نفسك ده مش بيحبك ولا عمره هيحبك ده حد بياخد منك غرضه ومضيع وقت ورامي عليكي ذنب ويستغل تعلقك واحتياجك للأمان عشان يكسر نفسك ويعيش دور الضحية، اقطعي أي تواصل معاه وبلوك من كل حتة وما تخافيش من أي تهديد أو ابتزاز عشان هو أجبن من إنه يعمل حاجة والتوبة بابها مفتوح ربنا غفور رحيم وساتر وما ترجعيلوش تاني مهما حاول يزن أو يمثل إنه بيحبك وركزي في حماية نفسك وتصليح حياتك من غير ما تضيعي عمرك ونفسيتك في علاقة سامة ومؤذية زي دي. واول حاجة هتعمليها دلوقتي انك تعمليله بلوك من كل حتة وما تديش لنفسك ثانية واحدة تفكري ولا تسمعي منه كلمة واحدة ولا حجة عشان هو هيحاول يضغط عليكي ويا بنت الحلال لو فكر يهددك بأي حاجة ما تخافيش خالص ولا تظهريله نقطة ضعف واعرفي ان مباحث الإنترنت في مصر بتاخد الحاجات دي بسرية تامة بتليفون واحد على ١٠٨ وتجيبه الأرض في ثواني وهو أجبن من إنه يعمل حاجة وبعد كده امسحي كل الشات والصور اللي عندك وما تسيبيلوش اثر على تليفونك واقعدي مع نفسك استغفري ربنا وتوبي توبة نصوحة وخليكي واثقة ان ربنا ساتر ورحيم واشغلي وقتك ومخك بحاجة مفيدة بدل التفكير واعرفي ان اللي حصل ده درس يتعلم منه وعمرك ما ترخصي نفسك تاني عشان اللي يحبك يجي من الباب مش من الشباك وأرجعي اهتمي بالقران الكريم انزلي حلقات تتعرفي على صحبه صالحه متسيبيش نفسك لاي أفكار ... الماضي ماضي لما ربنا يكرمك وتنخطبي خطيبك مش من حقه يعرف حاجه عنك تمام ..وجد والله ربنا يحفظك ويسعدك
تم النشر الأربعاء، ٢ سبتمبر ٢٠٢٦
أنا فاهمة إنك تعبانة جدًا ومخنوقة، وإنك بتحسي بالذنب والتعلق في نفس الوقت، وده شعور صعب جدًا على قلب بنت في سنك. أول حاجة أقولها لك: أنتِ مش لوحدك في الندم ده، وإنك عارفة إنك غلطانة ده خطوة مهمة جدًا، لأن الاعتراف بالخطأ هو بداية التصحيح. اللي حصل كان فيه ضغط وتلاعب واضح من الشاب ده، هو كان بيستغل إعجابك ويزن عليكِ لحد ما توافقي، وده مش حب حقيقي، ده استغلال. أنتِ مش غلطانة في إنك أعجبتي بيه، لكن الغلط كان في الاستمرار رغم إنك كنتِ شايفة إن الوضع بيأذيكِ نفسيًا ودينيًا. من منظور إسلامي، التوبة باب مفتوح دايمًا، وأنتِ لسه صغيرة وليكِ فرصة كبيرة تبدئي صفحة جديدة. ابدئي بخطوات عملية: أولها إنك تقطعي التواصل تمامًا، حتى لو هو رجع يزن أو يقول كلام حلو، لأن الاستمرار هيزود تعلقك ويخليكِ أضعف. ركزي على نفسك دلوقتي، على دراستك أو هواياتك أو أي حاجة بتديكِ شعور بالقيمة، وادعي ربنا كتير يقويكِ ويبعد عنكِ الفتنة دي. أنتِ تستاهلي حد يحترمك ويقدرك، مش حد يعلقك ويخليكِ تحسي إنك بتشحتي الكلام. أنا شايفة إنك قوية أكتر مما تتخيلي، وإنك قادرة تخرجي من الدائرة دي لو قررتِ. خدي وقتك في التفكير بهدوء، واكتبي اللي بيحصل في مذكرة عشان تشوفي الصورة كاملة. لو حسيتِ إنك محتاجة تتكلمي أكتر، ابحثي عن أسئلة مشابهة على فدني عشان تشوفي تجارب بنات تانيين وتاخدي منظور أوسع. أنتِ مش لوحدك، وربنا معاكِ.
تم النشر الثلاثاء، ١ سبتمبر ٢٠٢٦
العفو ولو احتاجتى اى حاجه ابقى اتفضلي اى وقت بالتوفيق دايما
تم النشر الثلاثاء، ١ سبتمبر ٢٠٢٦
انا عارف انك تقدرى وانتى قويه ومش عيب انك غلطتي كلنا بنغلط استعيدى نفسك وان شاء الله هتبقى اقوى بكتير 💜
تم النشر الثلاثاء، ١ سبتمبر ٢٠٢٦
اللى بيحب بيهتم وبيدعم وبيساعدك بيخليكى تحبى نفسك اقفلى معاه خالص وامسحى اى حاجه بتوصلك بيه
تم النشر الثلاثاء، ١ سبتمبر ٢٠٢٦
هو مش بيحبك
تم النشر الثلاثاء، ١ سبتمبر ٢٠٢٦
دا مش تعلق ، انتي مجرد ما هتبعدي فترة تجبري نفسك وتبعدي انتي هتنسيه ، لإن دا مش تعلق ، احنا عندنا نقص في العواطف ف احنا بنحب إن احنا نكون محل اهتمام ، عاوزين نعوض النقص دا بأي طريقة متوفرة قدامنا ، فدا مجرد تعلق مؤقت ، هيزول لما تبعدي وتفتحي عينك تعمَّقيها لقدام بإن في غيره احسن منه بكتير ، جربي كدا قارنيه بحد ذات خلق ودين وجمال ، هتنفري منه ، التعلق دا مؤقت متحطيهوش سبب يمنعك إنك تبعدي .
تم النشر الثلاثاء، ١ سبتمبر ٢٠٢٦
طيب يا قلبي بعيد عن إن العلاقة دي حرام من أساسها كدردشة لكن توصل للمس ! يا حبيبتي انتي غالية ، انتي تعرفي إن قبل الإسلام المرأة دي كانت عبدة تُحتقر ، يوصل بيهم لوأد البنات حتي ربنا قال في القرآن ﴿وَإِذَا الْمَوْءُودَةُ سُئِلَتْ * بِأَيِّ ذَنْبٍ قُتِلَتْ﴾ كانت المرأة مُجرَّد عار ، تُهان ، تحتقر ، حتي لما كانت تتزوج مكنش في حاجه اسمها هنسمع رأيها بل كان غصب ، وكانت تُضرب وتُعامل كصفقة ، لحد لما جه الإسلام وحرَّم وأد البنات بل وحتي جعل إن اللي يُحسِن تربية البنات ويُحسِن إليهن هيكونوا سبب لدخوله الجنة ، جه الإسلام وحرر المرأة من العبودية والتظلم ، وجعلها ملكة علي عرش الرجل ( قلبه ) ، جعل الجواز برأينا الأول ، جعلنا جواهر وغاليات وبقا لينا كلمة ورأي ، حتي زمان كان جواز المرأة بدون شيء ، دلوقتي عشان تتجوزي في الإسلام لازم الراجل يدفع مهر عشان ياخدك ، زمان كنا سلعة للبيع والشراء ، أما دلوقتي الوضع اتغير ، الإسلام غيَّر كل حاجة ، بقينا جواهر مش أي حد يلمسنا ولا يشوفنا ، فليه بعد ما ربنا جعلنا ملكات وغاليات نيجي احنا نقلل من نفسنا ، نلبس لبس مش هو الزي الشرعي ، نحلل الإرتباط بدون خطوبة ، وووووو وغيره لسا انا بحكيلك كل دا لي ؟ عشان عاوزة أخليكي تستشعري نعمة دينك وإن ربنا ميِّزنا وفضَّلنا وخلانا معزَّزين مكرَّمين غاليات ، عشان تحمدي ربنا علي نعمة الإسلام وتستشعري ندم من قلبك ، ربنا معملش حاجه غير وكانت خير لينا فليه نتَّبع خطوات الشيطان !
تم النشر الثلاثاء، ١ سبتمبر ٢٠٢٦
مسلمة ؟
تم النشر الثلاثاء، ١ سبتمبر ٢٠٢٦
لعرض السؤال في فدني اضغط هنا