انا دايما سرحانه ومش لاقيه حل لمشكلتى انى لو حد كلمنى بتوه ودماغى بتفكر فى حاجه تانيه لو بسمع فيديوز او بودكاست انا بتوه واسرح ومش بنتبه ومعرفش هما بيتكلموا فى ايه ولازم ارجع تانى علشان اسمع كويس وممكن بردو فى المره التانيه اسرح مش عارفه ايه دا انا تعبت من الفكره دى وللاسف مأثره على دراستى لو دكتور شرح اى حاجه انا بسرح ومش بنتبه ودماغى بتفكر فى حاجه تانيه وللاسف انا مش هعرف ارجع كلامه اللى فات زى الفيديو انا مش فاهمه مشكلة توهانى والسرحان المستمر دا ايه ممكن تفيدوني علشان انا فعلا تعبت من الازمه دى
للآسف دي بقت مشكلة جيل وأنا بعاني بشكل ما من الموضوع ده ولكن اللي قلل معايا الموضوع ده كذا حاجة: ١) الاستعانة بالله والمحافظة على الصلوات. ٢) حفظ القرآن لأنه بيقوي وبيربط الخلايا العصبية ببعض. ٣) ابعدي عن فيديوهات القصيرة (الشورتس) لأنه بتعودك على عدم تحمل اي حاجة أكتر من دقيقتين لدرجة أنك ممكن تسرحي في فيديو ٣ دقايق. ٤) تعاملي مع الفيديو أو المحاضرة المباشرة زي الناس زمان كأنك آخر مرة هتسمعيه فهيبقى فيه اهتمام. ٥) ممكن يبقى عندك متلازمة ADHD متتعبيش نفسك في أنك تتدوري عليها هي متلازمة عادية ومش بتأثر بشكل كبير واي حد عنده قناة على اليوتيوب اليومين دول بيتكلم عنها مع أنه معندوش علم بيها، هي باختصار متلازمة اسمها بالعربي ضعف الانتباه وسهولة التشتت أن أي حاجة ممكن تشتتك وأنك تسرحي بسرعة فحلها أنك بتتأقلمي عليها انا على سبيل المثال عامل في غرفتي مكان متر *متر وحاطط فيه مصلية بحيث يبقى وشي للحيطة فلو هقرأ قرآن أو أي حاجة أقرأ فيه بحيث مفيش قدامي غير الحيطة فمتشتتش. ٦) قللي من أحلام اليقظة وهي إنك تفكري في شيء وتعيشي فيه مثلا يا سلام لو أخوك محمد فتح الباب وبعد كده جاب كب كيك وبعد كده راح طالع بهدوء من غير ولا كلمه وراح جيه بعد نص ساعة أخد الطبق من غير ولا كلمة ومن ثم غسل الطبق والشوكة وراح ينام....... فده من أسباب السرحان. ٧) بمناسبة الكب كيك والآكلات الجاهزة حاولي تقللي منها وتخليها مثلا مرة واحدة في الشهر كمكافأة لإنجاز معين ولو معاكي فلوس ممكن تجيب مكسرات زي الكاجو وعين الجمل والفستق.. ولو مش معاك ممكن تجيب فول سوداني ب٢٠ ج مثلا وبردوه متكتريش منه لأنه زي ما هو مفيد للدماغ فكثره بينفخ البطن. إن شاء الله مع الإستمرارية هتشوفي الفرق وبالتوفيق.
تم النشر الخميس، ١٣ أغسطس ٢٠٢٦
السلام عليكم، المشكلة دي معك من زمان ومن وأنتِ صغيرة ولا بدأت مؤخرًا؟ وهل هي متعلقة بالمذاكرة والمحاضرات فقط ولا عموما حتى في حياتك وتعاملاتك مع الناس؟ والنوم أخباره إيه؟ مشاكل النوم وعدم جودته بتؤدي للسرحان وقلة التركيز، كمان فيه أساب عضوية زي الأنيميا ونقص بعض الفيتامينات والمعادن، فتأكدي من النقاط دي وبعد كده شوفي الجانب النفسي. عشان برضه في احتمال لو المشكلة دي من سنين وبتزيد إن يكون ADHD بس طبعا من غير رأي مختص مش هينفع تؤكدي ده. استبعدي العوامل العضوية وأي مشاكل في النوم أو مرورك بضغوط أو توتر وبعدها ممكن تروحي لمختص. لو رحتِ متقوليش له أنا شاكة إن عندي ADHD، قولي له المشكلة زي ما ذكرتِها في سؤالك واتركيه هو يشخص، متوجهيش التشخيص يعني. *** وعامة، متجبريش نفسك على فكرة ركزي ركزي... ولا تلومي نفسك كل ما تسرحي. عادي، تفهمي مشكلتك وطبيعتك ودربي نفسك كل ما تسرحي ترجعي نفسك للتركيز حتى لو مئة مرة، التدريج والتدريب هيقوي عضلة التركيز عندك. ** أنتِ مثلا لو في المحاضرة متخليش مهمتك إنك تفضلي منتبهة. لأ، خلي مهمتك إنك كل شوية تكتبي إيه الفكرة اللي الدكتور لسه شارحها، ومش لازم تكتبي كل كلمة قالها، اكتبي كلمات مفتاحية. أنتِ كده بتشغلي تفكيرك وبتخلي المحاضرة مش جلسة استماع سلبي. ** ونفس الشيء في الفيديوهات والبودكاستات، متخليش النشاط ده سلبي، اكتبي كل شوية، فكرة قالها أو جملة أثارت انتباهك، ولو سرحتِ عادي رجعي الجزء اللي سرحتِ فيه. على فكرة بتحصل مع كتير مننا ومعي شخصيا وبضطر أرجع الجزء اللي سرحت فيه وساعات وأنا بقرأ برضه بسرح وأرجع أقرأ تاني الجزء اللي سرحت فيه. فمتخليش ده مشكلة وعائق وترسبي ده في عقلك الباطن فيصدقها ويخليكِ فعلا عندك مشكلة حقيقية في التركيز وهي ممكن تكون حاجة بسيطة ومحتاجة وقت وتدريب. ** طبعا لو بتتفرجي على شورتس كتير ده عامل لزيادة التشتت وقلة الانتباه، واستخدام الموبايل والتنقل بين التطبيقات برضه بيزود المشكلة فقللي ده قدر الإمكان. ** وبالتوفيق إن شاء الله.💚💚
تم النشر السبت، ١٥ أغسطس ٢٠٢٦
أولاً، أنا آسفة إنك بتمري بكل التعب ده، وأقدر إن السرحان المستمر ده بيأثر على دراستك ويخليكِ تحسي بالإحباط والتعب. المشكلة دي شائعة وغالباً بتكون مرتبطة بأسباب زي التوتر أو قلة التركيز بسبب الضغوط اليومية أو حتى عادات الدراسة، ومش لازم تكوني قلقانة، لأن فيه طرق عملية تقدري تطبقيها عشان تتحكمي فيها تدريجياً. ابدئي بتحديد أوقات السرحان، مثلًا لما تسمعي فيديو أو بودكاست، جربي تكتبي ملاحظات مختصرة أثناء الاستماع عشان دماغك يبقى مشغول بالمحتوى بدل ما يتوه. قسمي الدراسة لفترات قصيرة، مثل 25 دقيقة تركيز ثم استراحة قصيرة، وابتعدي عن المشتتات زي الهاتف أثناء الشرح. كمان، حاولي تكوني نشيطة في المحاضرات بطرح أسئلة داخلية لنفسك عن الموضوع، ده بيساعد على ربط المعلومات ويقلل السرحان. من الناحية الإسلامية، تذكري إن التركيز نعمة من الله، فادعي الله بالتوفيق واستعيني بالصلاة والذكر لتهدئة العقل، وهذا يعطيكِ قوة إضافية. لو استمرت المشكلة، ابحثي عن أسئلة مشابهة على فدني عشان تشوفي تجارب أخرى وتستفيدي من وجهات نظر متنوعة. أنتِ قادرة على التغلب على ده خطوة بخطوة، وأنا هنا لو عايزة تفاصيل أكتر! (يرجى ملاحظة أن هذه إجابة آلية بواسطة الذكاء الصناعي ولا تغني عن زيارة الطبيب في الأمور الصحية)
تم النشر الأربعاء، ١٢ أغسطس ٢٠٢٦
@M . @Nada Ramadan اه انا بفكر فى اى حاجه وبعمل سيناريوهات
تم النشر الأربعاء، ١٩ أغسطس ٢٠٢٦
هو انتي بتفكري أو تعملي سيناريوهات كتير أو قصص في دماغك
تم النشر الاثنين، ١٧ أغسطس ٢٠٢٦
لما بتسرحي مثلا بتكوني اصلا بتفكري في ايه بتكوني عارفه انت بتفكري في ايه لو حد مثلا بيكلمك او بتسمعي دروس وجيتي تهدي تبقى عارفه انت فكرتي في ايه
تم النشر السبت، ١٥ أغسطس ٢٠٢٦
لعرض السؤال في فدني اضغط هنا