انا شاب 23 سنة وكعادة الشباب ف السن ده بيبدأ تفكير اني الاقي بنت الحلال ... فطبعا ف أي مكان ادخله حتى لو في المواصلات لما بشوف بنت بفضل اقلبها في دماغي هل ظاهريا كدة دي تنفع كشريكة حياة ولا لأ.
ف انا اكيد قابلني بنات كتير ومفيش اي واحدة فيهم حسيت انها ممكن تنفعني انا مبدئيا كدة لغاية النهاردة قابلت واحدة ف الاتوبيس خطفتني حسيت انها هي دي اللي بدور عليها لبس واسع ملامح مريحة سنها صغير يعني 3 ثانوي مثلا فتمام لإن انا لسة قدامي 4 او 5 سنين ع ما اكون نفسي فدا هيكون هي بقت ناضجة ان شاء الله يعني
فنزلت في المحطة اللي هي نزلت فيها وبدأت معاها الكلام ان معلش ممكن اخد رقم والدك (انا داخل جد ع طول مش عايز رقمها هي) .. لقيتها بترفض وبتقولي انا لسة بدري عليا انا ف تالتة ثانوي فانا قولتلها انا ف 5 طب ولسة ليا سنتين امتياز وكمان 3 سنين جيش يعني مش دلوقتي برضو ولقيتها رفضت تاني وتالت وانا اتحرجت جامد ... انا الحمد لله مكلمتش قبل كدة بنات علشان ربنا يباركلي ف حياتي بعد كدة
اخواتنا اصحاب النصيحة انا كدة اتصرفت صح ولا غلط؟ وليه سلوك البنت كان الرفض؟ ودا رفض للمبدأ ولا رفض للشخص نفسه لذاته (مش فتى احلامها مثلا) ؟ وإيه هو التصرف الصح لو حصل قدامي حاجة مشابهة لكدة وخصوصا اني رافض مبدأ الارتباط قبل الخطوبة
مفيش حاجه اسمها أشوف واحده في اتوبيس... ارتحت ليها فعاوز أتزوجها.... ده من اكبر أسباب الطلاق وترك الخطاب لبعضهم.... الصح ان الانسان يختار حد مناسب ويكون عارفه كويس جدا جدا.. معاه في شغل... قريب من العيلة.. اخت ليك أثنت عليها.... انت بتختار حد هتربتط بيه طول حياتك... اكثر الناس بتختار على معايير في الخطوبة كتير منها لا علاقه له بالعيشة إطلاقا.. اقولك ايه بس... اكثر الناس في البيوت مش مرتاحه والسبب معايير الاختيار مش صح.
تم النشر الأربعاء، ١٧ سبتمبر ٢٠٢٥
ممكن البنت خافت او اتخضت منك وانها لقت حد فجأة بيقولها عايز رقم والدك وعايز يخطبها وهي فعلا شايفه ان لا ده مش الوقت المناسب ولا هي ولا اهلها هيرضوا بحاجة زي دي دلوقت اما حتة ان ازاي تعرف بنت كويسه بدون ارتباط او علاقات محرمه ف والله ابسط حاجة بص فالمكان اللي حوليك مثلا البنات فالمدينة اللي انت عايش فيها تروح مع والدتك مكان زي فرح. او كده تبص ولو شفت بنت مناسبه ممكن من الافضل بكتير والدك هي إللي تاخد الخطوة دي وتسأل البنت عن أهلها وكده بحيث ميتكررش نفس الموقف ده كده يعني
تم النشر الأربعاء، ١٧ سبتمبر ٢٠٢٥
وارد جداا تكون خافت خصوصا ان سنها صغير واكيد دماغها ف الدراسة ..وارد تكون فهمت تصرفك انك حد لعبي مثلا ..معلش هو التصرف نفسه غلط انا عارفة ان حضرتك عايز طريقة توصلها بيها بس كان ممكن تبقي حاجه تاني غير انك تروحها دايركت كده.. فيه احتمال كمان انها ممكن تكون مشافتكش مناسب ده احد الاسباب بردو .. هو لو متمسك بيها ممكن تروح نفس المكان اللي شوفتها فيه وتحاول تسأل عنها وتعرف حد من أهلها وتوضحلهم نيتك لو وافقت يبقي هي كانت خايفة بس انك متكونش صادق ..أما بقاا لو رفضت تاني ف كده خلاص تصرف نظر عنها وتدعيلها بالخير.. ربنا يكرمك
تم النشر الثلاثاء، ١٦ سبتمبر ٢٠٢٥
أنا آسف بس محدش بيتجوز حد لأجل هو شافه في المواصلات يا عالم معدلات الطلاق في مصر مرعبه لازم تعرف أهلها قبل ما اتقدم اختار نسب وجمال بلاش نركز على الشكل بيحصل طلاق بسبب كده اعرف تفكير ابوها وتفكيرها هل من الطبيعي أنك تحتاج شريكه حياتك وانت ماشي كده خلي حد من بنات العيله يدورا على بنت صالحه تعرف تربي اولادك تكون معاك في الأيام الحلوه والوحشه تكون جمبك لما تتعب محتاج تعدل طريقه تفكيرك
تم النشر الاثنين، ١٥ سبتمبر ٢٠٢٥
هو انت صح انك متقي وعارف الحدود والحمدلله في كل حاجة بتراعي ربنا بس من كتر المواقف المنتشرة دلوقتي في الحياة بنفكر أنه مقلب الصراحة وموقف مضحك بس انت تمام والأصح انك تدور علي حد قريب من منطقتك أو من عليتك ون شاءالله تلاقي بنت الحلال المواضيع اكبر من كدا مش مجرد انجذاب بالشكل الشكل ماهو مظهر خارجي مؤثر بس الأفكار وشخصية الإنسان اهم لأن احنا في يوم من الايام الشكل اللي كان عجبنا بيحصل ليه تغيرت ويبقي الجوهر
تم النشر الاثنين، ٢٢ سبتمبر ٢٠٢٥
كان المفروض تكمل لحد باب بيتها لان ساعتها كان ممكن تديك فرصة لكن موقف زي ده مربك لأي انسانة دي حتي هتحاول تصرفك عشان حتي كلام الناس عليها في الشارع ... و ساعتها لو الموضوع خير ربنا هيسهل بس تستخير و تصلي و تتقي الله فيها ولو هي مناسبة ليك الموضوع هيمشي ان شاء الله
تم النشر الثلاثاء، ١٦ سبتمبر ٢٠٢٥
ربنا يوفقك وييسر لك اللي فيه الخير
تم النشر الثلاثاء، ١٦ سبتمبر ٢٠٢٥
أعتقد رد فعلها كان طبيعي شوية من بنت في ثانوي الموضوع مش في دماغها أصلا وفجأة لقت شاب متعرفوش بيقولها اديني رقم والدك .. حتى لو هي معندهاش مشكلة في شخصك، فلا تبتأس يا صديقي!
تم النشر الاثنين، ١٥ سبتمبر ٢٠٢٥
تعليق جميل جدا والله شكرا ... انا طبعا مش انجذاب للشكل بس لإن اكيد مش هي اجمل واحدة شوفتها وأكيد شوفت الأجمل منها بس لما بصيتلها حسيت براحة كدة وحسيت ان هي دي اللي بدور عليها مش عارف ليه
تم النشر الاثنين، ٢٢ سبتمبر ٢٠٢٥
المشكلة لو كنت كملت ف مكنتش هعرف هي ساكنة فين لإن لو دخلت عمارة ف السكان كتير جدا وممكن حارس العقار ميفيدنيش اوي ف لجأت لكدة وكنت مفكر صراحة اني كدة بعمل الصح بس دلوقتي مفيش قدامي غير اني لو شوفتها تاني اتابعها وأمري لله بقى .... بس صراحة قبل ما اخد الخطوة دي مكنتش متخيل ان الأمور معقدة كدة ... يعني كنت مفكر ان البنات لما اجي ليها سكة كدة اني واحد جد ومش بتاع لعب وكدة ف دا هيبقى الأفضل بس باين فيه حسابات تانية مكنتش اعرفها
تم النشر الثلاثاء، ١٦ سبتمبر ٢٠٢٥
لأ هي اتكسفت و اتصدمت يعني مجاش في بالها ان ممكن يحصل معاها موقف زي ده . و حست فكره انها تديك رقم والدها ده تقليل منها كتير من البنات بيفهموا كده . الافضل كنت كملت شوفتها ساكنه فين و اتكلمت مع والدها .
تم النشر الثلاثاء، ١٦ سبتمبر ٢٠٢٥
اترعبت مني او من الموقف مثلا .. طيب حضرتك عندك رد ع باقي الأسئلة؟
تم النشر الاثنين، ١٥ سبتمبر ٢٠٢٥
لعرض السؤال في فدني اضغط هنا