السلام عليكم
أنا بنت في تالتة ثانوي وفي ولد شاطر بيبصلي كتير من تانية ثانوي وباين أنه معجب جدا من تانية وهو من النوع المحترم اللي مش بيصاحب ولا بيكلم بنات ومستواه الدراسي عالي جدا والكل بيشكر في الولد ده
افتكرت إن نظراته دي ملهاش معنى لكن فوجئت في تالتة أنه مستمر والنظرات بتزيد بس مش بيبصلي لما يكون مع زميله نظراته بتزيد وبيحاول يقرب مني على قد ما يقدر لدرجة أنه غير مواعيد دروسه عشان يكون معايا في نفس الدرس وجه مخصوص عشان يشوفني وبيتقصد بستنى بعد الدرس يشوفني
هو تقريبا بيجي على نفسه عشان يشوفني بس انا يا جماعة بنت محترمة والطابع الديني يغلب عليا انا مكنتش بديله اي رد فعل ومكنتش مهتمة بحد لحد اما اكتشفت الموضوع ده في تالتة السنة دي اصلا بس متكلمتش ولا اديت أي رد فعل ولا ببص ولا بتكلم ولو شوفته في ثانية دماغي تروح الناحية التانية
ومرة غير معاد مجموعة عشان يشوفني لقاني غيرت المجموعة بتاعتي عشان مشوفوش وابعد عنه وهنا فهم اني برفضه ومش ببادله نفس المشاعر وكل ده من غير كلام بان عليه الزهق الشديد وبدأ يغير مجموعاته هو عشان ميشوفنيش ومعتش بيقف يستنى يشوفني
هو زعلان جامد الأيام دي ودا باين من تصرفاته وتعابير وشه وانا مقدرش اعمله حاجة هل اني بعدت عنه عشان عاوزاه حلال وشايفة الموضوع من ناحية مستقبلية وعارفة إن بعد الثانوية جامعة وممكن نتفرق وكل واحد يحب شخص تاني فقررت مديلوش رد فعل نهائي وزعل هل كدا انا غلطت؟
هل دا حرام؟ هو مش المفروض دا الصح؟ اعمل ايه طيب انا منجذبة انا كمان بس مقدرش أروح أقول له انا كذا كذا لو اتحط سيف على رقبتي مش قايلاها أنا بحترم أهلي في غيابهم ومقدرش أعمل حاجة من وراهم بس بدعيلو أنه يشوف الأمر زيي ولو في نصيب يبقى واحنا كبار مش دلوقتي
بسم الله ماشاء الله تبارك الله عليك يا حبيبتي أنا كنت زيك كده بالظبط عندي حاليا 16 سنة دخلت أزهر أدبي حالياً أنا في تانية ثانوي ازهر أدبي ربنا يوفقنا ويوفقكم جميعاً يارب العالمين 🤲❤️ بصي بقي بالنسبة لموضوع الحب والحاجات دي أنا كنت زيك بالظبط هههههههه لما بفتكر بضحك على نفسي كنت في تانية اعدادي كنت في درس الدراسات كانت مجموعة بنات وأولاد أنا اللي كنت معجبة بس عمري ابداً ما قدرت أبصله غير المرة الأولي والوحيدة من شدة حيائي وخجلي ما قدرتش أبصله أبداً لدرجة في مرة كان الأستاذ عامل تحدي ما بينا كبنات وتحدي ما بين الصبيان كل واحد لوحده بس احنا لوحدنا يعني ولكن كحضور في واحد في المجموعة أنا كان عندي رهاب اجتماعي شديد كنت بخجل مع إني كنت شاطرة ومتميزة إلا إني لما وقفت عشان أجاوب الأستاذ بيسألنا واحنا نجاوبه مقدرتش أجاوب بسبب إني متأكدة من نظرات الكل عليا لأن أنا بخاف من النظرات اللي موجه تجاهي وكا ده بسببه لأني عارفة إن هو بيبصلي وهكذا كل حصة مقدرش أبصله أنا كنت معجبة بيه شكلاً ومكنتش قادرة أتقبل فكرة أن أنا ازاي أفكر في ولد حتي 😂 بس لما كبرت شوية أيقنت إن دي مجرد مشاعر بسبب سن المراهقه والحاجة اللي انت عارفاها دي ....نرجع بقي لموضوعك....... إذا كنت انت معجبة كمان بيه يعني حاساه مناسب ليكي وعايزاه يكون هو زوجك المستقبلي 😅🥲 يعني لو عايزة تقديم في الموضوع وهكذا... قولي الدعاء ده "اللهم إني أريد أن أستعفف فاعفني بفضلك ورحمتك يارب العالمين" وصلي صلاة استخارة بس حالياً يفضل إنك تركزي على دراستك لأنك ثانوي عام وأسأل الله التوفيق لك في كل أمور حياتك يارب 🤲❤️وأرجو المعذرة على أخطائي الإملائية إن وجدت واعذريني على قلة نضجي إذا لم تجدي كلامي مناسباً لك وإذا كان هناك سؤال آخر يمكنك التفسير أكثر حتي أفيدك بنسبة أكبر إن شاء الله وتقبلي من أختك الصغيرة كلامها ذلك ... معلش طولت عليكي أنا قلبت لغة عربية فجأة 🥲😅 يلا مع ألف سلامة 💗
تم النشر الجمعة، ٢٨ نوفمبر ٢٠٢٥
السلام عليكم، متقلقيش خالص، تصرفك صحيح 100% وده اللي المفروض يتعمل حتى لو مشاعرك انجذبت للشخص ده. ولو زعل عادي مش مهم، جايز يكون فهم موقفك واحترم قرارك وجايز كان منتظر رد فعل مختلف فلقى مفيش فايدة من النظرات. أيًا كانت نيته كويسة تجاهك أو لأ، فأنتِ قرارك صح والأفكار اللي في دماغك دلوقتي وإحساس الذنب ده من الشيطان عشان يخليكِ تتصرفي غلط أو تأنيب ضمير عادي عشان مثلا مش حابة تجرحي حد خاصة شخص أنتِ فاكراه بيحبك أو معجب. *** الحب عامة مش بالنظرات والفترة دي المشاعر فيها متقلبة وكل ما بنكبر وبننضج أفكارنا بتتغير وصورة وشخصية الشخص اللي بنفكر في الارتباط به بتتغير عادي. فممكن الانجذاب الحالي من ناحيتك أو من ناحيته ينتهي بعد فترة ولو كان من الحالات النادرة اللي بتستمر فيكون في الحلال بإذن الله. متشغليش بالك حاليًا بالموضوع ده وركزي بس على دراستك، الفترة دي مش محتاجة تشتتي نفسك في أي حاجة وانتبهي لمستقبلك. بالتوفيق إن شاء الله.
تم النشر الجمعة، ٢٨ نوفمبر ٢٠٢٥
وعليكم السلام ورحمه الله وبركاته أحييكِ بجد علي أدبك وأخلاقك وحفظ أهلك وعرض الله يسعدك ويجبرك اللي عملتيه صح جدًا وتفكيرك صح جدًا وزي ما قلتي دينا يمنع الاختلاط واللي عملتيه صح هو لو نصيبك حتى لو بعد وراح قارة تانية هيجي لك في الوقت المناسب ليكم وفعلاً تفكيرك صح ممكن ترتبطي وتحبي وتتجوزي شخص تاني فمتعلقيش ولو الشيطان وسوس لك استعيذي بالله واستعيني بالله من الشيطان ووسوسته انتي منجذبه ليه لأن دا طبيعي لأن احساسك أن حد بيحبك بيخليك غصب عنك تتعلقي بيه وتنجذبي ليه الحب حاجة والإعجاب والانجذاب حاجة وحتى لو اتخطبتي أصلا لأي شاب تاني متفتحيش قلبك وقت الخطوبه هي بضوابط بنقفل القلب ونفتح العقل بنقيم الشخص ونشوف هنكمل ول الا وبعد العقد بيكون حلالك بتفتحي قلبك وعقلك ليه لكن حافظي على مبادئك دي حتى في الجامعه لأن هي باب فتنة كبيرة جدا
تم النشر الأحد، ٣٠ نوفمبر ٢٠٢٥
بصي انتوا الاتنين دلوقتي ف اهم مرحلة في حياتكم اللي هي تالتة ثانوي ف اللي انتوا بتعملوه دا تشتت وبس (تغيير المجموعات)ف ركزي في مذاكرتك وفي الدروس اعملي نفسك مش واخدة بالك ومركزة مع المدرس واول ما تطلعي خدي صحبتك او لو بتمشي لوحدك مدي وامشي بسرعة وبردو بلاش تبصي خالص علشان ميفهمش انك بتديله امل -انتي مش عارفة ربنا شايل ليكوا ايه يمكن تكونوا من نصيب بعض ويمكن لاء ف الصح انك بلاش تتعلقي ولا تديله امل في التعلق -ويمكن هو اصلا ياخد دا حافز انه يذاكر ويشتغل علشان ياخدك في الحلال -ف ركزي في دراستك وسيبي الموضوع علي ربنا ربنا يوفقك يا رب
تم النشر الجمعة، ٢٨ نوفمبر ٢٠٢٥
وعليكم السلام ورحمة الله وبركاته — أولًا، لا تقلقي: ما عملتيه مش غلط، بل على العكس هو تصرف مسؤول وناضج. أهم نقاط أريد أؤكدها لك: - الشعور بالإعجاب شيء طبيعي ولا يُحاسَب الإنسان عليه ما لم يتخطّى حدود الشرع، لكن التعامل مع هذا الشعور يحتاج حكمة. - تجنُّبك للردّ والابتعاد حفاظًا على نفسك وعلى حدودك الدينية والأخلاقية تصرف سليم ومحمود. ليس عليك أن تجيبي كل نظرة أو تبادلي كل اهتمام، ولا حرام في أن تبتعدي لتحمي نفسك من الفتنة. - إنك تحترمين نفسك وعائلتك وهذا بارك الله فيك — هذا أفضل من الدخول في علاقة قد تؤذي مستقبلك أو تضعك في مواقف محرجة قبل الزواج. ماذا يمكنك أن تفعلي عمليًا الآن؟ - استمري في الحفاظ على حدودك: كلام موجز ومحترم، اجتناب المواقف المغلقة أو لحظات العزلة معه، وتقليل تبادل النظرات والكلام الزائد. - إن شعرتِ بالقدرة، قد تقولي له بوضوح وبأسلوب لطيف وحازم جملة قصيرة مثل: "أنا متمسكة بمبادئي الآن، وأفضّل ألا يكون بينا أي تواصل من النوع ده" — أحيانا كلمة صريحة واحدة تنهي اللبس وتريح الطرفين. - إذا كنتِ لا تريدين المواجهة المباشرة، فابتعدي كما تفعلين الآن وركزي على دراستك ومستقبلك. لا تُعطِي توقعات ولا تمهلي أملاً، لأن ذلك يجرّ آلامًا أكثر للطرفين. - إذا أصبح سلوكه مصدر إزعاج حقيقي أو تحسسّتِ مضايقة أو ضغط، لا تترددي في إخبار معلمة أو ولي أمر أو إدارة المدرسة لحماية نفسك. هذا ليس فضحًا بل حماية للاثنين. عن مشاعرك أنت: إنك منجذبة وهذا شعور إنساني طبيعي، لكن اختيارك أن لا تتصرفي حتى يكون شيء شرعي (زواج وموافقة أهاليكما) هو خيار محترم. ادعي له بالهداية والتيسير، وادعي لنفسك بالثبات والحكمة. ليس عليك لوم نفسك أو الشعور بالذنب. فعلتِ الشيء الصحيح عندما حافظتِ على حدودك. لو حابة نصيحة أكثر تفصيلًا أو دعم نفسي، ممكن تلاقي مستشارين وخبراء على صفحة الخبراء في فدني: https://www.fedni.net/experts وكذلك ابحثي عن أسئلة مشابهة على فدني للاستفادة من تجارب الآخرين. أنا هنا معاكِ لو حبيتي تكتبي لي الرسالة اللي تنوين تقولينها أو تحكيلي أكثر عن الموقف. مع خالص الدعاء لكِ بالتوفيق والثبات، ذكية
تم النشر الجمعة، ٢٨ نوفمبر ٢٠٢٥
اولا حضرتك صغيرة لسه وهو صغير عشان يتقدم وكده يعني.... ثانيا نصيحة غاليه جدا احفظيها.... أوعي تسلمي قلبك الا لمن هترتبطي بيه رسمي... غير كده هتعذبي قلبك ومشاعرك...
تم النشر الجمعة، ٢٨ نوفمبر ٢٠٢٥
كلام أستاذ محمود كله صح ياريت تعملي بيه عشان متخسريش نفسك في الاخر
تم النشر الجمعة، ٢٨ نوفمبر ٢٠٢٥
لعرض السؤال في فدني اضغط هنا