ردود غبية؟ تمام، من حقك يكون عندك انتقاد للتطبيق أو لبعض الإجابات فيه، لكن بما إني قريت كلامك كله فحابّة أوضح وجهة نظر تانية برضو.(اعذريني ع الاطاله لكن محتاجه اوضح كام حاجه ) أنتِ بتتكلمي وكأن المشكلة كلها في اللي بيرد، لكن أحيانًا المشكلة بتكون في السؤال نفسه. ناس كتير بتعرض جزء من المشكلة فقط، أو تكتب مشاعرها أكتر ما تشرح الموقف نفسه، وبعدها تنتظر من الناس إنها توصل لحل دقيق. طب إزاي؟ ولو اللي بيرد حاول يفهم أكتر وسأل عن تفاصيل ناقصة، ساعات صاحب السؤال نفسه بيتضايق ويعتبر ده تدخل في خصوصياته، أو يرد إنه عايز حل مباشر مش نقاش. فالموضوع مش سهل زي ما يبدو. وفي نقطة تانية، ناس كتير بتنزل المشكلة وبعدها تختفي تمامًا. لا بترد على الاستفسارات، ولا بتوضح أي حاجة، ولا حتى بتناقش الردود اللي اتكتبتلها. فلو الهدف فعلًا الوصول لحل، فالمفروض يبقى فيه تفاعل من الطرفين. أما موضوع الصبر والدعاء والكتب، فأنا متفقة إنهم مش حل سحري لكل حاجة، لكن غالبًا الناس اللي بتنصح بيهم بتكون بتنقل حاجة نفعتها هي شخصيًا، مش لأنها شايفة إن دي إجابة تصلح لكل مشاكل الدنيا. وكمان مش كل الناس بتدخل تسأل وهي عايزة نفس الشيء. في شخص محتاج حد يسمعه، وفي شخص محتاج رأي عملي، وفي شخص عايز حل سريع وخلاص. فصعب جدًا إن رد واحد يرضي كل الناس. وبالنسبة لفكرة التعاطف، فأنا معاكي إنها مهمة، لكن التعاطف الحقيقي مش مجرد جملة "حاسس بيك" أو "فاهمك". دي كلمات أي حد يقدر يكتبها، وحتى الذكاء الاصطناعي يقدر يقولها. الأهم إن الشخص يحاول يفهم المشكلة فعلًا ويبذل مجهود على قد ما يقدر. وفي النهاية، أكيد فيه ردود ضعيفة أو مستعجلة أحيانًا، ومحدش يقدر ينكر ده. لكن برضو فيه ناس كتير بتحاول تساعد بما عندها من وقت وخبرة، ومش من العدل نحكم على الجميع من خلال بعض الردود السيئة..فـ زي ما فيه محتاجين يردوا بشكل أفضل، فيه كمان محتاجين يعرضوا مشاكلهم بشكل أوضح ويتفاعلوا مع اللي بيحاول يساعدهم. ساعتها الحوار هيبقى مفيد أكتر للطرفين.
شكرا علي كلامك الجميل ❤️
تم النشر السبت، ٢٠ يونيو ٢٠٢٦
ولا يهمك خالص، وشكرًا إنك شاركتي رأيك ولفتي نظرنا لحاجات فعلًا ممكن نكون مش واخدين بالنا منها كفاية. وأتمنى تجربتك الجاية تكون أفضل وتلاقي حد يساعدك وتوصلي للإجابة اللي كنتِ بتدوري عليها. وبجد والله نفسي لو بإيدي أحل مشاكل الناس كلها وأخلي عيشتنا وردية 😅 بس طبعا دي دنيا اختبار، ومش كل حاجة فيها بتكون سهلة أو ليها حل بسيط. وكمان بعتذرلك عن إحساسك من تجربتك وإنك محسيتيش إنك وصلتي للإجابة اللي محتاجاها. بس خلي بالك برضو إننا بشر عاديين والله، عندنا ظروفنا ومشاكلنا زي أي حد، ومش دايمًا بنكون قادرين نقدم الحل الكامل خصوصًا إن في مشاكل كبيرة فعلًا بتحتاج ناس متخصصة وخبرة ومتابعة. إحنا بس بنحاول نساعد باللي نقدر عليه، ويمكن مش دايمًا نوصل لأفضل إجابة، لكن النية في الآخر إننا نخفف عن بعض ونفيد بعض على قد استطاعتنا. بتمنالك كل خير 🤍
تم النشر الجمعة، ١٩ يونيو ٢٠٢٦
ذلة لسان أكيد مش معني اني قلت عديم الفايده يبقي عديم العكس جدا المهم ان في ناس غيري بتلقي حلول أنا قلت كدا بتسرع وشكرا علي تفهمك
تم النشر الجمعة، ١٩ يونيو ٢٠٢٦
لا يا حبيبتي متعتذريش ولا تمسحي البوست، من حقك تقولي رأيك طالما قولتيه باحترام، وأنا أصلًا ما اتضايقتش من كلامك. وأتفهم جدًا نقطة إن الواحد لما يكون داخل بسؤال مهم أو محتار في قرار معين ويبقى أغلب اللي بيقابله اقرأي كتاب أو اشغلي نفسك أكيد هيحس إن محدش جاوب على اللي بيسأل عنه فعلًا. أنا بس كان قصدي أوضح إن الموضوع مش دايمًا بسبب اللي بيرد. أحيانًا المشكلة نفسها بتكون معقدة، أو المعلومات ناقصة، أو صاحب السؤال بيكون منتظر حل محدد جدًا من ناس ميعرفوش كل تفاصيل حياته. وعامة أنا مكنتش مختلفة معاكي في أصل الفكرة، لأن فعلًا فيه ردود أحيانًا بتكون عامة أو متكررة. أنا بس اعترضت على التعميم لما قلتي إن التطبيق عديم الفائدة وإن الردود غبية، لأن فيه ناس فعلًا بتقعد وقت وتحاول تفهم وتساعد على قد ما تقدر حتى لو مساعدتها مش دايمًا بتكون كافية. وفي الآخر أعتقد إننا متفقين على حاجة واحدة، وهي إن أي حد بيسأل بيبقى محتاج يحس إن اللي قدامه قرأ كلامه وفهمه فعلًا قبل ما يرد عليه.
تم النشر الجمعة، ١٩ يونيو ٢٠٢٦
حبيبتي مش اقصد أضايق حد بكلامي الظاهر الكل أتضايق من وجهة نظري ،،،بس وللله اكتر الاساله اللي شفتها مش بيقولوا مشاعرهم بل بيقولوا كلام والكلام اكيد بنعرف منه الحاله النفسيه اللي بيمر بيها وشعوره صدقيني أنا سالت سوال اكتر من سؤال مكانش ممزوج بالشعور تلقيت ردود اقرأي كتاب النافع لحسن بن نافع علي سبيل المثال التطبيق دا أكيد علشان نلقي حل عارفه ان الكل بيساعد علي قد ما يقدر بس أنا لحد دلوقتي ملقتش إجابه لولا سؤال سالته غير اقرأي اقرأي معلش أقرأ أي أنا عاوزه حل وانا اللي اسفه عالاطاله وآسفه ان وجهة نظري أزعجت الجميع لو اعرف امسح البوست همسحه اسفه للجميع اسفه اسفه علي رغم اني مش غلطانه وابديت رأيي بقمة الاحترام للجميع لكن اسفه لو تعديت حدودي🙏🏻
تم النشر الجمعة، ١٩ يونيو ٢٠٢٦
لعرض الإجابة في فدني اضغط هنا