دلوقتي انا في اولي ثانوي والمفروض حسب النظام الجديد نختار المسار 'الشعبة يعني ' من دلوقتي ومعنا لحد الصيف عشان السنة جاية ثانوية عامة
دلوقتي انا عايزة ادخل مسار هندسة اللي هو علمي رياضة وأهلي مش موافقين خالص عايزين ادخل علمي علوم عشان ادخل طب وابقي دكتورة ولو مجيتش طب يبقي صيدلة ونفتح صيدلية ودي حاجة ممتازة للبنت وكويسة جدا وكمان بتقول عشان تتجوزي حد كويس ومناسب قال يعني كانت بكلية 'تفكير عقيم' بس انا مش عايزة دا انا عايزة ادخل هندسة
مش عاجبهم وبيقولوا هندسة دي عايزة ولد بس القسم اللي عايزة ادخله ممكن اشتغل منه من البيت عادي مش مقتنعين بردو كل الي فات دا عادي دلوقتي ماما بتقول انتي عايزة تضييعي تعبي بعد كل ده وبتقول لو عملتي كدا انا مش راضية عنك وغضبانة عليكي انتي بنت عاقة انتي متعرفيش مصلحتك احنا اكبر منك
الموضوع قلب زعيق بجد لما دورت عادي ادخل اللي عايزة طلع عادي ادخل مالهاش علاقة بالبر عشان دي حياتي انا بس لما قولتلها كدا قالتلي انتي بنت مش محترمة
مش عارفة اي مشكلة اني ادخل هندسة مع انهم هما نفسهم مهندسين واخويا كبير بردو دخل هندسة و ماما عملت معاه زي ما بتعمل معايا دلوقتي بس انا اكتر
اعمل اي عشان تعبت من كتر تفكير انا مش عايزة ادخل حاجة تبع الكليات الطبية حد عنده حل معلش طولت
بصي يا بنت الناس استعيني بالله كده واعرفي إن ربنا مبيضيعش تعب حد أبدا وإنتي نيتك خير إنك تنجحي وترضي أهلك بس في نفس الوقت ربنا مديكي عقل وميول لمجال معين فاستخيري ربنا كتير في الخطوة دي وبلاش تخلي الموضوع يقلب بعقوق أو زعل لإن بر الوالدين باب للرزق والتوفيق بس خليكي عارفة إن طاعتهم بتكون في المعروف وفي الحاجة اللي متضركش ومستقبلك ده أمانة في إيديك ربنا هيحاسبك عليها فإنتي حاولي تقنعيهم بالراحة ومن غير صوت عالي وقولي لهم إنك هتتقي الله في دراستك وهتكوني مهندسة محترمة ومتميزة وتخدمي دينك ومجتمعك وخلي أخوكي المهندس يكلمهم بالحسنى ويفهمهم إن ده رزق ونصيب وإنك لو دخلتي حاجة مش حباها هتقصري فيها وده ميرضيش ربنا وخليكي واثقة إن لو ليكي خير في هندسة ربنا هيلين قلوبهم وييسر لكي الصعب بس إنتي ادعي بقلب صافي وخليكي هادية ومطيعة في باقي جوانب حياتك عشان يحسوا إن اختيارك ده نضج مش تمرد وربنا يكتبلك اللي فيه الخير ويرضيكي بيه ويرضي أهلك عنك ويوفقك لكل حاجة جميلة🤍🌷
تم النشر الأربعاء، ٢٢ أبريل ٢٠٢٦
بصي، انتي فعلاً في موقف مش سهل… بين حاجة انتي حاباها وحاسة إنها شبهك، وحاجة أهلك شايفينها أأمن ليكي. بس لازم تبقي فاهمة إن مفيش طريق مضمون 100%، لا طب ولا غيره. الفرق الحقيقي بيبقى إنك تبقي مقتنعة وقادرة تكمّلي، مش اسم الكلية بس. موضوع إن هندسة للولاد ده كلام قديم، وفي بنات كتير شاطرين وناجحين فيها جداً، وفي مجالات فيها شغل مريح أو مرن عادي. وفي نفس الوقت، طب مش سهل خالص، وبيحتاج نفس طويل جداً، فلو انتي داخلاه غصب عنك هتتعبي نفسياً قبل أي حاجة. أهلك أكيد خايفين عليكي وده طبيعي، بس فكرة إنك تدخلي حاجة بس عشان مضمونة أو عشان الجواز دي مش عادلة ليكي. دي حياتك انتي، مش المفروض تختاريها على أساس ترضي حد. حاولي تتكلمي معاهم بهدوء، من غير خناق، ووصّلي لهم إنك فكرتي كويس ومش بتاخدي القرار كده وخلاص، وإنك مستعدة تتحملي مسؤوليته وتتعبي عشانه، و كمان انتي ف الغالب مسار الهندسه بيبقي فيه رياضيات و كيمياء و برمجه اعتقد و انتي هتختاري حاجات من دول علي حسب السنه (مش فاكره تفاصيل البكالوريا بالظبط معلش ) ف لازم تكوني متاكده من انك هتكوني قادره ع المواد دي و متميزه فيهم او حباهم علي الاقل عشان يساعدوكي ف ان مجموعك يبقي مرتفع وممكن كمان تطمنيهم أكتر إنك بتدوري فعلاً اسألي ناس في المجال، شوفي أقسام هندسة اللي ليها شغل كويس، وبيّني لهم إن عندك خطة مش مجرد فكرة. وفي نفس الوقت خليكي صريحه مع نفسك هل انتي فعلاً حابة هندسة ومستعدة تكمّلي فيها حتى لو صعبة؟ولا مجرد فكرة عاجباكي وخلاص؟ لو مقتنعة بيها، تمسكي بيها و خليكي واثقه من قرارك و انك تتحملي نتيجته مهما كانت. ولو لسه محتارة، ممكن تشوفي اختيار تاني يريحك ويبقى مقبول شوية لأهلك القرار الصح مش اللي يرضي كل الناس… القرار الصح هو اللي يخليكي تعرفي تكمّلي وانتي حاسة إن ده طريقك انتي،اللي بيختار لك البداية، مش هيعيش معاكي باقي الطريق. عشان كده حاولي توصلي لحل يرضي أهلك، بس من غير ما تضيّعي نفسك في النص. خلي اختيارك مبني على اقتناع، ومعاه صبر وسعي… لأن أي طريق هتختاريه محتاج تعب، بس الفرق إنك تتعبي وانتي راضية، ولا تتعبي وانتي مجبورة. متنسيش طبعا اهم حاجه صلاة الاستخارة و صليها كذا مره و ان شاء الله ربنا يهديكي للصح و الخير ليكي 🤍
تم النشر الأربعاء، ٢٢ أبريل ٢٠٢٦
السلام عليكم، أولا ربنا يوفقك في دراستك وإن شاء الله تدخلي مجال تحبيه وتتفوقي فيه. بالنسبة لمشكلتك فمن حقك طبعا تختاري مجال دراستك وتصممي عليه وخاصة إنك مش حابة الدراسات الطبية، وكرهك للدراسة فيها هيؤثر طبعا على مستواك بعد كده وإنجازك في الكلية. هندسة صعبة أكيد لكن الطب كمان مش سهل. حتى بعد التخرج ممكن يكون أصعب في الشغل ونبطشيات وسهر وضغط ومشاكل مع المرضى وأهاليهم، فمش ده مقياس عامة لاختيار ده عن ده لان المجالين صعبين. ****** رفضك لاختيار أهلك وتصميمك على اختيارك ملوش علاقة بعقوق الوالدين، لكن ممكن يكون فيه عقوق إذا في طريقة نقاشك معهم تعصب وانفعال عليهم. فأنصحك، لو هتحاولي تتناقشي معهم تحافظي على هدوئك التام، أولا عشان ميحصلش عقوق بصوتك العالي عليهم وثانيا عشان الزعيق هيزود المشكلة وهيخليهم يعاندوا أكتر معك ويرفضوا رأيك ويتهموكِ بالعقوق زي ما حصل مع مامتك. الزعيق والانفعال هيخسروكِ كتير فاعملي جهدك مهما حصل منهم انفعال تحافظي أنتِ على هدوء أعصابك ونبرة صوتك، ويا ريت تختاري وقت هادي يكونوا مرتاحين فيه وأنتِ مركزة ونايمة كويس وتكوني محضرة قبلها اللي هتتكلمي فيه، يا ريت تقعدي مع نفسك قبلها بيوم وتكتبي في ورقة كل نقاط اعتراضهم وردودك المنطقية عليها وازاي تقنعيهم بوجهة نظرك وردك على كل نقطة وذاكري الكلام كويس عشان تعرفي تناقشيهم به بهدوء ووضوح. ومهم طبعا قبل كل ده تصلي استخارة وتتوكلي على الله وتسلمي له الاختيار هو يختار لك الأفضل لك بإذن الله. وبالتوفيق.
تم النشر الأربعاء، ٢٢ أبريل ٢٠٢٦
انصحك تحاولي تقنعى اهلك ان انت المفروض تدخلى المجال اللى بتحبيه وهتنجحي فيه ولو دخلتى مجال مش حباه مش هتعرفى تتأقلمي معاه علشان مش بتحبيه وكان ينفع ادخل مجال انا عايزاه وبحبه وهحقق فيه نجاح كبير وبعدين مافيش حاجة اسمها هندسه للولاد و طب للبنات مفهوم غلط اختى فى هندسة حاسبات و اخويا فى طب اسنان يعنى عادى جدا ملهاش علاقه اهم حاجة تدخلى مجال انت عايزاه مش مجال اهلك عايزينه ولكن لازم قبل ما تدخلى يكونوا راضيين عنك ويوافقوا على القرار دا علشان ربنا يباركلك وصلي استخاره وادعي لربنا يختارلك الخير علشان فعلا ممكن الخير فى المجال اللى اختارته مامتك يعنى استخيري ربنا وكل الامور هتوضح ولحد ما الامور توضح حاولى تتكلمي مع اهلك كتير وتقنعيهم ان دا حلمك ومستقبلك واللى هيحدد نحاجك انت وربنا يهديكِ للخير
تم النشر الخميس، ٢٣ أبريل ٢٠٢٦
استخيري اكتر من مره وشوفي هتتيسر لايه بس نصيحه هندسه صعبه جدا وفعلا اقسامها كلها متعبه يمكن تكوني قصدك على الشغل من البيت لقسم عماره بس ده برده قسم تقيل مع انه مشهور انه اسهل اقسام هندسه وكمان عشان تشتغلي من البيت بتكوني محتاجه خبره عمليه وكمان تطوري نفسك على طول عشان مفيش حد هيطورك او هاسمعي معلومه من زميل شغل بصراحه كان نفسي حد يعرفني ان الهندسه صعبه كده
تم النشر الأربعاء، ٢٢ أبريل ٢٠٢٦
بعدين اي حاجة صعبة ومحتاجة صبر وتكون حابب اللي بتعمله و اكيد يعني مش طب هوا اللي سهل
تم النشر الأربعاء، ٢٢ أبريل ٢٠٢٦
لا مش عمارة، هندسة حاسبات
تم النشر الأربعاء، ٢٢ أبريل ٢٠٢٦
لعرض السؤال في فدني اضغط هنا