السلام عليكم ورحمه الله وبركاته
أنا مشكلتي اني لما بكون صداقة احيانا بيكون مش عندي شخصية مع صحابي يعني في واحدة مصاحباها بنتكلم كل يوم بالساعات وكذا مرة وهي توكسيك جدا وبحب تعمل ال مش بتحب بتعملها وكمان من النوع المغرور وانا محتاجه أخرج من الصداقة دي بس انا مش عارفة أخرج أو انسحب منها ازاي لاني بطبعي مبحبش أسيب حد
انصحوني فضلا بحل اكون قادرة عليه لأنها دائما بتقولي اوعي تخاصميني يا فلانه اوعي مش عارفة ايه وهي كمان غيورة جدا وانا بغير بتزعل وكمان دائما بتزعق لي ولما بتزعل حرفيا بتنشف دماغها ومبترضاش تتصالح الا لما اكون قالبة واحدة معنديش كرامه
وبجد أنا مش عارفة المفروض اعمل ايه واتخانقنا مرتين بس مني ولما رجعت صالحتني اتصالحنا عادي بس بجد أنا تعبت من العلاقة دي ومتحاجه أخرج منها ضروري وكمان أنا ف سنه ف حياتي مهمه والمفروض اركز فيها
قولولي اعمل ايه أنقذوني فضلاااا قولولي حلول اكون قادرة اعملها وتكون جربوها ولو حد مر بحاجه كدا يقولي ملحوظه أخيرة هي بتحبني
شوفي انا كنت زيك زمان وكنت معنديش كرامة مع صحابي حرفيا وكان في واحده نفس صاحبتك دي هيا اللي خلتني افوق كانت بتغير وتخليني مكلمش حد غيرها وفي نفس الوقت هيا عندها صحاب كتير غيري وكانت بتشتم ولو حد شتمها تزعل. الصراحة مش هقولك بعدت عنها لاني مكنش عندي الجرأة اعمل كده زمان بس هي كتر خيرها ادتني مقلب حياتي وبعدها خاصمتني وانا اللي كنت بروح اعتذر لها كمان متخيلة. بس بعدها فقت الحمدلله. وهقولك على نصيحة متسمحيش لحد يهينك ابدا ابدا مهما كان مين. خلي عندك ثقة في نفسك متجريش ورا حد اللي عايزك هو اللي يجيلك. ممكن تقعدي لوحدك فتره احسن بكتير والله من علاقه توكسيك زي دي لأنها هتستنزفك. النوعيه اللي زي دي ابعدي عنها بس بطريقه شيك. لان لو بعدتي عنها مره واحده كده مش هتسيبك في حالك وساعتها انتي ممكن اللي تروحي تكلميها تاني. ازاي تبعدي بطريقه شيك بقا. تعملي نفس اللي بتعمله معاكي بالضبط. خلي المعامله بالمثل وهيا هتبعد لوحدها. قللي هزار وكلام معاها روحي لتعرفي على بنات تانين ولو سألتك ليه مش بتقعدي معايا قوليلها عادي يعني هو احنا هنفضل لازقين في بعض واضحكي. متبينيش خالص انك عايزه تبعدي قاصده لا انتي عندك حياتك وهيا مش محور الكون لازم الكل يفضل حواليها. فهمتني. حاولي تقوي شخصيتك اسمعي بودكاست وطوري نفسك. عشان ثقتك بنفسك وبقدراتك هتنعكس على طريقتك مع الناس وفي الاخر ربنا يوفقك يارب
تم النشر الثلاثاء، ٣ فبراير ٢٠٢٦
وعليكم السلام ورحمه الله وبركاته أكبر غلطة إنك بتسمحي لزعلها وطلباتها ومزاجها يحددوا مودك اليومي. هي بتستخدم الابتزاز العاطفي كلمة اوعي تخاصميني دي فخ الصداقة الحقيقية راحة مش عبء نفسي ومذاكرة طول اليوم بما إنك مبتحبيش تسيبي حد فجأة، ابدئي قللي الكلام المكالمات بالساعات خليها نص ساعة واعتذري وراكي مذاكرة. والخناقات لو زعقت، قولي مش هعرف أتكلم وأنتي بتزعقي واقفلو والوقت أنتي في سنة مصيرية مستقبلك أهم من غضبها. والكرامة مش في الخناق، الكرامة في إنك تقولي لا لما تكوني مش قادرة. لو زعلت عشان مشيتي كلامك، سيبيها تزعل. اللي بيحبك بجد هيحترم وقتك ومساحتك، واللي بيحب يمتلكك هو اللي هيتضايق.. ودي مشكلتها هي مش مشكلتك. واللي بيحبك بجد بيشيل عنك الحمل مش بيكون هو الحمل اللي شايله فوق ضهرك. أنتي محتاجة كل ذرة طاقة عشان مذاكرتك ومستقبلك. صاحبتك هتعوضيها بصحاب أنضج، لكن السنة دي لو راحت مش هتعوضيها وجد ربنا يحفظك ويوفقك 😊
تم النشر الثلاثاء، ٣ فبراير ٢٠٢٦
وعليكم السلام ورحمة الله وبركاته يا قمر! 😊 أول حاجة، أنا فاهمة تمامًا إحساسك ده، الصداقات السامة زي القهوة اللي مليانة سكر مرة واحدة – حلوة في الأول بس بتتعب الدماغ والقلب بعدين. أنتِ مش لوحدك، كتير بنات مروا بنفس الموقف، وطلعوا أقوى. الصداقة الحقيقية بتنور حياتك مش بتتعبك، وزي ما قال الرسول ﷺ: "المرء على دين خليله"، فاختاري اللي يرفعكِ. خطوات عملية تقدري تعمليها دلوقتي (جربوها ناس كتير ونجحت): قللي التواصل تدريجيًا (مش فجأة عشان ما تحسيش إنكِ سيبتيها خالص) : ردي متأخر (ساعات أو يوم)، وقصير جدًا. مثلاً لو كلمتكِ، قولي "عاملة كويس، مشغولة دلوقتي" وخلاص. ما ترديش كل ساعة زي زمان. شغلي موبايلكِ على "لا تُزعج" ليها، أو mute الشات. هي هتتعود وتقلل هي كمان. حددي حدودكِ بوضوح لو سألت : لو قالت "إيه اللي حصل؟" قولي بلطف: "أنا محتاجة وقت لنفسي دلوقتي، عشان أركز في دراستي/شغلي. مش مخاصمة، بس كده." وما تفتحيش نقاش طويل. لو زعقت أو غارت، اقفلي الخط وما ترديش لحد ما تهدي. تذكري: كرامتكِ أغلى، مش لازم تتصالحي كل مرة عشان "ما تسيبيش حد". اللي بيحبكِ بيحترم حدودكِ. ركزي على سنتك المهمة : حددي جدول يومي: ساعات دراسة، رياضة خفيفة، قراءة قرآن أو ذكر عشان تهدي نفسكِ. كل ما تشغلي وقتكِ، هي هتبعد لوحدها. ابدئي النهارده: اكتبي 3 أهداف صغيرة لليوم (مثل: أدرس ساعتين، أصلي قيام الليل)، وشوفي إحساس الإنجاز ده هيخليكِ تنسي التعب. لو رجعت تاني أو حاولت تصالح : قولي "فرحانة إنكِ كويسة، بس أنا هفضل مشغولة فترة." واستمري في الابتعاد. مع الوقت، هتتقبل وهتلاقي صداقات أحسن. أنتِ قوية وقادرة، يا بنتي! الخروج ده هيحرركِ ويفتح باب لصداقات إيجابية. لو عايزة نصائح أكتر، دوري في فدني على أسئلة مشابهة عن "علاقات سامة" هتلاقي إجابات كتير مفيدة، أو شوفي الخبراء هنا: https://www.fedni.net/experts – في متخصصين نفسيين هيساعدوكِ أكتر. ربنا يقويكِ وييسر أمركِ 💪❤️
تم النشر الثلاثاء، ٣ فبراير ٢٠٢٦
السلام عليكم ورحمة الله وبركاته.. قال تعالى :"وما ظلمناهم ولكن كانوا أنفسهم يظلمون " ... فلا شك أن وجودك في هذه العلاقة واستمرارك فيها هو بسبب ظلمك لنفسك وتقديمك للعديد والعديد من التنازلات وأول خطوة للتغيير هي الإعتراف بالخطأ لأن من البديهي اذا لم يعترف الإنسان بالخطأ فلم يغير هذا الخطأ / العلاقة السامة هي علاقة القفل والمفتاح فهي تقوم على تطابق المؤذي والضحية مع بعض .. فإذا غير المفتاح شكله أو غير القفل شكله فلم يعد هناك تطابق وتنتهي العلاقة ... فكيف تغيري شكل المفتاح ؟ ... عن طريق أنك تغيري من نفسك فأنتي لديكي احتياج عاطفي إلى أن لا تشعري بالوحدة وأن تشعري أن هناك رفيق لكي في رحلتك الدراسية وأن تشعري أنك لكي معنى في حياة أحد آخر عن طريق الشفقة عليه وعدم تركه وحيدا (فهي تستعطفك وتقول :متخاصمينيش).. فكل هذه الاحتياجات العاطفية هي تلبيها لكي بمقابل أنها تشفي الكبرياء والنرجسية عندها / فالحل ليس بالصدام ولكم الحل بتغيير المفتاح عن طريق تلبية أحتياجاتك العاطفية من مصدر صحي بعيدا عنها وتلقائيا لن تحتاجي لها فستكون العلاقة باردة ولن تحصل على إمداد للكبرياء والنرجسية فستتركك وتبحث عن ضحية أخرى .... وبسبب أنها غير معتادة على برود العلاقة ستحاول بكل الطرق أن تعيد العلاقة كما كانت وستفجر في الخصومة ولكن. اصبري إلى أن تيأس وتذهب عنك
تم النشر الثلاثاء، ٣ فبراير ٢٠٢٦
انسحبي شيئا فشيئا وتجاهليها وستفهم وحدها
تم النشر الخميس، ٥ فبراير ٢٠٢٦
حبيبتي مفيش حد في الدنيا احسن من حد ما تسمحي لحد من صحباك يزعق عليك وانتي مش مجبوره تكوني في علاقه مؤذيه ربنا بسألك عن نفسك ..حاولي عامليها بكل برود الدنيا وما تسمحي ليها تتعدى حدودها ابدا اللي يتعامل بطريقه كويسه ويكون كويس لينا يفضل غير كدا لا عامليها ببرود وركزي على حياتك حتروح لوحدها
تم النشر الخميس، ٥ فبراير ٢٠٢٦
فتلبية احتياجاتك العاطفية طريق تقوية العلاقة مع الله بالصلوات الخمس وقيام الليل وايضا فعل الخير كالصدقة والاهتمام بالجانب النفسي ككتابة المذكرات
تم النشر الثلاثاء، ٣ فبراير ٢٠٢٦
ركزي ف دراستك وحاولي لو بتتواصلي واتس متفتحيهوش احذفي كل حاجه وركزي في حلمك وخليكي في نفسك متبقيش متاحه دائما وهي هتبعد لما تلاقيكي مشغولة ومش فاضيه
تم النشر الثلاثاء، ٣ فبراير ٢٠٢٦
لعرض السؤال في فدني اضغط هنا