السلام عليكم، ارجعي كده للسؤال واقرأي كم مرة كررتِ كلمة فشل وفاشلة ومش ناجحة ومش ومش... كل دي توكيدات سلبية عمالة تأكديها على عقلك الباطن، ودي مشكلة كبيرة جدا. عقلك الباطن بيصدق أي حاجة بتغذي بها عن نفسك وبينجحك فيها، هتفضلي تقولي له أنا فاشلة هترسخي الفكرة جواه وهينجحك في الفشل فعلا. أول حاجة عشان تكسري دائرة الفشل دي إنك تبرمجي عقلك من تاني. حتى لو مفيش نجاح انت شايفاه حاليا ابدئي اشتغلي على الأفكار الإيجابية وشجعي نفسك وازرعي في عقلك إن أي فشل أو وقوع مش معناه إني فعلا فاشلة ومفيش نهوض من الوقعة دي، بالعكس كل فشل (من وجهة نظرك) هو خطوة ناحية النجاح في الأساس. كل فشل بنتعلم منه وكل خطوة غلط لما نصححها بتقربنا للطريق الصح. *** عارفة الكلام سهل والتنفيذ أكيد صعب، بس مش مستحيل. *** استعيني بالله الأول وبعدين اشتغلي على نفسك، اقعدي مع نفسك وهاتي ورقة وقلم واكتبي كل أفكارك العشوائية ومخاوفك وفضي دماغك خالص عشان تعرفي ترتبي الأفكار بعد كده وتلاقي أساس المشكلة وطريق الخروج منها. ** ممكن تكتبي على الورقة الفكرة السلبية وتشطبي عليها أو تحطي علامة غلط وتكتبي قصادها الفكرة الصح. يعني تشطبي على كلمة أنا فاشلة وتكتبي قصادها (أنا ليه أستحق إني أكون ناجحة) (ليه وإزاي أنا أقدر فعلا أكون ناجحة) هتلاقي إجابات فعلا ليه تستحقي وليه وإزاي تقدري. ** الموضوع هياخد وقت وجهد لأن التغيير كده محتاج وقت وصبر ومجهود. ** حاجة مهمة كمان لازم تعرفيها، لما تبقي عاوزة تمسكي كل الخيوط مرة واحدة وتحلي مشاكلك كلها وتنجحي في أهداف كتير مرة واحدة هتلاقي نفسك مش قادرة تمسكي حاجة منهم وهتشتتي نفسك ومش هتحققي منهم حاجة، فالحل، تبدئي واحدة واحدة وتمشي خطوة خطوة، أرشح لك تشوفي فيديوهات عن (نموذج عجلة الحياة المتوازنة) هتساعدك تشوفي أوجه القصور في حياتك وإيه أكتر حاجة لازم وضروري تبدئي تشتغلي عليها هتلاقي فيديوهات كتير شارحاه على يوتيوب... ممكن تشوفي الكورسين دول مثلا وإن شاء الله يساعدوكِ. https://www.youtube.com/playlist?list=PL9qj2CGqAHHH2OZCzkiKTLzd2YQQe6pEm https://www.youtube.com/watch?v=eFLyTB9GC8Q&list=PLCnYSnTcuIm8GFg9ONsOZZPv0oUeoy7BD&index=1 *** وخدي راحتك في رحلة التغيير، من غير ما تضغطي نفسك ولا تملأيها بأفكار سلبية. ** وبالتوفيق إن شاء الله.
العفو، ربنا يوفقك. بالنسبة لكلام الناس متشغليش نفسك به خالص، اعتزلي أي حد يقول لك كلام سلبي عن نفسك، لو مش هتقدري تعتزليهم مترديش ولا تعبري كلامهم، ركزي مع نفسك وخلاص، احنا في الدنيا كل واحد المفروض يكون مشغول في ورقة امتحانه فركزي في ورقتك وملكيش دعوة الباقيين بيقولوا إيه ولا بيحاولوا يأثروا عليك ولا ينتقدوكِ... مش لازم على فكرة حد يكون جنبك، ناس كتير نجحت من دون دعم من أهل أو صحاب ووقفت على رجليها بنفسها، أيوه الدعم مهم والكلام الإيجابي من القريبين مهم بس حتى لو في أسوأ الظروف اتحرمنا منه مش هو لوحده اللي هيوقفنا على رجلينا. ** والدعم الخارجي عامة تأثيره محدود والأهم هو الدعم الداخلي والاستمرارية وإنك تدفعي نفسك باستمرار عشان هي تستحق. ممكن تتابعي قناة د. أسماء القاضي، عندها فيديوهات كتير هتفيدك... شوفي ده وابقي كل يوم شوفي فيديو وطبقي قد ما تقدري النصائح وإن شاء الله تتوقفي لكل خير ونجاح. https://www.youtube.com/watch?v=8xO-FS0IJKs&pp=ygU72LTZitihINmI2KfYrdivINmC2KfYr9ixINmK2LrZitixINit2YrYp9iq2YMg2K8uINij2LPZhdin2KE%3D أنصحك كمان تواظبي على أذكار الصباح والمساء وقراءة سورة البقرة يوميًا، هتفرق جدًا معك... واستعيني بالله وإن شاء الله كله هيكون تمام.
تم النشر الثلاثاء، ١٨ نوفمبر ٢٠٢٥
بجد شكرا ليكي بس فعلا معرفش ليه انا كده محدش مره قالي ان عملت حاجه كويسه او اني شطره في حاجه مشكله ان بحاول اساعدنفسي بس لما تلاقي ان كل حاجه فوقي وانك الناس ضيقني بقا خلاص مش قدره ورغم ده حاول بس لو في حد بشجعني يكون جنبي بس فعلا كل بقول عليا اني فشله وانا بقيت مصدقه كده اني فشله متقصرا بالموضوع ده اوي محدش جنبي خالص ولا فهمني
تم النشر الثلاثاء، ١٨ نوفمبر ٢٠٢٥
لعرض الإجابة في فدني اضغط هنا