السلام عليكم ورحمه الله وبركاته
انا فى تالته مش عارفه اوصف انا حاسه بإيه بصراحه ولا عارفه اتقدم خطوه لقدام مش لاقيه حاجه تشجعنى انى اذاكر فى السنه دى ولا حتى هدف أو كليه معينه مش عارفه اهلى طول الوقت يقولولى طب أو صيدله عاوزين نفرح بيكى
وانا عارفه من جوايا أن مش عاوزه أو مش عارفه انا عاوزه إيه كنت بذاكر اول السنه و ماشيه تمام بس مش عشان عندى هدف لا كنت عاوزه اجيب مجموع عالى يفرح أهلي و يعوض بابا خصوصا عن كل حاجه عملها ليا انا واخواتي .
فى كل ماده عندى نقاط ضعف معينه و عارفه المشكله و عارفه حلها بس مابخدش خطوه عايشه فى عالم ديزنى مع نفسى ممكن اعمل اى حاجه غير انى اذاكر حتى الصلاه مش حاسه باى حاجه ناحيتها مجرد حركات بعملها عشان ارضى ضميرى انى صليت و بس
الدعاء مش عارفه ادعى و لو دعيت مببقاش مصدقه اللي بدعى بيه خالص طول الوقت فى دماغى سيناريوهات النتيجه و انى اكيد هجيب مجموع وحش
معرفش ليه بتخيل يوم النتيجه وانا عايشه دور الضحيه إلى اتظلمت فى ثانويه عامه بقيت بارده مش فارق معايا أي درجات مع انى من جوايا عاوزه اكون شخص ناجح و شاطر بس مرتاحه وانا عايشه فى دايره المظلومه اللي معندهاش صحاب ولا حد معاها
كل ما أحاول أكون صاحبه تكون معايا و نروح و نيجى سوا يحصل موقف يبينلى ان هي مش كويسه أو بمعنى أصح خبيثة حاسه ان احنا بقينا فى عالم محدش بيحب الخير لحد ولا حد عاوز يشوف اللي قدامه كويس كل واحد بيبص و عاوز الحاجه الحلوه إلى معاك بتروح منك يا يأخذها هو
في البدايه خليني اقول لك ان من الواضح انك فاهمه كويس جدا اللي جواكي وعارفه تفرقي ما بين الجانب السلبي والجانب الايجابي ودي حاجه جميله فيكي وانت وضحتيها قوي في كلامك. لو جينا نتكلم عن الجانب السلبي فممكن تكون تعرضتي لمواقف او في حاجات سببت لك حاله انك عايزه تتجاهلي كل حاجه حواليكي وعايزه تعيشي في عالم مع نفسك ممكن يكون في مواقف او احداث سببت لك الاحساس ده. اما بالنسبه للجانب الثاني فالجانب ده جميل جدا ومن الواضح ان هو مليان اهداف ومليان افكار ومليان حاجات كتير .. بس احنا بالنسبه لنا الجانب السلبي هو الاسهل ان احنا بننسحب من الواقع اللي احنا فيه وبنروح لعالم تاني خالص العالم اللي احنا مرتاحين فيه وعايزين نعيش فيه طيب العالم اللي احنا بننسحب ليه ده مفيهوش مستقبلنا عالم خيالي من صنع دماغنا من صنع خيالنا او بنرتاح فيه بس مفيهوش مستقبل مفيهوش اي حافز مفيهوش اي حاجه. خلينا نتكلم في العالم الايجابي او الجانب الايجابي اللي جواكي. نقطه الصلاه او نقطه المذاكره دي اكتر نقط ممكن اقول لك ان انت المسؤوله عنها تقريبا مسؤوليه كامله انت المسؤوله ان انت تقربي من ربنا انت المسؤوله انك تبداي وتاخدي اول خطوه ايجابيه في حياتك انك تبداي تصلي. الصلاه بتعمل حاجات كتير جدا بتغير الانسان من جوه وبتنظم الوقت وبتساعدك انك تركزي وبتخلي الوضع بتاعك النفسي او الحاله النفسيه بتاعتك هاديه وبالنسبه للمذاكره انت لازم تكوني فاهمه كويس جدا ان انت مستقبلك وحياتك كلها. مبنيه على تفاصيل كتير من اهمها انك انت تبقي عارفه هدفك ايه عايزه ايه بتحبي ايه نفسك تدخلي جامعه ايه مفيش حد بيعيش في الدنيا مش عارف نفسه يحقق ايه أو هدفه ايه ممكن يكون تايه بس اكيد في حاجات نفسه يحققها .حاولي ان انت تبقي مع نفسك شويه وتفهمي انت نفسك تكوني ايه لازم تعرفي ان العالم اللي انت فيه ده او اللي بتنسحبي ليه ده عالم مفهوش اي حاجه ممكن تكون هدف لك بل بالعكس ده عالم هيخليك في منطقه سكون واقفه لوحدك مش هتتقدمي ولا خطوه فخلينا نبدا في البدايه ان احنا نتقرب من ربنا ونبتدي ننظم يومنا ونشتغل على نفسنا ان احنا نبدا بالتدريج ان احنا نذاكر وننظم يومنا ننظم وقتنا صدقيني هتلاقي في فرق كبير وطالما انت شايفه الجانب الايجابي اللي جواكي يبقى هتقدري انك تتعاملي معاه بس بالراحه بالتدريج مش مره واحده. وحاولي انك في الفتره دي يكون معاكي حد مقرب ليكي صديقه مقربه او حد من اهلك بترتاحي وبتحبي انك تتعاملي معاه اكيد ده هيشجعك وهيكون دعم نفسي ليكي ولو مفيش حد حاليا ممكن يكون معاكي لايف كوتش ده هيقدر يساعدك جدا ويبني معاكي خطوه بخطوه الدنيا معاكي تمشي ازاي بجد الموضوع هيفرق معاكي جدا 🌹
تم النشر الاثنين، ١٩ يناير ٢٠٢٦
إنتي شايلة هم تعويض بابا وفرحة أهلك أكتر من مستقبلك الشخصي، وده اللي مخلي المذاكرة تقيلة على قلبك. وانا مريت بالظروف دي أهلك أكيد بيحبوكي وعاوزين مصلحتك، بس فرحتهم الحقيقية مش في البالطو الأبيض فرحتهم الحقيقية إنهم يشوفوا بنتهم سوية ونفسيتها مرتاحة شيلي من دماغك فكرة إنك مديونة ليهم بالنتيجة. إنتي بتعملي اللي عليكي عشان نفسك أولاً والنتيجة دي رزق بتاع ربنا مش فاتورة لازم تسدديها. وبلاش دور المظلومه والوحدة كلامك عن إنك عايشة في دور الضحية وإن الناس مش بتحب الخير، ده مؤشر إنك منطفية من جواكي. لما بنحبط، بنشوف كل اللي حوالينا وحش أو خبيث. الحقيقة الصحاب والناس فيهم الكويس والوحش، بس تركيزك دلوقتي لازم يكون إنتي.اعتزلي الناس شوية بشياكة مش لازم يكون عندك "شلّة" دلوقتي. ركزي في علاقتك بنفسك، ولما إنتي تنوري من جواكي وتنجحي، الناس الكويسة هي اللي هتنجذب ليكي. إحساسك إن الصلاة مجرد حركات، ده سببه الخناق اللي جوه دماغك متجلديش ذاتك. ربنا عارف اللي في قلبك حتى لو مش قادرة تعبري عنه بكلام أو دعاء مرتب. حاولي بس وانتي بتصلي تاخدي هدنة من التفكير. قولي لربنا أنا تعبانة ومحتاجة مساعدتك🥺، دي في حد ذاتها أعظم دعاء. تخيل يوم النتيجة وإن المجموع هيكون وحش ده اسمه قلق إنتي بتضيعي طاقتك في خناقة لسه محصلتش. لما يجيلك الأفكار دي قولي لنفسك انا مسؤولة عن السعي مش النتيج ركزي في النهاردة بس. إيه اللي وراكي النهاردة؟ خلصيه ونامي مرتاحة . والله مجرد ما تخلص السنه هتلاقي حياتك طبيعيه . بعتذر عن الإطالة. جد ربنا يحفظك 😊
تم النشر الثلاثاء، ٢٠ يناير ٢٠٢٦
و عليكم السلام ورحمه الله وبركاته اعتقد ان دا شعور طبيعي جدا انت بس حاولى في يوم يكون بالك مرتاح تقعدي تفكري هل انا عايزة طب فعلا؟ و لا ماشية زي ما المجتمع عايز؟ و شوفي انت بتحبي ايه مثلا لو حاسة نفسك شاطرة في اللغات ادخلي السن و هكذا انا واحدة دخلت ادبي و ضربت كل اقاويل المجتمع في عرض الحيطة و بالنسبة للصلاة و الدين اسمعي لشيوخ بيتكلموا عن فضل الصلاه او الدعاء و هما كتير على يوتيوب ما شاء الله خليك لوحدك و كويسة احسن من لما تكوني مع ناس كتير بس بيأثروا عليك بالسلب و ما تشغليش بالك بالنتيجة كل دا مكتوب عند ربنا خلاص انت بس اعملي اللى عليك لاننا بنتحاسب على مجهودنا مش نتيجتنا و طبعا ما حدش عارف الخير فين ادعي ربنا يرزقك بكل خير و توكلي على الله و خير يا حبيبتي بإذن الله 🤍
تم النشر الاثنين، ١٩ يناير ٢٠٢٦
وعليكم السلام ورحمة الله وبركاته يا حبيبتي، أشعر بكِ تمامًا، الثانوية مرحلة صعبة مليئة بالضغوط، خاصة مع توقعات الأهل وعدم وضوح الهدف. أنتِ مش عايشة في عالم ديزني، ده شعور طبيعي للكثير من البنات في سنكِ، بس نقدر نخرج منه خطوة بخطوة. خلينا نركز على حلول عملية، معتمدين على التوكل على الله. 1. اكتشفي هدفكِ الخاص (مش عشان الأهل بس): اجلسي ١٠ دقايق يوميًا واكتبي: "إيه اللي بيفرحني؟" (مثلًا، هل تحبين الكتابة، الطبخ، التسويق؟). جربي اختبار شخصية مجاني زي "16Personalities" بالعربي، هيساعدكِ تعرفي ميولكِ. هدفكِ مش لازم يكون طب أو صيدلة؛ النجاح في اللي يناسب قلبكِ، زي ما قال الرسول ﷺ: "إذا أمرتكم بشيء فأتوا منه ما استطعتم". قولي لأهلكِ بصراحة: "بحاول أعرف نفسي أكتر، وهفرحكم بأحسن نتيجة ممكنة". 2. الدراسة: ابدئي صغير عشان تشعري بالإنجاز: حددي واحدة بس من نقاط الضعف (مثلًا، مادة معينة)، وخدي خطوة واحدة يوميًا: ٢٠ دقيقة حل تمرينات. استخدمي تقنية "Pomodoro" (٢٥ دقيقة دراسة + ٥ راحة). بعد أسبوع، هتشعري بالتقدم ويجي الدافع تلقائيًا. هدف أول: مش مجموع عالي، بس "أحسن من أمس". تخيلي النتيجة الإيجابية بدل السلبية: "هنجح وأفرح بابا بطريقتي". 3. الصلاة والدعاء: رجعي الإحساس خطوة خطوة: ابدئي الصلاة بخشوع قدر الإمكان، واقرئي صفحة قرآن بعديها (سورة الشرح مثالية للضيق). الدعاء مش كلام، بس قلي: "اللهم يسر لي ما فيه خير، وأعني على نفسي". مع الوقت، الإيمان هيرجع، زي ما قال تعالى: {وَمَنْ يَتَّقِ اللَّهَ يَجْعَلْ لَهُ مَخْرَجًا}. استغفري ١٠٠ مرة يوميًا؛ بيفتح القلب ويبدد البرودة. 4. الثقة في الناس والوحدة: العالم مش كله خبيث، بس ابدئي برعاية نفسكِ أولًا. ركزي على دراستكِ وهدفكِ، والأصدقاء الحقيقيين هيجوا مع الوقت. لو حصل موقف سلبي، قولي "ده درس، مش نهاية". يا قمر، أنتِ قادرة وشاطرة من جواكِ، بس الدايرة دي هتنكسر بالصبر والعمل الصغير. ابدئي النهارده بخطوة واحدة، وخلي ربنا يبارك فيها. لو عايزة نصائح أكتر، ابحثي في فدني عن أسئلة مشابهة هتلاقي إجابات كتير، أو شوفي الخبراء هنا: https://www.fedni.net/experts (في مدربين حياة ونفسيين رائعين). أنا معاكِ، قوليلي إيه اللي هتعمليه أول خطوة؟ 💕 ذكية
تم النشر الاثنين، ١٩ يناير ٢٠٢٦
لعرض السؤال في فدني اضغط هنا