ف البداية كنا صحاب وبعدين اعترفتلي بحبها ليا وانا مكانش في حاجة من نحيتي تجاها وقتها بس مقدرتش اكسر بخاطرها وقلبها فقولتلها وانا كمان بحبك .. فضلنا علي الحال ده مع بعض ٦ شهور بعدها وفي خلال الفتره دي كنت حبتها بجد وصدق فكلمت ابوها وامها رفضوني اكتر من تلات مرات و بعد محاولات كتير قدرت اتي اخطبها رغم ان ظروفي مش تمام لخطوة زي دي بس هي وعدتني هتصبر عليا ومن وقت ما اتخطبنا وهي حاطاني ف ضغط كبير جد وبدات المشاكل كل يوم بينا وقررت اسيبها اكتر من مرة مقدرتش عشان حبتها فعلا حب حقيقي بس للاسف هي قدرت وتخلت عني وقالت مش عايزاك بعد سنه من الخطوبة . انا عايز انساها لحد الان مش عارف اعمل اية ؟
حاول تشتغل ع نفسك اكتر وتكبر ف شغلك وتكون نفسك براحتك قبل ما تدخل ف اي علاقه تاني ولما تعمل كده مع الوقت هتنساها ولما تفكر فيها حاول تفكر ف انها بعدت عنك وانها مستحملتش ولو بتحبك بجد كانت استحملت وقتها هتلاقي قلبك بينفر منها
تم النشر الثلاثاء، ٣٠ مايو ٢٠٢٣
طيب فيه حاجه في الاول ملهاش علاقة بالتخطي بس في الحقيقة لازم تتقال .. احنا مش بنرتبط بالناس علشان بيصعبوا علينا ... خالص، يعني الجملة ديه (بس مقدرتش اكسر بخاطرها وقلبها) افرض مكنتش مثلا حبيتها .. او حتى مكانش فيه مشاعر ما اصلا، كان رد فعلك هيكون ايه وقتها، هتكون عايز تسبيها ولا هتكمل .. ما هو برضه كان هيجي عليك وقت وتفوق من اللي انت كنت فيه، كنت هتدرك حجم اللي انت عملته، وانك ارتبط بواحده علشان صعبانه عليك، مجرد انها صعبانه عليك. وده مينفعش ... انت مش هتعيش مع واحده باقي حياتك علشان مجرد مقدرتش تكسر بخاطرها. ف علشان كده محتاج تركز شوية المرة الجاية في اختيارتك. تاني حاجه .. علشان تتخطى العلاقة ديه .. لازم تمشي خطوات علشان تقدر تتعافي مش تنسي! سؤالك هو ازاي انسى .. مقدرة جدا انك عايز تنسى الألم .. ولكن هل المفروض فعلا اننا نسى الالم اللي حصلنا ؟ أول حاجة علشان تبدأ انك تتخطى المرحلة ديه .. هي انك تفرغ مشاعرك .. متحاولش تقول لنفسك انا كويس .. وانت مش كويس .. فرويد كان بيقول المشاعر المكبوتة لا تموت .. انت لو دفنت مشاعرك هتيجي في يوم وهتتحول لبركان وينفجر في وشك .. خد فترة الحزن بتاعتك واحزن براحتك .. مشاعر الحزن مقدسة من حقها تاخد وقت زيها زي الفرح بالظبط. حاول انك تروح تلعب رياضة قتالية وتفرغ اللي جواك كله في اللعبة اللي انت هتلعبها .. لو بتحب تكتب مذكراتك او يومياتك يستحسن كمان تكتب كل يومك مشاعرك ايه .. تكتب كل اللي جواك او اللي بيدور في عقلك ... الكتابة هي ايضا فكرة علاجية ف هتساعدك في المرحلة ديه. اسمع لنفسك ديما .. اسمع لصوت تفكيرك .. بتقول لنفسك ايه طول الوقت ..؟ ده مهم جدا لان كلامنا لنفسنا طول الوقت هو اللي بيحدد طريقة تفكيرنا وسلوكنا فيما ببعد. وممكن تكون انت مش واخد بالك اساسا لتفكيرك .. وتستعجب من نفسك وتقول انا وصلت للنقطة ديه ازاي .. ومنين ؟؟ تفكيرك هو اللي وصلك .. راقب نفسك وتفيكرك .. اكتب اي فكرة غريبة بتطرأ عليك .. واقرأ اللي انت كتبته اخر اليوم وحلل الكلام ده في الاخر. اهتم بنفسك .. شوف انت كنت بتتنازل عن ايه وانت مع العلاقة ديه .. وابتدي اعمله، خروجة مع صحاب .. سفرية معينة .. اهتم بشكلك وبأكلك .. وبصحتك .. اعمل كل اللي انت كنت عايز تعمله. واتكلم مع حد بتثق فيه لو انت بتحب تتكلم مع حد من صحابك ... اهم حاجة ميكونش بيحكم عليك اطلاقا. بلاش علاقة بديلة .. بلاش تداوي جروحك بحد تظلمه وتظلم نفسك. اقطع علاقتك بكل اللي يخصها .. سوشيال ميديا ... وسائل اتصالات .. كل حاجة .. اقطع علاقتك بكل حاجة. بلاش تتابع .. بلاش تدخل تشوفها هي اونلاين ولا هي راحت فين ولا جت منين ولا بتعمل ايه ..؟ متنساش ان هي شخص اذاك. لو فيه حاجات او هدايا معاك مع الشخصيه ديه امحيها خالص .. حطها في مكان ومتفتحوش .. لحد ما تعدي الفترة ديه. اتمنى تعدي الفترة ديه بسلام .. وهي هتعدي ان شاء الله.
تم النشر الأحد، ٢٨ مايو ٢٠٢٣
متنساهاش ...افتكر دايما ان العلاقات مبنعملش فيها جبر خواطر ...وخلى النتيجة اللى وصلتلها قدام عينك عشان ميحصلش ده معاك تانى
تم النشر الثلاثاء، ٣٠ مايو ٢٠٢٣
محو كل الأمور المادية التي تذكرك بها (الهدايا - الصور - المتعلقات - الكتابات) وأي شيء آخر كهذا البعد عن فعل أي شيء يذكرك بها، أو التواصل مع شخص يذكرك بها، أو الذهاب لنفس الأماكن اللاتي كنتما تزورانها سوية شغل النفس بالعديد من الأمور بحيث لا يتبقى لك وقت فراغ للتفكير فيها وأخيرًا الصبر حتى تنجح هذه السبل في جعلك تنساها رويدًا رويدًا البعيد عن العين بعيد عن القلب ... فاحرص على تطبيق هذه القاعدة لتصل إلى مبتغاك وتذكر نحن لا نرتبط بالأشخاص شفقة عليهم، فلو حدث ولم نبادلهم المشاعر فيما تلا نكون جنينا على أنفسنا وعليهم
تم النشر الاثنين، ٢٩ مايو ٢٠٢٣
إستخير ربنا و سيصلك الجواب عن تجربة
تم النشر الأربعاء، ١٤ يونيو ٢٠٢٣
لعرض السؤال في فدني اضغط هنا