السلام عليكم ورحمة الله وبركاتة
انا حقيقي آسفه اني هقول كدا انا مكسوفه اوي والله من كدا بس انا محتاجه مساعده
انا كنت بحب ولد وبنتكلم بقالنا سنه و 8 شهور كان فيه حاجات كتير انا مكنتش هقبلها ابدا تبقى موجوده في شريك حياتي ومع ذلك قبلتها فيه وكنت بدعي ربنا يتغير وفعلا كان بيتغير للاحسن الحمدلله المشكلة انه كان مش حنين عليا وقت الزعل وكان بيقولي على حاجات معملهاش كنت بعملها بالغلط زي مرجعش بعد الساعه 10 بالليل اوقات كنت بتأخر غصب عني وهو كان بيتقمص ويسيبني بالكام يوم وميصالحنيش غير حرفيا لما ببقى بتذلل ليه وكان معيشني في رعب اني اعمل حاجه غلط او كدا ولا مره حسيته متمسك بيا وعايزني وانا الي كنت بتمسك بيه وكنت حنينه عليه وقت الزعل ولما كان بيزعلني مكنتش بطول في الزعل وكنت بتراضي بسرعه عشان بحبه وكان بيقعد يقولي انتي بتزعليني اكتر م بتفرحيني وبحسني وحشه اوي ومستاهلهوش واني كتيره عليه ودلوقتي بعدنا بسبب اني اتاخرت ساعه وكانت صحبتي السبب وفهمته دا بس هو قالي هقفل دلوقتي عشان مقولش كلام يزعل وبعديها بشويه فتح وقالي اعملي الي تعمليه واتاخري براحتك وكنت بعديها بيومين قولتله وحشتني قالي معلش بقا وكانه عايز يبعد وبعد من غير م يقولي اي حاجه وانا أول كام يوم كنت عادي دلوقتي انا منهاااره وبعتله كذا مره وكنا بنتكلم واتفقنا ان لو حد فينا دخل علاقه تانيه هنقول لبعض واتفقنا انها هتبقى حلال وانا كنت طالبه منه يقولي عشان كنت هقعد هطلبه من ربنا وهدعيله انه يهديه ويصلحه وبعدين كنت بعتله تاني قولتله انت عايزني ولا لا ف قالي لي قولتله عشان لو عايزني هستناك بس مش هنتكلم في الحرام تاني قالي عايزك بس متستنينيش وقالي ان هو هيحاول يشوف حياته من غيري وان دا كله بسبب افعالي وقالي مش كل حاجه بنعوزها ينفع ناخدها
انا بجد مش مستوعبه كميه القسوه الي فيه وانه بيقول دا كله والمفروض انه بيحبني هو لو حد بيحب حد بيبقى كداااااا
والمشكله اني موافقه عليه بيعيوبه وهدعي ربنا يتغير بس هو مش موافق عليا بعيوبي وشايف نفسه وكرامته عليا وانا لا، انا دايما بتخطي الناس بسهوله ومحدش بيفرقلي بس مش فاهمه انا حاصلي اي...
هو فيه عيوب انا مكنتش هتقبلها زي انه مش قريب من ربنا وانا الي بشد بايده وانا كنت عايزه شريك حياتي هو الي يشد بايدي وكمان بيشتم وكمان مش حنين وبقعد كل شويه ابررله تصرفاتي وان نيتي كويسه وهو مش بيفهم دا وانا مش عايزه كدا بردو في شريك حياتي وكمان مش بيفهمني وكمان حاسه رجولته لسه مكملتش وانه مش ناضج وانه مش اد المسئوليه مع انه هيتم 20 سنه كمان 5 شهور
المشكله اني شايفاه مناسب ليا اوي وانه هو توأم روحي واني مش هلاقي حد كدا تاني وكمان ما شاء الله عليه محترم اوي وفيه مميزات كتيره اوي مش موجوده في شباب دلوقتي...
انا عارفه والله ان كل دا حرام ودي اول مره ارتبط اصلا وكنت قبل م اكون معاه قريبه من ربنا وبعد لما بقيت معاه بقيت ببعد تدريجيا لحد م عندي خلل في الفروض مش عارفه اصلي الفرض في وقته وانا ندمانه ندمانه اني دخلت في علاقه محرمه بجد ربنا مش محرمها من فراغ بس انا مش عارفه انا خايفه اقعد ادعي ربنا بانه يجعله من نصيبي اشقى معاه وخايفه اشقى مع غيره انا بجد حياتي وحشه اوي ومش عايزه جوازي هو كمان يبقى وحش
مش عارفه مش عارفه افكر انا مشتته انا عايزاه هو ومش عايزه غيره حرفيا بس خايفه خايفه وانا عندي مذاكره ومش فاضيه للكلام دا وزعلانه اوي والله وهو معندهوش دم ولا بيحس بحاجه
وكمان انا مرعوبه اخش في علاقات محرمه تاني انا قبل م اكلمه باقل من شهر كنت منزله استوري وفرحانه اني مش في علاقه محرمه ودخلتها انا مش عايزه ادخل الباب دا تاني ولا اعصى ربنا وكمان عشان انا مستحقره نفسي اوي بس الواحد مش بيتعلم ببلاش انا طلعت منها شخصيتي اقوي واخدت درس محترم منها بس مش عايزه دروس تاني من الباب دا اعمل اي بالله انا بترعب من الذنوب الكبيره الي زي دي اوي
وكمان مدايقه اوي اني لو اتجوزت واحد غيره هبقى حاسه اني خونته واني مستاهلهوش واني حقيره واني بخدعه ف بردو سبب من اسباب اني عايزه الولد دا عشان اصلح غلطتي دي والا ناويه متجوزش واهتم بمستقبلي واستني يومي وهيبقى صعب عليا اوي لاني نفسي ربنا يعوضني عن كل الي شوفته في حياتي يعوضني في زواجي
السلام عليكم، أولا اهدي واستهدي بالله وبلاش القسوة الكتير على نفسك. أنتِ غلطتِ أيوه، ومعترفة بغلطك. استحقارك لنفسك مش هيفيدك بحاجة ولا هيغير من اللي حصل. أهم حاجة دلوقتي، ما دام عارفة إنه حرام وغلط استغفري ربنا وتوبي واعتبري اللي حصل كان درس قاسي ومش هيتكرر. *** ثانيا، خلي نفسك رقم واحد والأولوية عند نفسك واسأليها، هل هي قليلة ومش غالية فتستحق شخص زي ده؟ لمجرد إنك متعلقة به؟ وأيوه، اللي أنتِ فيه ده تعلق. ** حبيبتي اعتزي بنفسك واختاري الشخص اللي يستحقها، ده من كلامك شخص توكسيك أصلا. وأنتِ نفسك قايلة فيه عيوب كتير أنتِ متقبليهاش، أنتِ قابلة بها بس دلوقتي عشان غيامة الحب عامية عينك ومخلياكِ ترضي بأي شيء منه.. فزيحي الغيامة دي خالص واخرجي من التعلق المؤذي ده. ** علاقتك به بالإضافة لإنها حرام فهي ضارة ومؤذية لك. هو أصلا ملوش حق يتحكم فيك ولا يقول لك مترجعيش متأخرة ومتعمليش ومتسويش. ولو خطيبك أصلا طالما أنتِ في بيت أهلك ملوش إنه يتدخل ويأمرك، فما بالك بشخص أصلا في علاقة محرمة، ده ملوش أي حقوق. *** لو عاوزة مصلحتك، أوعي ترجعي للشخص ده، حتى لو رجع هو وحاول يقنعك، هو غير ناضج أصلا وأنتم لسه صغيرين والمشاعر دي متقلبة ومتتبنيش عليها حياة ولا يتوثق بها. فكري في نفسك وبس. أنتِ أغلى من كده وتستحقي شخص غير ده. ** توأم روحك دي فكرة وهمك الرومانسي هو اللي معيشك فيها حاليا ومخليكِ مصدقاها، ومش بعيد بعد كم سنة تنسيه وترتبطي بشخص تاني وتبصي لورا وتقولي إزاي فكرت في يوم الفكرة دي. اهدي بس وفكري في هدوء وإن شاء الله تختاري مصلحتك. ربنا معك.
تم النشر الأربعاء، ٢٢ يوليو ٢٠٢٦
وعليكم السلام ورحمة الله وبركاته. أول حاجة أحب أقولها لكِ: أنا شايفة قد إيه قلبكِ متعب ومشتت، وإنكِ بتدوري على مخرج وسط كل الخوف والندم ده. اللي بتمرّي بيه طبيعي جدًا بعد علاقة طويلة مليانة تناقضات، وإنكِ بتندمي على الذنب ده دليل على إن قلبكِ لسه بيحب ربنا وخايف من غضبه، وده أمل كبير. العلاقة دي كانت محرمة من الأول، وكل اللي حصل فيها من قسوة وتجاهل وشعور بالذنب المستمر هو نتيجة طبيعية للابتعاد عن طريق ربنا. الولد ده مش بيحبكِ بالطريقة اللي تستاهليها، لأن الحب الحقيقي بيظهر في الرحمة والصبر والمسؤولية، مش في التهديد بالبعد أو جعلكِ تتذللي عشان يتصالح. هو شايف نفسه أعلى منكِ ومش مستعد يتقبل عيوبكِ، وده لوحده كفاية يخلّيكِ تعرفي إن الاستمرار في التعلق بيه هيخلّيكِ تعيشي في دائرة ألم مفتوحة. أنصحكِ دلوقتي بقطع التواصل تمامًا، بدون أي رسائل أو استفسارات. كل ما تفتحي الباب حتى لو "آخر مرة" هتطولي الجرح وهتزيدي الذنب. ركزي على دراستكِ اللي قلتِ إنها مهمة، واجعليها أولوية عشان ترجعي تشعري بقيمتكِ وقدرتكِ. ادعي ربنا كتير بالمغفرة والعوض، واقرئي قرآن واستغفري، وخلّي الدعاء يكون "اللهم إني أسألك الزوج الصالح الذي يعينني على طاعتك" بدل ما تدعي له تحديدًا. ربنا قادر يعوضكِ بأحسن مما تتخيلي، ومش هيخيب رجاء قلب خايف منه. أنتِ مش حقيرة ولا خاينة لو اتجوزتِ غيره، ده مجرد شعور مؤقت بسبب التعلق. الغلط اللي حصل خلّص، والتوبة الحقيقية هي اللي بتخلّصكِ منه، مش الرجوع لنفس الشخص. خدي وقتكِ في بناء نفسكِ، وهتلاقي إن الخوف ده بيقل تدريجيًا. لو عايزة تقرئي تجارب مشابهة، ابحثي عن أسئلة مشابهة على فدني عشان تشوفي وجهات نظر أخرى. ربنا يشفي قلبكِ ويعوضكِ خيرًا يا رب.
تم النشر الأربعاء، ٢٢ يوليو ٢٠٢٦
بصي انا واحد جرب الشعور ده من سنه وفاهم حضرتك تماما، بس اولا حتة الاستوري اللي نزلتيها وفرحانه انك مش في علاقه محرمه ده كانت غلط لان الانسان المفروض يحمد ربنا على أنه مبتلهوش بذنب زي المعظم فده ممكن كان عقاب ليكي، ثانيا ومعلش في الكلمة بس حضرتك غبية لأنك كنتي مكملة مع واحد كان بيعملك بالطريقة دي + دينه مش افضل حاحة زي ما قلتي، وخديها والله من واحد مجرب مفيش ابتلاء بينزل على العبد الا وهو خير ليه، انا من سنه كنت في علاقه محرمه بردو وسبحان الله يعتبر كانت نفس مواصفات الشب بتاعك وحاولت اعمل نفس اللي عملتي بحيث اني اغير منها وأشد بايديها وخليها تقرب من ربنا والكلام ده كله، بس ولا حاجه من دي حصلت ودخلت في علاقه مع واحد تاني وهي كانت لسه معايا، وبعد ما قلتلي وانفصلنا كنت شايف سواد حرفيا قدامي، لحد ما بدأت اقرب من ربنا اكتر وبدأت اصلي قيام الليل و حرفيا ده المفتاح اني خلاني انساها وابدا ارجع لنفسي واحلى من الاول كمان، انا بعد الموقف اللي حصلي في حياتي ده قدرت اكتشف عيوب كانت فيا انا مكنتش هعرفها لو مكنتش دخلت حياتي ونظرتي للحياة حرفيا اتغيرت بشكل كبير، خلاصة الكلام اقفلي الصفحه دي من حياتك وقربي من ربنا اكتر وركزي على نفسك عشان محدش والله يستاهل، وابداي طوري نفسك بتعلم مهارات جديده وفقهي نفسك في الدين اكتر، المهم متسبيش نفسك للشيطان والفراغ عشان دماغك هتفضل تودي وتجيب
تم النشر الجمعة، ٢٤ يوليو ٢٠٢٦
عليكم السلام ورحمة الله وبركاته ـ ابتعدي تماما عن هذا الطريق وهذا الشخص يتلاعب بك نفسيا سواء هو قاصد ذلك او لا لكن يفعل هذا - وانتي ضعيفة عموما سهل جدا تتلاعب بالنساء عاطفيا لذلك حتى السؤال انا لا افضله ان تسأل إمرأة سؤالا لرجل لأنه قد يعجبها فصاحته او ماشبه فتفتن به لكن على كل حال انا اقول هذا الكلام لحسن ظني وانك ستلنزمين واسأل الله تعالى الهداية للمسلمين وانا سئمت هذا الأمر صراحة تحدث النساء مع الرجال لأننا هرمنا وتعبنا من كثرة التحذير منه ومن عواقبه على قلب الإنسان لكن ليس وقته الآن الأهم هي التوبة والرجوع سريعا وفرمتي الهاتف ولا تترددي ولا تأخذي منه شيء احذفي كل السوشيال ميديا كل شيء فرغي حياتك ولاشك ان الامر قد يكون صعبا او سهلا في البداية ثم يصعب لكنه ممتع في النهاية عندما تكون الحياة نقية والله المستعان.
تم النشر الخميس، ٢٣ يوليو ٢٠٢٦
لعرض السؤال في فدني اضغط هنا