بصراحة مكنتش عارفة ابدأ الكلام منين و كل ما أكتب حاجة امسحها مش عارفة هل اوصفلك قد ايه الفكرة دى مرعبة هى مش مرعبة فى ذاتها و لكن للنتائج اللى مترتبة عليها و اللى للأسف هى جهنم مش هقلك هتخسرى دنيا و أخرة لأن محدش بيفكر كدا إلا لو شايف انه اصلا خسران الدنيا و لكن بصراحة الشخص دا بيكون غلطان ربنا كاتب من قبل ما تتولدى انت و أهلك و و أجدادك لحد آدم عليه السلام انك هتتولدى فى يوم كذا الساعة كذا و هتكونى بالصفات كذا و هتعيشى حياة كذا ربنا عارفك من قبل ما تتوجدى اصلا و اختارك انت بالذات علشان يخلقك بينما هو سبحانه قادر على أن يخلق غيرك بسهولة ولكن أختارك انت و انت فى النهاية عايزة تنهى حياتك بالبساطة دى مش انت اللى خلقتيها علشان وقت ما تحبى تقررى تنهيها دا مش بمزاجك و مهما كانت حياتك صعبة مؤلمة لا تطاق بالنسبالك ففى ناس عايشة حياة اسواء بكتير من حياتك بس صابرين و الفرق بينك و بينهم انهم بيعيشوا الألم و صابرين فبإذن الله هيكسبوا ما هو أعظم هيكسبوا رضا ربنا و لكن انت بتعيشى الألم و تسخطى فبتحكمى على نفسك تخسرى الأخرة طيب ليه يا بنت الحلال كدا كدا اللى مكتوبلك هتعشيه فليه تبقى خسرتى الأتنين و عندى ليكى طريقة هتخليكى بإذن الله تبقى كسبانة الدنيا و الأخرة قربى من ربنا عادى إنك تفضلى ساكتة و متكلميش حد إلا ربنا كلميه و أشكيله همك و هو السميع العليم و هو الرحيم اللطيف الودود، مستحيل مستحيل تلجأى لربنا و يردك خايبة مستحيل الإكتئاب بيزول بالقرآن لان دا كلام ربنا ليكى دا النور اللى بيمحى ظلمة القلب كونى صحبة صالحة تعينك فى دينك و على دنياك اسمعى قصص و سير الصحابة و التابعين و الأهم سيرة نبينا محمد و أمهات المؤمنين اشغلى وقت فراغك و متسمحيش لأفكارك تسيطر عليكى و أعرفى إن دى نفسك الأمارة بالسوء و الشيطان عايزينك تهلكى عايزينك تخسري بلاش تسمعى كلام عدوك يا ذكية حاولى تغيرى طريقة تفكيرك من السلبية للإجابية بدل ما تقولى مثلا ليه انا بس اللى بيحصل معايا كدا قولى ربنا أخترنى علشان يبتلينى و الإبتلاء دا علشان يغفرلى ذنوبى او يقربنى منه سبحانه قد ايه ربنا رحيم و أكيد هيصبرنى و أخيرا انا متأكدة انك كدا بسبب الفراغ فراغ دينى فراغ روحى أصل الإنسان أجوف و مش بيتملى إلا بالدين غير كدا بيفضل فارغ و هش فيا بنت الحلال حاولى تملى نفسك بالقرب من ربنا و صدقينى هتشوفى الدنيا بعيون تانية خاااااالص و أعتبرى دى إشارة قوية من ربنا بيناديكى فيها فخليكى ذكية و أستغليها لأن مش دايما الفرص بتتكرر و القلب بعد كدا بيُطبع عليه و أسفة إننى طولت عليكى او إن كلامى كان حاد شوية و لكن صدقينى اللى بتمرى بيه فترة و هتعدى و بعدين هتقولى لنفسك انا ازاى كنت كدا و زى ما قلتلك أملى فراغك اللى مش بيتملى إلا بالقرب من ربنا و الكلام اللى قلته دا كلام أجراه الله على لسانى و بس كدا أتمنالك حياة سعيدة (رغم إن مفيش حياة سعيدة أصلا و إن دى دار الشقاء و دا طبيعى) و لكن حياة فيها قرب من الله و قلب مملوء بالإيمان و الحب لله و رسوله و خوف من الله و رجاء فيه سبحانه
ادعيلى كتير
تم النشر الثلاثاء، ٤ نوفمبر ٢٠٢٥
لعرض الإجابة في فدني اضغط هنا