السلام عليكم ورحمة الله وبركاته
كل عام وانتم بخير -
انا ارتكبت غلط زمان في حق اهلي وفي حق نفسي كمان ربنا يغفر لي انا عندي 19 سنة من 5 سنين اتعرفت علي ولد واتكلمنا كام شهر ووالله كان اول مرة في حياتي ووقتها انا كنت وحيدة وبعيدة عن كل الناس حتى اهلي ودا مش مبرر انا عارفة اني غلطت غلط كبير اوي ومش مسامحة نفسي لغاية دلوقتي بس وقتها كنت صغيرة وطايشة ومع ذلك والله لا عمري بعت صورة ولا اتكلمت فيديو والولد اللي كلمته دا ميعرفش شكلي ولا انا اعرف شكله حتى الان لاننا كنا من محافظات مختلفة وهو كمان كان من سني ف كان كله كلام عيال وبنشكي اللي مزعلنا لبعض وخلاص وانا والله مش مستهونة بالغلط دا ابدا
وبعد حوالي 3 شهور اهلي عرفوا وضربوني واخدوا مني الموبايل وقعدوني من التعليم سنتين تقريبا لغاية ما الناس اقنعوهم اني اكمل وحاليا انا ثالثة ثانوي عام ادعولي مشكلتي بقي ازاي اقدر اخليهم ينسوا غلطي دا ؟
يعني انا قعدت السنتين دول حرفيا اهانة وذل وحرمان بس انا استاهل انا غلطت وكان لازم اتعاقب وبعد السنتين دول بدأوا يعاملوني عادي بس انا اللي كنت دايما حريصة اني اوريهم اني ندمانة والله اتغيرت وقربت من ربنا بس النهاردة كنت بقول ان عايزة اشتري موبايل بعد الامتحانات ف اختي الكبيرة قالتلي ان هما قالوا مش هنجيب ليكي موبايل علشان خايفين بصراحة من جوايا انهرت لاني والله ندمانة واتغيرت بس هما مش قادرين ينسوا اعمل ايه فيدوني بالله انا تعبت نفسيا من كتر جلد الذات ودايما بدعي ربنا إنه يغفر لي بس اهلي مش راضين يغفرولي
وعليكم السلام ورحمة الله وبركاته حاسه بيكي اوي وبكل كلمه انتي قلتيها لكن ي حبيبتي نصيحه مني ليكي بلاش موبيل بلاش بلاش والله لو يرجع بيا الزمن ٦ سنين ما همسك موبيل ولا هفكر امسكو ده فتنه كبيره اوي اوي بالذات الايام دي ياريت اهلي عملو كدا زي اهلك انتي في نعمه حرفيا حرصهم عليكي وانهم يبعدو عنك كل اذى دي نعمه كبيره وانتي عمرك ما هتعرفيها الا لو انتي مكاني ومش معني انهم مش هيرضو يجبولك موبيل انهم لسه زعلانين منك لا ابدا هما بس بيحموكي من بلاوي الموبايل ف انتي تقريبا معاكي تبلت الثانوي ف عادي استخدميه لدراستك وبس عزتي تكلمي حد كلميه من تلفون مامتك وعادي جدا والله انتي كدا هتكوني في امان تام باذن الله ولما ربنا يكرمك وتتخطبي ابقي ساعتها بس هاتي موبايل
تم النشر الخميس، ٢٨ مايو ٢٠٢٦
وعليكم السلام ورحمة الله وبركاته، كل عام وأنتِ بخير يا بنتي. أنا آسفة جدًا للي مريتِ بيه، وواضح إنك نادمة بصدق وتغيرتِ، وربنا يتقبل توبتك ويشرح صدر أهلك. الأهل بيحتاجوا وقت أطول عشان يثقوا تاني، خاصة بعد عقاب قاسي زي ده. أهم حاجة دلوقتي إنك تستمري في إثبات تغييرك بالأفعال مش بالكلام بس: كوني ملتزمة بدراستك، ساعدي في البيت، وخلي تصرفاتك كلها تعكس النضج والمسؤولية. لو عايزة موبايل، جربي تتكلمي معاهم بهدوء وتقترحي حلول عملية زي استخدامه تحت إشرافهم أو شراء واحد بسيط بدون إنترنت في البداية، مع التأكيد إنك مش هتكرري الغلط. ادعي ليهم بالهداية واستمري في الدعاء لنفسك، والصبر مفتاح. لو حسيتِ إن الموضوع بيأثر عليكِ نفسيًا أكتر، ممكن تشوفي استشارة مع خبراء على فدني من هنا: https://www.fedni.net/experts، وكمان ابحثي عن أسئلة مشابهة على المنصة عشان تلاقي تجارب تانية. ربنا ييسر أمرك ويصلح حالك مع أهلك.
تم النشر الخميس، ٢٨ مايو ٢٠٢٦
كل الناس بتغلط بس هقولك حاجة ربنا بيستر مرة واتنين وتلاته وبيجي مرة كده بيروح مبين الذنب ده للجميع عشان يعالجك أنتِ عدي الموضوع طالما عدى والله كل الناس عامله بلاوي أكتر منك سيبي أمرك لله وقربي منه أكتر وحاولي تعملي إنجاز ده هو اللي هينسيهم .
تم النشر السبت، ٣٠ مايو ٢٠٢٦
انا عارفة كدا والله بحمد ربنا انهم عرفوا وقتها علشان مكنتش اكمل في غلطي بس وقتها انا كان عندي 14 سنة يعني صعيرة ومتهورة وكنت بعيدة خالص عن ربنا لكن انا دلوقتي اتغيرت تماما بقيت اهدي وانضج واعقل وربنا هاديني ليه اللهم لك الحمد وبقيت عارفة حدودي كويس اوي وفكرت انهم ادوني فرصة جديدة بس اكتشفت انهم بيمشوا الايام وخلاص لكن لو الموضوع جد بيفكروني بالماضي اللي انا منستهوش اصلا ومش قادرة اتخطاه ولا قادرة اقلل احساسي بالذنب وجلد الذات
تم النشر السبت، ٣٠ مايو ٢٠٢٦
لعرض السؤال في فدني اضغط هنا