السلام عليكم
انا من فتره كبيره حصلي مشكله اتصدمت في شخص المفروض انو كان كل حياتي وكان كويس ومحترم جدا كان خطيبي كنا بنحب بعض جدا جه ف وقت بقي متغير معايا ولما اجيب سيره اي حاجه ف المستقبل كان يقولي مستعجله علي اي انا معاكي اهو وكلو ف وقتو كانو بيتهرب
في نفس الوقت كانت صاحبتي غريبه وتصرفتاهم مش مظبوطه في مره مسكت موبايلو من وراه لقيت رقم صاحبتي متسجل عندو ومكالمات كتير جدا وكل ده وانا هبله وعبيطه ومش فاهمه اي حاجه وكنت واثقه فيه ثقه عمياء ومكنتش بمسك موبايله خالص عشان انا مديالو الامان وكده واجهتو فضل يطلع كل عيوب الدنيا فيا وكأنو هو الملاك
وفجاه اتغير مش هو ده الي كنت اعرف وبحبو وبعدها لقيتها بعتالي اسكرينات وهو بيتكلم عليا معاها وانو كان مستحملني بالعافيه وانو مش مبسوط معايا وعاوز يفركش بس كان بيدور علي طريقه عشان يطلعني انا اللي غلطانه عشان يفركش وبكل بجاحه بعدها لقيتها بتقولي ف الاخر ياريت متكلمنيش تاني ومش عاوزه اعرفك
وانا عشان طيبه فضلت أعاتب فيها واكتشفت انها عملت بلوك يعني حتى كلامي مش وصلها مش فاهمه ليه ومن اقرب صديقه ليا كنت بعتبرها اختي يعني واضح جدا انها بتكرهني من زمان وطلعت كمان هيا اللي دخلت كلمتو طب كان يبعد لكن من غير ميستغبيني وكمان كان عاوز يطلعني وحشه قدام الناس
أنا نفسيتي مدمره وعايشه على المهدئات بس اهلي ميعرفوش وعارفه انو غلط بس غصب عني وعاوزه ارجع زي زمان مش عارفه ولما بخرج بيقعدو يسألوا عن الموضوع وتعبت من كلام الناس ونظراتهم ليا
حاسه اني خسرت كل حاجه خسرت الشخص الوحيد اللي حبيته واتمنيته من الدنيا وخسرت صاحبتي الوحيده مش عارفه اعيش حاسه اني مليش لازمه في الدنيا مش عارفه اعمل ايه تنصحوني به اي عشان ارجع زي الاول وانسى ازاي رغم أن في صعوبه
السلام عليكم، أنا متفهمة صدمتك ومشاعرك لكن اقفي مع نفسك وقفة وفهميها إن محدش يستاهل تدمري نفسك عشانه خاصة اتنين خاينين زيهم. أنتِ محتاجة تعيدي النظر للي حصل من زاوية تانية وتفكري في الجانب الإيجابي. فيه كم نقطة فكري فيهم واغرسيهم في نفسك كويس: أولا، ربنا حماكِ من إن اثنين زيهم يكونوا في حياتك والله أعلم ممكن أذيتهم لك كانت تبقى أكبر بعدين فاحمدي ربنا على النعمة دي. ومتفكريش إنه زي ما قلتِ كان كويس ومحترم... المحترم لو بنت دخلت كلمته كان احترم نفسه وخطيبته ورفض يتكلم معها ولو حصل وضعف ومشاعره تحركت كان هيبقى صريح ويعتذر بأدب لخطيبته مش يتصرف بحقارة زي ما ده عمل معك، فهو لأ، مكنش كويس ومحترم، أنتِ كنتِ مخدوعة فيه مش أكتر وظهر على حقيقته. ** ثانيا، أنتِ مغلطتيش في حق حد، أنتِ هنا كنتِ الضحية. غلطتك الوحيدة إن علاقتك بهم مكنتش متوازنة وكنتِ متعلقة بهم جدا وده سبب كسرتك. أي علاقة لازم تكون وسطية، من غير تعلق جامد ولا تفريط، ومن غير توقعات عالية عشان متتعرضيش للخذلان لو توقعاتك فشلت. فأنتِ فهمي نفسك كويس، اللي حصل مش غلطك أبدا، ضميرك يكون مرتاح ولا تفكري أبدا إنه تركك عشان عيب في شخصيتك ولا مشكلة فيك، هو تركك عشان هو شخص خائن ومش محترم وميستحقكيش. **** ثالثا، بلاش جلد ذات أو تفكير كتير في اللي حصل، وبلاش تحسي بالذنب ناحية مشاعرك الحالية لأنها طبيعية وعادي تاخد وقت لحد ما تخف وتتجاوزي الصدمة وأثرها إن شاء الله. متقاوميش الأفكار عشان المقاومة بتزودها، اشغلي وقتك وتفكيرك في حاجات تانية أهم وعادي لو خطروا في بالك اطرديهم بسرعة وركزي في حاجة تانية وطنشي الأفكار ومتطوليش معاها وتقعدي تجتري الذكريات وإحساس الألم. *** رابعا، متخليش اللي حصل يؤثر على ثقتك بالناس، مش محتاجة تخوني كل الناس بعد كده لكن يكون فيه توازن وحرص، زي ما بيقولوا (حرّص ولا تخون). *** خامسا، ليه مش بتقولي لأهلك لما بيسألوا؟ الكلام أولا هيريحك ويخفف الضغط النفسي المتراكم جواكِ وتاعبك. وثانيا، هيظهر الشخصين دول على حقيقتهم قُدام أهلك وده هيؤكد صورتهم وحقيقتهم قدامك وهيقلل من شعورك إن ممكن المشكلة كانت فيكِ أنتِ. **** سادسا، ليه بتقولي حاسة ملكيش لازمة في الدنيا؟ هو أنتِ ربنا خلقك ليه؟ هل كان هدفك تنجحي في علاقتك بالاتنين دول فلما فشلتِ بسبب خيانتهم يبقى مبقاش لك هدف ولازمة؟ فوقي لنفسك واعرفي قيمتك ومش عشان اتنين خاينين تقللي من نفسك وتنهي حياتك كده. ارمي كل اللي حصل ورا ظهرك وفوقي لحياتك ومستقبلك ومتسمحيش لحد يكسرك أبدا. *** أخيرا، استعيني بالله وادعيه يقويك تتجاوزي الوضع ده بأسرع وقت. ولو محتاجة لمساعدة مختصة نفسية تتابع معك فلا تترددي تاخدي الخطوة دي، وإن شاء الله ربنا يعينيك ويعوضك خيرًا إن شاء الله.💚💚
تم النشر الثلاثاء، ٢٩ سبتمبر ٢٠٢٦
وعليكم السلام ورحمه الله وبركاته بصي يا بنت الحلال أول حاجة المهديات دي توقفيها بالتدريج وبلاش تدمري جسمك عشان ناس متستاهلش وتعملي مسح لكل صورهم وسكريناتهم وأرقامهم وبلوك من كل حتة وما تسيبيش خيط واحد يربطك بيهم وتملي يومك على الآخر تنزلي جيم أو تدوري على شغل أو تاخدي كورسات وتنزلي تفرغي طاقتك هناك عشان مخك ما يلاقيش دقيقة فاضية يفكر فيهم ولو حد سألك من الناس أو الأهل تردي كلمة واحدة وتقفلي الكلام وتقولي كل شيء قسمة ونصيب وما تفتحيش أي تفاصيل وتفتكري دايماً إن ربنا أنقذك من شخصين خاينين ورجعك لراحتك بدري بدري قبل ما تتدبسي في جوازة وتكتشفي قرفهم بعدين .. وجد والله ربنا يحفظك ويسعدك
تم النشر الثلاثاء، ٢٩ سبتمبر ٢٠٢٦
وعليكم السلام ورحمة الله. أولاً، أنا آسفة جداً للي مريتي بيه، وأقدر إن الخيانة من أقرب الناس ليكي – خطيبك وصاحبتك – بتخلي الجرح أعمق وأصعب. اللي حصل مش ذنبك، وثقتك العمياء كانت دليل على طيبتك، مش على ضعفك. الشخص اللي كان بيتهرب ويخطط عشان يطلعك غلطانة قدام الناس، والصديقة اللي دخلت في الموضوع وكرهتك من زمان، دول مش يستاهلوا اللي كنتي بتديهولهم. نفسيتك مدمرة دلوقتي طبيعي، والشعور إنك خسرتي كل حاجة ومش عارفة تعيشي ده مرحلة صعبة، لكنها مش نهاية الطريق. عشان تتخطي وتنسي، ابدئي بخطوات عملية تركزي فيها على نفسك وإيمانك. أول حاجة، وقفي المهدئات لوحدك لأن ده بيضر صحتك أكتر وممكن يخليكي تعتمدي عليها، روحي لدكتور نفسي متخصص عشان يساعدك بطريقة آمنة ومناسبة لحالتك. ثانياً، ركزي على روتين يومي بسيط يملى وقتك: صلي وادعي ربنا بالصبر والشفاء، لأن الإيمان بيخفف الألم ويذكرك إن الله شايف كل حاجة وهيعوضك خير. اقرئي قرآن أو استمعي لتفسير يطمن قلبك، وخصصي وقت لنشاطات بتحبيها زي القراءة أو الرياضة الخفيفة أو تعلم مهارة جديدة عشان تبني ثقتك بنفسك تاني. كمان، ابتعدي عن أي حاجة بتذكرك بالماضي زي الصور أو الرسائل، وابدئي تكتبي يومياتك عن مشاعرك عشان تفرغيها. أهلك لو سألوا، جاوبي باختصار واطلبي منهم يدعموكي بدون الضغط على الموضوع. الوقت هيساعدك تنسي، وهترجعي أقوى إن شاء الله، لأنك إنسانة قيمة ومستاهلة حب حقيقي وصداقة صادقة. ابحثي عن أسئلة مشابهة على فدني عشان تشوفي تجارب تانية، وخدي خطوة بخطوة، هتعدي الفترة دي وترجعي زي الأول وأحسن.
تم النشر الاثنين، ٢٨ سبتمبر ٢٠٢٦
لعرض السؤال في فدني اضغط هنا