السلام عليكم ورحمة الله
بصراحه متردده ف الكلام اللي هقوله دلوقتي ومش عارفه هل أنا بعمل الصح ولا الغلط فجه في بالي اعرض مشكلتي والله المستعان أنا طالبة ثانوية ازهريه وفات من سنتي الدراسيه نصفها حاليا ومش عارفه أنا ماشيه صح ولا غلط وهل أنا هوصل للي أنا عايزاه الاخر ولا لأ
كلمت كذا حد قريب مني وبيقولوا انهم شايفين فيا نوع من التيه أنا بصراحه من كلامهم بدأت اراجع نفسي بس حسيت اني مش لاقيه ولا إجابه وازاي أنا مش مضغوطه كدا في المذاكره وكتير من رفقاتي مضغوطين ومش حابين الدراسه أبدا بس أنا مش كدا أنا بفوض امري لله+ وضغط تعدد المواد ولا أنا مش حاسه بالضغط فعلا بس أنا اوقات ببكي كتير وبكون مضغوطه بس مش بلجأ للبشر بلجأ لربي بحسه أقرب حد ليا أنا مش فهماني بجد والله حاسه بالضيق
السلام عليكم، أنا شايفة عادي مفيش مشكلة، عن نفسي وقت الثانوية مكنتش حاسة بضغط وكتير كانوا شايفين إن ده غلط ونوع من اللامبالاة بس أنا كنت حاسة إنه عادي، هي سنة زي غيرها ومش مضطرة أعيش الضغط والتوتر اللي المجتمع مصمم إن الطلبة يعيشوه عشان يثبتوا إنهم مهتمين وخايفين على مستقبلهم. أنت ممكن مش حاسة بضغط وده مش غلط المهم تكوني بتعملي اللي عليكِ وممكن تكوني من النوع اللي بيتعامل مع الضغط بطريقة مختلفة عن الباقيين... يعني لو تراكم بتلجأي للبكاء أو بتفرغيه بطرق تانية حتى لو بتعملي ده لاشعوريًا. ** لكن خدي بالك، فيه فرق كبير بين عدم الخوف والشعور بالضغط وأنتِ بتشتغلي وتعملي اللي عليكِ وبين شعور اللامبالاة وإنك ترمي كل المسؤولية ورا ضهرك ومتهتميش بالنجاح من عدمه. ** تأكدي بس إنك بتعملي اللي عليكِ وبتذاكري وأنتِ موقنة إن ربنا لا يضيع أجر من أحسن عملا، اجتهدي واتقني عملك. لو أنتِ بتذاكري ومرتبة وقتك ومنظمة مذاكرتك فخلاص كملي على نظامك من غير الاستسلام للضغط والتوتر زي الباقيين... لو لقيتِ فعلا فيه تقصير من ناحيتك، يعني مثلا بتلاقي دروس كتير تراكمت ومفتحتيهاش خالص أو بيضيع منك وقت كتير على السوشيال ميديا مثلا أو في حاجات مش مهمة يبقى لأ، محتاجة تراجعي نفسك لأن ممكن يكون عندك نوع من التسويف بيخليك تفتكري إنك بتنجزي في المذاكرة وبتعملي المطلوب لكن الحقيقة العكس. راجعي كده يومك ونظامك وشوفي لو فيه أي خلل محتاج يتعالج. واعملي كل ده من غير ما توتري نفسك... يعني لقيتِ مشكلة لا تتوتري وتبدأي تحسي بخوف وضغط، تعاملي بتوازن وهدوء وافتكري إن لسه فيه وقت على الامتحانات ممكن تصلحي فيه أي مشاكل تكتشفيها. وإن شاء الله ميكنش فيه أي مشاكل. خدي لفة في التطبيق وشوفي قسم التعليمية أو ابحثي عن أسئلة الثانوية وهتلاقي نصائح كتيرة تساعدك لو واجهتك أي مشكلة. وبالتوفيق إن شاء الله.
تم النشر الثلاثاء، ٣٠ ديسمبر ٢٠٢٥
وعليكم السلام ورحمة الله وبركاته يا قمر، أول حاجة أشكرك إنك شاركتيني اللي جواكِ، ده يعني إنك قوية وبتحاولي تفهمي نفسك، وده خطوة كبيرة أوي. حسيت بضيقك وترددك، خاصة إن نصف السنة فات ورفقاتك مضغوطين وأنتِ مش كدا، بس البكاء ده إشارة إن في حاجة محتاجة ترتيب. أنتِ ماشية صح لما بتفوضي ربنا، بس التوكل يجي مع الأخذ بالأسباب. خلينا نرتب اللي جاي عشان توصلي لهدفك (اللي هو إيه بالضبط؟ حدديه دلوقتي، زي "نجاح في الثانوية العامة عشان أدخل كلية معينة"): راجعي خطتك : اكتبي جدول يومي بسيط (مثلاً 4 ساعات مذاكرة مقسمة على موادك، مع 10 دقايق راحة كل ساعة). ابدئي بالمواد اللي فاتت نصفها، وركزي على التلخيص مش الحفظ بس. تابعي تقدمك : كل أسبوع، شوفي إيه اللي خلصتيه وإيه اللي ناقص. لو لقيتِ نفسك بتبكي، قومي صلي ركعتين وادعي ربنا يفتح عليكِ، وخدي كوباية مية أو امشي شوية في البيت. تعاملي مع التيه : سؤال بسيط لنفسك كل يوم: "أنا بعمل إيه النهاردة عشان أقرب من هدفي؟" ده هيخليكِ تشوفي الطريق واضح. أنتِ مش تائهة، أنتِ بس محتاجة خريطة صغيرة. ربنا معاكِ وقادر يقلب الضيق فرح، استمري كدا وهتشوفي النتيجة إن شاء الله. لو عايزة جدول جاهز أو نصائح أكتر، قوليلي. ودوري في فدني على أسئلة مشابهة عن "مذاكرة ثانوية أزهرية" هتلاقي إجابات كتير مفيدة، أو شوفي الخبراء هنا: https://www.fedni.net/experts لو احتجتِ استشارة متخصصة في الدراسة. قوية يا بنتي، هتوصلي! 💪❤️
تم النشر الثلاثاء، ٣٠ ديسمبر ٢٠٢٥
مش عايز اقولك ان الثانوية مش نهاية العالم لإن اكيد ناس كتير قالولك كدة بس فعلا هي مش نهاية العالم، ممكن متكونيش مدركة هي قد اي تافهة دلوقتي بس هي فعلا مستاهلش كل البروباجندا اللي الاهالي عاملينه، فحاولي تذاكري المواد بنظام تحطيه انت وفقا لقدرتك على استيعاب المواد دي و نصيحة مهمة جدا هي انت اللي تذاكريه حلي عليه وقتي والله المستعان
تم النشر الأربعاء، ٣١ ديسمبر ٢٠٢٥
ايوا والله كلام حضرتك حقيقه جدا + جزاك الله خيرا
تم النشر الأربعاء، ٣١ ديسمبر ٢٠٢٥
ربنا يوفقك ومتقلقيش خالص لسة بدري اعملي بس اللي عليكي
تم النشر الأربعاء، ٣١ ديسمبر ٢٠٢٥
صراحة كلامك فيه نوع من الطمأنينه بالنسبالي +جزاكي الله خيرا غاليتي💐
تم النشر الأربعاء، ٣١ ديسمبر ٢٠٢٥
انتي صح الشكوى للناس مذله أما لما تشتكي لربنا هو الي هيحللك كل امورك ويوفقك في حياتك اوعي تسيبي طريق ربنا ابدا وربنا يعينك ويوفقك يارب
تم النشر الثلاثاء، ٣٠ ديسمبر ٢٠٢٥
لا تقلقي الوقت امامك مازال كافي تبدأي من جديد ثقي في الله و توكلي عليه كمان تفعلين الان و بعدين تعالي نعمل بالاسباب شويه، شوفي اي ال بيعطل المذاكره و حاولب تمنعيه، و عاوزك ف يوم كدا تجيبي المواد كلها و تقسميها و تحددي كام درس و باقي كام يوم ع الامتحان و اعملي جدول نظمي فيه الامور دي عشان تلحقي تخلصي ال مطلوب منك بإذن الله، و اقترح تخلي الجمعه يوم حر... بمعني لو في احد ايام الاسبوع اهملتي قليلا تعوضيه الجمعه و مش تحسي بضغط قوي، و افتكري، رُب متأخراً اعانه الله ف سبق، توكلي ع الله و رينا يعينك و يوفقك يااارب و تكوني راضيه عن نفسك و عن النتيجه 🤲🏻... بالنسبه للمذاكره البدايه بتكون صعبه، ولكن حاولي تبعدي عن المشتتات و قولي لنفسك هذاكر 10 دقايق او ربع ساعه فقط و اول ما تدخلي في جو المذاكره هتقدري تكملي ب إذن الله و لكن ابعدي عن التليفون او المشتتات، انا بقول نصائح مش بعمل بيها الصراحه ولكن ربنا يهديني و ان شاء الله تفيدك 😂🤲🏻
تم النشر الخميس، ١ يناير ٢٠٢٦
احلى حاجه انك بتلجأي لربنا ربنا يوفقك وييسر لك امورك ابدأي حاجه بسيطه قولي لنفسك انك هتقعدي تذاكري عشرة دقائق واول ما تقعدي علي الكتاب هتلاقي نفسك اندمجتي وذاكرتي وهكذا و بردو خليك ديما قريبه من ربنا واطلبي منه أنه يعينك على مذاكرتك وبس إن شاء الله خير ما تقلقيش ربنا هيوفقك
تم النشر الخميس، ١ يناير ٢٠٢٦
نا كنت ثانوي ازهري برضه وزيك وبقولك فكك منهم كلهم بيقولو كده حتى لو نتي محصله بس متقوليش لحاد انك مرتاحه ف دراستك عشان مش كل الل حواليكي بيتمنولك الخير
تم النشر الأربعاء، ٣١ ديسمبر ٢٠٢٥
حصل معايا نفس الكلام والله السنة اللي فاتت وكنت بقول ازاي كله بيقول انه مقتول من المذاكرة وانا مش حاسة بأي حاجة بس بعد كدة اكتشفت ان مش كلنا واحد وان الضغط مش واجب يعني وفي `إعدادي هندسة دلوقتي الحمد لله فمتقلقيش كدة كدة هتتضغطي موووت في المراجعة+طالما بتعملي اللي عليكي وبترضي ربنا يبقا خلاص سيبيها على الله
تم النشر الأربعاء، ٣١ ديسمبر ٢٠٢٥
شكرا +جزاك الله خيرا
تم النشر الأربعاء، ٣١ ديسمبر ٢٠٢٥
لعرض السؤال في فدني اضغط هنا