لو سمحتم ممكن تساعدوني وتشجعوني انا مريضه استئصال مراره ولما عملت تحاليل واشاعات وقتها وبعدها بفتره اكتشفت اني عندي مقاومه انسولين وتكيسات ع المبايض والكبد عليه دهون وعندي لوف رحمي ومينفعش ليها اي حاجه لاني كشفت بس المهم ميكترش ومقاليش ع نصايح ولا حاجه وزدت بطريقه بشعه ومعدش عندي ثقه ف نفسي خالص ولا بلاقي لبس وبقابل كلام يضايقني جداً لدرجه كرهت جسمي بس انا اكتر امراضي بسبب وزني كمان انا بدات دايت بقالي كذا يوم بس لو حد عنده نصايح ليا وتشجعوني علشان عندي يآس واحباط ومفيش اراده وخايفه ارجع لنقطه الصفر تاني 🙂
ربنا يشفيكي ويعافيكي يا رب - نصيحة بجد اقطعي العيش والرز والسكر وعيشي علي الخضار بالذات الورقيات والبروتين ومش معني كدا ان الاكل هيبقي طعمة وحش لاء انتي ممكن تبتكري فيه وتعمليه مشوي وهكذا +الميه اهم حاجة هي اللي هتنزلك بطريقة رهيبة وهتحافظ علي جسمك من الجفاف ف الميه ثم الميه ثم الميه ثم النفس نظمي نفسك وخدي شهيق من الانف وعدي 8 عدات وبعدين خرجي زفير من الفم دا بيعلي الحرق في الجسم لانك بتاخدي كمية اكسجين كويس ودا اللي بيحرق + الرياضة مش لازم جم تقدري تعملي كارديو في البيت بيحرق جامد وتابعي (سارة بوب فيت )واعملي زومبا وان شاء الله هتلاقي نتائج حلوة اوي ان شاء الله بس اهم حاجة الاستمرارية
تم النشر الخميس، ٢٣ أبريل ٢٠٢٦
الف سلامه عليكي ، انتي محتاجه دكتور غدد صماء: لازم تتابعي مع دكتور متخصص يظبط ليكي علاج مقاومة الإنسولين، لأن لو الإنسولين عالي في جسمك، الوزن مش هينزل مهما عملتي دايت، والعلاج ده هو اللي هيكسر الحلقة دي. الأكل هو الدواء ابعدي تماماً عن (السكر الأبيض، الدقيق، والزيوت )(قللي نشويات وكلي بروتين وخضار كتير). الصيام المتقطع ده سحر لحالتك، ابدأي بساعات صيام معقولة (منهم ساعات النوم) وزوديهم بالتدريج، ده بيدي فرصة للكبد يتخلص من الدهون وللإنسولين إنه يقل. الحركة البسيطة: مش مطلوب منك مجهود جبار، مشي نص ساعة يومياً كفاية جداً كبداية عشان يحسن الحرق ويحسن مودك خليكي صبورة مع جسمك لأنه محتاج وقت يلم جراحه هو مش عدوك: جسمك ده "شريكك" اللي شايلك، هو دلوقتي تعبان ومحتاج مساعدة مش محتاج جلد ولا كره.على فكره اختي عندها نفس مشكله الانسولين والله الوزن مبيحددش قيمتك ولا جمالك: الناس كدة كدة بتتكلم كلامهم ارميه ورا ضهرك ، اللي بيعلق على وزنك ده إنسان ناقص، متخليش رأيه يبقى هو الحقيقة اللي بتشوفي بيها نفسك المرض مش ذنبك مقاومة الإنسولين وتكيس المبايض دي لخبطة هرمونات غصب عنك، زيها زي أي تعب، محتاجة علاج مش خجل. حبي نفسك عشان تتغيري التغيير بييجي من "الحب"، مش من "الكره". لما تحبي نفسك هتديلها أكل صحي وهتتحركي عشان تفرحيها، مش عشان تعاقبيها.وربنا يشفيكي يا حبيبتي وتبقي احسن يارب
تم النشر الخميس، ٢٣ أبريل ٢٠٢٦
شفاكِ الله وعافاكِ مفيش بأس ولا حاجه حاولي تظبطي الاكل وقللي نشويات يعني العيش والارز وهكذا والسكر والحلويات حاولي يبقى ليكي معلقتين سكر في اليوم واكثري من الخضار والفاكهة ونظمي مواعيد الاكل وبلاش تاكلي بالليل متأخر والأفضل اخر وجبه تبقى الساعه 7 او 8 ولو حسيتي بجوع بالليل تاكلي ذبادي أو طبق سلطه والصيام المتقطع لو تقدري واشتري شاي البقدونس والكرفس واشربي منه ولو تقدري من غير سكر يبقى افضل او التحليه بعسل ابيض والشاي دا هينزل الميه اللي في جسمك والرياضه أساسي جدا وخاصة المشي نص ساعة يوميا ولو تقدري تزودي يبقى تمام. وان شاء الله لو التزمتي هتحسي بالفرق لكن ما تتسرعيش لان مش كل جسم بيخس زي التاني يعني ممكن تخسي بسرعه او ببطئ حسب طبيعة جسمك بس الاكيد انك لو التزمتي هتخسي إن شاء
تم النشر الجمعة، ٢٤ أبريل ٢٠٢٦
يا حبيبتي، أنا ذكية هنا معاكِ، وأشعر بوجعك تمامًا 💕. أنتِ قوية جدًا إنكِ بدأتِ الدايت رغم كل ده، وده خطوة كبيرة مش هترجعي منها للصفر أبدًا! اليأس ده طبيعي في البداية، بس هتقاوميه بإذن الله. تشجيع سريع: افتخري بنفسكِ : كل يوم تقاومي فيه الرغبة في الأكل الزايد، اكتبي "شكرًا يا رب" في مذكرة صغيرة. الثقة هترجع لما تشوفي النتايج الصغيرة (مثل ملابس أوسع شوية بعد أسبوعين). نصايح عملية لدايتكِ (مع حالتكِ الصحية): الأكل : ركّزي على وجبات صغيرة كل 3 ساعات، منخفضة الكارب (للمقاومة والتكيس والكبد الدهني): فطار: بيض مسلوق + خيار + حفنة لوز. غدا: دجاج مشوي + سلطة خضراء + زيت زيتون. عشا: سمك أو توفو + بروكولي مطبوخ. تجنّبي: سكريات، خبز أبيض، عصائر. اشربي 3 لتر ماء يوميًا. حركة : مشي 20 دقيقة يوميًا بعد الصلاة (ابدئي بـ10 لو صعب)، ده مثالي للكبد والهرمونات بدون إرهاق. تتبّع : استخدمي تطبيق مثل MyFitnessPal للكالوري (هدف 1500-1800 يوميًا حسب وزنكِ)، وزني نفسكِ أسبوعيًا مش يوميًا. الـ"لوف الرحمي" ده يحتاج متابعة طبية دقيقة، فكشّفي عند دكتور نسا متخصص عشان يقيِّم الدايت معاه. لو عايزة نصايح أكتر، ابحثي في فدني عن "دايت لتكيس المبايض" أو روحي للخبراء هنا: https://www.fedni.net/experts – في خبراء تغذية ونساء هيساعدوكِ شخصيًا. أنتِ مش جسمكِ بس، أنتِ روح قوية هتغلب! ابدئي النهارده، وردي عليَّ بعد أسبوع إيه اللي حققتهِ 😘. ربنا يشفيكِ وييسر أمركِ. (يرجى ملاحظة أن هذه إجابة آلية بواسطة الذكاء الصناعي ولا تغني عن زيارة الطبيب في الأمور الصحية)
تم النشر الأربعاء، ٢٢ أبريل ٢٠٢٦
شفاكِ الله وعافاكِ عامةً أنا جنبك لو عايزة تتكلمي في أي حاجة بلاش يأس الله يرضى عنك اللهم آمين 🫂🤍أما باقي السؤال في دكاترة هنا إن شاء الله يفيدوكِ لا تيأسي كلنا جنبك بجد
تم النشر الخميس، ٢٣ أبريل ٢٠٢٦
لعرض السؤال في فدني اضغط هنا