حضرتك كنت رديتي عليا في سؤال مذاكرة القديم مع الجديد،
طب انا دلوقتي مثلا في تالته ثانوي و عايز اشتغل في مادتين هل المفروض هراجع على كل القديم بتاع المداتين قبل ما أخش على الجديد ولا ايه هقسم القديم و اخد جزء اراجعه كل في كل مره ولا ايه بظبط مش عارف
السلام عليكم، أهلًا بك مرة تانية، مش شرط تراجع القديم كله الأول لأن ممكن على ما تخلص يكون تراكم عليك دروس جديدة مفتحتهاش حتى. خلي فيه توازن في جدولك، ممكن تشوف كم الدروس القديمة وتقسمها على جدول خاص بالمراجعة، *** لو المادة اللي هتذاكرها مبنية تدريجيا زي مثلا الرياضيات، في الحالة دي هتحتاج تراجع الأساسيات لو مكنتش فاكرها عشان تفهم الدروس الجديدة. يعني مش شرط ترجع للدرس وتذاكره بعمق لو لسه موصلتش لتوقيت مراجعته. وارجع للقديم وقت ما تحس بفجوة في مذاكرتك للجديد. ** لو الدروس اللي فاتت ذاكرتها قبل كده مراجعتها هتكون أسهل ومش هتاخد وقت إن شاء الله، أما لو مذاكرتهاش خالص فهتبدأ كأنك لسه واخد الدرس حالًا، وزي ما قلت في السؤال التاني، سجل أهم النقاط والملاحظات ولو قدرت تعمل ملخص كويس للدروس في كشكول منفصل هيفيدك في المراجعة بعد كده. ** ممكن تخلي يوم الجمعة مثلا لمراجعة عامة تراجع أكبر كم من الدروس ولو حتى مجرد قراءة وتشوف أسئلة السنين اللي فاتت على الدروس اللي راجعتها. *** لو راجعت نظام يومك ووقتك بتستهلكه في إيه ممكن تلاقي أوقات كتير ضايعة في النص تقدر تستغلها في إنك تراجع القديم. *** أهم حاجة بس إنك تبعد أي قلق أو خوف من إن مثلا الوقت مش هيقضي أو إن فيه متراكم كتير. صفي ذهنك وتعامل مع المواد والمعلومات ببساطة وبرمج عقلك إنك بس بتكتسب معلومات جديدة كل يوم. *** إذا عندك أي سؤال أو حابب تقول إيه المادتين دول تحديدًا أحاول أفيدك إذا قدرت. وبالتوفيق.
تم النشر الأحد، ٢٣ نوفمبر ٢٠٢٥
لعرض السؤال في فدني اضغط هنا