السلام عليكم، أولا شكرا جدا إنك وجهتِ لي السؤال وأرجو إني أقدر أفيدك إن شاء الله. بالنسبة لإحساسك إن الوقت بيجري فده طبيعي، غالبا بيكون التوتر والقلق وراء الشعور ده. هو صحيح الأيام بتجري بس ده ملوش علاقة بإحساسك الحالي لأن الإنجاز في اليوم بيخليكِ تحسي إن حتى لو اليوم مر بسرعة فأنتِ استغليتِه. وأول خطوة عشان ده إنك تنسي خالص فكرة الوقت بيجري ومش لاحقة أخلص.. كل تركيزك يكون على المهمة اللي وراك. ولا تفكري في كمية المراجعة أو الحاجات اللي لسه مخلصتيهاش.. ركزي على جزئية جزئية. طول ما أنتِ حاسة إن فيه جبل قدامك مش هتقدري تتحركي وهتحسي إنك واقفة مكانك ووقتك بيجري، لو بس فكرتِ في الخطوة اللي قدامك وبعدين الخطوة اللي بعدها هتتحركي. *** مشكلة النوم دي طريقة هرب من عقلك.. عقلنا مصمم إنه يحمينا من الألم والضغط فأي شعور بالمسؤولية هيولد عندك ضغط وألم وأسهل حاجة التسويف بأي شيء ومنها الهروب للنوم. الفكرة كلها في التحايل على العقل... بمجرد ما تفكري إن المذاكرة تقيلة وواجب صعب وورايا كذا وكذا هتلاقي نفسك عاوزة تنامي أو تهربي لأي حاجة حتى لو الشرود أثناء المذاكرة. فكل اللي أنتِ محتاجاه خدعة نفسية، إنك تتحايلي على عقلك عشان ميحسش إن فيه حمل كبير منتظره. *** فيه طريقة البومودورو اللي هي ٢٥ دقيقة مذاكرة وخمس دقايق راحة... لو هتحسي إن الخمسة وعشرين دقيقة كتير ممكن تقولي لنفسك هقعد ١٠ دقايق بس أو هقرأ الصفحة الفلانية بس من الدرس. صدقيني عن تجربة، أصعب خطوة هي إنك تقعدي على المكتب وتبدأي بعدها مع التركيز هتنسي نفسك. **** فكرة إنك مش بتنجزي كتير، ممكن لسوء تقسيمك للوقت أو إنك بتسرحي أثناء المراجعة أو بتسوفي أو بتراجعي بطريقة بتستهلك وقت ومحتاجة تعدليها لطريقة أذكى.. حاولي النهاردة وبكرة تراقبي سلوكك وتشوفر إيه اللي بيضيع الوقت من غير إنجاز. *** فيه قانون ممكن يفيدك في الإنجاز وعدم المماطلة اسمه ( قانون باركنسون ) وهو إن ( العمل يتمدد ليملأ الوقت المتاح لإنجازه ) بمعنى إن ممكن درس ياخد منك نصف ساعة مذاكرة أو أقل ونفس الدرس لو حددتِ له ساعة أو ساعتين هتلاقيه بيمد معك لساعة وساعتين. ولو حددتِ له نصف ساعة هيقصر معك لنصف ساعة. فجربي كده تقسمي وقت المهام صح عشان متمدش معك. **** فيه طرق ذكية للمراجعة ممكن تبحثي عنها وتختاري اللي يناسبك. شوفي المقال ده فيه نصائح هتفيدك إن شاء الله. https://www.for9a.com/learn/أفضل-النصائح-لإتقان-فن-المراجعة-للامتحانات https://aladwaa.com/ar/541994/ذاكر-بذكاء-وليس-بكمية/ *** لو هنصحك بحاجة من تجربتي مع الامتحانات فهو إنك: كل درس تراجعيه هاتي أسئلته من امتحانات السنين السابقة وحليها. جربي طريقة المراجعة المتقطعة (التكرار المتباعد) هتفيد جدا في تذكر المعلومات.. ده فيديو عنها https://www.youtube.com/watch?v=Z-0OpHiw5DU نامي كويس ليلة الامتحان عشان تروحي فايقة ومركزة.. لو مذاكرة ٥٠٪ بس نايمة كويس هتحلي أفضل من لو مذاكرة ١٠٠٪ ومش نايمة كويس. لو انت مسلمة، من هنا للامتحان حاولي تواظبي على سورة البقرة يوميا (قسميها على الأيام عادي لو صعب تقرأيها كاملة) وهيفرق جدا معك لو فصلت بين فقرات المذاكرة بقراءة آيات من القرآن (زاحمي المذاكرة بالقرآن ربنا هيبارك إن شاء الله. ******** حاولت قدر الإمكان أجاوبك وأرجو أكون أفدتك. لو عندك نقاط عاوزة تستفسري عنها أو أسئلة تانية قولي لي وهجاوب إن شاء الله. بالتوفيق.❤️❤️
ده حصل معايا فعلا مع نظام قائمة المهام وكنت بحس بالإحباط لما ألاقيها فاضية أو حاجات صغيرة بس أنجزتها فيها عشان كده بقيت اعتمد أكتر على البلوكينج مع دمجه بقائمة مهام داخل البلوكينج نفسه بحيث آخد مزايا النظامين وأتجنب السلبيات... ده كان سؤال على فدني بخصوص أنظمة تقسيم الوقت فيه تفصيل أكبر لو حابة تستفيدي.. وقت ما تبقي فاضية اقرئي الإجابات وإن شاء الله ربنا يوفقك وييسر لك أمورك. ومفيش تعب خالص، سعيدة إني ساعدتك ولو شوية.❤️❤️ https://www.fedni.net/q/48372942/أي-نظام-أفضل-لإدارة-الوقت
تم النشر الخميس، ٢٣ أبريل ٢٠٢٦
انا حاولت قبل كده اعمل تودو ليست بس بقت تدايقنى اكتر إلى هو ساعات اعمل حاجه حاجتين أو مفيش خالص فقلت خلاص بلاش هسيبها بوقتها بردو كانت بتوترنى ومش عارفه اركز فى إلى بعمله لو اخترت ماده معينه اعملها بفضل افكر طب والباقى وامتى وازاى ...هجرب زى ما قولتيلى موضوع البلوكات احدد بالظبط اى إلى عايزاه... وشكرا جدا تعبتك معايا ❤️❤️
تم النشر الخميس، ٢٣ أبريل ٢٠٢٦
العفو، إن شاء الله تساعدك النصائح. بالنسبة لتقسيم الوقت فمش عارفة بخصوص المواد اللي عندك وقدرتك أنت مقدرش أحدد لك بس عموما فيه نقاط تساعدك في التقسيم زي أولوية المواد وطاقتك.. حددي المواد حسب الأولوية إيه أصعب بالنسبة لك وإيه أسهل.. الأصعب ممكن تعطي لها وقت أكبر وتختاري لها الوقت اللي تكوني لسه في كامل طاقتك وتركيزك... ممكن بدل قائمة المهام تتبعي نظام البلوكات يعني تقسيم اليوم على بلوكات زمنية من الوقت كذا لكذا المادة الفلانية وهذاكر فيها كذا أو هحل أسئلة على الفصل الفلاني منها ومن الساعة كذا لكذا هيبقى مخصصة لمراجعة كذا... البلوك متسيبهوش عايم يعني متقوليش هذاكر مادة كذا لأ تبقي محددة هتعملي إيه فيها. فيه طرق تساعدك طبعا تختصري وقت المراجعة ممكن يكون اتذكر بعضها في المقالات... عن نفسي كنت ببدأ بقراءة الدرس قراءة سريعة أو لو شرح فيديو أسمعه بسرعة وبعدين أفصل شوية صغيرين وأرجع للدرس بمراجعة تانية أبطأ وبعدها حل أسئلة على اللي راجعته... جربي كده اليومين دول ولو حاجة وقفت معك قولي لي.
تم النشر الخميس، ٢٣ أبريل ٢٠٢٦
هو بس اكتر حاجه مش عارفه اعملها نهائى تقسيم الوقت وانى اقسم إلى عليا ازاى والماده تاخد قد اى وهكذا
تم النشر الخميس، ٢٣ أبريل ٢٠٢٦
شكرا جدا ليكى وهعمل زى ما قولتيلى وهشوف اكتر حاجه بتضيع وقت وانا بذاكر وشكرا مره تانيه
تم النشر الخميس، ٢٣ أبريل ٢٠٢٦
لعرض الإجابة في فدني اضغط هنا