أنا لسه داخلة أولى كلية تمريض جامعة الأزهر ومش عارفه ناس هناك وأنا كنت شخص اجتماعى جدا مرة واحدة بقيت ولا عارفه اتكلم ولا عارفه أرد على حد وبرضو الدراسة مرة واحدة قلبت انجليزي وحاسة أنى مش عارفه حاجات كتير وفي نفس الوقت عايزة اطور من نفسى وأبدا اتعلم لغات زى ألمانى مثلاً واخد كورسات تفيدنى في المجال عايزة ابنى CV ليا من وأنا لسه في سنه أولى لحد ما اتخرج ممكن حد يفيدني
السلام عليكم، أولا ربنا ييسر أمورك ويوفقك في دراستك وحياتك عامة. بالنسبة لتفاعلك الاجتماعي فالحكاية مش إنك بطلتِ تكوني شخص اجتماعي، هو أمر طبيعي بعد انتقالك لبيئة ووضع مختلف، مكان جديد وناس جديدة ونظام دراسة مختف، فوضعك طبيعي ومتضغطيش على نفسك ومش محتاجة من أول أسبوع تبقي اجتماعية. الصداقات والتعاملات في الجامعة بتيجي بالتدريج وممكن تتعرفي مع الوقت على زميلة وبعدها شبكة علاقاتك تتوسع. خدي الأمور ببساطة وعلى طبيعتك، بالتدريج ممكن تفتحي كلام مع زميلة جنبك أو لو واحدة سألتك عن حاجة ردي عادي حتى لو حسيتِ بتوتر أو خجل، مع الوقت هتتعودي، لكن برضه خدي بالك بعد كده وأنتِ بتختاري زميلات وصديقات الدراسة وتأكدي إنك مصاحبة ناس كويسة ويكونوا بيشجعوا على المذاكرة والتفوق. **** بالنسبة للإنجليزي، فعادي برضه، مش محتاجة تكوني ممتازة ولا متقنة للإنجليزي عشان تبدئي تدرسي تمريض، الكليات الطبية وحتى الكليات التانية المعتمدة على الإنجليزي طلاب كتير بيبدأوها ومستواهم مش كويس بالإنجليزي لكن مع الاستمرارية مستواكِ بيتحسن وبتحفظي المصطلحات الطبية المطلوبة وبتتعودي على الدراسة باللغة. ممكن تخصصي مثلا نصف ساعة يوميا لحفظ المصطلحات الجديدة ومراجعتها وكمان حاولي تسمعي فيديوهات طبية أو تمريضية بالإنجليزي ولو عشر دقائق يوميا. ممكن تشوفي الفيديو ده عن دراسة التمريض بالإنجليزي وإزاي تتعاملي معها.👇👇 https://www.youtube.com/watch?v=vRLVrdSWnGw ** وعامةً التمريض والمجالات الطبية بتعتمد اكتر على المهارات المهنية والتواصل والمهارات الاجتماعية مش مجرد شهادة. إن شاء الله حد من اللي درسوا تمريض يفيدوكِ من ناحية الكورسات وعمل السيرة الذاتية والتخطيط للنجاح المهني. بس عموما حطي في بالك إن مش لازم تحققي كل حاجة من أول سنة ولا تتعلمي كل المهارات واللغات اللي عاوزاها في نفس الوقت، رتبي أولوياتك وامشي واحدة واحدة وإن شاء الله مع نهاية الدراسة تكوني أسستِ نفسك واستعديتِ للحياة المهنية والنجاح اللي عاوزة تحققيه. تابعي كمان قنوات أو جروبات دراسة التمريض وأكيد هتلاقي فيها معلومات اكتر. بالتوفيق إن شاء الله. 💚💚
تم النشر السبت، ٣ أكتوبر ٢٠٢٦
أهلاً بيكِ يا قمر، ومبروك عليكِ بداية السنة الجامعية في كلية التمريض بجامعة الأزهر. اللي بتمرّي بيه طبيعي جدًا، خاصة إن التحول من المرحلة الثانوية للجامعة بيجي معاه تغييرات كتير في اللغة والجو الاجتماعي والضغط الدراسي. هقدملك خطوات عملية تساعدك تتعاملي مع المواد وتطوري نفسك في نفس الوقت. ابدئي بخطوات صغيرة في الجانب الاجتماعي عشان ترجعي تتواصلي تدريجيًا. حاولي تجلسي في الصفوف الأمامية وتشاركي بأسئلة بسيطة زي "هل فهمتِ النقطة دي؟" أو "ممكن أشوف مذكراتك؟"، وكمان ابحثي عن مجموعات دراسية صغيرة داخل الكلية أو عبر التطبيقات الجامعية. هذا يساعدك تبني علاقات طبيعية مرتبطة بالدراسة بدون ضغط. بالنسبة للمواد اللي تحولت للإنجليزي، قسمي الوقت يوميًا: اقرئي المحاضرات بترجمة سريعة أولاً ثم ركزي على المصطلحات الطبية الشائعة باستخدام قواميس متخصصة، ومارسي الاستماع لفيديوهات تمريضية قصيرة بالإنجليزي. هذا يقلل الشعور بالعجز تدريجيًا. عشان تطوري نفسك وتبني CV قوي من السنة الأولى، ركزي على مهارات مرتبطة بالتمريض مثل الإسعافات الأولية أو التواصل مع المرضى، وخذي كورسات أونلاين مجانية أو مدفوعة في هذه المجالات. أما تعلم الألماني فهو فكرة جيدة لكن أجليه للإجازات أو بعد ما تستقري في الدراسة، وابدئي بتطبيقات بسيطة لمدة 15 دقيقة يوميًا. سجلي كل نشاط تقومين به (مثل ورش عمل أو تطوع في المستشفيات الجامعية) في ملف خاص، وأضيفيها للسيرة الذاتية مع التركيز على المهارات المكتسبة. ابحثي عن أسئلة مشابهة على فدني للحصول على تجارب إضافية من طالبات أخريات. أنتِ قادرة على التقدم خطوة بخطوة، وكل يوم بيحسن الوضع.
تم النشر الخميس، ١ أكتوبر ٢٠٢٦
لعرض السؤال في فدني اضغط هنا