سلام عليكم ...
انا عندي 17 سنة يعني تانية ثانوي .. انا من صغري واهلي قفلوا عليا طول طفولتي حرفيا مش فاكر اي حاجة منها غير اني كنت بتكسف اكتر من الطبيعي وكنت بتوتر لما بكلم اي حد
تلات سنين اعدادي شوفت اسوأ ايام حياتي لاني مكنتش بعرف اتعامل ف طلعت منها من غير ولا صاحب ومكنتش بعرف ادافع عن نفسي في أي موقف لاني متعودتش ع الضغط ده
ومع ذلك كان فيه حاجات حلوة في حياتي كنت قريب من ربنا وخاتم القرآن ومحافظ على صلواتي وبذاكر وبعدت عن الناس تدريجيا عشان متعبش نفسيا اكتر
كبرت ودخلت ثانوي وانا الواد العبيط الاهبل اللي مشافش دنيا وعشان انا فعلا كدة عملت اغبى حاجة ممكن واحد زيي يعملها
اتغلبت على خوفي وجربت وعملت صحاب ومسكتش حسيت اني اتحب فعلا ودخلت لبنت كان عيني عليها
كل ده مكنش هدفه حب ولا اني عاوز كدة انا كل ده بحاول اثبت لنفسي اني كويس واتحب لاني عندي عقد كتير منهم دي
فطبعا لاني مش سوي نفسيا اتسبت وصحابي سابوني في اكتر وقت كنت محتاجهم فيه
هو انا مقولتلكش انا عشان اعمل كل ده أهملت دراستي وصلاتي ونسيت القرآن اللي كنت حافظه
فيا ريتني رجعت لنقطة الصفر انا بدأت من تحت الصفر والمفروض اني اتأقلم على دايرة صحاب مبيحبونيش والمفروض اني ادخل الفصل كل يوم اشوف البنت اللي محبتنيش لا واذاكر وابقا حاجة عشان ارضي اهلي
تعبت ومحتاج مساعدتكم لو مكاني هتعملو ايه وبالله عليكم بلاش كلام تنمية بشرية وتنظير
السلام عليكم، ١٧ سنة لسه صغير والأوان مفاتش أبدا إنك تتغير وتصلح كل ده. إيه يعني لو رجعت لتحت الصفر ولا أبعد... كلنا بنتعرض لانتكاسات وممكن تكون انتكاسات كبيرة لكن مش معناه إنها النهاية ولا إنك تقول خلاص أنا ضعت. كلامك دلوقتي وإحساسك طبيعي ومفهوم بس مش صح أبدا إنك تغرق فيه. ربنا غفور رحيم، خلي ده قدام عينيك عشان الشيطان ميستغلش مشاعرك وإحباطك بإنه يغرقك أكتر ويخليك تيأس من رحمة ربنا. ** اللي حصلك ده ممكن تبص له من منظور تاني، بدل ما تفكر إنك ضيعت نفسك واتخذلت من أصحابك والبنت اللي حبيتها ليه متفكرش إنه كان درس قاسي عشان تفوق وربنا يرجعك له وتثبت على الصح بعد ما عرفت الغلط وواجهت نتائجه المؤلمة. وكل ما تفتكر الألم الحالي هتخاف تكرر الغلطة. احمد ربنا وارجع استغفره عن كل اللي فات وقطع الصفحة اللي مضت وابدأ صفحة جديدة. ** اللي تخلوا عنك عمرهم ما يستحقوا يكونوا أصحاب أو لهم مكان في حياتك فاحمد ربنا وافتكر (وعسى أن تكرهوا شيئًا وهو خير لكم وعسى أن تحبوا شيئاً وهو شر لكم والله يعلم وأنتم لا تعلمون) *** عادي لو أنت دلوقتي تحت الصفر، مفيش مشكلة، ابدأ من دلوقتي وخطوة خطوة رجع كل الحاجات الكويسة اللي كنت بتعملها. أهم حاجة تتوب وبعد كده تستعين بالله بصدق وهو هيعينك إن شاء الله. ** بالنسبة لتخطي التأثير السلبي اللي حصل نتيجة تربية الأهل فإن شاء الله الخبراء النفسيين هنا يدلوك بخطوات عملية إزاي تعالجه وممكن تتواصل حتى مع أي خبير وتحل المشكلة بإذن الله. وربنا يوفقك.
تم النشر الاثنين، ٢٧ أبريل ٢٠٢٦
وعليكم السلام ورحمة الله وبركاته... لو مكانك كنت هرجع اصلى و احفظ قران و ارجع اكون انسان كويس تانى و ابعد عن صحابى دول و اقطع علاقتى بالبنت و ابدا اشوف اى الحاجه اللى مش عجبانى ف نفسي و اغيرها و اشوف صحاب بجد و ارجع اذاكر و انسى الماضي لانه كدا كدا عدى و هفكر ف مستقبلى و كمان ابدأ الم شتات نفسي عشان اعرف ابدا تالته و اجتهد ف دراستى عشان اكون وسط ناس احسن ناس مثقفه و تعرف الاصول و اختار شريك حياه كويس علشان اعرف اعيش أطفالى بعدين حياه احسن من اللى عشتها و احافظ عليهم.....كنت هعمل كدا لو انا مكانك... سيبك من صحابك لانهم كدا كدا دول مش صحاب.. صاحب ناس كويسه غيرهم ناس زيك و صاحبهم مش ف وقت انت محتاج فيه لصحاب بس ف وقت تلاقى فيه صحاب كويسه..و احاول اسمع بودكاست لتطوير الذات... على فكرة الكسوف مش حاجه وحشه بل دى حاجه في قمة الادب الصراحه.... دا رايي
تم النشر الاثنين، ٢٧ أبريل ٢٠٢٦
وعليكم السلام ورحمة الله أنا حاسة بتعبك جدًا، وأنت شجاع إنك فتحت قلبك كده. أنت لسة 17، وقتك كتير عشان ترجع أقوى. لو مكانك، هعمل كده خطوة بخطوة، عملي 100% بدون كلام فاضي: الصلاة والقرآن أول حاجة : ابدأ النهارده بالفجر في وقته، لوحده في أوضتك. صلِ الخمسة كلهم في أوقاتهم، حتى لو قصير. خد قرآنك، اقرأ صفحة واحدة يوميًا بعد الفجر، وراجع حفظك 5 آيات بس كل يوم. ربنا غفور، التوبة دي هتريحك فورًا. الدراسة : اعمل جدول بسيط: استيقظ 5 صباحًا، صلِ، ذاكر ساعتين مواد أساسية (رياضة/عربي/إنجليزي حسب نظامك) قبل المدرسة. بعد الرجوع، ساعتين تانيين. حدد هدف أسبوعي زي "أحل 20 مسألة رياضة". بلاش تدرس كتير مرة واحدة، قسمها. الأصحاب : قول لنفسك "دول مش ليا"، ابتعد تدريجيًا – رد قصير على كلامهم، ماتدخلش في مشاكلهم. لو سابوك، خلاص، ركز على دراستك وهتلاقي ناس أفضل بعدين. البنت : غض بصرك تمامًا، ماتبصش ليها ولا تفكر فيها. لو دخلت الفصل، انظر لكتابك أو الأرض. امسحها من بالك، ده مش حب، ده وهم هيروح لوحده. الروتين اليومي : نام 10 مساءً، ماتقعدش على موبايل بعد 9. مارس رياضة 20 دقيقة يوميًا (مشي سريع أو تمارين بيت). كل وجبات منتظمة، اشرب مية كتير. كل يوم قبل النوم، اكتب 3 حاجات عملتها صح (حتى لو صلاة أو ذاكرة). مع أهلك : قول لأبوك أو أمك باختصار "أنا تعبان نفسيًا، عايز أركز على الدراسة، ساعدوني". هما هيفرحوا ويدعموك. ابدأ النهارده بالصلاة والقرآن، هتحس فرق في يومين. أنت مش تحت الصفر، أنت عند نقطة البداية الحقيقية. لو عايز تتابع أو تحتاج خبير نفسي/ديني، روح على https://www.fedni.net/experts وابحث هناك. قولي إيه رأيك في الخطة دي؟ ربنا يوفقك يا رب. 💪
تم النشر الاثنين، ٢٧ أبريل ٢٠٢٦
لو مكانك كنت هرجع لربنا واحفظ القرآن تاني (دا أهم حاجة) وألغي الصحوبية اللي مش بتجيب غير الأذى وعلاقتك بالبنت اللي مش بتجيب غير الذنوب والأذى برده، وسبب المشكلة أنك كنت عايز تكسر حتة. أنك مش اجتماعي وكدا فالصح أنك تحتك عشان تبني ذكاء اجتماعي مع الناس مش عشان تبني صحوبية لأن لو الناس مش كويسين فدا رمي في وادي الهلاك والوحدة خير من جليس السوء، وفيه كتاب هيفيدك جدا اسمه كيف عاملهم، المقصود هو الرسول عليه الصلاة والسلام ، وممكن تحتك بالناس بحيث يكون عندك خبرة في التعامل لكن مش لازم تبني صحوبية غير مع واحد أو اتنين كويسين دا لو موجود، وبالتوفيق يا حافظ القرآن
تم النشر الاثنين، ٢٧ أبريل ٢٠٢٦
وعليكم السلام . بص مش هقولك مكنش ينفع اللي عملتو لأن اللي حصل حصل خلاص .ابدأ من دلوقتي مش اول م تحس نفسك مستعد نفسيا لا أبدأ الاول صلي وارجع للقرآن واعمل حاجه انت بتحبها بعيد عن المذاكرة لو بتحب الرياضه انزل جيم لو بتحب الرسم ارسم ايًا كانت اي الحاجه اقعد واعلمنا وفضي دماغك من اي أفكار سلبيه واصلا انت دلوقتي ف سن اسمو سن التجارب هتعدي بأسوأ من كدا وهتتقلب علي وشك وهترجع تقوم تاني ف بلاش استسلام من دلوقتي انت دلوقتي هتعالج نفسك بنفسك من ناحية الدراسه شوف اي اكتر ماده كنت بتحبها وحاول تبدأ بيها وقت المذاكرة ممكن تحمسك شويه حط ل نفسك ولو نص ساعه تنزل تتمشي فيها او تجري المهم تفصل بعيد عن البيت . ومن ناحية المدرسه خش عادي من غير كلام وبصلها بصة اللامبالاة عادي واقعد وجاوب كدا كدا كلها شهرين ومش هتروحها تاني و حاجه اخيرة حاول تعيش سنك تعمل الحاجه اللي بتحبها هو اه في شوية أولويات بتكون للاهل بس انت برضو المسؤول عن سعادتك وكدا كدا هتقابل ناس كتيييييير وهتتعرف علي ناس اكتر
تم النشر الثلاثاء، ٢٨ أبريل ٢٠٢٦
وعليكم السلام ورحمة الله وبركاته، بس القرآن عامةً بيقوي الشخصية وأنت بتقول كنت حافظ القرآن، الفكرة أن أنت كان معاك قوة ولكن كنت فاكر إن دي مش قوة، يعني كنت محافظ على صلواتك والقرآن، كان ممكن تتدعي وتطلب من ربنا صحبة صالحة كان هيكرمك أكيد، ولكن أنت ظنيت إن الـ أنت عليه ضعف بس هو كان قوة، بس عادي ممكن ترجع وتحافظ على صواتك وترجع تراجع القرآن، وتدعي ربنا وربنا هيرزقك بصحبة صالحة تعينك وتكون سوية نفسية، أنت أكيد تعلمت من الفات ممكن تبدأ بداية جديدة، الصلاة في المسجد هتعرفك على ناس صالحة وأقرأ كتير في مجالات مختلفة وأنت شخصيتك مش ضعيفة بالعكس أنت عندك إحساس بدا ولكن أبدا تعامل عادي المهم الدعاء وإن شاء الله قريبًا تيجي هنا وتقولنا عن صحبتك الصالحة أهم حاجة تكون صحبة صالحة ودي مش موجوده غير في المساجد وحلقات القرآن
تم النشر الثلاثاء، ٢٨ أبريل ٢٠٢٦
توب لربنا الاول والتوبة دي عشان نفسك ربنا مش محتاجك ولا محتاج لتوبتك وارجع صلي وحافظ على صلاتك وراجع القرآن واهتم بمذاكرتك وواجه خطاءك عادي الانسان بيغلط المهم انه يتعلم من غلطه لسه الدنيا ما خلصتش ولسه معاك فرصه تبقى احسن مماكنت . البنت اللي ماحبتكش لو حبتك يعني كنت ها تتجوزها اكيد لا عشان لسه في التعليم فالحب دلوقت غلط . بص هو مش غلط بس تصرفك غلط . انت مش بتذاكر عشان اهلك اولا انت بتذاكر عشان نفسك وهما عاوزينك عشان نفسك وعشان الاسلام والمسلمين وهلك . يمكن ربنا صرف عنك شر وبيأدبك عشان تتعلم
تم النشر الاثنين، ٢٧ أبريل ٢٠٢٦
كلنا بنغلط وكلنا بنقع بس الاهم نرجع تاني وانت شخص كنت عارف كلام ربنا كويس وربنا اذاقك حلاوه الايمان ف انت عشان بس حسيت انك لوحدك ف انت حاولت تدخل ناس حياتك هما ميستحقوش عشان نقص معين من الاهل لكن الفتره دي كلو بيحس بوحده وانو غير مرغوب لكن ارجع لربنا وصلي وراجع حفظك والله ما في حاجه هتنفعك غيرو وخليك حاطط ف دماغك ديما اننا جينا الدنيا عشان ندخل الجنه وان هييجي وقت ربنا هيعوضك فيه عن الوحده دي بشخص يستاهل فعلا انو يكون معاك بلاش تبهدل قلبك بدري واشغلك وقتك متسبش نفسك فاضي والدنيا هتبقي تمام
تم النشر الاثنين، ٢٧ أبريل ٢٠٢٦
لعرض السؤال في فدني اضغط هنا