عندي مشكله كبيره بالنسبالي جدا . انا واحده المفروض اني داخله سنه مصيريه و مش محتاجه اقول اني لازم احط كل تركيزي في اتجاه واحده وهو المذاكره . ف الموضوع اني السنه اللي فاتت شوفت اكونت واحد على انستا و كان يعني من صوره جميل و الكلام دا بس الموضوع عدا و خلاص .
بعدها بتقريبا اسبوعين قابلت الشخص دا على الحقيقه و من هنا بدأ كل حاجه بقا بقيت الى حد ما معجبه بيه و دايما دماغي بتفكر فيه و خلاص مع انو عمره ما بصّ ليا أو أعطى اي اشاره انو واخد بالوا مني حتى (مع العلم ان أنا شخص ملفت جدا و دايما محط أنظار و مش بشكر في نفسي والله بس بقولكوا الجزئيه دي عشان حسيتها مهمه) و فات أقل من شهرين و بطلت اشوفوا و مع ذلك لسه بفكر فيه و براقب اكونتاتوا و ريبوستاتوا و معرفش فيه ايه بجد
و المشكلة اني احيانا بقعد اكلم نفسي و اقول ممكن اصلا ميكونش عارف اني عايشه على كوكب الأرض و مع ذلك أنا مببطلش تفكير فيه و حاجه كدا غبيه . لحد دلوقتي فات تقريبا ٨ شهور من اول مره خالص شوفتوا فيها و لسه زي ما أنا و الموضوع مضايقني و حاسه انو واخد مني مجهود ذهني و وقت ميستحقوش بس برضو مش عارفه اعمل ايه ( انا شخصيه شاطره جدا و مهتمه بالدراسه و خايفه الموضوع يأثر عليا السنه دي زي ما حصل السنه اللي فاتت )
هو شخص جميلا شكلا و بيروح الجيم و بتاع و كمان من ريبوستاتوا حسيت تفكيروا متحضر و قوي مش زي شباب الايام دي. انا مبحبوش و متأكدة من كدا مليون في الميه بس مش عارفه ليه بفكر فيه اصلا (اسفه لو طولت بس بجد أنا في حالة استفزاز رهيبه و نفسي اكسر دماغي من اللي بيعملوا و مش فهماني ولا دي انا خالص)
السلام عليكم، طبيعي التفكير بقى سلوك معتاد في يومك لأنك أخدتِ فترة بتكرري نفس التصرفات وبتعيدي على عقلك نفس الأفكار لحد ما تبرمج عليها. واللي بتعمليه حاليا بيزود المشكلة، أولا إنك بتراقبيه باستمرار. وثانيا إنك بتقاومي السلوك ده وبتنفري منه بشدة، ومقاومة الفكرة بتزودها وبتخليها أكثر تشبثا في نفسك. فالحل هنا مش في المقاومة، الحل إنك اولا تتقبلي الفكرة وتعيدي برمجة أفكارك، عادي إن حد يلفت نظرنا ونعجب بالصورة الظاهرية وكتر التفكير يخلينا نتعلق. فدي حاجة بشرية. لا تقسي على نفسك وتجلديها وتفهمي إنها بشر عادي. ثانيا، اشغلي وقتك، طول ما وقتك مشغول بحاجات مهمة مش هتلاقي وقت تروحي تراقبيه ومع الأيام هتقل رغبتك ويقل التفكير وفي الآخر هيكون شخص عادي وممكن تنسي إنك أعجبتِ به في يوم. الموضوع هيكون صعب شوية بالأول، لأنه حاليا مراقبته بقت عاملة زي الإدمان فبالتدريج إن شاء الله هتقدري تقللي الحاجة دي. اعملي قائمة مهام (بس طبعا راعي طاقتك ومتكتبيش أهداف كتيرة عشام متحسيش بإحباط) وكل ما نفسك تحس إنها عاوزة تفتح الحساب تراقبه فكريها إن فيه حاجات أهم، ويا ريت لو عرفت تقفلي الحسابات مؤقتا هيبقى أفضل ولو تفرضي على نفسك غرامة أو عقوبة على كل مرة هترجعي في كلامك وتراقبيه ممكن ده برضه يوقفك. جربي كده وربنا يوفقك.💚
تم النشر الأحد، ٥ يوليو ٢٠٢٦
أول حاجة، أنا فاهمة إن الموضوع ده بيضغط عليكِ جدًا، وإنكِ شايفة إن الوقت والجهد اللي بياخده منكِ مش مستاهل، وده شعور طبيعي لما الدماغ بيعلق في فكرة واحدة بدون سبب واضح. المهم دلوقتي إنكِ عايزة حل جذري عشان تركزي في السنة المصيرية دي، وده قرار قوي منكِ. الحل الجذري هنا مش هيحصل بمحاولة "نسيانه" مباشرة، لأن الدماغ بيحب يقاوم الأوامر السلبية زي "متفكريش فيه". بدل كده، غيري السلوك اللي بيغذي الفكرة. أول خطوة عملية: امسحي الاكونت أو بلوكيه أو على الأقل أخفيه تمامًا من الـ feed بتاعكِ، عشان كل ما تشوفي ريبوست أو ستوري يرجع يفتح الباب. ده مش عقاب، ده حماية لتركيزكِ. بعد كده، لما الفكرة تيجي (وهي هتيجي في الأول)، قولي لنفسكِ جملة قصيرة زي "ده وقت الدراسة دلوقتي" ثم تحولي انتباهكِ فورًا لمهمة دراسية صغيرة ومحددة، زي حل تمرين واحد أو مراجعة صفحة. الاستمرار في الفعل ده هيضعف الربط الذهني مع الوقت. من ناحية إسلامية، التفكير في حد مش غلط لوحده، لكن السيطرة على الأفعال (زي المتابعة والمراقبة) هي اللي بتفرق، وده بيحتاج نية ودعاء مستمر إن ربنا يريح بالكِ ويوجه طاقتكِ لللي فيه خير. كمان، تذكري إن الشخص ده مجرد صورة في دماغكِ، ومش حقيقي في حياتكِ، وإن تركيزكِ على مستقبلكِ أولى بكتير. عشان السنة دي متتأثرش زي اللي فاتت، حطي جدول يومي واضح فيه أوقات دراسة ثابتة وأوقات راحة قصيرة، وكل ما تنجزي هدف صغير كافئي نفسكِ بحاجة بتحبيها (مش متعلقة بالسوشيال ميديا). لو حسيتِ إن الأفكار بتزيد، اكتبيها في ورقة ثم مزقيها، ده بيساعد على إخراجها من الراس. أنتِ شخصية شاطرة وملتزمة، والقدرة على كسر الدائرة دي موجودة جواكِ، بس هتحتاجي تطبيق يومي وصبر على نفسكِ في الأيام الأولى. لو عايزة أفكار إضافية عن تنظيم الوقت أو التعامل مع التشتت، ابحثي عن أسئلة مشابهة على فدني عشان تشوفي تجارب تانية. أنتِ قادرة، وهتعدي الفترة دي بقوة.
تم النشر السبت، ٤ يوليو ٢٠٢٦
اقرأى كتاب الداء والدواء واسمعى شرحة يوتيوب هيفيدك جدا جدا ولازم تتخلصى من دا علشان متندميش عمرك كلة ربنا يوفقك ويكتب لك اللى تتمنية
تم النشر الأحد، ٥ يوليو ٢٠٢٦
التفكير الزائد سببه *المراقبه* ،،، امنعي نفسك من مراقبته وسيتم توقف التفكير والتركيز عليه تدريجيًا
تم النشر الأحد، ٥ يوليو ٢٠٢٦
خلي بالك ان كلنا بنحاول نبرز احسن صورة لينا على مواقع التواصل ، مقصدش انه وحش ، بس مواقع التواصل والحاجات الي بننشرها مش مقياس ابدا اننا اشخاص كويسين ، اعتقد لو بطلتي تراقبي الموضوع هيخف معاكي بالتدريج وهتبطلي تفكري فيه ، و ما تقاوميش التفكير فيه ، يعني لو جه على بالك عادي بس وقتها حاولي تعملي اي حاجة تشغلي عقلك بيها بس متقوليش لنفسك ابدا انا مش هفكر فيه لانك كدة هتفكري فيه اكتر
تم النشر الأحد، ٥ يوليو ٢٠٢٦
لعرض السؤال في فدني اضغط هنا