من فتره من حوالي ست شهور رحت كورس و لقيت واحد زميلي من لما كنت في الثانوي، أنا كنت معجبه بيه من ايام الثانوي من بعيد بس مكنتش اعرفه شخصيا المهم لما لقيته عرفته و قعدنا نتكلم عشان مكنش في حد اعرفه غيره و قربنا من بعض كأصدقاء يعني مكنش في أي تلميحات ولا اي حاجه ، ارتحت معاه جدا و طلع عسول بشكل مش طبيعي و حرفيا خدنا على بعض بسرعه ولا كأننا نعرف بعض من سنين
المشكله بقى دلوقتي الغلطه الي عملتها، كنا بنتكلم في مره و وقعت من لساني و قلتله اني معجبه بيه مع اني مش عايزه بفكر في الجواز و في مشاكل قد الدنيا في حياتي و حرفيا مش وضع مناسب نهائي للارتباط و بجد ندمانه بشكل مش طبيعي خصوصا لو اي حد تاني عرف اني قلتله هيقول عليا كلام زي الزفت و طبعا المجتمع بيعامل اي بنت عندها مشاعر أنها شمال ما علينا قالي أنه معجب بشخصيتي جدا بس مش متأكد لو هو معجب بيا اكتر من صحاب ولا لا ، قفلت على الموضوع عشان كنت محرجه جدا طبعا و بعدها متجابتش السيره نهائي و كلامنا بقى سطحي جدا و بجد أنا مش عارفه عملت كدا ليه و مش عارفه اعمل ايه دلوقتي
اللي عملتيه حصل وخلص وانتهى وكويس انه كان صريح معاك ومش استغل دا حطي حدود بينكم هو مهما كان أجنبي عنك والاختلاط بالجنس الآخر له حدود وانا على يقين أنك تعلميها جيدا انسي اللي حصل بس خليك فاكرة الدرس منه واشتغلي على نفسك افهمي مشاعرك وافهمي ازاي ممكن تشبعيها بدون طرق ملتوية وازاي تعبري عنها أي حد مخبطش على بابكم يطلبك، بلاش تشغلي بالك بيه
تم النشر الثلاثاء، ٢٩ سبتمبر ٢٠٢٦
لعرض السؤال في فدني اضغط هنا