عندي مشكله ضروري:
بصو يا جماعه انا مشكلتي بالنسبه لي كبيره. انا و ابن خالتي
من صغرنا واحنا ما بنتكلمش مع بعض اصلا احنا الاثنين عاملين زي الاشباح لو قعدنا في قعده واحده بيفضل ساكت تماما وانا بفضل ساكته وهو بيفضل حاطط عينه في الارض وانا كمان برده .. الموضوع ده خلاني بحترمه وبتمنى له الخير ولكن فجأة ده كله اتغير في لحظه.
في يوم ماما قالت لي روحي ادي لحمه العيد لخالتك وقولي لها كل سنه وانت طيبه عشان احنا كنا في العيد الكبير
... دايما بسال ابن خالتي بقول له خالتي موجوده بيرد عليا وبيقول لي اه او لا لو قال اه انا بدخل لو قال لا انا عمري ما هدخل البيت لان انا ما ينفعش انا وهو نبقى لوحدنا.
المهم دي المره الوحيده اللي رحت فيها لوحدي من غير ماما ركبت المواصله ورحت لخالتي وكده خبطت على الباب فرد عليا ابن خالتي قال لي مين قلت له انا فلانه. خالتي موجوده كالعاده قال لي موجوده. فدخلت البيت واكتشفت ان هي مش موجوده ان هو كان بيكدب عليا وما كنتش فاهمه هو ليه يعمل كده لان انا وهو اصلا انا شرحت لكم علاقتنا كانت قبلها عامله ازاي؟
واول ما دخلت بدا يتصرف بشكل غريب بدا ان هو يلمح تلميحات غريبه زي وزني وطولي وشى وملامحي والكلام ده كله وبدأ ان هو يتكلم بشكل يعني ونظراته كانت غريبه غريبه جدا واول ما قعدت واكتشفت ان خالتي ما كانتش موجوده كنت همشي ولسه بربط رباط الكوتشي راح رد عليا رد حسسني ان انا اتشليت مش قادره أقف على رجلي قال لي اقعدي هو انا هاكلك.
وجيت امشي لقيته حط ايده على الباب. بيمنعني من الخروج وبيقول لي هو انت فاكره نفسك رايحه فين؟ مينفعش تمشي في الشارع لوحدك وكده.
فانا قلت له مالكش دعوه ابعد ايدك وكده. فقال لي انت مش هتمشي من هنا الا لما انا اجيب مواصله مخصوصه عشان محدش يضايقك. فجيت امشي طلع بره وقفل الباب. وسابني لوحدي في البيت فبعدها ما كنتش عارفه اعمل ايه انا كنت حاسه ان انا عقلي غايب.
وفعلا جاب مواصله وانا كنت في شده انهياري مش عارفه اعيط ولا اصرخ ولا اقول ايه ولا ولا اعمل ايه؟ فجاب المواصله المخصوصه ودخلني ودفع الحساب وكده وانا روحت البيت ..
المفاجاه بقى اني اول ما روحت قلت لماما على اللي حصل عشان تربيه وتعلمه الادب ازاي يحطني في موقف زي ده ماما بتقول لي انه عادي وان هو كده بيخاف عليا مش اكتر وان انا فهمت الموضوع غلط والكلام ده كله.
والصدمه الاكبر ان قلت لاخواتي كلهم وقفوا معاه وكلهم قالوا لي ان انا فاهمه الموضوع غلط وان ده كان موقف عادي وبالنسبه لي انا كنت بموت انا حرفيا كنت منهاره الله اعلم انا كان هيحصل لي ايه لو كنت قعدت اكتر من كده.
المهم
والفظيع بقى في الموضوع ان لما قلت لمامتي ان انا مش هروح معاها ثاني العيد اللي فات الصغير ده اللي هو في سنه 2026 ماما قعدت تزعق وقعدت تشتمني وتقول لي كلام كثير وقالت لي ان انا هروح يعني هروح وأجبرتني ان انا اروح وكنت فعلا حاسه ان روحي بتتسحب مني لما رحت عند خالتي ثاني
المشكله بقى ان حصلت مشاده بينا وانا وهو بدأنا ان احنا نزعق في وش بعض وماما وخالتي بداوا ان هم يحاولوا يعني يهدونا احنا الاثنين ولكن هو بيزعق وانا بزعق فسبتهم ومشيت. وانا ماشيه في الشارع مروحه البيت لان البيت كان قريب من بيتي بدا ان هو اتصل وقعد يزعق وكده وكنت حاسه ان هو بيعاملني كاننا اتنين مخطوبين وعمال يزعق ويقول انت بتمشي لوحدك ليه انتي عنيده انت قليله الادب انت مش عارفه ايه وعمال يزعق.
فقفلت في وشه والتليفون. وماما جت خدتني من المكان اللي انا كنت فيه في الشارع. وانا مش عارفه اعمل ايه؟
بصي ممكن يكون كان بيحبك من زمان و موضوع انه في الاول مفيش اي احتكاك ما بينكم يمكن علشان كنتي لسه صغيرة ف هو مطمن ان مفيش حد هيتقدملك في الوقت دا لكن ممكن يكون حصل حاجة انه شاف حد بيعاكسك مثلا او حد اتقدملك ف شيطانه عماه وانتي روحتي عندهم في التوقيت دا ف يمكن حب يوصل انه مهتم بيكي بس للاسف بالطريقة القذرة دي ويمكن حس بالخطر انك ممكن تروحي منه ف قرر انه يتقدم ويخطبك ف هو خلاص وهم نفسه انك بيقيتي تبعه ولازم تسمعي كلامه او حتي مهما كان السبب ف طريقته فعلا تخوف جدا حتي لو كان فعلا بيحبك ف دا يخوف اكتر والحمد لله ان ربنا حفظك ونجاكي من الموقف دا خلي في حدود في التعامل معاه والاحسن بلاش تعامل معاه اصلا ولو اتجمعتوا في مكان واحد تجاهليه وبيني علي وشك الجمود وبعد كدا اي حاجة تحصل سرخي ولمي عليه الناس
تم النشر الاثنين، ٣٠ مارس ٢٠٢٦
بصى اثبتى انتى صح تماما تماما وتفكيرك مليون فى المايه صح وامك واخواتك غلط ومكانش ينفع بأى شكل من الأشكال تكلميه وانتى عندهم كان يكفى سلامك على خالتك وتروحى مع ان مكانش ينفع تروحى اصلا من الأول + الموقف اللى انتى اتعرضتيله صعب خصوصا بقى كلامه عن شكلك وجسمك وانتوا لوحدكوا الحمد لله انه شيطانه مصورلوش يعمل حاجه لكن هو موصل لخالتك واهلك وغالبا سبقك فى الكلام انه بيحافظ عليكى وبتاع لكن أجبرك على حاجه وانت مع احترامى مجرد ابن خالتى + ممكن يكون بيحبك وعينه منك ودا واضح من زمان حوار الهدوء وانه كان بيتكسف يتكلم معاكى+ نصيحة ليكى انتى صح انتى صح وتفكيرك صح وهما غلط لو كان الموضوع اتطور لحاجه عنده كنت زمانك دلوقتى فى تروما هتعانى منها طول حياتك ومحدش فى أهلك هينفعك أبدا والكلام كان لازم يوصل لأبوكى من الأول مش أمك يا بنت الحلال أمك قلبها عمره ما يطاوعها تحس ان خالتك او ابنها أو اى حاجه من ناحيتهم ممكن تاذى ف هتغلطك انتى + اثبتى وحافظى على نفسك .... متتكلميش معاه اطلاقا ومتفتحيش أى لغة حوار ما بينكم سواء عندكم أو عنده ...... مش عايزه امك تأثر عليكى قولى لابوكى ..... حاولى متحتكيش بيه أصلا ولو اتكلم وقالك خايف وبتاع زى ما هو مقنع امك وخالتك بكدا وعلشان كدا هما معاه ومش هيبقوا معاكى قوليله وانت مالك انت ملكش دعوة انت مجرد ابن خالتى الكلمة ديه هتزعله وياريت تعمليله بلوك مراعاة لنفسيتك وحياتك المستقبلية
تم النشر الأحد، ٢٩ مارس ٢٠٢٦
أختي العزيزة، أول حاجة أقولها: مشاعرك مبررة تمامًا، وأنتِ مش فاهمة غلط خالص . اللي حصل ده مش "حماية" زي ما بيقولوا، ده تصرف غريب وغير مناسب، وكان ممكن يتحول لشيء أخطر. هدف ابن خالتك واضح: هو كان عايز يقرب منك بطريقة شخصية، واستغل الفرصة دي عشان يفرض وجوده، وده مخالف للحدود الشرعية والاجتماعية اللي بتحمي بناتنا زيّك. إيه اللي تعمليه دلوقتي عشان تحمي نفسك؟ ضعي حدود صارمة : متروحيش عندهم لوحدك أبدًا، ولو مجبرة، قولي "لا" بصوت عالي وواضح، واتصلي بماما فورًا أو اخرجي. قولي لمامتك: "أنا مش مرتاحة، وده قراري النهائي، وأنا هحافظ على نفسي زي ما الإسلام علّمني". اقطعي الاتصال : بلوكي رقمه على التليفون، ومترديش على مكالماته أو رسائله. لو زعق أو هدد، سجّلي الكلام ده كدليل، ولو حسيتِ بخطر حقيقي، روحي للشرطة أو اتصلي بخط الطوارئ (122 في مصر). تعاملي مع العائلة : هما مش شايفين الخطر عشان "العادات"، بس أنتِ الأولوية. قوليلهم: "ده مش كلام عادي، وأنا مش هضيّع راحتي النفسية". لو مش بيسمعوا، قلّلي الزيارات تمامًا، وركّزي على حياتك. أنتِ قوية وبتحترمي نفسك، وده درس إن ربنا بيحميكِ من خلال الإشارات دي. اهتمي بصحتك النفسية: مارسي رياضة خفيفة، اقرئي قرآن يوميًا، وابحثي في فدني عن أسئلة مشابهة هتلاقي إجابات كتير مفيدة. لو عايزة استشارة متخصصة، شوفي الخبراء هنا: https://www.fedni.net/experts – في متخصصين في الصحة النفسية والعلاقات العائلية. أنا معاكِ قلبًا وقالبًا، هتقدري تتجاوزي ده وتطلعي أقوى. 💕
تم النشر الأحد، ٢٩ مارس ٢٠٢٦
ايه العبط ده. معلش بس ابن خالتك ده ملوش حكم عليكي ولا ليه انه ي عقلك والحركة اللي عملها دي مرعبة ازاي يدخلك البيت وخالتك مش موجوده وازاي مامتك عادي كده فيه حاجة غلط يجماعة ولا انا اللي مش واخده بالي
تم النشر الأحد، ٢٩ مارس ٢٠٢٦
الي عمله ابن خالتك غلط جدا خلي بالك علي نفسك منو ومتقفيش في مكان معاه لوحدكم حتي لو في الشارع
تم النشر الاثنين، ٣٠ مارس ٢٠٢٦
معلش انا اسفه بس ال عمله ده خطير اوي وانتي عندك حق ازاي اهلك مش شايفين كدا ولو خالتك بحكم انه ابن اختها شايفه ان الموضوع عادي اذاي اخواتك شباب وشايفينه عادي ممكن يكون خاطبك من زمان وانتي متعرفيش علشان التحكمات دي غريبه بصراحه بس انتي صح مش غلط وربنا يعينك ع ال حواليكي
تم النشر الأحد، ٢٩ مارس ٢٠٢٦
ابعدى عنه تمام
تم النشر الأربعاء، ١ أبريل ٢٠٢٦
حبيبتي انتي صح اوي واثبتي علي رأيك ومتفكريش في البني ادم دا تاني مهما حصل واثبتي علي رأيك ومتروحيش عندهم تاني وبني ادم زيه ميستهلش انك تبصي في واشه تاني حفظي علي نفسك وحاولى تتناسي الموضوع دا واثبتي علي رأيك
تم النشر الثلاثاء، ٣١ مارس ٢٠٢٦
امتناع تااااام عن الذهاب أو التواجد في أي مكان هو فيه . فين والدك
تم النشر الثلاثاء، ٣١ مارس ٢٠٢٦
الحمدلله علي العموم انا وقفته عند حده ومش هروح هناك تاني... وشكرا على النصيحه 🥹🌹
تم النشر الأحد، ٢٩ مارس ٢٠٢٦
لعرض السؤال في فدني اضغط هنا