جماعه بجد أنا حاسه إني تعبت جدًا من جوايا.. مش مجرد زعل عادي، لا، إحساس إن كل حاجه بقت تقيله ومفيش طاقه أكمل بيها.
بحاول أكون متفائله وأقول يمكن الجاي أحسن، بس كل سنه بحس إن الدنيا بتسود أكتر من اللي قبلها. والغريب إني زمان كنت شخص ناجح جدًا، عندي طموح وثقه وحاجات حلوه كتير، وحياتي كانت ماشيه كويس فعلًا… لكن بقالي حوالي ٦ سنين حاسه إني بنزل لتحت واحده واحده من غير ما أعرف أوقف ده.
أنا فعلًا تعبت من كتر الضغوط. مشاكل صحيه ظهرت فجأه، حاجات نفسيه، تنمر، مقارنات، ثقتي اللي بقت ف الارض، وإحساس مستمر إن كل الناس بتتقدم وأنا واقفه مكاني أو برجع لورا. يمكن ده مجرد إحساس مني، بس بجد بقيت حاسه إني في القاع.
وكمان الامتحانات… أنا أصلًا شخص مجتهد وبذاكر طول السنه، لكن أول ما تدخل فترة الامتحانات بتوتر جدًا وأحس إن عندي تراكمات وإن كل اللي عملته ضاع. وده تعبني نفسيًا لأن ليه أحس إني متزنقه زي اللي ماكانش بيذاكر أصلًا؟
والحاجه اللي مزعلاني أكتر إني بعد الامتحانات هخلص أولى ثانوي، وممكن فعلًا مايبقاش في مدرسه تاني بنفس الشكل. يمكن الموضوع يبان بسيط للبعض، بس أنا متعلقه بالمدرسه جدًا… بالروتين، بالمدرسين، بالحاجات الصغيره اللي كنت فاكره إني مش مهتمه بيها. حتى الناس اللي كانوا كويسين معايا، رغم انو كان ليا ذكريات سيئه اوي ف المدرسه دي. و أنا أصلًا شخص خجول جدًا ومبعرفش أعبر، لدرجة إن في مدرسه كنت بحبها جدًا ومع ذلك لما أشوفها أتجنب أسلم عليها من كتر الكسوف، وهي كانت تزعل مني فعلًا… ولحد دلوقتي زعلانه إني ماعرفتش أوضح مشاعري للناس اللي كانوا طيبين معايا.
حاسه إن عندي عقد كتير متراكمه جوايا من سنين، وكل فتره حاجه جديده تظهر كأن الدور جه عليها. وكل ده مخليني مرهقه جدًا نفسيًا. أنا لسه في بداية حياتي والمفروض أكون متحمسه للمستقبل، لكن أغلب الوقت حاسه بخوف وحزن وضغط مش طبيعي.
وبرغم كل ده… لسه جوايا جزء صغير عنده أمل. أمل إني في يوم أرجع لنفسي القديمه او افضل كمان ، أرجع قويه وطموحه ومبسوطة زي زمان. بس بجد أنا محتاجه مساعده، أو حتى كلام يخفف عني شويه، بس يكون بسيط أقدر أعمله… لأني حاسه إني لو الموضوع كان تقيل هفقد طاقتي تمامًا.وبرغم كل ده… لسه جوايا حته صغيره رافضه تستسلم. مهما كنت تعبت ومهما حاسه إن الدنيا خدت مني كتير، لسه عندي أملeven لو بسيط إني في يوم أبقي أحسن وأرجع لنفسي اللي ضاعت وسط كل الضغط ده. يمكن أنا تايهه ومجهده ومش قادره أستحمل زي زمان، بس أكيد ربنا ماحطش كل التعب ده جوايا عبث.
أنا بس محتاجه حد يفهمني بجد، أو كلمه تخفف الحمل اللي فوق قلبي شويه… يمكن فعلًا كلمه واحده تفرق معايا أكتر مما تتخيلوا. متستخسروش فيا كلمه منكم ممكن تساعدني اتخلص من كل دا 😭
شكرا لكل حد قرأ الكلام دا رغم انه اطول من حياتي حرفيا و حاول يساعدني بكلمه منه..و شكرا مقدما علي المساعده 🥹
ازيك يا جميله اتمني تكوني بخير يارب بصي يا ستي: اللي حاسة بيه ده اسمه علمياً "انطفاء نفسي" إنتي عاملة زي بطارية الموبايل اللي فضلتي مستهلكاها في برامج تقيلة لحد ما وصلت 1% وبتفصل. تراكمات السنين والضغط هي اللي عملت الثقل ده .مقارنتك لنفسك الحالية بالبنت الشاطرة الطموحة بتاعة زمان بتجلدك وبتموتك بالبطيء انتي بالظبط كده! البنت الناجحة بتاعة دي لسه جواكي ومراحتش في حتة. بس زمان (قبل 6 سنين) كانت الضغوط اللي عليكي صغيرة وعلى قد سنك. لما كبرتي، الضغوط زادت والمشاكل كبرت وتراكمت، فـ "السيستم" النفسي بتاع زمان مبقاش ملاحق على ضغوط دلوقتي، فعقلك وجسمك جابوا آخروهم وبدأوا "يهنجوا" ويجيلك إحساس إنك بتنزلي لتحت. يعني إنتي مش فاشلة، إنتي بس محتاجة تحديث للسيستم النفسي بتاعك عشان يستحمل المرحلة الجديدة من حياتك،وخوف الامتحانات بقي ده فخ اسمه "عقدة المثالية". إنتي بتبقي عايزة تعملي كل حاجة صح 100%، ولما بتخافي متوصليش للنتيجة دي، عقلك بيجيله "بلك ومبيجمعش" ويوهمك إنك نسيتي كل حاجةبصي التوتر بيفرز هرمونات بتقفل خلايا الذاكرة مؤقتاً، يعني إنتي منستيش ولا حاجه ده وهم! قسّمي المذاكرة حتت صغيرة جداً (مثلاً ذاكري 25 دقيقة وافصلي 5 دقائق)، ومتفكريش في المجموع؛ فكري في الصفحة اللي قدامك وبس، طبيعي تخافي من النقلة لأننا كبشر بنحب "منطقة الأمان" اللي واخدين عليها. وزعلك إنك معرفتيش تعبري للناس اللي بتحبيهم عن مشاعرك بسبب الكسوف ده "ندم رجعي" ملوش لزمة دلوقتي.إنتي زمان كنتي أصغر ومكنش عندك نضج كافي يخليكي تواجهي خجلك، فمتلوميش نفسك على تصرفات طفولتك،إنك مش عايزه تستسلمي ودي بقى "النقطه " اللي فرحتني جداً! الصوت الصغير ده هو المرونة النفسية بتاعتك. ده معناه إن روحك لسه قوية وبتعافر ورافضة تموت تحت الأنقاض. امسكي في الصوت ده بإيديكي وأسنانك. قربي من ربنا واشكي له تعبك في سجدة، لأن الطبطبة الربانية بتدوب جبال الهموم والله ربنا مش هيضيع تعبك ده أبداً نصيحه من اختك مفيش حاجه بتحصل مره واحده ده هيحصل بالتدريج كله واحده واحده اتعلمي تكتبي مشاعرك كل اللى بتحسي بيه وكل اللى بتمري بيه فى يومك والله والله عن تجربه هيفرق اوي انا لو قعدت اقول ازاى الكتابه حلوه اوي مش هخلص جيبي نوته ليكي واكتبي عارفه هتلاقي مشاعرك قدامك كأنك شايفها بعينك لو موقف مثلا سواء حلو او وحش هتفتكري تفصيله وممكن تضحكي على حاجات كنتي شايفها كارثيه وصعبه ودلوقتي عادي بتضحكي عليها اسفه اووي انا اللى طولت عليكي بس بجد بحاول اساعدك إنتي مش لوحدك والله كلنا مرينا بنفس حالتك او حتي شبهك 💗🫂حاسه ان كلامى ملخبط اوى 🥺
تم النشر الخميس، ١٤ مايو ٢٠٢٦
بصي يا بنت الحلال لازم تعرفي إنك مش لوحدك والإحساس إنك تائهة أو بترجعي لورا وسط زحمة الناس ده مجرد وهم من كتر الضغط والتعب اللي راكناه جواكي سنين أنت لسه فيك الروح اللي عايزة تنجح والدليل على كدا إنك لسه بتعافري مع المذاكرة والامتحانات رغم كل اللي حاسة بيه وموضوع تغيير المدرسة اللي قلقك ده ممكن يكون هو البداية الجديدة اللي تطلعك من الروتين اللي تعبك وعشان تريحي نفسك بطلي تقارني نفسك بحد ولا حتى بنفسك القديمة اللي كنت شطورة فيها زمان أنت دلوقتي في مرحلة بناء والترميم بياخد وقت فمتستعجليش النتيجة فكك من فكرة التراكمات اللي بتوترك وقت الامتحانات ركزي في الساعة اللي أنت فيها بس ولو ذاكرتي صفحة واحدة أحسن من مفيش المهم متقعديش تلومي نفسك وخلاص اكتبي كل العقد والمشاعر اللي حاسة إنها متراكمة جواكي دي في ورقة واحرقيهم لما تعمل كدا هيخفف الحمل اللي فوق قلبك ده شوية ومتخافيش من الخجل أو إنك مش عارفة تعبري عن حبك للناس اللي حواليكي كفاية إنك عارفة قيمة طيبتهم وده في حد ذاته نية كويسة ربنا هيجازيكي عليها خير وأهم حاجة خليكي واثقة في الحته الصغيرة اللي رافضة تستسلم دي وكبريها يوم ورا يوم هتلاقي الضلمة دي بدأت تروح .. وجد والله ربنا يحفظك ويسعدك 🌷 لو جربتي ده ومنفعشي ممكن ابعتي رساله اول تعليق 😊
تم النشر الأربعاء، ١٣ مايو ٢٠٢٦
يا حبيبتي 🌸، أول حاجة: أنا فاهمة كل كلمة قلتيها، وده مش بس كلام… ده إحساس حقيقي بيحصل مع ناس كتير زيك، وأنتِ مش لوحدك. اللي جواكِ ده مش ضعف، ده تعب متراكم، بس الجزء الصغير اللي لسه عنده أمل ده هو اللي هيطلعكِ لفوق. برافو عليكِ إنكِ مش مستسلمة، ده دليل إن القوة لسه موجودة جواكِ! 💪 خطوات بسيطة جدًا تقدري تعمليها دلوقتي (مش تقيلة خالص، خطوة واحدة كل يوم): ابدئي اليوم بشكر الله : كل صباح، قولي "الحمد لله" على 3 حاجات صغيرة (زي إنكِ صحيتِ، أو عندكِ أمل). ده بيغير النظرة تدريجيًا، زي ما ربنا قال: "لَئِنْ شَكَرْتُمْ لَأَزِيدَنَّكُمْ". جربي، هتحسي فرق في أسبوع. للامتحانات والتوتر : قسمي اليوم لـ"ساعة ذاكرة + 10 دقايق راحة". اكتبي اللي خلصتيه في ورقة صغيرة، عشان تشوفي إنجازاتكِ مش تراكمات. أنتِ مجتهدة، فـ"التوفيق من عند الله"، ادعي قبل الامتحان: "ربِّ اشْرَحْ لِي صَدْرِي وَيَسَّرْ لِي أَمْرِي". للخجل والمدرسة : اكتبي رسالة قصيرة للمدرسة اللي بتحبيها (أو أي حد طيب)، مش لازم تبعتيها، بس اكتبيها عشان تطلعي اللي جواكِ. بعد الثانوية، الروتين الجديد هيبقى أحلى، وهتلاقي ناس جدد يقدرونكِ زي ما أنتِ. للعقد والتعب : خصصي 5 دقايق يوميًا لقراءة صفحة قرآن، ده بيخفف الحمل زي السحر، وربنا قال: "فَإِنَّ مَعَ الْعُسْرِ يُسْرًا". أنتِ في بداية حياتكِ، واللي فات مش نهاية… ده درس عشان ترجعي أقوى. لو عايزة تتكلمي أكتر أو تحتاجي خطة شخصية، روحي على صفحة الخبراء في Fedni (fedni.net/experts) وابحثي عن متخصص نفسي أو مدرب حياة. كمان، دوري على أسئلة مشابهة في التطبيق، هتلاقي إجابات كتير تخفف عنكِ. أنتِ قوية يا بنتي، وربنا معاكِ دايمًا. كلمة واحدة: استمري ، الغد أحسن إن شاء الله. أنا هنا دايمًا 🥰❤️
تم النشر الأربعاء، ١٣ مايو ٢٠٢٦
ايوا فعلا انا استفدت.. شكرا علي وقتك
تم النشر الخميس، ١٤ مايو ٢٠٢٦
الشكر لله أتمنى أكون فيدتك و ربنا يوفقك إن شاء الله
تم النشر الخميس، ١٤ مايو ٢٠٢٦
كلامك فِ قلبي هفتكره علطول و ان شاء الله تبقي بداية تغييري للاحسن بس اخلص امتحاناتي علي خير..بارك الله فيكِ🤍
تم النشر الخميس، ١٤ مايو ٢٠٢٦
لو ملقتيش النتيجة دلوقت ف درجات امتحاناتك مش لازم تكون هنا ممكن تكون اتعلمتي الحاجة دي غيرت منظورك للأحسن تفكيرك خلاتك شخص واعي أكتر ربنا شايلك تعبك لبعدين طريق مقبلة عليه ربنا يوفقك فيه و متعرفيش منين ﴿إن الله لا يضيع أجر من أحسن عملا﴾
تم النشر الخميس، ١٤ مايو ٢٠٢٦
حابه اشكر حضرتك جدا لان الكلام اللي زي كدا بيفرق معايا..شكرا ليكي بجد
تم النشر الخميس، ١٤ مايو ٢٠٢٦
عشان تبقي عارفة طبيعي حاجة زي دي تحصل عقلنا في الطبيعي أغلب الأفكار اللي بيجيبها سلبية؛ كل ما فكرة وحشة تيجي ممكن ترفعي ايدك كدا و تفرديها و تقولي لا استوووووب بَطَّل تفكر كدا أنا كويسة و ربنا هيوفقني و هكون مبسوطة
تم النشر الخميس، ١٤ مايو ٢٠٢٦
بحاول اركز ع الكويس و لكن لازم تيجي حاجه من الوحش تخرب عليا مزاجي
تم النشر الخميس، ١٤ مايو ٢٠٢٦
منتي للأسف مش هتقدري تطلعي من دا غير بالصبر و المجهود النفسي و ربنا حطك هنا عشان هتقدري تخرجي إن شاء الله منها إنتِ نفسك قولتي إنك تقدري تصلحي الأمور و عشان تبقي عارفة الناس كلها عندها مشاكل بس فيه فرق بين الناس اللي بتقوم تحل مشاكلها و الناس اللي بتخاف و تفضل قاعدة لو فضلتي قاعدة المشكلة مش هتتحل إنتِ إن شاء الله قوية و شجاعة و تقدري تخرجي من اللي إنتِ فيه و الدليل إنك دخلت و سألتي إن حد يقدر يساعدك لإنك فعلا عاوزة تتغيري للأحسن و إن شاء الله ربنا يوفقك
تم النشر الخميس، ١٤ مايو ٢٠٢٦
تمام هجرب اعمل كدا... كمان رغم اني اكتر حاجه بحبها الدراسه و هكذا و ببذلفيها جهدي و لكن برضو مش بلاقي النتيجه اللي انا عايزاها
تم النشر الخميس، ١٤ مايو ٢٠٢٦
ايوا بس انا كدا معملتش المستحيل يعني اني بذاكر د في غيري كتير بيذاكرو و ناجحين اكتر و احسن مني
تم النشر الخميس، ١٤ مايو ٢٠٢٦
بالنسبه للاسباب ف انا مش عارفه اذكر اي ولا اي هوا اه في كتير منها اقدر اصلحه و لكن محتاج مجهود و صبر و انا معنديش دا بصراحه
تم النشر الخميس، ١٤ مايو ٢٠٢٦
يعني مثلا إنت قولتي إنك بتذاكري و مهتمية بدراستك ربنا يباركلك دي حاجة لواحدها المفروض تكوني فخورة بيها أنا بذاكر عشان إن شاء الله ربنا يكرمني و أجيب مجموع كويس في ثانوي و أدخل كلية كويسة و أرفع راس أهلي
تم النشر الخميس، ١٤ مايو ٢٠٢٦
أكيد في نظرة لنفسك كويسة ممكن تذكريها ممكن تيجي تفكري أنا فيا حاجة واحدة كويسة و مليون حاجة وحشة لا ركزي ع الكويسة بس
تم النشر الخميس، ١٤ مايو ٢٠٢٦
احنا واخدين بالنا انك مش مستحملة و عندك ضغط نفسي كبير بس دا بردو اللي تقدري انتي تحددي سببه لانك مذكرتيش أسباب تخلينا نقدر ندي نصيحة، و العلاج يبقى ف إيدك و جواكي لإنك اللي مريتي بتجاربك الخاصة اللي ثابت فيكي الأثر المرهق و غالبًا النصيحة هتكون عامة مش خاصة بمشكلة معينة يعني مثلا انتي بتقولي تراكمات من ٦ سنين ممكن مثلًا تقوليلنا على اكتر حاجة مأثرة فيكي و حد ممكن يفيدك
تم النشر الخميس، ١٤ مايو ٢٠٢٦
ايوه بس انا اعرف انو كل شخص فيه عيوب و مفيش حد كامل بس اني اشوف اني شخص كله عيوب حرفيا و مش لاحق يحل حاجه ساعتها هيبقي اي الحل؟
تم النشر الخميس، ١٤ مايو ٢٠٢٦
حلو إنك شايفة إن عندك عيوب دي لوحدها ميزة بس تتعلمي تستخدميها صح هتفضلي تقولي انا وحشة ف كذا و كذا و كذا و لا هتتحركي لقدام و لو خطوة بسيطة و تقولي هتغلب عليها و احسن من نفسي لان مفيش حد معندهوش مشاكل و لا أخطاء
تم النشر الخميس، ١٤ مايو ٢٠٢٦
حابه اضيف حاجه..اني حرفيا شايفه نفسي عيوبي محاوطاني من كل حته و مسببالي مشاكل كتير جدااا. انا لو فضلت اعد ف عيوبي مش هخلص. هيا كتيره اوي ي جماعه لدرجة اني مش هقدر اكتبها هنا كلها ف سؤال واحد عشان اشوفلها حل. انا لو جيت اكتبها هلاقي نفسي عامله كتاب بيها فعلا مش مبالغه.
تم النشر الأربعاء، ١٣ مايو ٢٠٢٦
لعرض السؤال في فدني اضغط هنا