صباح الخير
انا مطلقه ومعايا بنوته 6 سنين وبحب شاب مش متجوز قبل كده واول لما عرفته كان هو اللي بيحاول يعمل اي حاجه علشان نتجوز ونكون مع بعض للعلم انا 25س وهو 35س وف اول معرفتي بي كنا صحاب كنت بحكي لي كل حاجه وهو كمان وبعدين بدأنا نحب بعض والصحوبيه اتحولت لعشق بس انا كنت عندي صحاب كتير وكلهم شباب وهو كان عارف وقطعت علاقتي بيهم عشانه
هو مقليش كده بس انا عملت كده علشان هو مش حبيبي بس وصاحبي كمان ولما عملت كده حسيت انه انبسط اوي بس هما فرند عندي ع الفيس ولما بنزل حاجه عندي بيكون ف كومنتات مكنتش بركز خالص فيها ولا كنت ببص اصلا لكن هو كان مركز وكان عندي صديق ع الفيس عمل كومنت عندي كنت مش بتردي عليا ليه ردي انا عاوزك الكلام بتاع عاوزك دي قلبت كياني وهو دخل كلم الشاب ده وشدو مع بعض والواد طبعا عشان يديق حبيبي لانه هزقه قاله كلام كدب عليا
المهم ساعتها حبيبي بقا ف فجوه زمانيه بين كلام الشاب اللي قالو لي وبين حبنا وحياتنا وبعدها معملته ليا اتغيرت تماما وبقا ع طول ساكت وسعتها مكنتش بفتح الفيس بتاعي فتره كبيره واصلا عملاه برقم فون حبيبي بعتلو الباسورد وقلتله ادخل الغي الاكونت انا مش عوزها تاني قالي تمام لكن هو خد الباسورد ودخل يكلم الفرند اللي عندي ع اني انا اللي ببعت وطبعا بعت للشاب اللي علق بعوزك
الواد فعلا اسلوبه مش كويس انا كنت كلمته مره وبعدها مكلمتوش تاني بس نسيت الغي الاد واعمل بلوك المهم فضل يكلم الشاب كذا يوم ع اني انا وحبيبي لقيته بتكلم معاه بميعه والواد ساق فيها وبعت لي ناس تانيه بس كل الكلام كان كله ف سياق محترام ما عدا الشاب بتاع الكومنت ومن رمضان اللي قبل اللي فات وانا بموت من تغيره معايا
انا عارفه انه موجوع بسببي ولحد دلوقتي صبره عشان مفيش زيو ويوم مافكرت ف الجواز تاني كان من اجله مش عشان حد تاني انا وربنا بحبو اوي بتمناه لي الرضاه ونفسي ربنا بجمعني بي هو اتغير معايا جدا وديما ساكت يكلمني ف الفون يقول كلمتين مفيش غيرهم الو صباح الخير بس ويفضل ساكت طول المكالمه وبفضل اتكلم واقوله وحشتيني واقوله مش مهم تتكلم المهم اني سامعه نفسك
هو شغال ف الغردقه لما بينزل جازه لزم اشوفه بيجني من الصعيد للقاهره عشان يشوفني ساعتين وبيكونوا احلى ساعتين ف الكون بخرج معاه انا وبنتي وبيعامل بنتي حلو اوي كانه ابوها بالظبط بشوف نفسي ف عينه وبحس بحبه ليا لما بشوفه
والله العظيم اتغيرت عشانه خالص هو مبقاش واثق فيا خالص وبكدبني في كل حاجه يمكن كنت بكدب ف الاول عليه ساعات لكن بعد المشكله الاخيره دي عرفت قيمته والله بتمناه رضا نفسي ارجعه ليا زي الاول
انا متاكده انه بيحبني لكن هو خايف من الفشل ف الجواز لانه شغلو بعيد عني وهو بيقولي مقدرش اتجوزك واسيبك لوحدك ولا عند مامتك انا مقدرش اعيش كده قولته خلاص هشوف شقه قريبه من شغلك قالي انا عارف انتي لو عليكي تعيش معايا ف اي حتي لكن بنتك ليها حياتها لازم اوفرهلها وعشان اوفرلها حيتها لزم اكون متواجد معكم ديما يعني يكون شغلي جنب السكن ع طول البنت عاوزه مدرسه ونادي عشان التدريب بتعها
وهو بيقولي مقدرش اجي علبها ف ابسط حقوقها لكن مش هقدر اخليكي نزلي وانا مس معاكي بيقولي لو هنتجوز وتجي الغردقه هجيلك 3ايام ف الاسبوع ووقتها نجرخ سوا لكن طول ماهو مش موجود مش هيقدر يخرجنا مع العلم اهله مش موافقين ع الجوازه لاني مطلقه كاني رقاصه مثلا عاوزه الشباب ترد عليا اعمل اي وارجع ثقته ليا ازاي وربي اتعدلت وبقيت زي الالف والشارع مابشفوش غير وقت التمرين بتاع بنتي بس
مع العلم اني بدور ع شغل وهو رفض موضوع الشغى ده وبيدني مصروف ليا انا وبنتي كل شهر 3000ج ف سبيل منزلش من البيت ونبي اعتبروني اختكم وتردو عليا عاوزه ارجع حبيبي ليا نفس نتحوز والله الحياه يعني هو ومن غيرو ميته ونبي ادعولي نفسي ربنا يجمع بيني وبينه ف الحلال ونبي ادعولي ربنا يهدي عليا ويحفظو واسفه اني طولت اوي اوي عليكم
السلام عليكم ورحمه الله وبركاته. النمط اللي انتي ماشيه بيه ده جزء منه انت بتتعافي وعلاقتك بالشخص ده فيها جزء خلاك يعني تساعدي نفسك على انك تتعافي من ما بعد الطلاق والسكه اللي كانت متخبطه معاكي وانك بتتواصلي مع الشباب او مع الرجال عموما على اساس انهم صحاب وبتدي مساحه لحد يتكلم معاكي بطريقه لطيفه حتى لو زي ما بتقولي كده يعني يغلفها الاحترام ولكن ما زال كل اللي بيتعاملوا معاكي دولت وبيقربوا منك بشكل ما واحنا اصحاب وفضفضي معايا والكلام ده دول كلهم كانت ناس بتستغل بس وضع انك مطلقه مش اكتر من كده وللاسف الشديد اغلبهم ان ما كانش كلهم مش هيخلوا من النظره دي داخليا حتى ولو ظاهريا ناس محترمه وزي الفل فالعلاقه دي ساعدتك اه بسعادتك تمام حلو جدا لكن لازال هذه العلاقه برده بيشوبها نفس الشائبها الشخص ده بتواصله معاكي وباحساسه بالمسؤوليه تجاهك برضه هو كمان في عنده صراع الصراع ده هو انه عارف ان في جزء من علاقتكم لا يناسب انه انتم تكونوا في علاقه سليمه على الطريق السليم فاحنا هنا بقى قاعدين عاملين ميكس يعني احنا كويسين وحلوين وبنشعر بالمسؤوليه وعايزه أحافظ عليك وكل الكلام ده لطيف حلو كله معنويا كله كلام سطحي نخش بقى في العمق ونخش في الكلام السليم انه الامور تمشي بالشكل الصح طب ما يكون مسؤول عنك هو زوجك حتى لو مش هيبقى بيقابلك ما هو هيبقى نفس الوضع ايه اللي اختلف؟ اللي هيختلف انه هيكون مسؤول عنك اجتماعيا وانا يا دوبك الموضوع ما بينه وما بين نفسه وما بينه وما بينك خلاص يعني محدش يعرف حاجه لكن قدام المجتمع هو هنا بقى قدام جزء من المسئوليه وشكل هو ما يقدرش ان هو يتعامل معاه ولذلك ممكن يكون بيبرر الموضوع بقى بمسأله انه اصل ما ينفعش اصل لازم تكوني قريبه مني اصل لازم تنقلي حياتك وانا مرضاش ده لبنتك ويعني انا اسفه جدا بس ده ابوخ سبب بيتقال يعني انه انا مش عايزه اعمل كده عشان ما يبقاش باثر على حياتك ولا اخبط لك حياتك ولا لخبط حياتك وده طبعا يعني آسفه جدا الاسباب مايعة يعني فاتمنى انه لحد هنا وتستفيدي بالجزء اللي انت استفدتي منه انه العلاقه دي ساعدتك انك يعني تبداي كده تفوقي لانك تمشي في الطريق الصح وتوقفي حاجات كنت ماشيه فيها في حياتك بشكل غلط وتبدأي تفوقي للصح فقط لا غير حتى وان كان الصح ده معناه انك توقفي علاقتك بالشخص اللي هو كان جزء من السبب انك تبدأي تفوقي للصح هو سبب وشكرا ليه على قد كده ولكن نكمل طريقنا الصح علشان ربنا ييسر لنا كل الامور بشكل الانسب ان شاء الله. خليكي في شكل حازم جدا معاه انت وريتني الطريق الصح وانا عايزه اكمل على الصح فلو هنقدر ان احنا نوصل لحلول وسط ونتجوز رسمي تمام حلو جميل جدا لو مش هنقدر يبقى انا مش عايزاك تكون مسؤول عني مسؤوليه وهي كده وغير يعني غير واضحه بدون اي اسباب لانه طبعا بتاخذي فلوس من حد يبعت لك مصروف لحد ده ما لوش اي علاقه بيكي دي حاجه مش كويسه وما تعرفيش ممكن قدام في الحياه الشخص ده يستخدم ده ضدك ازاي اتمنى انك تكوني كلام بالنسبه لك كان واضح كفايه ان هو يساعدك ان شاء الله.
تم النشر السبت، ٢١ يونيو ٢٠٢٥
السلام عليكم، أنا عارفة ممكن كلامي ميعجبكيش بس هقول لك نصيحتي ولك تاخديها أو لأ. الشخص ده طالما أهله مش موافقين على زواجه منك عشان مطلقة وكمان عنده تبريرات وأسباب ليه مينفعش تتزوجوا بتعملوا إيه مع بعض حاليًا؟ إيه نهاية العلاقة دي طالما مش ناوي على زواج؟ هتفضلوا كده متصاحبين وبتخرجوا سوا على أمل يعني يتزوجك في يوم من الأيام؟ ** ده لو ركنا على جنب كده الحركة اللي عملها بالأكونت بتاعك وإنه يكلم شاب على إنه أنت (ده على اساس بيختبرك يعني ولا إيه النظام؟) حركة وحشة قوي بصراحة. كمان لو حد بيحبك وعارفك كويس وواثق فيك مش أول ما واحد كذاب ييجي يتبلى عليكِ ويقول كلام وحش مش هيصدقه وهيثق في كلامك وهيخرس أي حد يقول عليكِ كلمة وحشة أو يتهمك. يعني لا ناوي يتزوجك ولا واثق فيكِ ومن أول اختبار في الثقة فشل ومع ذلك بتقولي بيحبك وأنت اللي بتدوري على طريقة ترجعي ثقته بك؟ ليه شايفة نفسك قليلة قصاده كده؟ عشان انتِ مطلقة يعني وهو متزوجش قبل كده فنفسك من جواك بتقولك إزاي ده يبص لي أنا؟ ليه تقللي نفسك كده؟ المفروض تعززيها وتغليها وهو اللي يجري وراكِ عشان يشتري رضاك ويخاف على سمعتك. لو هو شاريكِ وبيحبك كان عمل أي شيء عشان يتزوجك، كان أقنع أهله ولقى حلول للمبررات السخيفة اللي بيقول ميقدرش يتزوجك عشانها. *** رأيي وبصراحة وحتى لو كان قاسي ومش على هواك، اقطعي العلاقة دي خالص، أولًا عشان هي حرام وربنا مش راضي عنها... في ديننا مفيش إلا زواج أو خطوبة رسمية لها حدودها غير كده حرام. قولي له يتقدم لك لو عاوز تكملوا سوا ولو فضل يبرر ويماطل اعرفي إنه بيتسلى بك مش أكتر. متتحايليش على حد عشان يثق فيكِ طالما شايفك مش قد الثقة. تواصلي مع حد مختص عشان تتخلصي من التعلق المرضي اللي انتِ فيه. فكري في نفسك وفي مصلحتك. ربنا معك.
تم النشر السبت، ٢١ يونيو ٢٠٢٥
الموضوع مؤثر اوي مقدرش اديكي نصحتي فا اتمني حد خبير يرد عليكي
تم النشر السبت، ٢١ يونيو ٢٠٢٥
عارفه انى معنديش خبره وكلامي مش هيفدك بس كل إللى اقدر اقوله العلاقه دى مش كويسه وكلها غلط في غلط وحرام إللى بتعملى ف نفسك ده بجد.. خلى بالك من بنتك ومن حياتك وان شاءالله ربنا يكرمك بشخص غيره لو مرجعش عن طريقته دى بقى
تم النشر الاثنين، ٢٣ يونيو ٢٠٢٥
لعرض السؤال في فدني اضغط هنا