متقدملي عريس أكبر مني ب 9 سنين مطلق و عنده بنت و ولد هو قريبي و انا عندي 21 سنه اوافق و لا استنى يمكن يبقي في فرصه احسن خايفه يرجع لمراته تاني بصراحه انا صليت استخاره و مش حاسه بحاجه
تم النشر الخميس، ٢٣ يوليو ٢٠٢٦
السلام عليكم ي اخواتي عساكم بخير جميعاً عاوزه اشارك معاكم حاجه و تدوني رأيكم انا عندي صاحبه معايا من حضانه يعني حرفيا صاحبه عمري هي يتيمه ام و مع بعض من زمان اوييييي المهم صاحبتي ربنا كرمها و درست تمريض عسكري في محافظة غير محافظتنا و حاليا بتشتغل في المحافظه اللي درست فيها يعني هي مغتربه كل اجازه بتنزل لازم تيجي لحد البيت عندي و تقعد معايا شويه و بعدين تمشي تمام هي كانت محترمه جداااااا و الله كانوا بيحلفوا ب اخلاقها و مازالوا يعني بصراحه مش عليها غبره بس لما تيجي عندي بتحكيلي عن شباب بيدخلوا يكلموها و يتعرفوا و كده بحكم شغلها يعني ي جماعه و الشباب دول بيبقوا معاها ممرضين أو دكاتره و هي مش مرتبطه باي واحد فيهم بس مع دا شويه و دا شويه أصحاب يعني ي جماعه و من كترهم و الله العظيم بتلخبط بين أساميهم بنصحها كتير متختلطش قدر الإمكان و متردش علي حد فيهم بس للاسف هي بتتدايق مني لما اقولها كده ليا فتره مش مرتحالها و حقيقي مش حابه نهائي زيارتها ليا و بتخنق منها مع انها صحبتي الوحيده و مش عارفه اعمل ايه و مش قادره ابعد عنها هي غلبانه اوي و بتغرق في شبر مايه مش عارفه بجد احلى مشكلتي دي ازاي
تم النشر الأربعاء، ١ يوليو ٢٠٢٦
السلام عليكم ورحمه الله وبركاته سؤال للبنات انا شعري بيقع جامد و عندي قشره كتير جدا و روحت لدكتوره لكن للاسف العلاج بيبقي مؤقت بمجرد ما اسيبه بترجع المشكله تاني واحده نصحتني استخدم الحنه ممكن تفيدوني استخدمها ازاي الكثافه و التطويل و بارك الله فيكم جميعا
تم النشر السبت، ٢٧ يونيو ٢٠٢٦
السلام عليكم ورحمه الله وبركاته عاملين ي اخواتي عساكم بخير بصراحه المره دي جايه اشارك مشكله بنت خالتي معاكم و اخد رايكم بنت خالتي مرتبطه ب واحد صعيدي و بتحبه و بيحبها و ليهم سنتين مع بعض و كان بيتقدملها عرسان و ترفض عشانه المهم النهارده كلمته و قالتله أنه لو ماخدش خطوه هي هتوافق علي اللي بيتقدمولها لأن هي مبقتش صغيره في السن عندها 23 سنه ف قالها أنه عاوز يتقدم بس اهله مش موافقين أنه يتجوز من برا بلدهم و قاله أنه هيجي لوحده يتقدم و يجيب معاه أصحابه بس اهله محدش هيجي بصراحه انا قولتلها متوافقش لأن دا بعدين هيعملها مشاكل مع اهل جوزها و هيبهدلوها و مش هيحبوها خاصه انها هتعيش في بيت عيله ف انتوا اي رايكم
تم النشر الخميس، ١٨ يونيو ٢٠٢٦
اه عادي ممكن تنزل تدور في محافظتك هتلاقي شغل في مطعم او سوبر ماركت أو مكتبه هتلاقي في كتير بس لازم تدور الشغل عمره ما كان عيب اشتغل اي حاجه دلوقتي لحك ما ربنا يكرمك و أن شاء الله تبقي حاجه كويسه
تم النشر الخميس، ٢٣ يوليو ٢٠٢٦
بصي ي حبيبتي الشهر دا خديه اجازه و رفهي علي نفسك اوي لأنك داخله سنه طويله و الكورسات ملهاش لازمه انا كنت باخد كورسات و محتجتهاش مش مطلوب منك غير منهجك مع بدايه السنه بلاش تدخلي ب حماس اوي عشان طاقتك متخلصش كلها اول السنه يعني خليكي ع الهادي كده طبعا التزمي بحضور دروسك في مواعيدها بلاش غياب بلاش تأخير بلاش اي تراكمات كله يخلص اول ب اول بلاش ناخد نفس الماده عند تلات مدرسين دا شغل عبط هو مدرس واحد كفايه مرتحتيش يبقي تغيره و ياريت التغير يبقي في اول السنه عشان تلحقي المدرس التاني بلاش تقعدي كل شويه تغيري من مجموعه للتانيه مش كل المجموعات ماشيه مع بعض و حتي لو ماشيه مع بعض ممكن معلومه استقالت عنها و متقالتش هنا و هتتقال في المره الجايه ف تضيعي عليكي المعلومه بلاش تهربي من امتحانات الدروس حتي لو مش مذاكره روحي جربي ابعدي عن السوشيال ميديا و قسمي وقتك و خلي في يومك ساعه بريك ترفعي بيها علي نفسك بالتوفيق ان شاء الله
تم النشر الأربعاء، ١ يوليو ٢٠٢٦
اكيد علاقه حرام و مفيش علاقه حرام لتكمل و لو كملت بتبقي كلها مشاكل بعدين ي ماما انتي لسه كتكوته صغيره مشوارك طويل محتاجه تركزي في تعليمك و مذاكرتك عشان ترفعي راس والدتك و والدك اللي طالع عينهم عشانك و هو لسه صغير اوي اوي اوي دا لسه وراه كليه و جيش و حوارات ي حبيبي و كمان انتوا الاتنين في سن مراهقه ف كل دا تضيع وقت و هو لو فعلا عاوزك و شاريكي يدخل البيت من بابه حتي لو مش معاه حاجه بس يبقي راجل و يحاول غير كده شغل عيال ابوكي ميستهلش منك ابدا ان حتت عيل يعدي من جميع يقول بكلم بنت الراجل دا و مغفله اقطعي علاقتك بيه ي حبيبي و ربنا يوفقك و يصلح حالك يارب
تم النشر الجمعة، ٢٦ يونيو ٢٠٢٦
استهدي بالله واظب علي قراءه سوره الاخلاص و البقره صلي حتي لو مش عارف تخشع صلي يفضل تصلي في المسجد جماعه اكيد هيبقي احسن مره في مره هتلاقي نفسك رجعت لطبيعتك متسيبش مجال الوسواس يتمكن منك استغفر الله كتير و ربنا يصلح حالك
تم النشر السبت، ٢٠ يونيو ٢٠٢٦
لا صحبتك مش كويسه و زي ما بتتكلم معاكي علي الناس اكيد هنتكلم عنك برضو ف اقطعي علاقتك بيها ادعي لها ربنا يهديها و يصلح حالها و حاولي تصديها كل ما تتدخل في خصوصياتك متسكتيش و اتريقي عليها في وشها انتي كمان و قليلي منها زي ما بتعمل عشان تجرب الاحساس عارفه انك ممكن متعرفيش تعملي دا بس هي مش هتسكت غير لما تدوق
تم النشر الخميس، ١٨ يونيو ٢٠٢٦
امسك في حبك متسيبهوش اي كان الظروف اي عارفه الدنيا صعبه شويتين تلاته بس اهو حاول تدخل البيت من بابه و تتقدم و فهم أهلها ظروفك و صدقني لو والدها حس انك فعلا بتحب بنته و هتحافظ عليها اكيد هيساعدك صلي استخاره طبعا قبل كل دا و ربنا يقدم لك اللي فيه الخير
تم النشر الأربعاء، ١٧ يونيو ٢٠٢٦
اول مره ليكي تنزلي جيم ف يكفي تلات ايام في الاسبوع هتقسميهم يوم بطن و يوم علوي و يوم سفلي مع الكارديو طبعا و هناك اكيد الكوتش هتفهمك اول اسبوع هتحسي بتعب اكيد و عضلات جسمك هتبقي مشدوده بس متقلقيش دا طبيعي بعد اول اسبوعين هيبتدي جسمك يتعود و مش هتتعبي تاني طبعا المواعيد دي براحتك بس الصبح هو احسن وقت لأن الحرق بيبقي عالي فيه و كمان الدنيا بتبقي هاديه بليل هتلاقي زحمه و ريحه وحشه و مش هتعرفي تتمرني😂 ف الصبح افضل وقت من وجهه نظري و كمان الكوتش هتبقي مركزه معاكي و تفهمك اكتر
تم النشر الثلاثاء، ١٦ يونيو ٢٠٢٦
بصي ي حبيبتي اول حاجه و اهم حاجه هتحتاجي ازازه ماء معاكي و كمان يبقي معاكي مناديل أو فوطه صغننه عشان الحر و العرق كمان هتحتاجي بادي اسبلاش يبقي معاكي في شنطتك و طبعا لبس الجيم مش لازم تشتري لو معندكيش البسي اي لبس يبقي مريح و برضو كوتشي يبقي خفيف عشان رجلك متوجعكيش و هما في الجيم بيبقوا مشغلين اغاني لو مش حابه تسمعي الاغاني ف خدي معاكي الهيدفون بتاعتك أو الايربودز عشان تسمعي اللي تحبيه و بس كده
تم النشر الثلاثاء، ١٦ يونيو ٢٠٢٦
من غير اي تردد لازم تبعدي عنه و متتنازليش ابدا عن كرامتك علشان خاطر حد
تم النشر الثلاثاء، ١٦ يونيو ٢٠٢٦
لعرض الملف الشخصي في فدني اضغط هنا