Habiba Kareem

إجمالي النقاط: 330

1 سؤال

كيف أتعامل مع ضغط المذاكرة وتراكم التوتر والأعراض الجسدية والنفسية وفقدان الشهية أثناء دراسة البكالوريا؟

السلام عليكم ورحمة الله وبركاته ٠ بداية انا بكتب وعارفة انه مفيش حاجة هتتغير بس لعل وعسى تحصل معجزة يعنى ! انا حاليا بمر بفترة نقدر نقول هيتحدد عليها مستقبلى "تانية بكالوريا " بداية الدراسة من حوالى شهر اصعب شهر عدى عليا نظرا لطبيعة مذاكرتى الاونلاين ف انا مش بطلع من اوضتى حرفيا بنام واقوم على الكتاب مقابل ده بقى التوتر مش بعرف اسيطر عليه بدأت احس بأعراض فى جسمى كله رقبتى وظهرى من قاعدة المكتب ايديا بتنمل كتير اوى عنيا بتوجعنى جدا مع انى كاشفه نظر ولابسة نظارة حالتى كلها بتتدهور من الاخر غير ان انا نحيفة وضعيفة عندى مشكلة كبيرة مع الاكل روحت ل 3دكاترة تغذية وروحت لدكاترة باطنه علشان مش بقدر اكل ومفيش حاجة بتجيب نتيجة فى دكتورة قالت لى انك مش بتقدرى تاكلى علشان توترك والموضوع متعلق بالنفسية اكتر واخذت مهدئات وحرفيا تعبت من نفسى جربت كل حاجة مفيش ولا حاجة بتجيب معايا نتيجة .. حاليا بقى حاسة انى خلاص مبقاش فى طاقة اكمل ولا نفسيا ولا جسديا مش عارفة اعمل ايه كل ده من شهر طب شوية كده هعمل ايه التفكير مش سايب دماغى ولا الصداع سايبها بردو حاسه ان اهلى تعبوا بجد منى مبقتش بقول حاجة لو حاسة انى بموت مش بقول دعيت ربنا كتير بحاول اقنع نفسى بأى كلام ايجابى ولا اى حاجة بتتغير والله اتمنى لو حد يقدر يساعدنى اكيد فى ناس مرت باللى بمر بيه ده افيدونى جزاكم الله خيرا

تم النشر الجمعة، ٢ أكتوبر ٢٠٢٦

3 إجابة

اللى عملتيه ده صح جدا وطبيعى تحسى الاحساس ده لانك مش متعودة على كده بس اهم حاجة خليكى ثابته على كده و متنزليش اى تطبيق تانى بقى وحاولى بقى تشغلى وقتك قدر الامكان بالمذاكرة مدوريش على اى حاجة تانية تشغلى بيها وقتك لا خلاص انا مسحت كل التطبيقات علشان اذاكر يبقى اذاكر بجد شهر بالكتير لو فضلتى فعلا مسيطرة على نفسك ومنزلتيش التطبيقات تانى خلاص هتتعودى على المذاكرة بجد وعقلك هيقتنع ان شوية التطبيقات دول مجرد تفاهات بنضيع وقتنا فيهم

تم النشر الخميس، ٥ نوفمبر ٢٠٢٦


ده شئ طبيعى وعادى اننا نتعرض لحاجات زى دى وهدفك هنا مش ازاى تتخلصى من التوتر لا انتى هتتعاملى مع التوتر هو كده كده موجود خلاص يبقى هنشوف حلول نتعامل معاه و وحده وحده ممكن مع كتر التعود على المواقف الموترة الموضوع يقل اول ما تلاقى نفسك اتوترى وبتفكرى كتير وضربات قلبك عاليه افقى ثوانى ما نفسك اهدى اتنفسى براحة خدى شهيق وانتى بتعدى ل ٤ وبعدها عدى ٢ وخرجى زفير فى ٨ عدات وكررى الموضوع كذا مرة وده مع انك تقولى لنفسك مش هفكر مش هتوترى عادى الموقف هيعدى وهكذا لو متاح انك تتكلمى مع اى شخص وقت التوتر يبقى كويس لما بتتكلمى دماغى بتبطل تفكير وتحسى ان دماغى هديت شويه والتوتر قل حاجة كمان ودى اهم حاجة زى ما ربنا قال ﴿ أَلَا بِذِكْرِ ٱللَّهِ تَطْمَئِنُّ ٱلْقُلُوبُ ﴾ اذكرى الله دايما خليكى واثقة كده ان طول ما بذكر ربنا ربنا ينزل السكينه على قلبى ومش هتوتر ممكن الموضوع يطول معاكى عادى مفيش حاجة بتيجى من اول مرة بس جاهدى نفسك دايما انك تتغلبى على ده اما بقى لو الموضوع صعب يعنى او مثلا بتحسى بحاجة فى قلبك بعد الشر وقت التوتر فكده ممكن تروحى لمختص افضل .

تم النشر الجمعة، ٢٣ أكتوبر ٢٠٢٦


اكيد فى مواقف بتحصل مش بنكون عايزينها بالشكل ده ولا حتى بنبقى عاملين حسابنا لكده فكثرة التفكير دى نابعة من كثرة الاهتمام بالموقف يعنى بلاش تهتمى بالمواقف ولا تلومى نفسك ولا اى حاجة من دى احنا عايشين حياة يعنى مواقف وخبرات بنتعلم منها مش بنقف عندها وغالبا كتر التعرض للمواقف خلاص دماغ مش هتفكر تلقائى واكيد طبعا الموضوع يختلف حسب الموقف نفسه

تم النشر السبت، ١٧ أكتوبر ٢٠٢٦

8 تعليق

طالما فيها جروب صدقونى ما هنعمل حاجة اساسا الحاجات دى مفقوشه قبل كده ما حد يقدر يشجعك ويقومك تذاكرى غير ارادتك

تم النشر الأربعاء، ٢١ أكتوبر ٢٠٢٦


احب اقولك فى كتير زيك يمكن انا داخله اسأل نفس السؤال لقيت سؤالك فى وشى دمعت ، بصى انا زي زيك حرفيا تانية بكالوريا بردو فهقولك على الحاجات اللى هحاول اعملها يمكن تفيدك وتفيدنى بردو ،اول حاجة لازم نخفف الضغط من علينا شوية وخلاص طالما بنعمل اللى علينا يبقى كل قضاء ربنا خير مش هيفيد بحاجة كتر التفكير مش يفيد بحاجة جلد الذات كل ما علينا نسعى بدون تفكير كتير ، بالنسبة للعزلة وده شئ جابلى اكتئاب حرفيا بقالى شهرين مش بشوف بشر ولا بطلع من الاوضه فقولت ان انا مثلا كل مرة هغير مكان المذاكرة بره الاوضة حتى لو مرة كل يوم فى اى مكان فى البيت مش لازم الاوضه ونحاول نتكلم ونتفاعل ونفرغ اللى جوانا بلاش كله يكون فى نفسنا حتى لو محدش هيسمعنا نتكلم بردو ،عندك بقى الجانب الصحى حرفيا انا عارفة ان فى فئة كده من بداية السنه وهما كل حاجة بايظة وانا من ضمنهم (خسيت) طيب ما هو ده اكيد بسبب الضغط النفسى والتركيز بس على المذاكرة والضغط والتفكير فهيا كلها شبكه فى بعضها نحاول نحسن النفسية ونكافئ نفسنا بعد الانجازات حتى لو بسيطه نقدر فكرة ان احنا بشر عادى وبلاش تفكير زيادة ، وحاجة كمان ابعدى فكرة "عايزة اموت نفسى " عارفة انه ساعات بيكون كلام بس بنقوله بس طالما ربنا حطنا فى السنه دى يبقى خلاص مقدمناش خيار غير اننا نسعى مش هينفع نستسلم هيا الحياة لو مبقتش كده يبقى ايه لازمتها ؟! هيا دار ابتلاء دار مشقه وتعب ، وفى الاخر بقى دايما اقول كده لو انا عايزة اعمل حاجة بعملها سيبك من كلامى الكتير ده كله انتى بجد لو قعدتى مع نفسى كده انا عندى كذا وكذا وده محتاجاه يتعدل وده لازم اهتم بيه خلاص هتلاقى ارادتك رجعت هتستعينى بالله وهتلاقى كل حاجة زى الفل وافتكرى ان المذاكرة هيا جزء من الحياة مينفعش ابدا تكون هيا الحياة وفى الاول و الاخر احنا بشر يعنى طبيعى نمر بفترات زى دى عادى وهنرجع احسن من الاول وهكذا بس كده اتمنى تستفادى ولو بكلمة بس انا يعتبر قولت جزء من اللى فى دماغى هو هيفيدنى انا شخصيا قبل ما يفيد حد

تم النشر الأربعاء، ٢١ أكتوبر ٢٠٢٦


ثبتى عدد ساعات مذاكرة كل يوم حتى لو 5 ساعات بس او على قد مقدرتك متسمعيش كلام اللى يقولك متضغطيش على نفسك ولسه بدرى ومش عارفه ايه لا لازم تتعودى على المذاكرة من دلوقتى هيديك ثقه فى نفسك والله انا كل ما افتكر تالته اعدادى تلقائى بقوم اذاكر لان خلاص انا كنت اثبتت لنفسى انى اقدر اجيب مجموع حلو فمش هينفع انزل عن كده بقى فاهمة

تم النشر السبت، ١٧ أكتوبر ٢٠٢٦


بصى اول حاجة تعمليها هيا انك تاخدى خطوة وتستمرى حتى لو حاجة بسيطه لان كده كل يوم التراكم بيزيد اكتر ، قسمى يومك على فترات وبلاش تخلى اليوم كله مادة واحدة خلى مجهودك متوزع على مادتين مثلا علشان متحسيش انك مقصرة فى مادة وكمان هتحسى انك ماشية بالتوازى كده وده هيقلل الضغط شوية وبالنسبة للانجليزى فى كذا حد كويس اونلاين انا عن نفسى باخد مع انجلشاوى والسر فى الانجليزى الاستمرارية والله سيبك من كل الكلام اللى بيتقال عن المناهج لو سمعنا للكلام ده حرفيا مش هنعمل حاجة وافتكر ان فى ناس قدرت على كل ده وفى ناس ما شاء الله اللهم بارك ليه منبقاش زيهم او على الاقل نحاول نبقى زيهم

تم النشر الجمعة، ١٦ أكتوبر ٢٠٢٦


بالنسبة لموضوع وقت المذاكرة انا كل يوم اقول هقوم الفجر مش عايزة اتعود على المذاكرة باليل من دلوقتى سيباها لقدام شوية ولكن مرة تظبط واتنين تلاته لا فده بيبقى مؤشر بيقولى خلاص اليوم راح فبتالى اراكم

تم النشر الخميس، ٨ أكتوبر ٢٠٢٦


شكرا جدا .والله انا بالفعل مثبته عدد ساعات يعنى مش بقل عن 7 المشكلة اللى بتقابلنى حاليا انى بطيئة فى المذاكرة مش عارفة ده بسبب ايه وساعات اقول انا فهمت المحاضرة خلاص مش قادرة ان انا اقعد اذاكرها تانى من الكتاب فبدخل على الحل علطول واللى يقف معايا ارجعله معنديش القدرة على انى افضل مستحملة شرح ومذاكرة وحل وتدريبات مع ان معنديش تعفن دماغى ولا حاجة ولا بشوف شورتس ولا بمسك الموبايل الا للوتس بس

تم النشر الخميس، ٨ أكتوبر ٢٠٢٦


ما شاء الله حلوة الفكرة دى بحاول امشى عليها الفترة دى بحث مزهقش من مادة واحدة طول اليوم مع بس تبديل ادارة الاعمال بالفيزياء. شكرا جدا لحضرتك

تم النشر الأربعاء، ٧ أكتوبر ٢٠٢٦


تمام شكرا لنصيحة حضرتك ان شاء الله اعمل كده

تم النشر الأربعاء، ٧ أكتوبر ٢٠٢٦

لعرض الملف الشخصي في فدني اضغط هنا

فدني: فدني مجتمع عربي للأسئلة والإجابات والاستشارات، يجيب فيه خبراء موثّقون وأشخاص مرّوا بالتجربة.