Just a Muslim

بصي هي الفكرة كلها عادات في يومك بتحصل وهي بتنتج التفكير والنفسيات واي حاجه عموما، انا من رأيي تغيري سلوكياتك في يومك، بمعنى تبداي تبدلي عاداتك اللي انتي شايفاها وحشه بعادات حلوه، وليكن بتتفرجي على التيك توك بطلي وخلي بداله القراءة، وليكن بتبداي يومك بمسك التليفون وتردي على الرسائل بدليها بقراءة قران، المهم انتي حاولي تغيري اي سلوك انتي فعلا شايفاه غلط، القرب من ربنا محتاج مجاهده، وحاجه فرقت معايا عشان انتظم في الصلاه واحس بذلتها ( كنت بتدبر القران ) هيفرق معاكي اوي واسمعي فيديوهات دينية وثقفي نفسك في الدين لأن ده الأهم وارشحلك امجد سمير، ثانيا حتة الشهوه دي محتاجه تتعرفي على نفسك بمعنى تعرفي اي اللي بيخليها تتحفز وتبداي تقطعيه بالتدريج، وليكن غض البصر وغيره وارشحلك تقراي كتاب العادات الذرية هيعلمك ده كله، الموضوع مش بالسهل ومحتاج وقت وصبر وكل مره تقعي فيها متقسيش على نفسك وقومي في نفس اليوم لأن ده طبيعي جدا، انا بحاول بقالي حرفيا سنتين ولسه موصلتش للنتيجه اللي عايزها بس في تحسن في حياتي كتييير اوي والحمد لله بطلت عادات وحشه كانت عندي وبنيت عادات انا فعلا عايزها، واقراي كتب لانها حرفيا هتفرق معاكي في طريقة التفكير والشخصية وحاجات كتير اوي ده طبعا بجانب القران لان ده اهم، واخيرا حتة انك بتحربي لوحدك وانك مش قادره، دي افكار شيطان وهتيقسك، خلي ديما هروبك وشكواكي لربنا مش لحد تاني خالص

بص اولا صلح علاقتك بربنا قبل اهم حاجه، موضوع التقطيع في الصلاة طبيعي في بداية الالتزام وعلاجه مجاهدة النفس ومع الوقت هتلاقي نفسك ملتزم وربنا كرمك ثانيا موضوع التوهان، انا كنت زيك كده من سنه او اكتر لحد ما جيت مسكت ورقه وقلم وفضلت كل حاجه كانت بتيجي في بالي حرفيا من غير ترتيب افكار ولا اي حاجه، كنت بكتب بس اللي في بالي وظروفي الخاصه ونا نفسي في أي وعايز ابقى كده لي، وبعدها بدأت وحده وحده احدد اهداف ليا في الحياة، بدأت أقرأ وبدأت اتعلم لغه وبدأت أفكر أحسن من الاول، فأنت اعمل كده و هتلاقي الموضوع معاك بيتحسن وحده وحده بس اهم حاجه علاقتك بربنا ( انا كنت بكتب كل يوم حرفيا لحد ما قدرت اوصل لحد، قصدي انك مش من اول صفحه كتابه هتقدر تحدد انت عايز اي)

بصي انا واحد جرب الشعور ده من سنه وفاهم حضرتك تماما، بس اولا حتة الاستوري اللي نزلتيها وفرحانه انك مش في علاقه محرمه ده كانت غلط لان الانسان المفروض يحمد ربنا على أنه مبتلهوش بذنب زي المعظم فده ممكن كان عقاب ليكي، ثانيا ومعلش في الكلمة بس حضرتك غبية لأنك كنتي مكملة مع واحد كان بيعملك بالطريقة دي + دينه مش افضل حاحة زي ما قلتي، وخديها والله من واحد مجرب مفيش ابتلاء بينزل على العبد الا وهو خير ليه، انا من سنه كنت في علاقه محرمه بردو وسبحان الله يعتبر كانت نفس مواصفات الشب بتاعك وحاولت اعمل نفس اللي عملتي بحيث اني اغير منها وأشد بايديها وخليها تقرب من ربنا والكلام ده كله، بس ولا حاجه من دي حصلت ودخلت في علاقه مع واحد تاني وهي كانت لسه معايا، وبعد ما قلتلي وانفصلنا كنت شايف سواد حرفيا قدامي، لحد ما بدأت اقرب من ربنا اكتر وبدأت اصلي قيام الليل و حرفيا ده المفتاح اني خلاني انساها وابدا ارجع لنفسي واحلى من الاول كمان، انا بعد الموقف اللي حصلي في حياتي ده قدرت اكتشف عيوب كانت فيا انا مكنتش هعرفها لو مكنتش دخلت حياتي ونظرتي للحياة حرفيا اتغيرت بشكل كبير، خلاصة الكلام اقفلي الصفحه دي من حياتك وقربي من ربنا اكتر وركزي على نفسك عشان محدش والله يستاهل، وابداي طوري نفسك بتعلم مهارات جديده وفقهي نفسك في الدين اكتر، المهم متسبيش نفسك للشيطان والفراغ عشان دماغك هتفضل تودي وتجيب

عليكم السلام مبدايا الحاجات اللي انتي حساها دي طبيعي جدا، حته الانضباط هتلاقي نفسك منضبطه فترة وبتقعي فتره وده شئ طبيعي بس متخليش الواقعه تطول وانصحك تتابعي علي والكتاب على يوتيوب هيساعدك في حته الانضباط دي وتنظيم اليوم، بالنسبة للمواد، أنا كنت واحد مأهمل جاااامد اوي في اولا وتانيه ثانوي في جميع المواد حرفيا مش ماده واحده ولا اتنين، والحمد لله دخلت تالته ظبطت نفسي، وجبت 89% والحمد لله كنت راضي جدا، والأهم من ده كله المدرس اللي هتابعي معاه، قوليلي المواد اللي عندك عشان أنا سامع أنه في حوارات حصلت وفي مواد اتشالت والطالب بقى بيختار اللي هو عايزه ونا اقدر ارشحلك مدرسين كويسين تتابعي معاهم

قربي من ربنا وهتلاقي امورك تمام، وبلاش تعالجي حاجه ناقصه عندك بحاجه غلط، ولو على الواد فمن رأيي اني انتي محبتهوش ما هو إلا لهفه أو تعلق عشان بتملي بيه حاجه ناقصه عندك ( الحنية )، فنصيحة مني امسحي كل حاجه وحاولي تشغلي بنفسك بحاجات مفيده زي تعلم مهارات أو تتفقهي في الدين اكتر اي حاجه المهم بس انك تشغلي نفسك ومع الوقت هتلاقي نفسك اتحسنتي