يُوسُف أسَامَة

ده شامبو بستخدمه بشكل شخصي، خلى القشرة تختفي تماما و هو 0 sulfat فمش هيهيج الفروة وفيه لوشن حاجة كدة شبه النقط اسمها كيريلا هي علبة كدة لونها اخضر بتشيل القشرة كويس جدا ومحصليش معاها اثار جانبية بس عيبها انها قصيرة المدى فاسألي عن الجرعة المناسبة لو هتجيبيها واخر مرة جبتها اتذكر كانت ب٤٠ج تقريبا

حاولي تقسمي الدعاء لأقسام، زي قسم الدنيا وقسم للآخرة وتفصلي في كل واحد يعني مثلا الدنيا دعوات ليكي ولأهلك وتدعي بالرزق سواء مال او زوج صالح او ابناء صالحين او او او، تدعي بالصحة من الآخر تقدري تقسمي الدعوات في شأن الدنيا لأقسام كتير وادعي لنفسك ولأهلك ده هيخليكي تغتنمي اكبر غنيمة من الدعوات، كذلك نفس الشيء مع الآخرة اقعدي بس مع نفسك رتبي افكارك اكتبي ورقة وقلم وقسميهم واعمليهم في شكل خريطة ذهنية اكتر ده هيخليكي متنسيش إن شاء الله

حبيبي طالب الثانوية العامة خلاص فاضل حاجات بسيطة الشهر اللي قدامك ده بالثانوية العامة كلها وصدقني لو ظبط الدنيا فيه شهر الامتحانات هيكون أحسن شهر بالنسبالك فدي بعض النصائح خدها من أخوك ظبط نومك إنك تصحى من الفجر وتنام بعد العشا عشان انت هتمتحن ٩ الصبح فلازم دماغك تتعود إنك تكون فايق في المعاد ده بطل أي منبهات متعود عليها عشان لما تشربها وقت الامتحانات تحس بمفعولها خلي أسلوب مذاكرتك معتمد على القراءة من الكتاب مش من الفيديوهات ده هيكسبك وقت كتييييير جدا، وذاكر بإنك تراجع شرح الدرس من الكتاب و تحل الأسئلة اللي تخص الدرس ده، مش شرط كل الأسئلة، بس المهم تكون مُلم بأفكار الدرس، وامشي درس درس على هذا المنوال اقعد من عند اي مدرس مبتطلعش منه باستفادة ونصيحة مهمة جدااااا: السؤال اللي تغلط فيه علم عليه بالأحمر عشان ليلة الامتحان مش هتقعد تحل أسئلة جديدة، انت اللي هتعمله ليلة الامتحان انك هتراجع المنهج مراجعة سريعة بعد كدة تحل الأسئلة اللي أنت وقعت فيها في فترة المراجعة. اعمل اللي عليك وادعي ربنا كتير، عشان اللي في اللجنة ده بتاع ربنا مش بتاعك. يومك حاول تذاكر فيه مادتين أو ٣، والوقت اللي يضيع متتحسرش عليه، كدة كدة هيضيع منك وقت، مفيش حاجة بتتعمل كاملة ١٠٠%. حدد نفسك بكمية مش بوقت في اليوم عشان الوقت كدة كدة هيمر إنما الكمية لا. قسم يومك من الصلاة للصلاة، ده أفضل فاصل ممكن تاخده راحة بين المواد. افصل الموبايل و إياك تمسكه طول ما أنت بتذاكر، ارميه بعيد عنك اقفله باور المهم إياك تمسكه و إياك حتى في وقت الراحة تمسكه أو تفتح سوشيال. إياك إياك إياك تتوتر في اللجنة، أو تطبق قبل الامتحان، النوم قبل الامتحان أهم من المذاكرة، وحاول تخلي أعصابك هادية في الامتحان وخليك متأكد إن اللي في اللجنة ده بتاع ربنا مش بتاعك. اكتفي بكتاب واحد يكون سمعته حلوة، متشتتش نفسك في بحر من الكتب، ركز على كتاب واحد، واعرف إن الناصح اللي يجيب أعلى قيمة بأقل مجهود أتمنى أكون فيدتك، ممكن أكون قلت الكلام ده متأخر شوية بس خير إن شاء الله أتمنى لك التوفيق وأيا كانت النتيجة ارضى بيها واعرف إنها والله ما نهاية العالم و إن والله الحياة إيزي ومبتخلصش مع الثانوية العامة. أسأل الله لكم التوفيق.

بصي، و عن تجربة طول ما المنهج ماشي و لسا فيه جديد ذاكري الجديد و حلي عليه و متشغليش بالك بالقديم ليه وقته، و مع نهاية المناهج اقفلي على نفسك بابك و ابدأي هاتي المناهج من الاول و راجعي على كل كلمة فيه، وحلي بنوك الأسئلة اللي بتنزل في كتب المراجعة النهائية عشان بتكون شاملة لكل تفاصيل المنهج و استعيني بالله بس و منيأسيش هي نهاية الترم الأول بيصحبها حالة من الإجهاد و التعب و عدم القدرة على المذاكرة، نصيحتي إنك لما المدرسين يدوكي الاجازة اتعاملي معاها كأجازة و متذاكريش فيها و انسي انك في ثانوية تماما و بالتوفيق ان شاء الله

والله بصي، انت عندك بس كام مشكلة لو حليناهم هتبقي زي الفلل، او حاجة لازم تدركي أن الله هو مدبر الأمر، يعني اول حاجة حافظي على ورد قرآن يومي في معاد محدد و صلاتك و تشوفي فيديوهات بتتكلم عن تدبير ربنا للأمور، و تصلي على النبي كتييييييييييييير، الصلاة على النبي بتزيل الهم و تفرج الكرب، و مثلا تحافظي على اذكار الصباح و المساء و دعاء (اللهم إني أعوذ بك من الهم و الحزن والعجز و الكسل و الجبن و البخل و غلبة الدين و قهر الرجال)، تاني حاجة لازم تعرفي إن والله الكلية ما نهاية عالم، انت ممكن اصلا جنب الكلية تاخدي كورسات في الحاجة اللي بتحبيها و تشتغلي فيها، ولو كليتك سهلة خدي الشهادة و خلاص بس خدي كورسات في اللي بتحبيه جنب الكلية، واعرفي ان تقييمك كإنسانة مش بمجموع ثانوية ولا بكلية دخلتيها، قيمتك فعملك الصالح و نفعك لغيرك و اتقاء الله

بالنسبة للموبايل في برنامج اسمه digital detox. اديه الصلاحيات اللي يطلبها منك و اسمحي للتطبيقات المهمة انها تشتغل زي المكالمات الكاميرة و الواتس و هكذا، اما بالنسبة لعدم التركيز هيبدأ من ضبط معاد للنوم، مش بقولك اصحي ذاكري من اول الفجر ونامي بدري و كدة لا، بس ع الاقل يبقى فيه معاد محدد للنوم و معاد محدد للصحيان عشان مخك يتعود عليه، أما بالنسبة لتصوير الكتب فهو مش حرام غير لغرض البيع، لو انت هتصوري الكتب عشان تبيعيها فده حرام اما عشان تنتفعي بالعلم فلا إثم فيه ان شاء الله، لازم تظبطي سيستم للمذاكرة تمشي عليه و ادعي ربنا و اقرأي ولو ربع قرآن قبل المذاكرة كل ده هيفرق معاكي كتير ان شاء الله

ممكن تقولي لحد من اقاربه يقوله مثلا اخته تيجي في مرة و هما بياكلوا تقوله حاول تظبط كذا و كذا حتى عشان خطيبتك متلاحظش و كدة و تتصرف هي بقى كأخت، او لو ليكي أخ يخرج مع خطيبك يروحوا يقعدوا في مطعم فةاو ع قهوة لإن من الطبيعي ان الأخ لازم يتعرف على خطيب اخته فعو يجيبهاله بينهم و بين بعض متكنش منك مباشرة، وإن ضاقت السبل قوليله و إن شاء الله يتفهم. والله المستعان

بالصحبة الصالحة، ممكن تشوفي ناس صاحبك بتحبي القعدة معاهم، قراءة القرآن، العبي لعبة تسلي وقتك لحد ما تنسي، اتفرجي على اليوتيوب على حاجة بتحبيها او بتضحك ممكن ستانداب كوميدي او ما شابه، ولو انت من محبي الكرتون ممكن تتفرجي على كرتون، بلاش مسلسلات، المهم وقتك يكون مشغول سواء بحاجة مفيدة او حاجة مش حرام غير مفيدة ولو إن المفيدة أفضل، الحمدلله ربنا خلقنا بننسى عشان ننسى اللحظات الوحشة فكل شيء بيتنسي مع الوقت متقلقيش، الأمر كله مجرد وقت

سيبي الموضوع لأخوكي، أنت ماتاخدش منك حاجة، ممكن أذاكي أذى نفسي ولكن ده لا يعني إنك المفروض بقى تواجهيه و الموضوع ناخده بعداوة و تحطيه في دماغك لإنك لو رجعتي وبعتي هيؤذيكي أكتر على الاقل نفسيا وبدل ما بقى ملكيش حق بإنك قفلتي الكلام (و ده الصح لإن مش من شيم البنت مواجهة الرجل بل ترك الرجل للرجل) بل إنك لو رجعتي و بعتيله حاجة اول حاجة لا هو هيتأثر بيها ولا هيديها اعتبار، و تاني حاجة هتبقي انت الغلطانة لييه لإن احنا نهينا العلاقة ليه رجعتي تبعتيله تاني فأنت توكلي على الله و اتركي الأمر للنسيان مع الوقت هتنسيه و هتنسي إنه مر عليكي اساسا والله المستعان

الأفضل تروحي لدكتور تفسي لإن الصفات دي كثيرا ما بسمعها عن حالات الADHD اللي هو اضطراب فرط الحركة و تشتت الانتباه و انا مش طبيب نفسي ولكن عندي خلفية عنه و يفضل تشوفي الفيديو ده ممكن يفيدك https://youtu.be/FmofzVkYjA4

إن أمكنك نقله من المدرسة فهو أفضل لإن طالما هم تعاملهم معاكي لمطالبة بحق ابنك كدة فمستحيل يدوا لابنك حقه و يتعاملوا معاه بالطريقة السليمة و لو تسألى على المدارس اللي بتدي الجانب الديني بجانب الجانب العلمي يبقى افضل ليه بكتير، و إن شاء الله تكون افضل والله المستعان

إن كان عندك المقدرة على الانتقال لبلد جديد محدش يعرفك فيها قما قال العالم لمن قتل مئة نفس بأن يترك أرضه و يذهب إلى بلد أخرى فهو خير لك و ادعِ الله كثيرا بأن يسترك و اسأل الله أن يسترك و أن يثبت قلبك لازمي القرآن و اقرأي تفسيره و تدبري آياته و بكرر بأهمية الدعاء لأن الدعاء يرد القضاء

حاولي تبدأي بأنك متدخليش تنامي غير لما تكوني فعلا منهكة تماما و جاهزة للنوم، ذاكري بقى و اشغلي نفسك بأي شيء مفيد قراءة قرآن او دراسة علم شرعي و ابدأي بكدة على الأقل حبك للموضوع يقل بالتدريج مع الوقت و الله المستعان

مش عايز اقولك ان الثانوية مش نهاية العالم لإن اكيد ناس كتير قالولك كدة بس فعلا هي مش نهاية العالم، ممكن متكونيش مدركة هي قد اي تافهة دلوقتي بس هي فعلا مستاهلش كل البروباجندا اللي الاهالي عاملينه، فحاولي تذاكري المواد بنظام تحطيه انت وفقا لقدرتك على استيعاب المواد دي و نصيحة مهمة جدا هي انت اللي تذاكريه حلي عليه وقتي والله المستعان

فعلا الأوزان التقيلة في السن ده غلط جدا على الفقرات و الغضاريف بالأخص فيه رياضة جديدة اسمها calisthenics منتشرة دلوقتي في اماكن كتيرة ممكن حضرتك تسألي عنها في منطقتك الرياضة دي افضل بكيتر من الجيم بتكسب كتلة عضلية و قوة مش زي الجيم بيكسب كتلة بس، ممكن ميقتنعش بالكلام ده بس يشوف حتى التحديات على اليوتيوب بين لاعبي الجيم و لاعبي الكالستنكس، واللعبة ليها بطولات و اتحاد و الرياضة لسا جديدة ممكن يوصل فيها لبعيد انصحك شوفي فيديوهات للعبة هي كلها بوزن الجسم فقط