Ahmed M Youssef

كنت حاجة شبه كدة لحد اولى ثانوي تقريبا ... مشكلة اللي زينا كدة انه رغم انه جيد في التعامل مع دايرة معارفه لكنه سيء بمجرد الخروج من دايرة معارفه .... مشكلتي اني كنت في الأزهر ف كان صحابي عددهم قليل جدا ف كنت ف الفصل اتكلم معاهم لكن لما اخرج اخد دروس مشتركة مع العام مكنتش عارف اتكلم ولا كلمة ... بس الحمد لله كنت بعرف ألعب كورة ف فيه مرة واحد صاحبي قالي ان فيه حجز كورة وتعالى معانا ومن هنا بقى عرفت ف خلال فترة بسيطة اكتر من 20 واحد بحكم ان الكورة لعبة جماعية في حين اني كان شبه مستحيل اني اصاحب واحد بس جديد قبل لعب الكورة ف دايرة معارفي كدة بقت اوسع .... لما دخلت الجامعة حصلت نفس المشكلة لإن دايرة معارفي ف اولى جامعة هي صفر وفضلت لحد نص الترم الأول ع نفس الحال ده لحد ما سكنت سكن خارجي ف السكن اجباري زود دايرة معارفي وبدأت ألعب معاهم كورة ف عرفت ناس اكتر .... اكتر حاجة بتهلك الواحد مننا هو احساسه انه دايما متراقب وإنه لو غلط هيلاقي كل الناس بتضحك عليه ويستهزأوا بيه ف لازم تعرف ان اولا محدش مهتم وثانيا انت مش من المشاهير علشان تتراقب اصلا... حاول تدخل نفسك ف نشاطات رياضية .. اتعلم لعبة سهلة زي البنج بونج والعبها مع ناس غريبة ... روح جيم علشان تظبط جسمك وهناك اكيد هتلاقي ناس تتعرف عليها .... ممكن كل بوم علشان تكسر حاجز الخوف توقف واحد ف الشارع تسأله الساعة كام ... اي حد متعرفش اسمه قوله يباشا ويا مدير ... جرب حاجات جديدة انت مجربتهاش قبل كدة اصل هيحصل اي يعني لو تنحت ف وش بياع😅 ولا هيحصل حاجة ما انت شوف كام واحد بيتنح ف وش البياعين والدنيا بتمشي ف اكيد يعني مش هتيجي عليك وتقف... جرب كل حاجة دلوقتي علشان متندمش لما تكبر

معظم بيوت الارياف او بيوت العيلة بيبقى فيها القصة دي ... بتتكرر كتيييير جداااا حلها هو ان الزوج يعرف ان هو ومراته كيان واحد ... كرامتها هي كرامته والمطلوب منه انه يحافظ ع كرامتها ويقف لأهله بحق ربنا مش بالظلم والافتراء ويوقفهم عند حدودهم .... طب لو معملش كدة ؟ خلاص كدة بقت الزوجة مستباحة هي وأهلها واللي يتشددلها وللأسف زوجات اخواته اللي في البيت بيبقى نفسهم ومنى عينهم انه ينفصل عن مراته وغالبا الأم بتكون ليها نفس الرأي لإنه في الغالب بيكون هو الابن البار بقى او اللي عامل نفسه البار اللي شايل هم اخواته الرجالة اللي يقدروا يشيلوا همهم بس لأ هو شايل هم اخواته والبيت وكل حاجة.... طيب هل انا اقدر اقول حل؟ لأ طبعا دا اختيار ف خراب بيت بس انا بعرض حالة مش اكتر بس الملخص هو الراجل لو هيحافظ ع كرامة مراته او وعد انه يحافظ او حتى ف نيته انه يحافظ ف كدة المركب هتمشي ... غير كدة ف الوضع هبقى ازمة

بص حضرتك انا كنت ف صيدلية وكان ناس كتير جدا بيجيلها حرقان ف المعدة باستخدام اي دواء فيه المادة الفعالة دي اللي هي تادالافيل سواء بقى تركيز 5 او حتى تركيز 20 ... فيه حل انك تاخد لزقة اسمها تادانيرفي تركيز 5 مجم بدل سياليس 5 مجم ودي ميزتها انها بتذوب وبتمتص في الفم ومش بتعدي على المعدة اصلا ف نتجنب حرقان المعدة والمريء ... انصح حضرتك الأول ان دا يبقى تحت إشراف وعلم الطبيب المعالج ولو حضرتك عايز حل مؤقت ممكن تاخد دواء مضاد للحموضة قبل النوم اسمه "أنتودين 40 مجم"

بصي هو لو. لو دخلت على الصفحه بتاعتي. كان فيه حد سأل برضو بس هي كانت ثالثه ثانوي صراحه مش تانية هي الطريقه ستريكت قوي يعني طريقه حازمه قوي الطريقه يعني ما انصحش بيها في ثانيه ثانوي لانها شديده يعني البني ادم متهيأليمش هيستحملها سنتين ورا بعض خدي منها اللي تقدري تقدري تنفذيه واللي ما تقدريش تنفذيه خليه لثالثه ثانوي. كنت رادد على يعني حد كان كاتب كده فانت لو دخلت بس على الاكونت بتاعي هتشوفس التعليقات بتاعتي كاتبه في التعليقات مش في الاجابات في التعليقات هتلاقي كذا ريكورد كده بتاع ست ريكوردات ولا حاجه كلهم بيتكلموا في النقطه دي. منهم ما تشائي. ولو في حاجه يعني حاجه مركزه اقدر ان انا اقولها لثانيه ثانوي. حاجه يعني ليهم هما فاقدر اقول ان اهم حاجه دلوقتي مش تجميع الدرجات قد ما انا احاول افهم كل كلمه مكتوبه الكتب حاول يعني عارفه التدقيق في العلم ان انا ادقق في العلم او ان انا لان دي تاسي فعلا دي سنه تاسيس انا فعلا يعني انا احمد يعني تاسست في السنه دي. اولى ثانوي انا كنت ضايع فيها اصلا كنت جايب مجموعه يعني مش فاكر كان كام 80% حاجه كده يعني مش مش كويسه يعني؟ ولكن في ثانيه ثانوي الكيمياء كان فيه الجدول الدوري بقى وازاي ان انا اعمل معادله والحاجات دي كلها والتكافؤات وكل كل الحاجات يعني هي سنه يعني. فيها تاسيس كبير فانا دلوقتي ايه الفكره ان انا ما افوتش

اي هي نقطة التحول؟ اكيد مش فجأة ... دائما بيكون فيه بداية في الموضوع ده. ليه الإنسان ممكن يوقف حاجة هو كان بيعملها الا اذا كان داق حاجة تانية حركت جواه شعور معين خلاه يبقى كارف لحياته (انا هنا بدور معاكي مش باتهمك بحاجة خالص) ... ممكن يكون اكتسبتي عادة سيئة فيها لذة من لذات الدنيا خلتك تبقي كدة ... القعدة ع الفيسبوك بالكام ساعة اصلا دي ف حد ذاتها عادة سيئة ... فتح الريلز بتحرك جوا الواحد حاجات مش لطيفة ... تيك توك ... المقارنة بين حياتك وحياة المشاهير ... قراءة بوستات المرتبطين واللي بيبينوا قد اي الصحوبية بين الولد والبنت دي حاجة واو جدا ف ده حرك جواكي شعور ان انا عايزة اجرب من ده وهنا انا بأكد اني مش بوجه الكلام دا مباشرة لشخصك بس دي حاجات بتحصلنا كلنا... سماع اغنية مثلا كلماتها رايقة حركت شعور جواكي عايزة تمليه دا كله بيخلي الإنسان يزهق من حياته .... طب والحل ؟ الحل اني اقسم مشكلتي الكبيرة دي لمشاكل صغيرة وابدأ احل كل مشكلة لوحدها ويبقى كدة حليت المشكلة الكبيرة. اول حاجة ابدأ بيها هي الصلاة .... تبقي عاملة تحدي لنفسك اعملي جدول ف كشكول كدة وكل يوم تصلي ف الميعاد ادي لنفسك علامة ✅️ جنب اليوم ده.... وبالتوازي طبعا مع الصلاة المذاكرة... كدة انتي ضمنتي انك مفوتيش حاجة من فروض الله ولا فروض الدنيا .... بعد كدة نبدأ بالتدريج نحل المشاكل التانية ... صفحة من المصحف كل يوم كفاية ونزيدها بالتدريج بعد كدة ندخل الأذكار ..... الأهم من دا كله اني مجرد م ابدأ بتظبيط الصلاة لازم ابدأ ف نفس الوقت أوقف اي عادة سيئة نهائي .... يبقى كدة اولا اظبط صلاتي واتوقف عن العادات السيئة ثم ابدأ ادخل باقي العبادات بالتدريج البسيط .... وفيه نقطة صغيرة بس مهمة جدا وهي انك لسة صغيرة في السن وياما هتقعي بس الفكرة انك تقومي تاني بنفس الطريقة كدة بالتدريج وع الهادي.... ياما هتقابلي صحاب هيبقوا اي كلام وياما مش هتعرفي تذاكري ف الجامعة وياما وياما بس يكمن اهم حاجة انك تحافظي ع صحتك الجسدية والنفسية صدقيني مفيش حاجة يمتلكها الإنسان اهم من صحته النفسية والجسدية لإن بالمناسبة كونك بنت وكل ما يحصل حاجة تفضلي تعيطي دا اصلا عامل من عوامل ممكن تسبب أمراض مناعية ودي حصلت لواحدة اعرفها كانت بتعيط كتير جدا ودلوقتي بتقول انا لو رجع بيا الزمن كنت ضربت نفسي بالجزمة اول ما اعيط