كيف أتجاوز التفكير في علاقة عاطفية سابقة وأتعافى نفسياً دون التسرع بالعودة أو الارتباط مجدداً؟

Question

سلام عليكم انا بقالي فتره طلعت من علاقه بس ساعات بتاجي في بالي وبفكر فيها مع اني مش عايز ارجع ولا عايز اخش في علاقه تاني حاليا علشان مش جاهز ولا عايز ارجع علشان انا لسه مش كويس نفسيا وحتى لو حاولت نرجع لنفس الحته وهنسيب بعض علشان انا لسه مش عارف اصل حاجات فيه فحد ممكن ينصحني

أحمد بلال كرماني · Accepted Answer

وعليكم السلام إنك تفتكر العلاقة أو الشخص بعد الانفصال مش معناه إنك لسه عايز ترجع، ومش معناه كمان إنك أخدت قرار الانفصال غلط. فيه فرق بين إنك تفتقد شخص، وبين إنك تكون عايز وجوده في حياتك تاني. وفيه فرق بين إنك تفتكر لحظات حلوة عشتها، وبين إنك تكون مستعد تعيش التجربة بكل تفاصيلها ومشكلاتها من جديد. من كلامك، واضح إن عندك قدر من الوعي بنفسك؛ إنت مدرك إنك لسه مش متعافي نفسياً، وإن الرجوع من غير ما تعالج الأسباب اللي أدت للانفصال غالباً هيرجعك لنفس الدائرة. عايز ألفت نظرك لثلاث حاجات: 1. متتعاملش مع الذكريات باعتبارها أوامر. مش كل فكرة محتاجة تصرف، ومش كل اشتياق محتاج تواصل. ممكن تفتكر وتحن، وتسيب الشعور يعدي من غير ما تعمل حاجة. 2. متستعجلش الدخول في علاقة جديدة. مش مطلوب منك تثبت إنك تخطيت العلاقة بإنك ترتبط بحد تاني. خليك في الفترة دي مركز على نفسك، واحتياجاتك، والحاجات اللي محتاج تفهمها أو تغيرها في طريقة تعاملك مع العلاقات. 3. افهم إيه اللي محتاج تصلحه في نفسك. مهم متخليش كل تركيزك على إن العلاقة فشلت، لكن اسأل نفسك: إيه اللي كان بيحصل جوايا أثناء العلاقة؟ إيه المشكلات اللي مكنتش بعرف أتعامل معاها؟ وإيه اللي محتاج أتعلمه علشان متكررش نفس الأنماط مستقبلًا؟ وخلي بالك، التعافي مش معناه إنك تنسى الشخص أو متفكرش فيه تاني، التعافي معناه إن ذكراه متبقاش هي اللي بتحدد قراراتك ومزاجك واتجاه حياتك.

Yasmine Tawfik · Answer

السلام عليكم ورحمه الله وبركاته طبيعي جدا ان الانسان يشعر بحنين لاي حاجه هو سابها حتى لو كان هو بنفسه واخد القرار وقايل لا لانه اي حاجه بنعدي بيها بتكون ميكس كده ما بين الحلو والوحش وما بين الحاجات اللطيفه والحاجات الصعبه المؤذيه لانه في الاساس بيكون ايه اللي دفعنا نكون موجودين في المكان ده او نكون موجودين مع الاشخاص دول؟ اكيد في البدايه كان عندنا امل حاجه حلوه كان عندنا تفكير في حاجه حلوه فلما الحاجه الحلوه دي ما تكونش موجوده او بتيجي حاجات ثانيه اصعب تغطي عليها ده معنى مش انه موجود هي موجوده بس بقى متغطي عليها بقى في حاجات سلبيه اكثر منها فلذلك بنقوم واخدين قرار ان لا مش هينفع نكون موجودين هنا او مش هينفع نكون موجودين مع الشخص ده. فبتيجي الحاجات اللطيفه كل شويه تطلع لنا كده وتقول لنا طب احنا عايزين من ده تاني فاحنا نحن ونفكر ثاني ده طبيعي كل ده طبيعي جدا المهم هنا هو انه انا بعد ما قررت قرار في حاجه معينه وخرجت منها محتاج ان انا اعمل كده نهايه مفهومه للموضوع انا ليه وقفت الشيء ده انا ليه مش عايز اكمل في علاقه مثلا زي دي او في الشراكه دي مع الشخصيه علشان واحد اثنين ثلاثه اربعه طب والواحد اتنين تلاتة دولت ليه يعني اللي هو مجرد انا عشان خاطر اتكلمت معاه بطريقه مش كويسه لا علشان انا شخص مش برتاح وانا مع شخص مثلا يكلمني بطريقه مش كويسه مهما كنت بحبه مش هحب ان هو يكلمني بطريقه مش كويسه انا شخص عندي مبدا ان انا عندي احترام لنفسي وحاجه زي دي فيها كسر الاحترام لنفسك انا لازم اكون فاهم تفاصيل الموضوع كده علشان ابقى عارف اذا كان ده امر منتهي تماما ولا حاجه احتمال بعد فتره او بعد تغييرات معينه يكون فيها رجعه لازم افهم كل الكلام ده مع نفسي فكل لما يجيلي حنين كل اما ده يبقى بيفكرني ان انا محتاج اقعد ارتب الامور مع نفسي كويس قوي عشان ابقى عديت. التجربه دي في حياتي بشكل مضبوط يفيدني بدل ما يكون شكل مؤثر عليا سلبيا

Nada Ali · Answer

حاول تشغلي نفسك ومتخليش نفسك فاضيه وقرب من ربنا اكتر وطورى من نفسك وكل حاجه هاجي من غير اي ترتيب متحسبيش اي حاجه ما دام اخدتي قرار البعد خلاص مترجعيش تاني او حتي تحاولى اشتغلي علي نفسك وعلي الكرسى بتاعك وعلي حياتك وصدقني مفيش حاجه هتوقف

كيف أتجاوز التفكير في علاقة عاطفية سابقة وأتعافى نفسياً دون التسرع بالعودة أو الارتباط مجدداً؟

نفسية

علاقات

اجتماعية

سؤال من أحد أعضاء فدني

تم النشر السبت، ٧ نوفمبر ٢٠٢٦

4 إجابة

8 تعليق

فدني: فدني مجتمع عربي للأسئلة والإجابات والاستشارات، يجيب فيه خبراء موثّقون وأشخاص مرّوا بالتجربة.