السلام عليكم، الأعراض دي كلها طبيعية بعد فترة ضغط شديدة زي اللي مرت، أنتِ في حالة احتراق واللي بيحصل معك دلوقتي إنك جسمك وعقلك محتاجين فاصل من الراحة يطول أو يقصر على حسب احتياجهم. فاعطي نفسك الوقت للتعافي والرجوع لحالتك الطبيعية. إذا عندك موهبة أو هواية كنتِ بتحبيها فجربي تمارسيها ولو عشر دقائق في اليوم، ممكن حتى ترسمي أي شخبطة على الورق تفرغي فيها مشاعرك. شوية تمارين استرخاء خفيفة كل يوم هتفرق في تحسين حالتك المزاجية. لو فيه إمكانية تخرجي تغيري جو أو تسافري أنتِ والأهل لمكان تاني هيكون حلو جدًا. وأهم حاجة مهما كان الاحتراق اللي انتِ فيه والفصلان من كل شيء متتركيش الصلاة. صلي الوقت بوقته وقومي أول ما تسمعي الأذان وخلي وقت الصلاة فاصل تاني من الدنيا وضغوطها والتزمي بأذكار الصباح والمساء وخلي فيه وِرد قرآن ولو نصف صفحة تداومي عليها. استعيني بالله وإن شاء الله فترة وهتمر. اسمعي لجسمك وعقلك وتفهمي احتياجاتهم، نقطة أخيرة، مش عارفة إذا كنتِ لسه مكملة في دراسة مدرسية أو جامعية لكن عمومًا للدراسة وللحياة تعلمي تقنيات التعامل مع الضغط والتوتر وخلي دائما فيه فواصل للراحة والاسترخاء عشان جسمك وعقلك ميوصلوش تاني لدرجة الاحتراق. بالتوفيق إن شاء الله.
لعرض الإجابة في فدني اضغط هنا