السلام عليكم ورحمه الله وبركاته
ليا صديقة كنت بروح معاها الدروس في الابتدائيه و كنت بروح معاها المدرسة كمان و كنا كويسين سوا بس من ساعة ما دخلت الاعداديه و انا بقيت بحاول أبعد عنها و بقتش أحب اتعامل معاها زي زمان و بحس اني بتضايق لما بتعامل معاها
لدرجة اني في تالتة اعدادي غيرت مواعيد دروسي علشان ما تكونش معايا و كانت لما تقولي ننزل سوا لدرس مشترك بينا كنت اقول لها لا اسبقي انت
و ايام الامتحانات كنت ببعد عنها قد ما اقدر لانها ايام الامتحانات بالذات بتكون سلبية جدا و تقعد تقول انا مش هعرف احل حاجة و لما تطلع من الامتحانات نلاقيها بتعيط و بتقول سبت اسئلة كتير و طبعا كنت انا و واحدة صاحبتي بنقعد نواسيها
دلوقت انا بقيت في ثانوي و هي لسه معايا بل و بقت في فصلي كمان و دا تاعبني جدا
رغم انها طيبة جدا و وقت ما بحتاجها بلاقيها بس بحس انها بتهتم بزيادة عن اللازم
يعني لو بحط سنون للقلم بلاقيها بتفتح لي القلم مثلا او لو احنا نازلين فسحة و بلبس الشنطة بلاقيها بتساعدني انى البسها رغم اني اقدر البسها لوحدي
و هي كمان بتحب تتكلم كتير على التليفون وأنا مليش خالص في مكالمات التليفون الطويلة لأنها بتتعبني جدا بس كنت بستحمل علشان عارفة انها وحيدة و ملهاش اخوات ولا صحاب غيري
كمان هي تصرفاتها طفولية و ردة فعلها على الحاجة بتبقى زيادة عن اللزوم و انا هادية و مش بحب الصوت العالي
و المشكلة ان عندي واحدة كمان زيها بردو بس مش عارفه ليه بقبلها عنها شوية
بس هما الاتنين مش على وفاق اوي مع بعض
يعنى صاحبتي الاولى بتقعد تشتكي من التانية و ان ردة فعلها بردو زيادة عن اللازم و هي زيها و تقول لي اعملي حاجة
و انا حاولت بالفعل كذا مرة بس اللى فيه طبع ما بيتغيرش فبقيت اقول لها خلاص ما تتعامليش معاها و انا مش دكتورة نفسية هقدر أساعدها يعنى و بعدها الاقيها بتتكلم معاها بردو و بتقعد معاها
اللى هو منين بتشتكي منها و بعدها بتكلميها
يعنى انا بضطر اقعد معاها علشان هي وحيدة في المدرسة لكن ليه هي تقعد مع صاحبتي التانية و لما تغيب تقول كويس انها ما جاتش
فأنا دلوقت بقيت بحاول ابعد بس مش لدرجة أنهي الصداقة و انا بس عايزة اعرف هو انا طبيعية ولا انا كده شخص توكسيك ولا ايه الدنيا
علشان الموضوع دا تاعبني جدا و مش لاقية حد يساعدني
عارفة طولت عليكم و بشكر حضراتكم على القراءة
خلينا نقول في البدايه ان صداقه الطفوله بتكون صداقه مميزه جدا ما بتتنسيش على مر الايام. بيكون فيها كل التفاصيل الحلوه اللي ممكن ان احنا نفتكرها في حياتنا. لكن مع الوقت الصداقه دي بتكون ما بين اتنين اصدقاء هما بيكبروا وبيكون كل واحد فيهم ليه ميول وليه طباع مختلفه ممكن يتفقوا هم الاثنين مع بعض وممكن يختلفوا .في وضعك انت وصديقتك انت اختلفتي لكن مش شخص توكسك بمعنى ان البنت دي متعلقه بيكي جدا وبتغير عليك وممكن تصاحب البنت اللي معاكي علشان خاطر هي بتغير عليكي وبتحبك فتحاول ان هي تبعدها عنك. الوضع ده طبيعي. فكره ان الطريقه بتاعتها انتي مش حابه انك تتعاملي بيها فانت ممكن تعملي اطار للعلاقه.بمعنى انك تتكلمي معاها في الحاجات اللي انت مش حباها وهي هتتقبل منك الموضوع بس يكون باسلوب هادي. ما يكونش في عنف ولا حده في الكلام. صدقيني هي هتتقبل منك وهي عشان بتحبك هتقدر ان هي تتعامل معك بالشكل المرضي اللي يخليكم تكملوا مع بعض. البنوته دي ممكن ما تتكررش تاني في حياتك لان هي بتحبك بجد ومش عايزه حاجه منك ومش عايزه مصلحه منك فانت ممكن تعملي حدود في العلاقه وتقولي لها كانكم بتتناقشوا او بتلعبوا لعبه الصراحه مثلا وتقولي لها الحاجات اللي انت نفسك ان هي تتغير. علشان تقدروا تكملوا لان لو البنت دي بعدت عنك انت ممكن تقابلي اشخاص تانيين بس مش هيكونوا بنفس مصداقيه البنوته ممكن يكون تعلقها بيكي الزائد هو اللي عمل كده. وانت مش متحمله التعلق ده فاحنا ممكن بالتدريج وبالراحه نخلي العلاقه تمشي بشكل سوي لكن مش اننا نصدم اللي قدامنا بعيوبه او بتعلقه ده لانه هيزداد اكتر هينهار. فكوني صبوره وهاديه في التعامل لو حابه تكملي مع حد بيحبك بجد🩷
تم النشر الخميس، ١ يناير ٢٠٢٦
السلام عليكم، تصدقي انت وهي صعبانين عليّ. واضح إنها بسبب ظروفها وحياتها عندها تعلق مرضي بك، ومش بعيد تكون هي نفسها مدركة المشكلة ومش عارفة تتخلص منها. وممكن قوي يكون الوضع ده مسبب لها أذى وضغط نفسي كبير. لو بحثتِ هنا في التطبيق هتلاقي بنات كاتبين مشاكل عن تعلقهم بصديقات أو بأشخاص وبيعانوا عشان يتخلصوا من التعلق ده. في نفس الوقت أنا متفهمة مشاعرك وصعوبة الوضع عليك خاصة مع اختلاف شخصياتكم وإنك زي ما قلت شخص بيحب يعتمد على نفسه في كل حاجة وبتحبي الهدوء ومش لك في المكالمات الكتير. التعلق الزائد للأسف ممكن يدفع الطرف المقابل للنفور لاشعوريا وده بيحصل تقريبا مع كتير من البشر، فتغير مشاعرك ناحيتها حصل بسبب تعلقها وارتباطها الشديد بك. أنت غصب عنك أكيد الوضع تاعبك وده اللي بيخليك تعامليها ببرود وقسوة أحيانا... سهل أقول لك حاولي تتفهميها وتلتمسي لها العذر، ممكن أقترح عليك تقرأي بعض الأسئلة على التطبيق الخاصة بالتعلق وشوفي إجابات الخبراء عليها ونصائحهم، ممكن تلاقي نصائح تساعدك. وانتظري برضه إن شاء الله حد من الأخصائيين يجاوبك ويفهمك إزاي تتعاملي معها بطريقة تساعدها تفك التعلق أو على الأقل تكون تعامليها بطريقة صحيحة لا تجرحها أو تسبب آثار سلبية معها. وربنا يصلح أحوالكم انتم الاتنين.
تم النشر الخميس، ١ يناير ٢٠٢٦
وعليكم السلام ورحمة الله وبركاته يا قمر 🌸 لا يا حبيبتي، أنتِ مش شخص توكسيك خالص ! ده شعور طبيعي جداً، والصداقات بتتغير مع السن والنمو الشخصي. في الطفولة كنتوا قريبين، بس دلوقتي أنتِ هادية وبحبي الهدوء، وهي سلبية وطفولية وبتحتاج دعم زيادة – ده مش عيب فيكِ، ده حدود شخصية صحية. الإسلام بيأمرنا نختار الصحبة اللي ترتقي بنا (زي قوله تعالى: "وَاصْبِرْ نَفْسَكَ مَعَ الَّذِينَ يَدْعُونَ رَبَّهُمْ بِالْغَدَاةِ وَالْعَشِيِّ")، ومش معناه نتحمل اللي بيرهقنا نفسياً. إيه اللي تعمليه عملياً عشان ترتاحي: حددي حدود بلطف : قولي لها "أنا بحبك، بس أنا مش بحب المكالمات الطويلة، خلينا نتقابل في المدرسة أحسن"، أو "شكراً على المساعدة، أنا هعملها لوحدي". كده بتحافظي على الاحترام بدون قطع كامل. ركزي على وقتك : في الفسحة أو الدروس، انضمي لمجموعات تانية أو ركزي في دراستك. لو غابت، استغلي الوقت ده في هواية صغيرة زي قراءة كتاب إسلامي قصير يريح بالك. مع الصديقة التانية : لو هي تشكي، قولي "أنا مش هتدخل بينكم، كل واحدة مسؤولة عن تصرفاتها". وابتعدي عن الدراما دي شوية عشان متتعبيش. أنتِ طيبة إنك بتحاولي تساعديها رغم التعب، بس صحتك النفسية أولوية . لو الموضوع لسه بيضايقك، ابحثي في فدني عن "صداقات مرهقة" أو "كيف أحدد حدود مع الأصدقاء"، هتلاقي إجابات كتيرة مفيدة. ولو عايزة استشارة أعمق، روحي على صفحة الخبراء هنا: https://www.fedni.net/experts – في متخصصين في علم النفس هيساعدوكِ. أنتِ قوية وهتعديها، ربنا يريح بالك ويختارلكِ صحبة صالحة 😊. لو عايزة تفاصيل أكتر، قوليلي!
تم النشر الخميس، ١ يناير ٢٠٢٦
😂😂العفو
تم النشر الخميس، ١ يناير ٢٠٢٦
استعيني بالله وادعيلها إنها تتخلص من التعلق ده + اسألي شات جيبي تي هيفيدك 🙃
تم النشر الخميس، ١ يناير ٢٠٢٦
عن طريق مثلا انك توصلي لها رساله غير مباشره انها ما ينفعش تتمسك بحد التمسك ده او التعلق الشديد ده ليه بقى لان اولا ده بيخلي اللي قدامها بدل ما يحبها اكثر بالعكس بيزهق منها بس طبعا انت مش هتقولي لها الكلام ده مباشر انت هتعملي كده عن طريق تصرفاتك ازاي يعني مثلا زي ما انت قلتي مكالمات مش هتردي الا مثلا كل اسبوع تردي على مكالمه انت مش مضطره تردي على كله وده فايده ليها قبل ما تكون فايده ليكي فايدتك طبعا عدم تضييع الوقت لكن فايده ليها انها هتتعلم انها ما تتعلقش بحد تتعلم انها لازم تكتفي بنفسها وبربنا يبقى اول حاجه المكالمات ما فيش رد غير مثلا كل فتره كل فتره اللي هو على بعض بس ثاني حاجه مش بالضروره تكون معاكي في كل مكان وفي كل وقت يعني اقعدي في مكانك في الفصل او في الطابور او في اي حاجه هي جت قعدت جنبك تعاملي مع الموقف عادي جدا ما فيش مبالغه خالص انت بتعملي حاجه او مركزه في حاجه معينه تمام هي قاعده خلاص ما تلاقي ما فيش اهتمام منك اصلا هي خلاص هتزهق اما تلاقيك انت اصلا مركزه مع حاجه ثانيه خلاص وحسسيها ان ده العادي انك تبقي قاعده جنبي وانا اكون قاعده بعمل حاجه ثانيه ده الطبيعي بتاعي جدا ما فيش ادنى مشكله لو مشيتي على الخطوات دي دايما التعلق اللي عندها من ناحيتك هيقل
تم النشر الخميس، ١ يناير ٢٠٢٦
😂 .... لا ده الموضوع بقى طلع كبير بصي بقى هي البنت دي واضح من كلامك كده انها متعلقه بيكي جدا وانتي مش نفس درجه التعلق بيها لان اصلا التعلق ده مش حاجه كويسه ده حاجه ليها اضرار والتعلق ده بيخليها تكون عاوزه تكون جنبك دايما او حاسه بوجودك بس ما نقدرش نقول ان التعلق حاجه بتروح في ثواني كده اصل القلب مش زرار بندوس عليه فتتقفل والتعلق يروح لا هو بيروح بس على مدى طويل ازاي ؟؟
تم النشر الخميس، ١ يناير ٢٠٢٦
الحل الأريح إن تعاتبيها وتعرفيها إنك محتاجه خصوصيه أكتر
تم النشر الخميس، ١ يناير ٢٠٢٦
لأ إنتي مش توكسيك إنتي بتختاري إن الناس اللي المفروض يكونوا حواليكي يريحوا نفسيتك مش يتعبوها بس ده مايمنعش إن تعاملك معاهم يكون بالحسنى
تم النشر الخميس، ١ يناير ٢٠٢٦
انا اعتقد اني بعدت عنها علشان شخصيتها البعيدة عني تماما. يعني صاحبتي التانية فاهماني و شبهي شوية عنها اي نعم انا هادية جدا عنها بس هي بتتفهم اكتر منها.
تم النشر السبت، ٣ يناير ٢٠٢٦
صاحبتي التانية طيبة و ما عندهاش مشكلة معاها
تم النشر السبت، ٣ يناير ٢٠٢٦
اعتقدت اني ما عرفتش اوضح النقطة دي😅 هي صاحبتي الأولى دي هي اللى مش بتحب التانية
تم النشر السبت، ٣ يناير ٢٠٢٦
السلام عليكم ... حسب فهمي ان في الأولى طفولية وانتي زهقتي منها والثانية طفولية برضو بس بتقبليها /// الأولى شخصية عاطفية وحساسة ومشاعرها وردود أفعالها عالية زي ردود فعلها السلبية فترة الإمتحان ودي بتشعر بأي حاجة حواليها واي حاجة بسيطة تحصل بتبقا مؤثرة بالنسبة لها يعني لو المعلمة بصت لها بغضب مثلا هي هتحس ان المعلمة هاجمتها بشراسة مثلا .... الثانية اعتقد انها خبيثة لأنها بتنتقد البنت وبتقعد معاها في نفس الوقت ..... بعدك عن الأولى قد يكون لسببين ١-الإهتمام الزايد بيزهق ٢-الثانية هي اللي كرهتك في الأولى لأنها بتنتقدها وقد يكون بتتريق عليها من مبدأ فرّق تسُد مثلا وغريب انها بتقول لك اعملي حاجة هل هي عايزاكو تتخانقو مثلا ؟ وكلامي وجهة نظر متاخديهاش كحكم ثابت
تم النشر السبت، ٣ يناير ٢٠٢٦
بس انا الحمد لله ما طلعتش شخص توكسيك في الآخر يعني😅!؟
تم النشر السبت، ٣ يناير ٢٠٢٦
هي فعلا بيكون عندها طاقة كبيرة جدا ما شاء الله 😆 بحاول فعلا على قد ما اقدر افهمها بس كله بيجيب معايا نتايج عكسية او بلا تغيير في احسن الاحوال😅 فهي الفكرة اني بحس اني بظلمها معايا لان ساعات بتعامل معاها ببرود او تجاهل في اسوأ الحالات
تم النشر السبت، ٣ يناير ٢٠٢٦
عموما لو كانت estp فالله يكون في عونك لان شخصية ال estp تعتبر من اكتر الشخصيات المرحة وسريعة الملل من الروتين، وكمان اسمها المنقذ، يعني مش بتحب تسيب حد في حاله باختصار، الحل دلوقتي لازم هي تعرف عن شخصيتك والحاجات الي بتضايقك، انا ENFP وعندي صديقة ESTP وبالكاد قادر استحمل تواجدها في حياتي، المهم، عايز اقول ان في اختلاف شاسع جداً بين INFP و ESTP او ESFP، خليها تقرا عن نمط شخصيتك ووعيها بنفسك عشان ال ESTP دايما بيجيبو خارجيات وبحبو الكلام الكتير بدون فايدة وبيكرهو انهم يقعدو بدون ما يعملو حاجة، وعشان انتي صديقتها الوحيدة بتحب انها تظهرلك حبها واهتمامها بيكي عن طريق مساعدتك (زي ما قلت (estp) اسمه المنقذ) طبيعة شخصيتها انها معندهاش حاجة تقدمها للشخص الي بتحبه غير انها تساعده ولو في ابسط الحاجات، وبعدين estp شخصية عملية جداً ومتقدرش تقعد من دون ما تعمل حاجة، وهي عندها طاقة تفاعلية عالية جداً عكسك تماماً، انتي من اكتر الشخصيات الهادية والخجولة والمتجنبة في ارض الواقع، الكلام عن estp كتير بس اسالي gpt هيفيدك اكتر مني
تم النشر السبت، ٣ يناير ٢٠٢٦
بس جزاك الله خيرا الموقع ما شاء جايب حاجات كتير جدا و فعلا كنت قريت عن شخصيتها قبل كده بس انا ساعات بحس ان المشكلة فيا انا و بحس اني شخص وحش رغم ان تصرفاتها هي اللى بتضايقني بس بحس ان انا اللى بضايق نفسي رغم اني بتعامل مع كل زمايلي طبيعي جدا
تم النشر السبت، ٣ يناير ٢٠٢٦
اول مرة اسمع عن الأنياقرام دا بصراحه
تم النشر السبت، ٣ يناير ٢٠٢٦
هي كانت تقرييا يا estp او esfp
تم النشر السبت، ٣ يناير ٢٠٢٦
في اختبار تاني اسمه (الانياقرام) ده مهم برضو، ممكن تبحثي عنه
تم النشر السبت، ٣ يناير ٢٠٢٦
طيب الحل انك تقري عن شحصيتها وده مهم عشان تفهميها اكتر
تم النشر السبت، ٣ يناير ٢٠٢٦
ده رابط لأكبر موقع عربي نفسي بيضم مجموعة واسعة من الاختبارات من ضمنها اخبتارات الوسواس القهري، سمات الشخصية، لغة الحب (مهم جداً للازواج) واختبار الارق وغيرها كتير، المهم خلصي الاختبار ولازم تكوني صادقة جداً في الاجابات ولازم تكون حالتك النفسية قبل الاختبار معتدلة عشان النتيحة تكون صحيحة
تم النشر السبت، ٣ يناير ٢٠٢٦
اتا عارفة اختبار الانماط انا INFP و كنت خليتها تعمله قبل كده و كانت شخصية من الشخصيات الصفراء بس مش منذكرة اوي نمطها
تم النشر السبت، ٣ يناير ٢٠٢٦
https://obstan.org/16personalities/
تم النشر السبت، ٣ يناير ٢٠٢٦
انا لسة مخلصتش شرح
تم النشر السبت، ٣ يناير ٢٠٢٦
انتي محتاجة تعرفي نمط شخصية صحبتك، بصراحة الكلام عن الموضوع ده طويل جدا بس باختصار (في اختبار نفسي عالمي تم انشائه بواسطة كبار علماء النفس اسمه MBTI لتحديد انماط الشخصيات) الاختبار ده بيكشف انماط الشخصيات الانسانية وسلوكهم وطريقة تفاعلهم ونظرتهم للحياة، وطبعا حاجات تانية كتير جدا، وطبعا في مواقع كتير جدا لعمل الاختبار بس قبل ما تعملي الاختبار لازم تعرفي شوية حاجات (بعد ما تعملي الاختبار: حيظهرلك كود مكون من 4 احرف باللغة الإنجليزية، الكود ده عبارة عن رمز نمط شخصيتك، بس مش بيكون بشكل دقيق جدا لان ظروف الحياة والتجارب الشخصية بتغير في انماط شخصياتنا) المهم بعد ما تعملي الاختبار ابحثي كويس جداً في اليوتيوب وأسألي GTP عن نمط شخصيتك، والاهم من ده كله انك لازم ضروري جدا انك تعملي الاختبار لصحبتك، عشان تعرفي نمط شخصيتها ايه، وليه هي كلامها كتير وردة فعلها عالية، ومهم انك تقري تن شخصيتها عشان تفهمي السبب ورا انك مش بترتاحيلها رغم انها انسانة طيبة (دقيقتين وهبعت روابط الاختبار)
تم النشر السبت، ٣ يناير ٢٠٢٦
هو بسيط بس متراكم و كل ما بيتراكم بيتقل لان بردو فيه حاجات حصلت كتير جدا انا بس اللى مش فاكرة بس اتبقى الاثر و زي ما قولت دا تاعبني نفسيا جدا
تم النشر السبت، ٣ يناير ٢٠٢٦
الحصل بسيط جدا
تم النشر السبت، ٣ يناير ٢٠٢٦
غلبتك معايا حقك عليا 😆🫂 بس متشكرة ليكي جدا🫶
تم النشر الخميس، ١ يناير ٢٠٢٦
طب تصدقي انا يا اختي في الله فعلا مش برد عليها الا كل فين وفين و بحاول اتجاهلها ساعات و كل فين وفين اكلمها بطريقة غير مباشرة عن طريق اني اكلمها في قصص او ناس عندهم تعلق بردو و زي ما قولتلك هي كل ما اروح مكان الاقيها ورايا و كله جاي معايا بطريقة عكسية الحمد لله فمش عارفة ايه الحل 😆💔
تم النشر الخميس، ١ يناير ٢٠٢٦
ايوة انا حاسة انها متعلقة بيا جدا يعنى صاحبتي التانية فاهماني عنها شوية لكن الاولى دي صعبة جدا و بتوصل معايا انا مش بتوحشني يعنى دايما لما بتكلمني بتقولي وحشتيني بس انا مش حاسة زيها و مش هعرف اقول لها و انت كمان علشان ما تبقاش كدابة و كل يوم عايشة في الصراع دا😆💔
تم النشر الخميس، ١ يناير ٢٠٢٦
و المشكلة اني بحس ان انا اللى غلطانة لاني عارفة انها وحيدة و ملهاش اخوات بنات بردو بس انا فعليا بقيت بتعب منها كل ما اشوفها مزاجي بيتغير حتى الصبح في الطابور لما بشوفها بقولها ازيك و خلاص سواء هي او صاحبتي التانية بردو لكن لو شفت غيرها ببتسم و بسلم عليهم و بضحك معاهم و ساعات بكون قاصدة ابعد عنها و اتكلم مع التانيين على اساس انها تسيبني بس بلاقيها ورايا بردو بس الحمد لله صاحبتي التانية فهمت عليا و بقت الصبح تسيبني لحد ما انا اتكلم معاها. بردو ساعات بحس بالذنب لانهم كويسين معايا و لو في حاجة مضايقاني بيقعدوا معايا و بشوفوا ايه اللى مزاعلني و مش بيرتاحوا الا لما اكون ارجع لطبيعتي فمش عارفة هو انا اللى وحشة ولا ايه بالظبط 😆💔
تم النشر الخميس، ١ يناير ٢٠٢٦
ياما قلت لها و هي مفيش فايده ༎ຶ‿༎ຶ كذا مرة اقول لها صوتك عالي وطيه و كذا مرة اقول لها ردة فعلك زيادة عن اللازم و كذا مرة اقول لها مش بحب المكالمات الطويلة و هي مفيش خالص فبقيت بحس اني لو قسيت عليها هي هتبعد بس الموضوع جاب معايا نتيجة عكسية فمش عارفة اعمل ايه بحس اني عايزة اعيط من الضحك على مشكلتي الغريبة دي😆💔
تم النشر الخميس، ١ يناير ٢٠٢٦
انا حتى لو حبيت اسيبها و اروح اقعد مع بنات تانية و كده الاقيها جاية ورايا و كل ما اروح في حتة في المدرسة الاقيها ورايا النهاردة كان عندى درس مشترك معاها اتصلت عليا تقولي انت هتنزلي امتى؟ اللى هو انا انزل وقت ما اعوز طالما مش هتأخر عن معاد الحصة فرديت و قلت لها بعد العصر كده و بعدها رنت عليا تاني بس ما قدرتش ارد عليها بصراحه. المشكلة زي قلت انها شخص طيب بس انا اللى مش عارفه مالي يمكن لانها بتحسسني اني عايزة مساعدتها في كل حاجة و دا مش صح خالص لاني شخص بيحب بعتمد على نفسه فدا بيضايقني ولا ايه مش عارفه
تم النشر الخميس، ١ يناير ٢٠٢٦
المشكلة اني من كتر ما انا مش بحب اتعامل معاها بقيت بتعامل ببرود ساعات و ساعات بكون متعصبة رغم ان انا فعلا مش فاهمة ايه اللى وصلني لكده انا بتعامل مع الناس كلها كويس لكن معاها هي مش عارفه مش برتاح معاها ليه
تم النشر الخميس، ١ يناير ٢٠٢٦
لعرض السؤال في فدني اضغط هنا