انا تعبانه بجد نفسيا وجسديا مش عاوزه اعمل اي حاجه ومليش مزاج لاي حاجه كنت باخد علاج للاكتئاب وبعدين وقفت خوفا من أنه يأثر عليا بشكل سلبي في المستقبل هل يمكن يكون ده السبب ،
بحاول اكون طبيعية واتعامل طبيعي بس يلاقي نفسي حساسه زيادة عن اللزوم وعاوزه انام طول الوقت من التعب سواء من التفكير القلق اي حاجه بسيطه ناتجه عن أي قرار اتخذته بتأثر فيا اعمل ايه هل ارجع اخد العلاج تاني انا الفكرة بس إن انا خايفه مقدرش اعيش من غير العلاج ده اعمل ايه حد يساعدني
اعتقد خطوه غلط انك توقفي العلاج من نفسك لان التوقف المفاجئ دا غلط المفروض تكملي العلاج وتستمري عليه لحد ما الدكتور نفسه يقولك وقفي واعتقد بردو اني هوا هيقولك وقفيه بالتدريج استعيني بالله وكملي علاج وان شاء الله توقفيه في يوم من الايام وقصه انك تدمنيه لازم تسألي دكتورك تقوليله هل العلاج دا يا دكتور ممكن يوصلني لمرحله الإدمان اسئليه واستفسري منه عل كل حاجه وإن شاء الله فتره وتعدي اكيد الكل بيمر بظروف زي دي .....وربنا يشفيكي ويعافيكي اللهم آمين
تم النشر الثلاثاء، ٣ مارس ٢٠٢٦
السلام عليكم ورحمة الله وبركاته . بصي يا حبيبي اول حاجة الاكتئاب علاجة تقيل اصلا تمام بيعمل خمول وكسل وبيخلي قلبك تحسي كأنك بتموتي بالبطئ وبيأثر على كيمياء المخ دا معظم ادويه الاكتئاب كدا وبيعمل رعشه و.... و.. وحاجات كتير كل دواء وليه تأثير سلبي علينا حاولي تقللي الجرعه استغني عنه تماما وهتبقي احسن ان شاء الله عارفه ان لو قولتلك شوفي ايه بيفرحك واعمليه هتقولي مفيش حاجة بتفرحني ما هو فعلا الشخص اللي بيكون عنده اكتئاب بيبقا مش عارف ايه اللي بيفرحه او هو امتى بيكون حاسس هو فرحان ولا زعلان ومتضايق والكلام دا كله لان بيبقا مشاعره في حاله اضطراب. دا كله ناتج عن القلق الزايد حتى بردو بيبقا مش عارف ينام من غير الدواء فـ الأحسن نستغني نقلل فون قبل النوم ونقلل من الريلزات اللي ممكن تسبب اضطراب وخوف في المشاعر نشغل قرءان قبل ما ننام واتعودي تنامي عليه مش هقولك تكوني ملتزمه بصلاتك اوي لان الصلاه بتبقا صعبه علي مريض الاكتئاب بيحس كأن جسمه متخدر فـ حاولي تصلي حتى ولو ركعتين حاولي تقرئي جزء صغير من القرءان اسمعي بودكاست تشتت او بودكاست سكينه البودكاست بيساعد ان قلبك يرجع شبه ما كان دا غير انه بيفيدنا جميعا سواء كبير أو صغير اسمعي بودكاست كتير اهم حاجة ما تعيطيش كل حاجة بتعدي وافتكري ان الشخص لو حابب يشوف الدنيا جميله هيشوفها جميله ولو عايز يشوف كل حاجة سوداويه هيشوفها كدا فعلا فـ الدنيا على حسب نظره الإنسان فـ احنا نتفائل ونقول الذكر بتاعنا ونفتكر ان كلنا بتعدي علينا الفتره دي أهم حاجة تجنبي انك تقعدي لوحدك اطلعي اخرجي انزلي جيم او اعملي يوجا هتساعدك تبقي هاديه خالص وما تفكريش كل حاجة بإيد ربنا اتوكلي عليه ادعي ربنا كتير انسي انك مكتئبه تماما جسمك محتاج راحة انتي تستحقي انك تاخدي وقت لنفسك بس ولدماغك فـ نهدي كدا وهتعدي والله وربنا يربط على قلبك ويطمنك يارب ويجعلك مرتاحه دايما 💕
تم النشر الثلاثاء، ٣ مارس ٢٠٢٦
بصي اللي إنتي فيه ده الخمول، كتر النوم، الحساسية الزيادة مش عيب فيكي، ده جسمك بيقولك أنا مش قادر لوحدي. الاكتئاب بيسحب الطاقة زي الموبايل اللي بطاريته بتهرب، فبلاش تلومي نفسك إنك مش قادرة تتحركي. وإنتي خايفة من الدواء ليه؟ الدواء مش هيغير شخصيتك ولا هيخليكي مدمنة، هو بس بيصلح كيميا باظت جوه. الخوف الحقيقي هو إنك تضيعي أيامك وسنينك وإنتي محبوسة في السرير وفي الأفكار السودا دي. الرجوع للدواء مش هزيمة، ده ذكاء. وقرار إنك توقفي الدواء لوحدك هو اللي تعبك أكتر. لازم ترجعي للدكتور، مش عشان يغصبك على حاجة، بس عشان هو اللي معاه الكتالوج بتاع حالتك. قوليله أنا خايفة من الأعراض الجانبية، وهو هيطمنك أو يغيرلك النوع وقومي دلوقتي كلمي الدكتور أو احجزي ميعاد، دي أهم حاجه .وجد والله فتره وتعدي كان في حد عزيز عليا تعبان والحمد لله بقى احسن بالعلاج ومش بياخد حاجه دلوقتي بس هو هيطول معاكي شويه بس لازم تجاهدي عشان تخفي. وجد ربنا يحفظك ويسعدك
تم النشر الثلاثاء، ٣ مارس ٢٠٢٦
ما دي المشكلة أنه فعلا دلوقتي مش قادرة تعيشي من غيره و محتاجاه بس ليه من الاول أساسا اخدتيه و مكنتيش اخدتيه طلاما عارفة اضراره و تأثيره و أنا مش بهاجمك بس حاولي زي ما كنتي متعودة قبل متاخدي و الكام يوم دول إللي وقفتيه متاخدهوش حاولي تكملي من غيره على طول زي قبل كدة لما مكنتيش بتاخدي و إحنا كلنا حساسين و مش أي حد بيكون زيادة عن اللزوم غير إللي بيكون قلبه طيب زيك كدة و أنتي فعلا دة مش عيب دة من كتر ما أنتي طيبة زيادة فا حاولي متتأثريش بأي حاجة حواليكي ولا تتعلقي بيها ولا تتضايقي علشانها لأن كل شيء عابر و لو فيه موقف ضايقك حاولي تحكيه لحد قريب منك لو يقدر يساعدك و يحل لو مستدعية كدة أكيد هيقدم دة و ربنا معاكي بجد
تم النشر الثلاثاء، ٣ مارس ٢٠٢٦
يا حبيبتي، أنا ذكية هنا معاكي، وأنا آسفة جداً إنك بتمري باللي بتمري بيه ده.. الاكتئاب والقلق بيخلوا الإنسان زي اللي مش عارف يتحرك، وده طبيعي يحصل بعد وقف العلاج فجأة – ممكن يكون السبب جزء كبير، لأن الجسم بيحتاج وقت يتأقلم، بس متاخديش قرار العودة للدواء لوحدك أبداً . روحي لدكتور نفسي متخصص عشان يقيم حالتك ويحدد الجرعة أو البديل المناسب، وده مش ضعف، ده قوة إنك تهتمي بنفسك صح. خطوات عملية تساعدك دلوقتي (ابدئي بصغيرة عشان متتعبيش): روتين يومي بسيط : حددي 3 حاجات بس كل يوم – صلاة الضحى مع ذكر الله (زي "لا إله إلا الله" 100 مرة، بتخفف القلق جداً)، مشي 10 دقايق في الشمس، ووجبة صحية زي فاكهة أو تمر مع لبن. ده هيبني طاقتك تدريجياً. قرارات صغيرة : لما يجيلك قرار بسيط ويقلقك، اكتبيه على ورقة وقولي "هقرر بعد صلاة واحدة" – الصلاة بتنور البال وتريح القلب، زي ما قال ربنا "ألا بذكر الله تطمئن القلوب". النوم : حددي موعد نوم وصحيان ثابت (مثلاً 11 مساءً لـ7 صباحاً)، وابتعدي عن الموبايل ساعة قبل النوم. لو التعب شديد، خدي قسط نوم قصير 20 دقيقة بعد الظهر بس. أنتِ قوية وقادرة تتجاوزي ده، بس متستعجليش – الشفاء خطوة خطوة. لو عاوزة دعم أكتر، شوفي الخبراء في https://www.fedni.net/experts ، فيه دكاترة نفسيين هيساعدوكِ شخصياً. وابحثي في فدني عن "حلول للاكتئاب" هتلاقي إجابات كتيرة زي دي. أنتِ مش لوحدك، وهتقدري تعيشي حياة مليانة فرح إن شاء الله. 💕
تم النشر الثلاثاء، ٣ مارس ٢٠٢٦
لعرض السؤال في فدني اضغط هنا