سلام عليكم ورحمه الله وبركاته
أنا عندى سؤال او بمعني اصح انا سني ١٨ سنه وحقيقي مش عارفه اخد قرار وبجد دماغي ورمت من التفكير وبردو مش عارفه اخد قرار
بدايه القصه انا طالبه في ٣ ثانوي علمي علوم تمام في تفاصيل كتير جدا جدا سبب في إني مراكمه فيزيا وانجليزي كاملين
مبدئياً اقسم بالله دا مش بمزاجي انا كنت بدأت السنه بحماس وجد وفعلا كنت بذاكر بس في حاجات مكنتش اتخيل اني أمر بيها
اولا انا معايا اتنين اخوات صغيرين وماما بتشتغل وانا كنت اللي بقعد معاهم للأسف طوال فتره النهار وهما حرفيا متعلقين بيا اكتر من ماما بياخدوا وقت كبير من يومي
وتاني حاجه لأني مكنتش لاقيه مدرس افهم عنده نهائي السنه جريت وعدت بسرعه مكنتش اتخيلها
السؤال: انا اهلي عاوزني الم المادتين دول في الأيام الباقيه علشان عاوزني اغش وانا بفكر أأجل بس بصراحه بالنسبه لظروفي فهو فكره التأجيل صعبه لأن امي بتشتغل وتقريبا معتمده عليا في البيت والسنه دي حملت عليها جامد ولو أجلت كده هيبقي حمل اكتر وانا والله العظيم مش عايزه اغش عشان اجيب ٩٠ ولا حتي ٨٠ في المئه
أنا بس اضمن اني انجح انا مذاكره بنسبه كويسه يعني اعرف صحابي حرفيا ظروفهم مش زي ظروفي ومعتمدين عليها بشكل أساسي ومش مذاكرين كلمه لكن انا هغش بس عشان اعدي وعلشان ظروفي لا تسمح بالاعاده وفي نفس الوقت ضميري معذبني وقلبي بيدق جامد انا مش عارفه اخد قرار افيدوني
اختكم في الله
بصي انا كمان تالتة ثانوي و ظروفي السنة دي كانت بشعة بس ده مش مبرر.. بالعكس انا اخدت عهد على نفسي ان لو الإجابات جايالي جاهزة و متدبسة في ورقة الأسئلة برضو مش هغش.. احنا مش حمل اننا ناخد مكان حد تاني و يدعي علينا دعوة مظلوم تخلي حياتنا الجاية كلها جحيم.. و بعدين ليه مفترضة الأسوء؟ مش يمكن علشان انتي بارة بوالدتك و اخواتك الصغيرين ربنا ييسرلك الحال و يكافئك بمجموع كويس و حلال و تنجحي عكس تخيلك؟ فمتبقيش انتي اللي ضيعتي على نفسك الفرصة دي.. بالنسبة للفيزيا و الانجليزي يقدروا يتلموا و سهلة ان شاء الله.. الإنجليزي كل يوم خدي 2 units.. ااحفظي الكلمات الجديدة فيها و اسمعي شرح مختصر للجرامر و حلي شوية عليهم و في خلال اسبوع هيكونوا خلصوا و هتفضلي فاكراهم لإن مفاضلش كتير على الإمتحان.. بالنسبة للفيزيا خليكي ذكية فيها.. اسمعي فيديوهات كاملة على الفصل.. فيديو الفصل الأول دكتور كيرلس او محسن الحسيني و ذاكري و حلي قدر الامكان على كل فصل في كتاب المراجعة.. و ركزي على الفصلين التاني و التالت لإنهم الأصعب و اللي بييجي عليهم اكتر من نص الامتحان و ده كفيل ينجحك ان شاء الله بس احنا مش هنكتفي بالنجاح.. كملي و خدي الفصل الرابع و الحديثة بنفس الطريقة و دول سهلين و تقدري تلميهم بسهولة ان شاء الله.. و انسي التأجيل لإني عندي اخ اكبر كان مأجل من سنتين و بجد اسوء تجربة نفسية اتحطينا فيها كلنا مش هو بس.. رفض يذاكر في السنتين و خصوصا في السنة التانية لإن نفسيته كانت وحشة اوي و خصوصا لما شاف صحابه دخلوا كليات وهو لسة في ثانوي و لما النظام اتغير و انه كمان مع دفعة اصغر منه ف بجد متفكريش في التأجيل لا انتي ولا غيرك غير لما تكونوا متعرفوش كلمة في كل المواد ووقتها شهر فعلا مش هيكفي انما في حالتك شهر يكفي و نص ف متاخديش قرار تندمي عليه بعدين.. وبس اتمنى اكون فيدتك 🤍
تم النشر الأربعاء، ٧ مايو ٢٠٢٥
لا تغشي ابدا واثبتي واعلمي أن الغش من الكبائر والكبائر موجبة النار وايضا أرضي بقضاء الله وقدره مهما حصل واسعي إنك تنجحي والله سيوفقك ويسددك بإذن الله واعلمي أن الأمة لو اجتمعت على أن يضروك بشيء ما ضروكي إلا بشيئا قد كتبه الله لك ولو اجتمعت الأمة على أن ينفعوك بشيئا لن ينفعوك بشئيا إلا ما كتبه الله لكي انا مش عارف هل ليكي الحق أنك متساعديش مثلا اخواتك وتذاكري عشان تنجحي ولا لا بس انتي اسألي وحددي يعني
تم النشر الجمعة، ٩ مايو ٢٠٢٥
وعليكم السلام ورحمه الله وبركاته الرسول عليه الصلاه والسلام قال من غشنا فليس منا فأكيد احنا مش حابين نطلع من الدائره بتاعه المؤمنين اللي هما في دائره الرسول صلى الله عليه وسلم واحنا قوم سيدنا محمد فبلاش نخرج من الدايره وخلينا من الناس اللي عمرها ما هتقرر تغش ولا هتلجأ للغش ابدا ابدا في اي حاجه في حياتها خليكي في اجتهادك لحد اخر لحظه وادخلي الامتحانات وربنا ان شاء الله هيكرمك باللي يكون فيه خير لك دي اهم حاجه مش هقول لك اللي على قد مجهودك ولا هقول لك اللي تستاهليه ولا اي حاجه اقول لك ربنا إن شاء الله يكرمك باللي فيه الخير ليكي فلو الخير لك 80% إ ن شاء الله تجيبي 80 خير لك في ال 90 ولا أعلى منها ان شاء الله تجيبي المجموعه ده ولكن اعتمدي على مجهودك وان شاء الله ربنا هيلهمك وهيذكرك حتى لو انت قراتي المعلومه مره واحده بس مش ذاكرتيها بقى وعدتيها ورجعتي عليها يعني انت ممكن تذاكريها مره واحده ولكن ربنا بفضله وبكرمه يذكرك بيها وتجاوبيها وممكن الناس كلها تنساها وانت بس اللي تفتكريها بس كوني صادقه مع ربنا انك عايزه تفضلي من امه سيدنا محمد وما تبقيش من اللي هيخرجوا منها علشان خاطر قرروا وبإرادتهم بترتيب مسبق ان هم يغشوا ارجوك ما تعمليش كده.
تم النشر الأربعاء، ٧ مايو ٢٠٢٥
وعليكم السلام ورحمة الله وبركاته، أختي العزيزة، ذكية هنا معك، وأشعر بكل ما تمرين به من ضغوط ومسؤوليات في هذا الوقت الصعب، وأقدّر جداً صدق مشاعرك وحرصك على اختيار الطريق الصحيح رغم كل التحديات. لنقسّم مشكلتك إلى نقاط لنوضّح الأمور معًا: الضغوط والمسؤوليات التي تتحملينها أنتِ لا تتحملين فقط ضغط الدراسة الصعب، بل أيضًا مسؤولية كبيرة في البيت مع أختيك الصغيرتين وأمك، وهذا عبء حقيقي يؤثر على وقتك وتركيزك. التحدي الأكاديمي وصعوبة فهم المواد عدم وجود مدرس يفهمك بشكل جيد يزيد من صعوبة المذاكرة، وهذا شيء مزعج جدًا ومهم أن يصلح أو تتعاملي معه. غش في الامتحانات مقابل النجاح أنتِ ترفضين الغش لأن ضميرك يؤلمك وهذا شرف كبير، وأنتِ تريدين النجاح بجد، حتى لو كانت النتيجة ليست مثالية، وهذا موقف يمثل قوة أخلاقية عظيمة عندك. الخوف من الرسوب وتأجيل السنة الدراسية تأجيل السنة يعني زيادة العبء عليك وعلى أمك، وهذا مقلق لكِ، خصوصًا أن ظروفكم تعتمد على مجهودك. نصائح عملية أرجو أن تساعدك: جدولة الوقت وتسليط الضوء على الأولويات: حاولي تقسيم وقتك خلال الأيام القادمة بتركيز أكبر على الفيزياء والإنجليزي بشكل مكثف، ولو حتى ساعة أو ساعتين يوميًا مع استغلال كل فرصة للمذاكرة، حتى لو في وقت قصير. البحث عن دعم إضافي: حتى لو لم تجدي مدرسًا، هناك على الإنترنت مصادر تعليمية كثيرة بالفيديو أو مواقع مجانية تشرح الدروس بسهولة، يمكن كتابة اسم المادة أو الموضوع الذي تدرسينه والبحث عنه، هذا قد يساعد في تسهيل الفهم. التخفيف عن نفسك: تذكري أن الكمال غير مطلوب، وليس من العدل أن تقارني نفسك بزملائك الذين ظروفهم مختلفة، ركزي فقط على ما تقدرين فعله. الاستعانة بالله: الدعاء والتوكّل على الله مهم جدًا في مثل هذه الفترات، قولي: "اللهم لا سهل إلا ما جعلته سهلاً، وأنت تجعل الحزن إذا شئت سهلاً." التحدث مع الأسرة: ممكن أن تشرحي لأمك وأهلك وضعك بصدق، حتى لو كانت الأمور صعبة، فأحيانًا المشاركة تفتح أفقًا لمساعدات أو حلول لم تفكري بها. في النهاية ، قرار الغش ليس مبررًا مهما كانت الظروف، لأن ذلك يبقى وزرًا على نفسك وضميرك، ولن يحل المشكلة بل يزيدها تعقيدًا على المدى البعيد. النجاح الحقيقي هو أن تفخري بنفسك لأنك جربتِ بصدق. إذا احتجت لأي دعم نفسي أو مرافقة أكثر تخصصًا، أنصحك بزيارة صفحة الخبراء في فدني https://www.fedni.net/experts حيث ستجدين متخصصين في التعليم وعلاج الضغوط يمكنهم مساعدتك بشكل أكبر. ولا تنسي أن تبحثي في فدني أيضًا عن أسئلة مشابهة لقدرتك على الاستفادة من تجارب الآخرين. أنا هنا معك وأدعو الله أن يثبت قلبك ويرزقك النجاح والتوفيق. لا تترددي في العودة إليّ بأي سؤال أو مشورة تحتاجينها. 💗 دمتِ بخير وسلام، أختكِ ذكية.
تم النشر الأربعاء، ٧ مايو ٢٠٢٥
ربي يوفقك وتوصلي لأعلى المراتب
تم النشر الأحد، ١١ مايو ٢٠٢٥
دلوقتى حضرتكم خلصتي ايه في المواد
تم النشر السبت، ١٠ مايو ٢٠٢٥
الأخت اللي بتكلم في موضوع النجاح وإن مش كل الناس ظروفها زي بعض فحضرتك معاك حق فعلا مش كل الناس ظروفها زي بعض انا ما كانت ظروفي زي غيري بس ما رديت حاولت السنه اللي فاتت ودخلت 3 مواد وبدفع تمن السنادي تقيل اوووي من نفسيتي بس والله الغش هيأثر على نتايج غيرنا انت اكيد اكتر واحده فاهمه ظروفك.... وما تقلقي هقولك كذا نقطة تفكري فيها يمكن تعدلي تفكيرك
تم النشر السبت، ١٠ مايو ٢٠٢٥
اولا استاذ محمد مجهودك و تعبك ربنا مش هيضيعه مؤمن بكدا و لا لأ أي أسباب تانيه مش في ايدك هي مش من شأنك
تم النشر السبت، ١٠ مايو ٢٠٢٥
جميعاً يارب
تم النشر الأحد، ١١ مايو ٢٠٢٥
على فكرة انت مع مجهودك ده النجاح بالنسبالك سهل إن شاء الله وهتعرفي تظبطي الدنيا اكتر من ما أنا موضحلك بس لازم تكلمي مامتك في موضوع اخواتك الشهر ده وتقوليها تشوف حل معاكي لان ياما كدا ياما هتلاقي نفسي مضطره تأجلي كذا ماده
تم النشر السبت، ١٠ مايو ٢٠٢٥
بجد ربنا يبارك فيك نعم الأخت ونعم الأبنة.... وأكيد ربنا هيكرمك إن شاء الله بالخير اللي جواك لان ده بقى يعتبر شيء قليل لما نلاقيه فيشرفني جدا اني اساعد حضرتك..... دلوقتي عشان نحل المشكلة لازم نخف الضغط على عقلنا عايزك تفتكري انك الإنسان أفضل كائن في الكون هو اللي بيحل المشكلات ومش بيكون تحت تأثيرها انت ان شاء الله تقدري تتأقلمي وتوصلي لنتايج كويسه بمفهوم السعي..... عشان تخلصي اللي عليك لازم تبدأ باللي فاضل ليك يعني مثلا العربي لو أنت هتبدأ مراجعة مع مستر محمد صلاح في خلال 10 أيام هتخلص كل المنهج وكمان بالنسبة للجيولوجيا انت محتاجه يومين والاحياء حوالي يومين بالكتير والكيمياء حوالي الست ايام الباقيين فهتكوني خلصت في الشهر ده المنهج بمراجعة العربي.... تقدري تخلصي الانجلش في السبع ايام اللي قبل العيد اللي هما من 31/5 لحد 6/6....هيتبقى ليك الفيزياء لو خلصت منها في عشر ايام بس لحد الباب السادس يبقى كويس اوووي ويتبقى بابين واحد منهم حصه واحده يخلص بسرعه مع ليالي الامتحان والثامن هيخلص هو كمان ان شاء الله.... الفكره بقا انت هتراجعي ولا هتبدأ مع انهي مدرسين
تم النشر السبت، ١٠ مايو ٢٠٢٥
حاضرنساعدك بس اهدي وفكري واحدة واحدة
تم النشر السبت، ١٠ مايو ٢٠٢٥
مصدقك، بس التفكير من كدا بسبب الضغط والشيطان فحاسس باللي بيجي فبالك لانك زي باقي الناس لما النفس تحاول تخرج باي مخرج
تم النشر السبت، ١٠ مايو ٢٠٢٥
انا دماغي تعبت من التفكير وحقيقي ما بقيت اصدق ألاقي اي حاجه تنقذني
تم النشر السبت، ١٠ مايو ٢٠٢٥
هنا بقا في مشكله ازاي ما تعرفي حاجه وبتفكري فيها... يعني لازم حضرتك تدرسي الفكرة كويس هي بديل ازاي وايه كلياتها وهل كلياتها عام ولاخاص وهل هتغيري المواد ولا لا.... وبعدين تحكمي على حسب مده الدراسه تبعها هل هي انسب ولا الثانوية
تم النشر السبت، ١٠ مايو ٢٠٢٥
انا معرفش حد مجربها بس بديل للثانويه العامه وبردو بيدهل منها كليات
تم النشر السبت، ١٠ مايو ٢٠٢٥
هو ايه هي الدبلومة الأمريكية
تم النشر السبت، ١٠ مايو ٢٠٢٥
انا مصدقك يا اختي ... وعشان كدا لازم اوجهك للصح حتى لو جتلك فكره من الشيطان او نفسك فكلنا بنغلط وانتي انسانه كويسه وفاهمه
تم النشر السبت، ١٠ مايو ٢٠٢٥
انا كل الفكره اني مش عارفه اخد قرار انا ٣ ثانوي عام علمي علوم مش دبلومه امريكيه
تم النشر السبت، ١٠ مايو ٢٠٢٥
مش فاهمه سؤالك ؟
تم النشر السبت، ١٠ مايو ٢٠٢٥
هي الدبلومة الأمريكية؟
تم النشر السبت، ١٠ مايو ٢٠٢٥
انا والله العظيم مش عاوزه اغش مش عارفه اعمل ايه وربنا يعلم بحالي
تم النشر السبت، ١٠ مايو ٢٠٢٥
أخت أزهرية أنا عارف ومتأكد من كدا كويس مجهود كل واحد فينا عمره ما بيضيع بس في ناس بتأخد حق ناس حضرتك انا مش برفكت ولا حاجه مع اني اتمنى اكون كويس وداخل مطمن بس حتى لو مش تمام معايا فهمل اللي ربنا يقدرني عليه مع ذالك هكره اني اغش.... الغش ده هيزود نسب النجاح فكدا كدا هيأثر
تم النشر السبت، ١٠ مايو ٢٠٢٥
انا بالعكس أنا حاسه بالذنب من دلوقتي
تم النشر السبت، ١٠ مايو ٢٠٢٥
طيب حد عنده حل ممكن يفديني ومراكمه اغلب المواد بردو
تم النشر السبت، ١٠ مايو ٢٠٢٥
انا والله العظيم وربنا يعلم بنيتي انا مش عاوزه اغش
تم النشر السبت، ١٠ مايو ٢٠٢٥
اما بالنسبه للي. كاتبه البوست بصي انتي اكيد نفسك تطلعي مجموع و نفسك ربنا يكرمك بعدين هيفضل الغش صدقيني ذنب جواكي كل هتيجي تدعي بحاجه تفتكريه عشان هتعمليه عن عمد و انتي داخله حطااه في بالك مش ذاكرتي ولقيتي للامتحان صعب مثلا او لقيتي حد بيغشش حد فا سمعتي الاجابه بالغلط هو انت براحتك برضو بس لو عاوزه مشاكلك تتحل متعمليش حاجه حرام المشاكل دي ابتلاء من ربنا هيشوفك انتي قدها و تواجهيها أو متحطهاش في بالك و تستمري ولا لأ اوحش حاجه و انا عملتها قبلك أن الإنسان لما ربنا يبتليه يلجأ لفعل الذنوب بدل ما يلجأ لفعل الطاعات و الدعاء و ارضاء الله عز و جل الموضوع محتاج منك صبر قوه تحمل و اتكلمي مع أهلك قوللهم من النهارده محدش يكلمني في حاجه عاوزه اركز في مستقبلي و مليش دعوه بيكوا تمام و مترديش عليهم في اي حاجه و ركزي في دراستك كويس اوي
تم النشر السبت، ١٠ مايو ٢٠٢٥
طيب دلوقت افرض حد عاوز يغش علشان يجيب ٥٠ في المئه حتى وهو ظروفو متسمحلوش إنه يعيد السنه وانت ظروفك احسن منه مليون مره ومذاكر هو مش زيك هوبنسباله طوق نجاة حيا او موت
تم النشر السبت، ١٠ مايو ٢٠٢٥
لو غشيتي كلمة عمري ما هسامحك لا أنت ولا اي طالب يتسبب في خلل في المجاميع او يدخل مكان ما يستحقوش وكدا كدا اللي اتبنى بالحرام مصيره للنار.... عايز اقولك اننا مش مثاليين بس عاقلين وأنك تتغلبي على نفسك دي حاجه هتفتخر بيها طول عمرك... عايزك تفتكري أن مجموعك هو هو هيجي سواء بالحلال او بالحرام
تم النشر الجمعة، ٩ مايو ٢٠٢٥
ما تغشيش لمي المادتين دول بقدر استطاعتك و قدامك شهر اهو كافي اوي لي مادتين بس و انتي بتقولي مذاكره المواد التانيه خلاص هتقدري تلميهم استعيني بالله و ابدأي و مضيعيش وقت و متخليش الشيطان يوهمك انك مش هتقدري فا الغش اسهلك لأ من غشنا فليس منا ربنا عالم بظروفك اعملي اللي عليكي و استعيني بالله و ربنا يوفقك يا رب متعمليش حاجه حرام عشان خاطر ظروف يعني كدا المسكين أو الفقير يسرق اصلي هو ظروفه و حشه برضو مش معاه فلوس متخليش الشيطان يبررلك الحرام الحرام حرام و الحلال حلال احنا بنستعين بالله مش معني اني اتزنقت اغش انا حصلت معايا و ندمت و زعلت اوي ربنا اللي بأيده كل شئ و جزاء غشي و الله اعلم برضو شيلت خمس مواد اعملي اللي عليكي يا قلبي
تم النشر الأربعاء، ٧ مايو ٢٠٢٥
لعرض السؤال في فدني اضغط هنا