السلام عليكم ورحمه الله وبركاته
انا بنوته عندي ٢٥ سنه متقدملي عريس من طرف عمتي
انا لا عمري شوفته و لا اعرفه
هو متكلم من قبل العيد تقريبا بس لحد دلوقتي مطلبش رسمي بيغيب فتره و يرجع يفتح الموضوع تاني
غاب اسبوع و طلب أنه يشوف صورتي و بعتنا الصور و رجع غاب اسبوعين و طلب أنه يشوف صوره كامله ليا يعني اقصد صوره لطولي
و بصراحه حاسه ان الموضوع بقا بايخ اوي خاصه أنه لحد دلوقتي لسه مطلبش رسمي و غير كده الموضوع طول
و انا مش عارفه اعمل ايه هل اوافق و ابعت الصوره و لا ارفض
ملحوظه: بصلي استخاره و مش حاسه بأي حاجه
وعليكم السلام ورحمة الله وبركاته لأ ما تبعتيش حاجة؛ كفاية إنك بعتي صورة أصلًا، غير كدا فيه حاجة اسمها رؤية شرعية ويا ريت ما تشغليش نفسك بيه وطلعيه من دماغك لأن شكله مش جادّ أو مش جاهز وربنا يكتب لك السعادة مع اللي فيه خير ليكي
تم النشر الثلاثاء، ١٦ يونيو ٢٠٢٦
وعليكم السلام ورحمة الله وبركاته عايزه اقولك ان ده نفس السيناريو اللي حصل معايا يكاد يكون بنفس التفاصيل متقدم ليا من الترم الاول وكل ما يحدد معاد يجي قبل المعاد بيوم وبيعتذر لاسباب غير منطقيه لحد ما بابا قفل معاه الموضوع وقلو بنتي حد متقدملها تاني وموافقين عليه المهم الشخص ده رجع يكلم بابا في عيد الاضحي وهو متاكد اني متخطبتش وطلب من بابا تاني انو يحدد معاد علشان يجي واجل المعاد تاني برضو لسبب انو عايز يجيب دهب علي طول مع انو ولا شافني ولا شفتو ولا سأل علينا ولا سألنا عليه بس الغبي كشف نفسو بالحركه دي انو مش بتاع جواز وبيحور المهم لما حددو معاد تاني برضو اعتذر ف بابا عملو بلوك 😂 المهم اني الفتره دي قبل ما يعملو بلوك صليت صلاه الاستخاره وبرضو محستش بي حاجه فاستمريت كام يوم علي ذكر لا حول ولاقوة إلا بالله العلي العظيم وبعدها صليت استخاره تاني وشفت حلم كشفلي الحقيقه كامله الحمد لله ف قلت لبابا وعملو بلوك النهائيه من قصتي القصيره الحزينه دي استمري على الحوقله بنيه ان ربنا ينور بصيرتك
تم النشر الاثنين، ١٥ يونيو ٢٠٢٦
وعليكم السلام ورحمة الله وبركاته يا بنتي. أول حاجة، أنا فاهمة إحساسك تمامًا. الموضوع بدأ من فترة ومازال بيطول بدون أي خطوة رسمية، وده طبيعي يخلّي الواحدة تحس إن الموضوع "بايخ" زي ما قلتِ. الغياب المتكرر والطلبات المتتالية (صورة، بعدين صورة كاملة) بدون ما يتقدم رسمي بيخلي الوضع غير مريح، وده حقك تاخديه بعين الاعتبار. بما إنك صليتِ استخارة ومش حاسة بحاجة، فده مش بالضرورة معناه "لا"، لكنه كمان مش معناه "استني أكتر". الاستخارة بتفتح لكِ الباب للتفكير المنطقي والراحة النفسية. دلوقتي السؤال الحقيقي: هل الوضع ده بيحقق لكِ الاحترام والجدية اللي تستاهليها؟ نصيحتي العملية: ما تبعتيش الصورة دلوقتي لو حاسة إن الموضوع بيطول بدون التزام. قولي لعمتك بصراحة ولطف إنك مش مرتاحة لاستمرار الموضوع كده بدون ما يتقدم رسمي، وإنك تفضلي إن الأمور تكون واضحة. لو هو فعلاً جاد، هيحرك نفسه. أما لو استمر الغياب والرجوع بدون خطوة، يبقى ده إشارة كفاية إنكِ ترفضي وتتوكلي على الله. التوكل مش معناه الانتظار السلبي، معناه إنكِ تعملي اللي عليكِ (توضيح موقفكِ) وبعدين تسيبي الأمر لله. أنتِ عندك ٢٥ سنة، ولكِ الحق تختاري اللي يريح قلبك ويحترم وقتك. لو حابة تاخدي رأي أكتر، ابحثي عن أسئلة مشابهة على فدني عشان تشوفي تجارب بنات تانيين. ربنا يختار لكِ الخير ويشرح صدركِ للقرار الصح. لو عايزة تتكلمي أكتر، أنا هنا.
تم النشر الأحد، ١٤ يونيو ٢٠٢٦
متبعتيش .. الصح مقابله شرعيه ف البيت او حتى بره البيت مع وجود الاهل تشوفو بعض وفيه قبول ولا لا وبعدها والامور تمشى مظبوط ... وبعدين ما ممكن تبعتى ويبقى تمام من ناحيته بس انتى لما تشوفيه ميبقاش فيه قبول صح ؟ .. خلى الامور ف الواقع ويبقى الرفض والقبول منكم انتو الاتنين
تم النشر الأحد، ١٤ يونيو ٢٠٢٦
لأ ، ما تبعتيش صور ،، علشان الطريقة اللي الشخص ده بيستخدمها فيها لف ودوران ،، وآه الموضوع بايخ ، اللي عنده ثقة في نفسه بيروح لراجل مش بيبعت مع واحده ويبقا شغل حريم في حريم ،، الصورة الصحيحه للموضوع ده إن الشخص بيروح للأب يطلب منه إنه يعمل رؤية شرعيه علشان يشوفك في بيتك في وجود حد من محارمك أبوكي أو أخوكي وإنتي كمان تشوفيه وتتكلمي معاه حصل توافق تمام ماحصلش توافق يبقا عادي مفيش مشكله مش حرام يعني، أما اللي بيحصل ده لعب عيال و*عدم وضوح* ،، لو عمتك فتحت الموضوع ده تاني ، قوليلها اللي عاوز يتقدم يروح لأبويا مفيش صور لحد بحزم
تم النشر الأحد، ١٤ يونيو ٢٠٢٦
لعرض السؤال في فدني اضغط هنا