ازاي الواحد يحصل على نوم بجد، نوم كافي وصحي، والاهم انه يصحى وينام في نفس الميعاد كل يوم، علشان انا ركزت ولقيت ان معظم مسؤولياتي مش بتخلص زي ما عايزة وغالباً دة بسبب النوم لإني بنام متأخر، او حتى بدري وبصحى برضو متأخر وبالعافية وببقا عايزة اكمل نوم،
بظبط منبهات كتير ومش بصحى على ولا واحد، والمشكلة ان ده بيخليني مصليش الفجر وببقا صاحية متضايقة علشان رغم اني ظبطت المنبه مصلتش وطبعاً يومي عقبال ما بفوق فعلياً وبعمل شغل البيت اللي عليا بيكون طار نصه وهكذا، الموضوع دة بقاله شهور وعايزة اوقف ده، حد عنده حل؟
السلام عليكم، الأول ضروري تكشفي وتتأكدي إن مفيش أسباب طبية للخمول والنوم الزائد اللي عندك. وخدي بالك برضه إن ساعات النوم بيبقى هرب من الضغوطات والمسؤوليات اللي عقلك الباطن عارف إنها منتظراكِ أول ما تصحي من النوم. فلو ضاغطة نفسك بمهام تقيلة ده ممكن يكون مأثر عليكِ نفسيا من غير ما تحسي. *** لو نومك نفسه مش مظبوط ودماغك بتحسيها بتفضل صاحية طول الليل حتى لو نمتِ وبتلاقي نفسك بتقلقي وتفوقي فجأة وسط النوم وترجعي تنامي أو فيه كوابيس وأحلام مزعجة ده كله مش بيخليكِ تحصلي على نوم جيد فطبيعي جسمك ميقدرش يصحى حتى لو نمتِ ساعات طويلة. *** بعد استبعاد الأسباب الصحية، متضغطيش على نفسك إنك تظبطي نومك فجأة وتعدلي ساعتك البيولوجية مرة واحدة، خدي الموضوع بالتدريج. أخري موعد الاستيقاظ كل يوم مثلا ربع أو نصف ساعة عن اليوم اللي قبله وقدمي موعد النوم تدريجيا. قللي شرب قهوة أو أي حاجة فيها كافيين واشربي أعشاب مهدئة زي البابونج واليانسون والكاكاو ده هيساعدك على النوم بدري ويقلل القلق أثناء النوم بحيث تحصلي على نوم جيد وهيقلل نشاط دماغك وإنها تفضل صاحية زي ما بيحصل مع شرب الكافيين بكثرة. مارسي رياضة ولو عشر دقائق كل يوم، هيحسن مزاجك ونفسيتك ويحسن نومك برضه. *** لو بعد كل ده لسه فيه مشكلة فممكن تشوفي مختص في أمراض النوم يساعدك في حلها. والأهم استعيني بالله والتزمي بأذكار وأدعية قبل النوم وإن شاء الله تساعدك. 💚💚
تم النشر الاثنين، ٢ نوفمبر ٢٠٢٦
بصي انتي راجعي يومك و شوفي بتعملي ايه بخليكي مبتعرفش تنامي يعني مثلا لو بتشربي منبهات و كافيين ياريت توقفيهم قبل ٣ من النوم و لو بتسهري عالتليفون ده عامل مهم لانه بيطلع ضوء أزرق بخليكي منتبهه و خلي السرير بس للنوم خلي السرير مربوط بعقلك بالنوم يعني متاكليش عليه و لا تمارسي حياتك عالسرير و حاولي تتعبي طول النهار و متنامي خالص بالنهار عشان لما ييجي بليل تنامي
تم النشر الخميس، ٥ نوفمبر ٢٠٢٦
ضبط الساعة البيولوجية ثبات ميعاد للنوم والاستيقاظ يوميا ... تأكد ان غرفتك مظلمة تماما وهادئة وتميل للبرودة .... قاطع الشاشات قبل النوم التلفزيون والموبايل .... قاعدة الساعتين للاكل والشرب تجنبي تماما ..... روتين الاسترخاء شهيق وزفير والزفير أطول ....نامي ع جمبك اليمين
تم النشر الثلاثاء، ٣ نوفمبر ٢٠٢٦
يا حبيبتي، أول حاجة أقولك إن اللي بتمرّي بيه ده شائع جدًا، وإنك قادرة تتغلبي عليه خطوة بخطوة. الشعور بالذنب من تأخير الصلاة وتأخر اليوم كله بيخلي الموضوع أثقل، لكن ده بالضبط اللي هيخلّيكِ تبدئي تغيير حقيقي. الهدف مش إنكِ تنامي وتصحي فجأة في ميعاد مثالي، لكن تبني روتين ثابت تدريجيًا عشان جسمك يتكيف. ابدئي بتحديد ميعاد نوم وصحو ثابت حتى لو بفارق ١٥-٣٠ دقيقة كل أسبوع. مثلًا لو بتصحي دلوقتي الساعة ١٠ صباحًا، حاولي تخلي المنبه يرن الساعة ٩:٤٥، وتنامي أبكر بنفس القدر. حطي المنبه في مكان بعيد عن السرير عشان تضطري تقومي، ومتستخدميش أكتر من منبه واحد. كمان، حاولي تقللي الشاشات قبل النوم بساعة على الأقل، وتأكدي إن الغرفة مظلمة وهادية. لو بتأخري في الأكل أو القهوة، خلّي آخر كوب قهوة قبل الظهر عشان ما يأثرش على نومك. عشان تصحي للفجر بانتظام، ركزي على إنكِ تنامي مبكرًا بما يكفي عشان جسمك ياخد حقه من النوم، واستخدمي الصلاة كدافع قوي. جربي تكتبي جدول يومي بسيط فيه ميعاد النوم والصحو والصلاة، وكل يوم تسجلي إنجازك حتى لو صغير. لو استمر الموضوع شهور زي ما قلتِ، ممكن تبحثي عن أسئلة مشابهة على فدني عشان تشوفي تجارب بنات تانيين وتاخدي أفكار إضافية. أنتِ قادرة، وكل تغيير صغير هيتراكم ويحسن يومك كله. (يرجى ملاحظة أن هذه إجابة آلية بواسطة الذكاء الصناعي ولا تغني عن زيارة الطبيب في الأمور الصحية)
تم النشر الاثنين، ٢ نوفمبر ٢٠٢٦
لعرض السؤال في فدني اضغط هنا