ماذا أفعل لأساعد أختي وأنصحها؟

Question

السلام عليكم ورحمة الله. انا بنت بيقولوا عليا معقدة عشان مهتمه بدراستي و ملتزمه في البس الشرعي أختى عكسي هي مصاحبه بنات مش كويسين علي ما اعتقد بيكلموا شباب ويخرجوا معاهم المهم كنت بتكلم أنا و هي و بدأت تقولي اد اي انا معقده و ان الموضوع إن البنت تكلم ولد عادي وان مافيش غيري و شويه صغيرين هما بس إلي بيفكروا بعقليه دي مش بيتجوزوا و فرصهم بتبقي قليله و بدأت تديني امثله علي ناس في حياتي وتقولي شوفي دي عشان هى محترم بزياده فمتخطبتش لحد دلوقتي وانها عايزاني أكون شبه اختي واحده صحبتها تسمع من اختها بتكلم مين وتخرج معاها وهي خارجه مع واحد. كلامها خلاني أحس إني غلط وإن لازم فعلا أتغير شويه و مبقاش قفل وبقا زي كل البنات يضحكوا وبيتكلموا بدلع وكدا مع العلم إن كلامها جه بعد موقف حسيت فيه بحساسية شويه من عمي وهو بيسلم عليا قال العسكري بتاعنا بس بعدها قولت لا وإن انا صح ومش معنى إن معظم الناس بتعمل ذنب و استبيحوا إن هو بقا عادي وقلت إن لو بقيت فمكان كلوا معاصي وجبت العزله و فعلا تراجعت عن كل حاجة كانت فدماغي وبدأت انصح اختى انوا غلط و مينفعش وحاولت أقرب منها واسمعها وهي حكتلي عن صحابها و دي بتكلم دا في محاولة منها إنها تقنعني بدأت احسسها اني مهتمه عشان لو عملت حاجه ابقى عارفه و بقيت بين كل كلمه وكلمه أقولها افتكري أنو مينفعش لغاية ما بالصدفه شوفت شات بينها وبين صحابها البنات و معاهم أرقام شباب في الجروب فكرت أقول لماما على إن هي بتكلم بس أمي فنص الكلام أنا عارفه إنها هتقول إنها عرفت مني حتى لو قولتلها كذا مره متقولش اني قولتلها و بالذات اني عايزه اختي تفضل تحكيلي عشان ابقي عارفه عنها كل حاجه ياريت بجد النصيحه و المفروض أعمل أي وابعدها إزاي وهي مهما أتكلم مش بتهتم حتى بقول اي

Accepted Answer

و عليكم السلام ورحمه الله وبركاته ،الوضع الحالي كفايه و ما تحاوليش تطلبي اكتر من كده ، لحدما هتيجي لحظة و لازم هتيجي هتوصل لوجع كبير من كل اللي بيحصل و هتتخنق من نفسها و وقتها هتحكيلك طبعاً بس وقتها هتبقى في موقف ضعف اتجاه رأيها و هتتقبل النصيحه ، غير كده اسمعي منها بس و ما تحكميش عليها الا لو طلبت نصيحتك ، غير كده خليكي الاخت القريبة من اختها لا تبقي زيها ولا تخسريها ، ده بالنسبة لأختك ، بالنسبة لك بقى ، ماله يا ستي العسكري ، زي الفل و تمام و محافظة على نفسها و ملتزمة و بتخاف ربنا ، هو فيه اخلى من كده عسكوره ، و بعدين ما هو طبيعي تبقي كده مع اي رجالة مش من محارمك، علشان أي وشوش تانية انتي شايلاها لجوزك في المستقبل ، و النوع ده فرصه قليله ، لأ طبعاً خالص ، هو بس النهج ده بيحميكي فربنا بيبعتلك اللي يستاهلك بجد و يستاهل على اللي انتي حافظتي عليه طول حياتك ، و دول هما اللي قليلين شوية ، لكن الطريق اللي انتي مختاراه هو ده اللي بيكمل بسعادة و بيأسس حياة زوجية و اسرية سليمة و صحية ، أما بقى الفئات التانية فمش محتاج اوصفلك مستقبلها ، اتفرجي على أي محكمة أسرة و انتي هتعرفي انك صح ، وبالتوفيق 😊

Answer

بالنسبة لمامتك انتي ممكن تنصحيها انه يا ماما ركزي شوية مع اختي وشوفي تصرفاتها وافعالها وشوفي اصحابها يعني حاولي تلمحي لمامتك اما بالنسبة انك حاسة انك غلط ف الاجابة في قوله تعالي بسم الله الرحمن الرحيم {قُل لَّا يَسْتَوِي الْخَبِيثُ وَالطَّيِّبُ وَلَوْ أَعْجَبَكَ كَثْرَةُ الْخَبِيثِ} و ايه يعني لما حد يقولك عسكري . عسكري يعني التزام ودا المطلوب دلوقتي وفي هذا الزمن زمن الفتنة -ربنا يحفظك ويثبتك يا رب

Answer

وعليكم السلام ورحمة اللة وبركاته أهم حاجة دلوقتى انتى اثبتى على ما انتى فيه انتى مش معقده ولا حاجه وفيه ناس كتير كتير زيك اما بالنسبه للزواج فدا بيبقى نصيب وحوار بقى اللى مبتكلمش مبتتجوزش واللى بتكلم بتتجوز دا كله من وساوس الشيطان بيزين بيها الباطل والحرام واحنا لينا مرجع وقوانين عاملها رب البشر للبشر وهو أعلم بأحوالهم وطباعهم الله عز وجل يقول فى كتابه "ولا متخذات أخدان" يعنى مفيش صداقة بين الولد والبنت إطلاقا ودا مش عادى مهما حاولوا يفتنوا الناس ومهما اختك حاولت حرام ويعد من خطوات الشيطان. أنا عايزك بس تتخيلى ان لو واحده تعطرت بس وشم هذه الرائحة رجل كتبت فى صحيفتها زانيه ما بالك بالكلام بقى والعلاقات عموما تخيلى تكونى بتعملى كل الأعمال الصالحة وكل العبادات وعلى الرغم من ذلك لا يمر يوم الا ويكتب فى صحيفتك زانيه والعياذ بالله لمجرد ان زى ما بتقول أختك عادى بل وعايزه تسحبك فأهم حاجه لازم تثبتى ووالله شباب كتير يتمنوا اللى زيك وهيجيلك اللى شبهك بإذن الله + أختك بقى حاولى انتى تسحبيها متكونش هى حميتها على الباطل وعايزه تسحبك ليه أكبر من حميتك على دينك وعلى الحق اللى هينجيها دنيا وآخره حاولى تنصحيها مرة واتنين وتلاته مجاتش لازم تقولى لوالدك مش والدتك كمان ولازم تنقطع تماما عن شياطين الإنس اللى ماشيه معاهم ربنا يهديها ويثبتك

ماذا أفعل لأساعد أختي وأنصحها؟

اجتماعية

دينية

أهل

سؤال من احد أعضاء فدني

تم النشر الأحد، ٢٩ مارس ٢٠٢٦

4 إجابة

6 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك