السلام عليكم انا داخله تالته ثانوي دفعة 2027 وحقيقي الواحد خايف اوي من حاجات كتير زي أولهم الانضباط هل هعرف انظبط ولا لا والفيزيا والكيمياء دول رعب بسبب خوفي من المسائل الصعبه والاحياء ال اول مره أخدها وانا مستوايا في الانجليزي متوسط بس برضو خايفه من الإنجليزي واحساسي بيقولي لازم تبقي مستواي في الانجليزي عالي علشان تعرفي تقفليه والعربي خايفه من النحو لاني معرفش حاجه فيها لو فيه حد من الدفعات ال قبلي كان عندو نفس المشاكل دي وكان خائف زي ولقي حل وجاب مجموع كويس يطمني علشان الواحد مش قادر يبطل تفكير
و عليكم السلام و رحمة الله و بركاته انا دفعة ٢٠٢٦ علمي رياضة ، حابه أقولك ان احساسك ده طبيعي بس متخليهوش يأثر عليكي ولا تخلي كلام الناس و تكبيرهم للمواضيع يأثر عليكي ، احنا كنا ف داخل السنة نفسها و بنقول على الناس إنهم مكبرين المواضيع و واخدينها بصعوبة مع إن الموضوع المفروض يتاخد بسهولة و ببساطة نصيحتي ليكي متخليش الخوف يوصلك لليأس و تجنب المحاولة مهما حسيتي ان الدنيا بايظة معاكي متخليش الشيطان يسيطر عليكي لإن صدقيني الأمور سهله جداً هو تكبير المجتمع للموضوع اظهره صعب و لكن هو باطنُه سهل إن شاء الله بالنسبة للمواد ف قسميها ٣ اقسام قسم المواد الصعبة ذي الفيزيا و الكيميا ف نظرك ، و قسم المواد اللي انتي شايفاها سهله ، و قسم المواد اللي بتحبيها انزلي سنتر في المواد الصعبة و السهله و متسمعيش لأي حد يقولك خدي كله اونلاين لإن ده كان احد اسباب ضياعي ف حاجات كتيرة المواد الصعبة تلقائي هتتجنبي تذاكريها و هتسدي مكانها ب اي مادة تانيه عشان تهربي ، و بالمناسبة عقلنا كلنا كبشر هو يعتبر ذي آلة بتحاول دايما توفر طاقة و تتجنب الحاجات اللي احنا شايفنها صعبه ف بناءاً عليه ده هيأثر جدا عليكي ف المواد اللي انتي شايفاها صعبة و هيوصلك للمراكمة و المراكمة هتحسسك ب إنك مهما عملتي ف لسه في هَم اسمه كيميا و فيزيا متذاكروش كويس و مش ده اللي المفروض توصليله اه هتراكمي و بالمناسبة هتلحقي تلمي حتى لو فاضل على الإمتحان شهر بس نفسيتك شيء مهم محتاجه تحافظي عليه طول السنة عشان تقدري تكملي و بالنسبة للمواد السهله هتشوفي إن في أصعب منها أولى إنه يتذاكر ف هتراكميها بردو المواد اللي بتحبيها خديها أونلاين لإن دي هتبقا اللي بتهربيله فعلاً و هتذاكريها ب متعة مش شرط تنضبطي 100٪ أنتِ إنسانة طبيعي تقعي و تقومي مهما كان ثانوية عامة عبارة عن تجربة ذي أي تجربة حتى الأوائل محدش فيهم كان مثالي و منصحش إنك تبحثي عن المثالية لإن هتضيعك ، انصحك بالمحاوله مهما كان الأمر صعب خلي عندك روح تحدي و دي مش صعب تكتسبيها ، بس مهم التحدي ده يكون تحدي لنفسك مش تحدي يوصلك للمقارنة بينك و بين صحابك لإن المقارنة هتوقعك. و متحاوليش دايما تبحثي عن حد شبه كدا خاض بالتجربة كذا و نجح او اي حاجه من دي ، لإن حتى لو لقيتي ف الشخص ده له ظروف و خاض حاجات مش هتبقا ظاهرالك لإن كل حد فينا تجربته مختلفة عن التاني إستحاله تلاقي تجربتك مشابهة لحد ١٠٠٪ حلو إنك تسمعي و تتعلمي بس متخليش ده الدافع اللي يحركك . بالنسبة للإنجليزي ف عايزاكي تطمني لإن حقيقي هو كان أحسن مادة ف كل دول هو الوحيد اللي حفظ هو و العربي ، ف اللي بتسمعيه بتلاقيه ، اسئلتهم مفيش فيها تحوير بمعنى أصح ذي المواد التانيه ، بس أنا مش بقولك كدا عشان تتخاذلي و ترتاحي ف توقفي محاولة ، بالعكس خدي كورس فيه يعلمك أساسيات انتي واقعه فيها حاولي تشوفي نقطة ضعفك فين و تصلحيها ، عندك مشكلة مع حفظ كلمات ؟ تطبيق على الجرامر؟ تكوين جمل؟ مهم قبل اي حاجه تحاولي تصلحيها تحددي مشكلتك فيها عشان تعرفي ايه الطريق الصح اللي المفروض تمشي فيه ، و لو احتاجتي تسألي ف حاجه انا موجودة إن شاء الله اقدر أساعدك و بالتوفيق 💗
تم النشر الاثنين، ٢٠ يوليو ٢٠٢٦
أنصحك تسمعي بودكاست د. أحمد الجوهري في بودكاست عقلية شرح قصة تالتة ثانوي وإزاي تذاكر وإزاي تتغلب على أي ضغط وقال كلام لخص فيه تالتة ثانوي كلها وإزاي تتجنبي الوقعات البودكاست ساعتين ونصف بس يستاهل رابط البودكاست: https://youtu.be/yt8HkqvcfyE?si=hI1M5PViA7jdgpg7
تم النشر الاثنين، ٢٠ يوليو ٢٠٢٦
عليكم السلام مبدايا الحاجات اللي انتي حساها دي طبيعي جدا، حته الانضباط هتلاقي نفسك منضبطه فترة وبتقعي فتره وده شئ طبيعي بس متخليش الواقعه تطول وانصحك تتابعي علي والكتاب على يوتيوب هيساعدك في حته الانضباط دي وتنظيم اليوم، بالنسبة للمواد، أنا كنت واحد مأهمل جاااامد اوي في اولا وتانيه ثانوي في جميع المواد حرفيا مش ماده واحده ولا اتنين، والحمد لله دخلت تالته ظبطت نفسي، وجبت 89% والحمد لله كنت راضي جدا، والأهم من ده كله المدرس اللي هتابعي معاه، قوليلي المواد اللي عندك عشان أنا سامع أنه في حوارات حصلت وفي مواد اتشالت والطالب بقى بيختار اللي هو عايزه ونا اقدر ارشحلك مدرسين كويسين تتابعي معاهم
تم النشر الاثنين، ٢٠ يوليو ٢٠٢٦
وعليكم السلام يا بنتي، أول حاجة أحب أقولها لك إن شعورك ده طبيعي جدًا، وكتير من البنات اللي دخلوا تالتة ثانوي قبلك كانوا خايفين من نفس الحاجات بالضبط: الانضباط، والمسائل الصعبة في الفيزياء والكيمياء، والأحياء الجديدة، والإنجليزي، والنحو في العربي. والحمد لله كتير منهم قدروا يتغلبوا على الخوف ده ويجيبوا مجاميع كويسة. الانضباط مش هيجي فجأة، لكنه بيتبنى بخطوات صغيرة يومية. ابدئي بعمل جدول دراسي بسيط فيه أوقات ثابتة لكل مادة، وخلي أهدافك في البداية صغيرة زي "أحل 5 مسائل فيزياء النهاردة" عشان تحسي بالإنجاز وتكملي. كتير من الدفعات السابقة قالوا إن أول شهرين كانوا الأصعب، وبعد كده الروتين بقى أسهل. بالنسبة للفيزياء والكيمياء، الخوف من المسائل بيروح لما تبدئي بالأساسيات وتفهمي القوانين قبل ما تحلي. خدي كل درس لوحده، وركزي على فهم الفكرة الأساسية ثم طبقيها على مسائل تدريجية الصعوبة. الأحياء اللي أول مرة تاخديها، ركزي على الحفظ المنظم مع الفهم، وربط المعلومات ببعض عشان ما تنسيهاش. الإنجليزي، لو مستواكِ متوسط، ابدئي بتقوية القواعد والكلمات الأساسية من دلوقتي، ومارسي القراءة والاستماع يوميًا حتى لو لمدة نص ساعة. أما العربي والنحو، فالنحو بيحتاج تدريب مستمر على القواعد من الصفر، وفيه كتب وملخصات كتير بتبسط الموضوع، والبنات اللي كانوا زيك قالوا إن الاستمرار في حل تمارين يومي ساعدهم يتقدموا بسرعة. أنتِ مش لوحدك في القلق ده، وكتير من اللي سبقوكِ مروا بنفس الشعور ونجحوا. دوري على أسئلة مشابهة في فدني عشان تشوفي تجارب البنات التانيين وتاخدي أفكار إضافية. أنتِ قادرة، وخطوتك الأولى دلوقتي إنك تثقي في نفسك وتبدئي بخطوات عملية. لو عايزة نصايح أكتر في أي مادة، قوليلي.
تم النشر الأحد، ١٩ يوليو ٢٠٢٦
لعرض السؤال في فدني اضغط هنا