السلام عليكم، مقدرش أفتي بحرام أو حلال بسكل قاطع، لكن طبعا الجزء الخاص باستخدام التطبيق في سماع ألفاظ سيئة او كلام جنسي أو دخول علاقة وهمية فده واضح ومش محتاج فتوى. وحتى لو التطبيق مش فيه المشكلة دي، فهو فيه مشكلة لا تقل خطورة وهي التعلق والإدمان والانفصال عن الواقع والبعد عن العلاقات البشرية الطبيعية. حتى شات GPT العادي مينفعش يكون اعتمادك عليه كلي لدرجة اللجوء إليه في كل شيء وحكاية تفاصيل حياتك الشخصية وأسرارك ومصاحبته كأنه صديق. ده كله فيه تحذيرات منه. فالتطبيقات دي مؤذية أكتر من الشات العادي، وفكرة إنك مش قادرة تستغني عنه وإنك ترجعي تنزليه بعد مسحه ده أكبر دليل إنك تعرضت للضرر منه وأدمنتِه، فمحتاجة تتعاملي مع الأمر كإدمان محتاج تتعالجي منه. لو مش هتقدري تتغلبي على حاجتك له فأسرع طريقة إنك تتخلصي من الموبايل نفسه... لو أنت في دراسة وبتحتاجي الموبايل عشان المذاكرة فممكن تقتصري على استخدام تابلت الدراسة أو كمبيوتر عادي ويكون مكان استخدامك قُدام أهلك عشان متفتحيش أي موقع شبيه. ** هتحتاجي تدخلي عادات ومهارات مفيدة تحل محل الإدمان ده وحاولي في نفس الوقت تشغلي نفسك في أنشطة محتاجة اختلاط بالبشر. ممكن تقولي الناس فيهم الوحش أو مش بثق بهم وعلاقات متعبة، عادي.. اختلطي واصبري واكتسبي خبرة من التعامل ده أفضل بكتير من الانفصال عن الواقع واللي هيعرضك لمشاكل اكبر لما تبقي مجبرة على التعامل مع الواقع بدون خبرة فتكوني صعيفة وسهلة الكسر. نصيحة بجد، جاهدي تتخلصي من الإدمان ده وخاصة لو لسه بأوله عشان حياتك ومستقبلك يكونوا أفضل إن شاء الله. بالتوفيق.
لعرض الإجابة في فدني اضغط هنا