حاولت كتير اكتب مشكلتي بس مش قادره مع اني عارفه ان محدش هيكون عارفني ولا عارف اسمي. بس لما باجي اكتب بحس اني م قادره اطلع الكلمات.
اللي مريت بيه كان صعب اوي بس انا مبعرفش او مبحبش دور الضحية بكره التعاطف والشفقة وبكره ان حد يقلل من مشكلتي ويقولي فيه غيرك أسوأ احمدي ربنا ان اللي حصلك على قد كده. يعني ايه؟
هو حد فاهم انا مريت بايه بسبب اللي حصلي. حد عارف انا فضلت طول حياتي بعيط قبل ما بنام. ممكن مشكلتي فعلا مكنتش كبيره للدرجة بس كانت كفيله انها تدمرني. بس مع ذلك مش هبص للماضي هبص للمستقبل وهحاول اطور نفسي وفعلا عملت كده ودخلت كليه عاجباني بس بدل ما أشكر ربنا لا رجعت لنقطة الصفر.
رجعت أسأل نفسي نفس الاسئله. هو انا كنت استاهل ! هو ليه انا؟ اسئله ملهاش اجابه وبترحعني الف خطوه.
انا حاليا مش عايزه اكمل في اي حاجة. أو مش حاليا انا داخله على سنه او اكتر كده. مبقتش عايزه اكمل في المعافره عشاني. بطلت احاول اقوم لاني كل مره كنت بقوم كنت بضغط على نفسي بس انا مبقتش قادره اضغط على نفسي وبسأل نفسي ليه بوظت حياتي بعد ما قعدت سنين بصلحها.
انا غالبا عارفه كل الكلام اللي معظمكم هيكتبه لاني بكتب زيه وبقوله بس مش قادره اعمل بيه. رحعت تاني لفكره اني استسلم واعيش دور الضحية زي زمان.
انا مبعرفش اشتكي لمين ولا حتى احكي عشان محدش يقولي شوفي مختص حقيقي حاولت بس رجعت في الاخر. إذا كان مش قادره اكتب مشكلتي في ورقه و اقطعها ازاي هروح احكي لحد بحس بعدم الأمان الشديد لو حكيت بيكون نفسي حد يطبطب عليا بس لو حد عمل كده بتعصب وبقول انا كويسه. يمكن حتى كلامي ده مش متضبط بس مش مشكله انا عارفه اصلا ان النصايح اللي هتكتوبها مش هعمل بيها.
حاسة بيكي اوي .. ربنا يهون عليكي تعبك .. مش عايزة اكتب كلام وبس فاسمحي لي اكتب لك نصيحة صغيرة فيه سلسلة على يوتيوب باسم التحرر من الماضي لعماد رشاد عثمان انا بدأت فيها ولحد دلؤتي مستفيدةمنها ابدأي فيها وإن شاء الله تكون ذا فائدة لك
تم النشر الاثنين، ٣٠ مارس ٢٠٢٦
أنا عارف ومتأكد انك تعملي بالنصيحه دي بصي يا ستي انتي لازم تنزلي من فوق الشجرة يعني بطلي تعيشي في خيالات إنك لازم تكوني مثالية أو إن حياتك اتدمرت للأبد عشان وقعتي وقعة في النص الواقع بيقول إنك بشر والبشر بيغلطوا وبيضعفوا وبيملوا وده مش معناه إنك فاشلة ده معناه إنك عايشة ،ودلوقتي بطلة تحليل وابدأ في التشغيل يعني وقفي خناقتك مع نفسك والأسئلة الوجودية اللي بتسحب طاقتك دي وقومي شوفي وراكي إيه مادي وملموس يتعمل دلوقتي لو وراكي مذاكرة افتحي كتاب ولو وراكي صلاة قومي صلي لو الأوضة مكركبة رتبيها المهم تشغلي جوارحك وتمنعي عقلك عن جلد الذات لأن النفس طول ما هي فاضية هتفضل تاكل فيكي ومتستنيش إنو حد هييجي ينقذك ولا يديكي الأمان اللي بتدوري عليه غير ايه ..لما إنتي تدي لنفسك حقها في الضعف وتقومي تعافري في المتاح ليكي النهاردة وبس وما لكيش دعوة بكرة هيحصل فيه إيه لأن بكرة مش بتاعك أصلاً فخليكي بنت النهاردة واعملي اللي تقدري عليه حتى لو كان صغير تافه في نظرك بس هو ده اللي هيبنيكي من تاني وجد والله ربنا يحفظك ويسعدك لو محتاجه ارشحلك حد من يوتيوب هيفيدك جدا 😊
تم النشر الأحد، ٢٩ مارس ٢٠٢٦
خلاص مش هقول نصايح ، ندردش أحسن ، غيرك احسن ، اكيد غيرنا احسن ، لكن ده ايه علاقته بيكي و بتجربتك و بإحساسك ، هو مش كل واحد فينا بيعيش تجربته برده ولا ايه ، و مش كل رحلة فيها قيعان و قمم ، فليه بقى شايفه نفسك تمام في القمة و انك كده انسانة و بتتقبلي نفسك ، ولما تنزلي للقاع ما بتعمليش ده ،مع ان الاتنين وجهين لعملة واحده ، لبني آدمة عايشة ، ليه مانعه نفسك من تقبل ضغفك ؟
تم النشر الأحد، ٢٩ مارس ٢٠٢٦
أختي العزيزة، أشعر بثقل اللي جواكِ ده، والتعب من الدوران في الدائرة دي… مش سهل، وأنتِ مش ضعيفة خالص لأنكِ حاولتِ وطورتِ نفسكِ قبل كده. ده دليل قوتكِ، حتى لو رجعتِ دلوقتي لنقطة الصفر زي ما بتقولي. الأسئلة دي زي "ليه أنا؟" و"أستاهل؟" بترجعنا للورا، بس الحقيقة إنها ملهاش إجابة واضحة، وده جزء من الابتلاء اللي ربنا بيختبرنا بيه عشان نتقرب منه. قال تعالى: "وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ" (البقرة:216). ركزي على اللي تقدري عليه دلوقتي، مش على اللي فات. خطوات صغيرة عملية عشان تبدئي تاني: اكتبي على ورقة خاصة بيكِ بس : مش هنا، ولا لحد. اكتبي كل اللي جواكِ، اقرئيه بصوت عالي لنفسكِ، وبعدين احرقيها أو قطعيها. ده هيخفف الضغط بدون ما حد يعرف. خطوة واحدة يوميًا : مش كل حاجة مرة واحدة. النهارده، صلي ركعتين شكر أو استغفار، وقولي "اللهم أعني على نفسي". بكرة، اقرئي ولو صفحة قرآن يوميا. غيري السؤال : بدل "ليه أنا؟"، اسألي "إيه اللي أقدر أعمله دلوقتي عشان أتقدم خطوة؟" ده هيحول الطاقة لعمل. أنتِ مش هترجعي دور الضحية، لأنكِ أقوى من كده. لو عايزة تكملي في المعافاة، ابحثي في فدني عن أسئلة مشابهة، هتلاقي إجابات كتير. ولو محتاجة دعم متخصص، روحي لصفحة الخبراء هنا: https://www.fedni.net/experts – فيه معالجين نفسيين هيساعدوكِ بطريقة آمنة. أنتِ قادرة، خطوة صغيرة كفاية النهارده. يا رب يفرج همكِ ويشرح صدركِ. 💕
تم النشر السبت، ٢٨ مارس ٢٠٢٦
انا ما رح انصحك الا انك تبقي على طبعيتك وهاد شي كتير طبيعي ما حد يرضا يبين ضعيف لا اي انسان بس بنحب انو نشكي ويفضفض وهاد اساس يعني لما احكيلك مشكلتي اذا ما سئلتك على حل لا تعطيني انا عم احكيلك عشان ارتاح بس الموضوع انو هل فعلا انا بستاهل الكليه هاي فعليا يا اختي نحنا كتير شغلات عنا اياها وما استاهلناها متل يدين رجلين نظر هل هدول نحنا منستاهلهم هل الصحه نحنا منستاهلها اكيد لا بس نحنا مؤمنين انو الله رزقنا اياها ومؤمنين انو قدرنا مكتوب قبل ما نولد ورزقنا مكتوب، كم من شخص شفتهم يتعبو ليل نهار وبالاخير مصراتهم ما تكفيهم دوبها مصاريف المعيشه وغير ناس ما يشتغلو او يتعبو ومعاهم مصاري هاد هو رزق، الله رزقك في كليه منيحه عشان تجتهدي وتشدي حالك اذا رسبتي مو يعني انتي ما تستاهلي لا يعني الله ما يسر لك الله يسر لك وينجحك اذا بدك تفضفضي فعليا لازم تفضفضي لشخص يفهمك وشخص هو مفضفض لك من قبل وانتي وقفتي معاه عشان ما تحس نفسك عبئ او فضفضي لله الجبار الذي لم يلد ولم يولد
تم النشر الثلاثاء، ٣١ مارس ٢٠٢٦
الحمد الله الله رزقك فيها، خلص كوني مؤمنه بهاد الشي
تم النشر الأربعاء، ١ أبريل ٢٠٢٦
@yaze n شكرا ليك. هو فعلا الكليه دي كانت حلمي ولما دخلتها حسيت انه مش مقدره النعمه اللي انا فيها وبعدت عن المذاكره وكل حاجة عشان كده دخلت في الدوامه القديمه بتاعت زمان.
تم النشر الثلاثاء، ٣١ مارس ٢٠٢٦
شوفي مهما كان اللي مريتي بيه فده ابتلاء الابتلاء بيكون على حسب المحبة يعني تخيلي أكثر الناس ابتلاءا كانت الرسل والأنبياء هل عشان ربنا استغفر الله بيكرهم مثلا لا طبعا ده من محبة ربنا ليهم كان بيختبرهم الاختبارات الصعبة دي عشان يعلي مرتبتهم في الآخره كان ممكن الأنبياء يستسلموا ويقولوا مش قادرين او ليه احنا اللي تعبانين ما كله عايش ومرتاح. ليه احنا اللي مضطرين ننشر الدعوه بس تخيلي معايا لو ده اللي حصل مكنش فيه اي دين وصلنا. الابتلاء بيكون الصالحين عشان ربنا يشوفهم هيصبروا ولا لا. لو صبروا جزائهم الجنة ولو يئسوا من رحمه ربنا فجزائهم معروف. مشكلتنا مش إننا مش عارفين احنا مشكلتنا إننا بستسهل عايزين كل حاجة ببلاش وراحة وده عمره ما هيحصل في الدنيا. لأنها دار كبد وعناء ومحدش مرتاح فيها لعلمك حتى لو واحد معندوش ابتلاءات هتلاقي فيه حاجة مضايقاه برضو. فوقي لنفسك وده مش عشان الناس ده عشان الجنة تستاهل وسلعة الله غالية جدا لازم نتعب عشانها والراحة هتكون فيها لانهائيه. ممكن تختاري تستلمي دلوقتي بعد كل التعب اللي تعبتيه مش هلومك علفكره لاننا كلنا بنوصل للمرحلة دي إنما هلومك لو فكرتي تفضلي في مكانك منغير ما تحاولي تقومي. المحاوله دي نجاح حتى لو وقعتي إنما انك تقفي ده الفشل بجد ذاته. آسفه اني طولت بالتوفيق
تم النشر الأحد، ٢٩ مارس ٢٠٢٦
طبل اتفضل قول نصحيتك
تم النشر الأحد، ٢٩ مارس ٢٠٢٦
والله يا بنتى ما بتريق مش قصدى خالص بس بنتقد فكرة أسلوب طرحك لللكلام بس مش أكتر اللى هو متقوليش انا عارفه الكلام اللى هتقولوه متقلليش من كلمة، الإنسان مننا ممكن يتغير بكلمة ممكن حياته تتقلب بكلمة فاهمانى فانتى اسمعى مش هتخسرى حاجه حتى لو عارفه فاهمانى كلنا بيجيلنا وقت وبتضيق علينا أنفسنا وبنحتاج نصايح تخفف عننا حتى لو احنا عارفينها بس على الأقل بنحس ان فيه حد مهتم بينا أو لسه فيه آمل فاهمانى.... أنا أكيد مش بتريق ولا بزايد عليكى إطلاقا أنا بلفت نظرك ل حاجة معينه بس فاهمانى ولا شكلى وقعت فى دور الضحيه وانتى مبتحبيش دا 🥺
تم النشر الأحد، ٢٩ مارس ٢٠٢٦
عندك نصيحة قولها مش عندك متتريقش بقا
تم النشر الأحد، ٢٩ مارس ٢٠٢٦
مش لوحدك عندك نفس المشاعر لما تحكي مشكلة لحد ففعلا بحس انا كمان بعدم الامان وبشوف اني مبحبش ابان ضعيف او في حاله ضعف قدام اي حد. على الرغم ان ده شيء مهم انك تخرج مشاعرك. بس ممكن بسبب حاجات في الماضي الله اعلم متفهم انك مريت بمواقف صعبه ومش هتقدر تحكيها بس فعليا لا تبكي على اللبن المسكوب فالماضي انتهى. والحل بصراحه هو اخراج المشاعر دي اثناء الصلاه لله. بجد انا كشخص لن ولم احاول اني ابان ضعيف قدام انسان .. فقط امام الله وكمان خلي هدفك التطوير وتكون ناجح ابتاغ وجه الله فالمسلم القوي خير واحب لله من المسلم الضعيف.
تم النشر السبت، ٢٨ مارس ٢٠٢٦
اوعى تخافى تحكى مشكلتك اتكلمى ومن حقك القدامك يسمعك وغلط جدا ان القدامك يقلل من كلامك يبقا هو العايز يتغير مش انتِ
تم النشر الأحد، ٢٩ مارس ٢٠٢٦
كل واحد بيقابل المشكله حسب شخصيته او حسب قوة الصبر والايمان بالله يعنى ممكن غيرك فى نفس البلاء بس وضعه غير وضعك
تم النشر الأحد، ٢٩ مارس ٢٠٢٦
@Dareen 🌷 فهمتك تسلمي
تم النشر الأحد، ٢٩ مارس ٢٠٢٦
يعنى انتى شايفه دا الحل انك تتدمرى تانى وترجعى ؟ طب انتى هتبقى مبسوطه يعنى بعدما تستسلمى بقى وتعيشى دور الضحيه وبتاع ؟ وشايفه كمان انك عارفه كل الكلام والنصايح اللى ممكن تساعدك ؟ ........ اه تمام فهمت انتى شايفه كدا تستاهلى الندم اللى هيحصلك بعدين عن استسلامك دا اللى بدون داعى أو أثر خارجى ..... بس ممكن على الأق... اه معلش مش هتكلم ما انتى عارفة بقى 🥺
تم النشر الأحد، ٢٩ مارس ٢٠٢٦
لعرض السؤال في فدني اضغط هنا