كيف أنهي هذه الخطبة وأبدأ حياتي من جديد وكل الأهل ضدي؟

Question

السلام عليكم ورحمه الله وبركاته مشكلتى طرحتها كتير بس قالولى صعبه ملهاش حل اتمنى القى حل هنا انا مخطوبه لواحد انا اللي وافقت عليه يشرب ويبيجب قروض و الكبائر بيعملها وانا اتغيرت بعد الخطوبه واتنقبت وبدات اغير من حياتى عدم مصافحته والكلام بحدود بس هو مش عاجبه كده وانا اتاكدت فعلاً انه مش هو ده اللي يناسبنى ولا هيكون زوج صالح لى اهلى عندا فيا وباباى جى فى صفهم علشان هو كان نفسه في ولد وانا للاسف جيت بنت انا كبيره اخواتى هو عايز يخلص منى عمرى ما شفت حنان اب ولا اى حاجه لدرجه انى ناسيه أنى ليا اب بلاش تقولوا لي اتكلمى مع باباكى لان انا حاسه انه حتى هو نسي شكلي مع انى في بيت واحد عمرى ما جمعنا حديث كل الدنيا عليا مليش غير ربنا ارجو ألاقي حل هنا خطيبى عامل فيها بريء وكل مره يحط اللوم عليا وهو الملاك انا عايزه ابعد عن كل ده بفكر امشى من البيت او انتحر مش بيجى في دماغى غير حاجات سلبى لو هكلم خال او عم فهما مقاطعنى علشان فركشت من ابن عمى قبل كده انا مش وحشه وعارفه انى فيا عيوب بس لما بغلط بعترف وانا مش شايفه انى غلطانة انا بسبب الحزن والكتمان جالى ارتجاع في صمام القلب بسببهم هل لو مشيت وسبت كل ده هكون غلط عايزه أبدأ من جديد بس برجع وبقول لو مشيت هيجبونى ويموتونى علشان عندنا اللي بيمشى بيجب العار لاهله

Accepted Answer

السلام عليكم، مش معنى إنك غلطتِ واخترت غلط إنك تكملي في الغلط وتدفعي الثمن طول عمرك. أولًا شيلي من دماغك أي أفكار سلبية أو انتحار أو حتى هرب من البيت، أنتِ بتقولي قربتِ من ربنا وبدأت تغيري من حياتك فبلاش خالص تفكير سلبي. ما دام شايفة الشخص ده لا يصلح زوج ودينيا عنده مشاكل كبيرة جدا فصممي على رأيك... وخاصة لو هو كمان مش بيصلي. محدش هيتأذى غيرك ومحدش منهم هيقف في صفك بعد الزواج. اقفي وواجهي، طالما مقرة إن اختيارك كان غلط فتحملي نتيجة الخطأ بإنك تواجهي وتتحملي المواجهة وصعوبتها مش إنك تكملي في زواج مجبرة عليه مع شخص لا يصلح زوج أو قدوة لأبنائك بعد كده. اتكلمي مع أهلك وعشان عنادهم معك صارحيهم إنك غلطتِ في اختيارك بس مكنتيش تعرفي وانتِ تغيرتِ ومش صح خالص تكملي في زواج مش راضية عنه وشايفة إنه هيكون أذى لك. *** بدل ما تفكري في الانتحار فكري في اللجوء لربنا، صلي وادعي كتير وبلاش تكون مجرد صلاة ودعاء باللسان، خلي قلبك حاضر ويكون فيه خشوع قد ما تقدري وخلي عندك يقين وصدق وثقة باستجابة ربنا وإنه هيكتب لك الخير بإذن الله. كل ما كان فيه يقين بالله هتلاقي بإذن الله المخرج فخلي يقينك بربنا كبير. ربنا معك ويكتب لك الخير ويرضيك به.

Answer

وعليكم السلام ورحمه الله وبركاته اولا انتي اختارتي غلط واكتشفتي أن الاختيار ده غلط ماينفعش نكمل في هذا الغلط اكيد علشان حد دي حياه ومستقبل الصح انك تسيبي الشخص ده حتي لو اهلك مش موافقين بس لازم تسببه انتي حياتك هاتدمر لو كملتي معاه انتي لازم تاخدي خطوه انك تسببه وبعدين تشوفي اهلك حطيهم قدام الأمر الواقع انك سبتبه خلاص هو هايحصل شويه مشاكل احسن من انك تعيشي في القرف ده مدا حياتك وبنا معاكي يارب

Answer

انت حطيتي اجابه لسؤالك، انت انسانه ملتزمه، انسانه عاقله ووعيه وعارفه ايه الصح وايه الغلط ان انت ترتبطي بانسان ربنا يهديه وينور بصيرته انا مش هحكم على انسان ربنا يهديه ونتمنى له وندعي له بالهدايه لكن مفيش حاجه اسمها اصل انا ابويا بيعمل معايا وبيسوي وابويا واقف ضدي ما ينفع ما فيش حاجه اسمها ان ابويا بيعاملني وحش وعايز راجل خدي موقف انت صاحبه القرار انت اللي هتعيشي لو وقعتي وتعبت ما حدش هيقف في صفك ما حدش حيطبطب عليك معلش بابا وماما مش عايشين للابد انت اللي هتعيشي في بيتك ويتقفل عليك بابك والله أعلم ايه اللي يحصل خدي الموقف من دلوقتي وابعدي تماما وقولي لا انا مش هرتبط بالانسان دوت لان احنا مختلفين في الطباع ميولنا مش واحده انا ما اقدرش ان انا اكمل معاه حظلمه وهيظلمني بس انا رافضه مهما كانت الضغوط مهما كانت العواقب خدي موقف اوعي

كيف أنهي هذه الخطبة وأبدأ حياتي من جديد وكل الأهل ضدي؟

اجتماعية

زواج

أهل

سؤال من احد أعضاء فدني

تم النشر الاثنين، ٢١ يوليو ٢٠٢٥

4 إجابة

10 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك