انا حالياً مغترب وقاعد لوحدى لأسباب معينة خاصه بيا بحاول اتفادى بعض الأمور ولاكن ممكن الفترة تطول ، كنت عاوز أربى حيوان أليف بس للاسف بكره القطط اوى اوى وطبعاً الكلاب ف الشقه مش هينفع ، العصافير مش هحس بتفاعل معاها اوى يعنى مش هتسلينى بنفس تفاعل القطط والكلاب ، استقريت ف الآخر على القطط بس معنديش خلفية عن التعامل معاهم خالص وكمان بكرههم بس هكسر الحته دى ، لو حد عنده فكره هعودها ازاى تدخل الحمام لأنها لو عملتها بره الحمام هرميها ف الشارع ريحة البراز بتاعها مؤذى جدا ، أو فكرة تانى غير الحيوان الأليف او اى نوع تانى غير ما سبق ذكره
أنا بصراحة مش هقدر أفيد حضرتك أوي في تربيه القطط و كدا لأني مش من محبيها. لكن لو هتجيب واحدة فالأفضل تكون صغيرة لأن تعويدها على الليتر بوكس بيبقى أسهل.. وممكن تبص على بدائل برضو زي ببغاء أو هامستر أو سلحفاة أو حتى حوض سمك كل واحد ليه طبيعته ومميزاته. بس في رأيي مفيش واحد منهم هيديك نفس إحساس التفاعل والونس اللي هتديهولك القطة،،لكنهم يفضلو تجربه مختلفه و حاجه هاديه جميله.. قبل ما تاخد القرار شوف فيديوهات لمربيين قطط بيتكلموا عن تجربتهم بعد فترة من التربية وادخل جروبات خاصة بالقطط واسأل عن أي حاجة محتار فيها. هتعرف منهم تفاصيل كتير عن الأكل والعناية والتطعيمات وإيه الأخطاء اللي الأفضل تتجنبها من البداية.ربنا يعينك و يخفف عنك الغربه مش ساهله.
تم النشر الأربعاء، ٢٩ يوليو ٢٠٢٦
ممكن سلحفاة ، بس زي ما قولت انت عايز حاجه تتفاعل معاك و عن تجربة لو القطة اتعودت عليك هتحبها جدا ، موضوع تتعود انه تدخل الحمام في دا محتاج صبر شويه ، ممكن تعملها زي سلة رمل لفضلاتها و تحطه قريب من مكان أكلها علشان تتعرف عليه ، تخليها قريبة من الحمام برضوا ، هي مرة على مرة هتتعلم ، عموما هي من افضل حيوانات ، و اظن ان اي حيوان هتجيبه هيبقي برضوا فيه مشكلة الفضلات دي ، فحاول تتقبلها علشان تقدر تربي قطة او غيره
تم النشر الأربعاء، ٢٩ يوليو ٢٠٢٦
السلام عليكم، أولا ربنا يعينك ويقويك على الغربة وييسر أمورك. أي حيوان أو كائن أليف هتفكر تجيبه اعرف إنك هتكون مسؤول عنه وتربية أي كائن صعبة زي تربية الأطفال، أنت مسؤول عن أكلهم وشربهم ونظافتهم ولو لا قدر الله مرضوا فأنت مسؤول عن علاجهم، لأنهم أرواح في النهاية. ولو أنت كمان من النوع اللي بيتعلق ويرتبط عاطفيا لدرجة كبيرة فخلي بالك إن فقدهم مؤلم جدا، كأنك فقدت شخص عزيز بالضبط... لو مش هتتحمل تمر بحاجة زي دي في يوم من الأيام بلاش. ******** لو ضروري قوي تربي كائن، واستقريت على قطة، أنصحك تتابع قنوات اليوتيوب الخاصة بتربية القطط، من ناحية هتستفيد من معلوماتهم وخبراتهم وتتجنب أخطاء وقعوا فيها بالبداية ومن ناحية تانية هتشوف هل الموضوع هيكون صعب بالنسبة لك ومش هتتحمل تربية قط ومسؤوليتها. *** كمان لو فعلا ناوي إذا زهقت منها أو اتضايقت من رائحة فضلاتها إنك ترميها في الشارع فبلاش تشتريها من الأول. القطط المنزلية للأسف مش نفس القطط البرانية، ولا هتستحمل عيشة الشارع، وهتتبهدل من القطط البرانية وتجوع وتتعذب وممكن تموت وتتحمل مسؤولية روح وخلاص، إلا لو رجعتها ملجأ حيوانات أو عرضتها للتبني، غير كده بلاش موضوع رميها في الشارع ده. *** حاسة إني عقدت لك الموضوع يا باشمهندس، بس عشان أنا عارفة الموضوع صعب ومسؤولية كبيرة فعاوزاك متاخدش قرار إلا وانت متأكد أو عامل حسابك بعد كده مش هتعرض روح بريئة لأي نوع من الأذى. *** وبالتوفيق إن شاء الله.
تم النشر الأحد، ٢ أغسطس ٢٠٢٦
أولاً، أقدر شعورك بالوحدة الموحشة دي، خاصة وأنت مغترب وبعيد عن الناس لأسباب خاصة بيك. الوحدة بتكون ثقيلة جداً في الغربة، ومحاولتك تبحث عن حل عملي زي تربية حيوان أليف دليل على إنك عايز تكسر الروتين ده وتدي نفسك شوية تفاعل. ده خطوة إيجابية، وأنا هنا عشان أساعدك بأفكار واقعية. لو مصر على القطط رغم إنك بتكرهها، فالأمر ممكن يتغير مع الوقت لو بدأت بخطوات بسيطة. القطط بتحتاج تدريب على الصندوق الرملي (الليتر بوكس) من أول يوم. اشترِ صندوق رملي كبير نسبياً، وحطه في مكان هادي وثابت في الحمام أو قريب منه. استخدم رمل ناعم ونظيف، وحط القطة في الصندوق بعد كل أكل أو شرب عشان تتعود. لو عملت بره، نظف المكان فوراً بمطهر بدون ريحة قوية عشان ما تربطش المكان بالبراز. القطط بطبيعتها بتحب النظافة، فلو الصندوق نظيف ومتاح دايماً، هتستخدمه بنسبة كبيرة. ابدأ بقطة صغيرة عشان تتعود أسرع، وخد وقتك في التعامل معاها بهدوء بدون إجبار. لكن لو القطط مش مناسبة خالص، فيه بدائل تانية ممكن تخفف الوحدة بدون تعقيدات. مثلاً، تربية سمكة في حوض صغير ممكن تكون مهدئة وبتحتاج رعاية بسيطة، أو حتى نباتات داخلية زي الصبار أو النباتات اللي بتتحمل الجفاف، بتدي إحساس بالحياة في البيت وبتحتاج عناية يومية خفيفة. كمان، جرب هوايات تفاعلية زي تعلم لغة جديدة أونلاين أو متابعة دروس طبخ بسيطة، أو حتى لعب ألعاب فيديو جماعية عبر الإنترنت عشان تحس بتواصل غير مباشر. لو الفترة هتطول، فكر في تنظيم يومك بروتين يومي يشمل صلاة وذكر، لأن ده بيملأ الفراغ النفسي ويقلل الشعور بالوحشة. ابحث عن أسئلة مشابهة على فدني عشان تشوف تجارب ناس تانيين، ولو عايز تفاصيل أكتر عن أي فكرة قولي. أنت مش لوحدك في الموضوع ده، وهتعدي الفترة دي بإذن الله.
تم النشر الأربعاء، ٢٩ يوليو ٢٠٢٦
كان عندي قطة من غير ما أعلمها اي حاجة كانت بتدخل الحمام وتخلص حاجتها وتطلع معرفش ده حصل ازاي بس كانت كدا، ممكن مثلا تحطلها الاكل قريب من الحمام او لو حسيت انه بتحفر في السجادة تمسكها بسرعة وتوديها وبعد فترا قصيرة هتفهم ان ده المكان اللي المفروض تعمل فيه، ده مش من خبرة ولا حاجا انا بعطي اقتراح فقط
تم النشر الخميس، ٣٠ يوليو ٢٠٢٦
لعرض السؤال في فدني اضغط هنا