من و انا صغيرة جدا وانا بعاني من خوف ووسواس وتعب نفسي وجسدي مستمر الموضوع بدأ معايا من ابتدائي وبقى يزيد سنة بعد سنة لحد ما حياتي كلها اتلخبطت ..بقالي سنين بحاول افهم انا مالي وكشفت عند دكاترة كتير جدا وكل شوية يظهر تعب جديد يقولو انيميا صداع شديد بيستمر لأيام أو نزيف شعري كله سقط وعدم تركيز ومفيش يوم تقريبا بيعدي من غير مسكن او شكوى الحمدلله
ف فترة من الفترات أهلي ودوني لشيوخ واتقالي إن فيه أذى وسحر وناس قريبة مننا اعترفت فعلا انها أذتني ومن وقتها وانا تايهة بين اني أصدق وإني أحاول أقنع نفسي إنه مجرد ضغط نفسي ولما بدأت اصدق اهلي قالولي متحطهوش ف دماغك يمكن بس حسد
بس ال انا بمر بيه مش طبيعي بالنسبالي وقت تعبي ببقى شخص تاني بخاف من نفسي ببقي عصبيه جدا ممكن اضرب اي حد حتي لو والدتي ببقى عايزة أهرب من البيت ومش ببقي حاسة بنفسي اصلا لولا لطف ربنا حد بيمسكني
انا دلوقتي في تالتة ثانوي ازهر كنت قاسمه السنه دي تاني سنه ليا وباقي حوالي 20 يوم على الامتحانات ومش قادرة اذاكر ولا أركز الوقت بيضيع مني بشكل مرعب ممكن اليوم كله يعدي وأنا حرفيا معملتش حاجه كل يوم يقوم وانا واثقه أن النهارده هنجز وبكتب الحاجات ال المفروض هعملها السنه ال فاتت كل المواد اللي دخلتها كنت بنسي كل حاجه السنادي معايا كل المواد العلميه ومادتين عربي واتنين شرعي.
أهلي بقوا خايفين عليا جدًا وبيفكروا يدخلوني أي كلية حتى لو خاص بس أنا نفسي أجيب حاجة بمجموعي وأفرحهم وأحس إني تعبت على حاجة وخايفه اصلا مجبش مجموع يعرفو يدخلوني بيه خاص انا الكبيره وكلهم كانو حاطين امل عليا..كل ما أحاول أقرب من ربنا اتعب جامد واحس بتعب وتقل ف جسمي وتقل ف قلبي بحاول دايما اصلي سنن واحافظ ع الصلاه ف وقتها و الأذكار على قد ما أقدر لكن حاسه اني مش عارفة اطلع من اللي انا فيه طول الوقت بهزر ومش بسبب نفسي للتفكير لكن من جوايا انا هتجنن
مسكت تحفيظ في مسجد يمكن نفسيتي تتحسن وحبيت الموضوع جدا ولقيت نفسي احسن شويه كام يوم بس والوضع بقي مرهق بالنسبالي بقيت مش قادرة اروح من كتر التعب واللخبطة اللي جوايا
منكرش ان لما اي شيخ كان بيقرأ كنت بتعب جدا وقتها لكن بفوق بعدها بقعد يومين او تلاته والاقي نفسي رجعت للتوهه دي تاني حتي اي مره بخرج بره البيت كله بيلاحظ اني مش مركزه طول الوقت مش عارفه اعمل اي مش عارفه اذاكر خالص.
بعتذر عن الاطاله
ازيك شفاكى الله وعافاكى ، مبدأيا احب اقولك انك شخص قوى جدا ، بتحاولى وبتقاومى علشان تكونى احسن وسعيك ل دا مش اى حد بيعمله غير الابطال اللى زيك ، عايزة اقول لك هونى على نفسك الاهم دلوقتي صحتك واللى هتتحسن لما نفسيتك تتحسن ، اللى مريتي بيه كان كتير واحساسك بالتوهان طبيعي حاليا ، لكن لازم تتواصلى مع مختص نفسي يعمل لك اختبارات ويقيس حالتك ويقيمها ويحط لك خطه علاج مناسبه ليكي ، فى حاجات كتير بنحتاج نعرفها وقت التقييم للحاله ، بس اللى اقدر اقولهولك دلوقتي هونى على نفسك ، انتى مش متأخرة ولا شئ كل حاجه حلوة ليكي هتيجي ف وقتها المناسب ليكي لو مجتش دلوقتي ف هتيجي بكرة عادى جدا ، بتمنالك التوفيق والنجاح الدائم
تم النشر الاثنين، ١٨ مايو ٢٠٢٦
استمري على سورة البقرة يومياً زي ما الأخت فاطم قالت وياريت تلزمي الإستغفار بإذن الله هو هييسرلك الطريق لكل شيء بإذن الله وشفاكِ الله وعافاكِ. وبارك فيكِ وفي وقتك وإدراكك ورزقك النجاح والتوفيق والتقرب إلى الله عز وجل أكثر 🤲🏻... ولكن كما قلت رجاء إلزمي الإستغفار يومياً بأعداد بسيطة ومن ثم أكثري من العدد بصيغة ...أستغفر الله... لا تظني الأمر سخيف أو ثقيل عليك لا بل هو سهل جداً إبدأي مثلاً بأكثر عدد تظنيه كثير مثل 1000 وبعد فترة زيدي من العدد وهذا ليس من باب التحديد الدقيق ولكن من باب الإلتزام .... واستمري وستلاحظين فرقاً سحرياً كبيراً وأخبرك بسراً آخر 🫢 قيام الليل 🤭 قيام الليل فعلاً معجزة لوحده في حد ذاتها... يعني الخلطة الحلوة اللي قولتلك عليها دي ايه.... سورة البقرة... الإستغفار وقيام الليل والدعاء فيه مستجاب ... وعلي ذكر الدعاء... احنا داخلين على أيام مفترجة العشر الأوائل من ذي الحجة ويوم عرفة والدعاء فيه مستجاب حتمياً باليقين بالله وسأدعو لكِ بظاهر الغيب إن شاء الله 💗🫶🏻 ويكفي بكِ فخراً أنك تنتمين للأزهر الشريف لأنني كذلك أيضاً...🤍💕
تم النشر السبت، ١٦ مايو ٢٠٢٦
أنا فاهمة يا حبيبتي إنك حاسة بالتوهان والتعب ده من سنين، وإن اللي بتمرّي بيه مش سهل أبدًا، خاصة وأنتِ في سنة مهمة زي تالتة ثانوي. مشاعرك طبيعية في الظروف دي، وإنك بتحاولي تقربي من ربنا رغم التعب ده دليل على قوتك. الأعراض اللي بتوصفيها (الوسواس، الخوف، العصبية الشديدة، فقدان التركيز، والتعب الجسدي) ممكن تكون مرتبطة بضغط نفسي مزمن أو اضطراب قلق، وده محتاج تقييم متخصص. استمري في المتابعة الطبية عند دكاترة نفسيين وجسديين موثوقين، وفي نفس الوقت روحي لشيخ موثوق للرقية الشرعية بانتظام، لأن الجمع بين الاثنين مهم. بالنسبة للمذاكرة دلوقتي مع الـ20 يوم المتبقيين: قسمي المواد لأجزاء صغيرة جدًا، ابدئي بـ15-20 دقيقة يوميًا على مادة واحدة فقط، وركزي على المواد العلمية أولًا لأنها تحتاج تركيز. اكتبي أهداف يومية بسيطة وتابعيها، ولو حسيتِ بالتوهان خدي استراحة قصيرة ثم ارجعي. أنتِ مش لوحدكِ، وأهلكِ خايفين عليكِ لأنهم بيحبوكِ. جربي تبحثي عن أسئلة مشابهة على فدني عشان تشوفي تجارب بنات تانيين. لو محتاجة دعم أعمق، روحي لصفحة الخبراء على https://www.fedni.net/experts واختاري معالج نفسي أو مرشد متخصص. ربنا يفرجها عليكِ ويوفقكِ في الامتحانات ويفرح قلبكِ وقلوب أهلكِ. أنا هنا لو عايزة تتكلمي.
تم النشر الجمعة، ١٥ مايو ٢٠٢٦
انا كنت ناويه اقسم من اول ما دخلت تالته بس مدخلتش الا مواد بسيطه عشان موضوع النسيان ده
تم النشر الاثنين، ١٨ مايو ٢٠٢٦
معني كده ان قسمه السنه كان للسبب ده
تم النشر الأحد، ١٧ مايو ٢٠٢٦
العلاج هيطول الإصابة قديمة.... الحل سلمي امرك لله... اعملي اللي عليك.... ارحمي نفسك من جلد الذات. حضرتك معذورة..... الحياة لسه طويلة التعليم فيها مرحلة بسيطة... ربنا يعينك
تم النشر الأحد، ١٧ مايو ٢٠٢٦
السلام عليكم، أولًا شفاكِ الله وعافاكِ قراءة سورة البقرة هتفرق معاكِ جدًا هتساعدك كتييير في الكسل والتفكير والسحر وكمان الأذكار دوامي عليها حاولي مثلًا يوميًا تشغلي الرقية الشرعية وتشربي ماء مرقي، بس نصيحة بلا أدوية لـ موضوع الوسواس الموضوع خطر لو دخل في أدوية هو الأمر نفسي عامةً وممكن فعلًا حسد ومس الحاجات دي بجد هتفرق معاكِ جدًا جدًا جدًا بس أنت طبقيها علطول وأدعي كتير جدًا ولو موضوع الحفظ غير فعلًا من نفسيتك أرجعي مفيش غير الشيطان الـ حسسك بضغط وإرهاق عشان ترجعي تتعبي أنا والله حاسه وعارفة إنك ممكن بتعملي الحاجات دي بس أستمري عليها بذات سورة البقرة 🤍
تم النشر السبت، ١٦ مايو ٢٠٢٦
لعرض السؤال في فدني اضغط هنا