انا ممکن مشکلتی انی مش عارفه انا عاوزه ایه او مش عارفه اخد قرار بکون عاوزه اتغیر بحاول بس مبعرفش اکمل یعنی او اخدت مثلا قرار انی مسمعش اغانی مش هعرف اثبت یعنی بقطع و تلاقینی سمعت اغنیه و رجعت تانی المشکله مش فی الاغانی بس المشکله فی حاجات کتیر قوی حتی ساعات بحس انی معندیش مبدأ فلو حد عندو حل یا ریت یقول
السلام عليكم، ممكن مشكلتك في عدم التدرج أو البدء بحماس زائد أو إنك بتعطي نفسك قرارات صارمة وصعبة فبتقعي بعد فترة. أولا، بلاش التفكير السلبي ولا إنك تفضلي ترددي على نفسك إنك فاشلة أو مش عندك مبدأ لمجرد إنك مش بتقدري تكملي أو تثبتي، خدي بالك من الأفكار اللي بتملأي بها عقلك الباطن لأنها لو ثبتت فيه هتلاقي نفسك فعلا بتثبتي الكلام اللي قلتِه وبتحققيه في الواقع. *** موضوع الوقوع وعدم الاستمرارية بيحصل مع كتير مننا فحاولي تعرفي أصلا إيه السبب في عدم استمراريتك ومتحاوليش تحكمي على شخصيتك بسبب التعثر ده. *** راجعي نفسك في القرارات اللي أخدتها قبل كده، هل ساعتها أخدتِ قرار كبير وبدأت متحمسة زيادة؟ هل بدأت مرة واحدة ومن غير تدرج؟ هل كنتِ مقتنعة أصلا بالقرار اللي أخدتِه؟ لأن فيه فرق بين عدم اقتناعك بقرار لكن هتجبري نفسك عليه وبين إنك مقتنعة تماما بقرار لكن فيه صعوبة في التنفيذ. *** فالأول كده، بلاش تاخدي قرارات كبيرة ولا تاخدي قرار وأنتِ متحمسة أو متضايقة، يعني شوفي القرار أنتِ مقتنعة به وعاوزة توصلي للحاجة دي ولا بتعمليها لمجرد إحساسك بالذنب أو تقليد لغيرك أو عشان الناس شايفة إن ده الأفضل؟ لا تتقلي على نفسك بالأهداف، اختاري هدف أو اثنين بالكتير تركزي عليهم لفترة أو عادة إيجابية عاوزة تثبتيها أو عادة سلبية عاوزة تتخلصي منها، التكرار اليومي بيثبت العادات. راجعي نفسك وشوفي إيه بيخليك توقفي وترجعي في قرارك، بتحسي بزهق ولا بتتأثري بكلام حد ولا بتحسي بشغف تجاه حاجة مختلفة؟ لما تعرفي السبب هتعالجي جزء كبير من المشكلة. التدرج مهم جدا جدا، بلاش تضغطي نفسك بخطوة كبيرة ومجهود شاق وتوقفي فجأة، تدرجي بخطوات صغيرة وزودي واحدة واحدة، ده هيقلل الضغط والتسويف ويقلل وقوعك في الطريق. الالتزام مش معناه إنك عمرك ما تقعي، لكن كل ما تقعي تقدري تقومي بسرعة وتستكملي نفس الطريق. جربي تكديس العادات، عشان تثبتي عادة جديدة اربطيها بعادة قديمة ثابتة... ممكن تبحثي أكتر عن شرح للنظام ده. أنصحك تشوفي على يوتيوب شروحات لـ(نموذج عجلة الحياة المتوازنة) هيساعدك تقيمي جوانب حياتك المختلفة وتشوفي إيه اللي ناقص ومحتاج يتظبط فيها وتقدري بعدها تحطي الأهداف لكل جانب وتبدئي هدف هدف. المهم، استعيني بالله دي أهم نقطة وحددي أولوياتك وتدرجي ومتحكميش على نفسك لو وقعتِ، ارجعي اقفي وكملي عادي من غير يأس في نفسك. وربنا يوفقك إن شاء الله.💚💚
تم النشر الثلاثاء، ٢٧ أكتوبر ٢٠٢٦
بصي العاده بثبت بمرور 90 يوم فمثلا لو انتي عايزه تنتظمي في الصلاة أو أي حاجه حاولي تثبتي في المده دي و خلي في برامج كتير بتساعد على الحاجات دي و اكتبي كل يوم في بدايه اليوم جمله تحفيزيه يعني أنا مش متردد او بدل ما تقولي لنفسك انا مش عايزه اسمع اغاني قولي انا مش بسمع أغاني العقل البشري بيصدق الحاجات الي بتدخله وحاولي دائما تشغلي نفسك بحاجه علشان متفكريش في الحاجه دي كتير وكل ما تحسي نفسك متوتره جيبي ورقه وقلم واكتبي كل الي بيشغل بالك اكتبي بشكل عشوائي وبعديها نظميها جربي الطرق دي قوليلي أتمنى اكون فدك علشان انا عندي المشكله دي برضوا ويحاول اعالجها 😊
تم النشر الأربعاء، ٢٨ أكتوبر ٢٠٢٦
أول حاجة، أنا فاهمة إحساسك تمامًا، ومش لوحدك فيه. كتير من الناس بيحسوا إنهم عايزين يتغيروا، بس لما ييجوا ينفذوا القرار بيلاقوا نفسهم بيرجعوا للورا، وده بيخليهم يشكوا في نفسهم أو يحسوا إن عندهم مشكلة في "المبدأ". الحقيقة إن المشكلة غالبًا مش في ضعف الإرادة، لكن في طريقة اتخاذ القرار وفهم السبب وراه. جربي تبدئي بخطوة صغيرة جدًا بدل ما تقرري قرار كبير زي "مش هسمع أغاني خالص". مثلاً، قولي لنفسك "هقلل ساعة واحدة في اليوم" أو "هستبدل أغنية بآية أو ذكر". لما الخطوة تكون صغيرة، الدماغ بيتقبلها أكتر وبتقدري تثبتي عليها. كمان، اسألي نفسك سؤال مهم: "ليه أنا عايزة أغير الحاجة دي؟" لو السبب مش واضح أو مش مرتبط بقيمة داخلية (زي إنك عايزة ترضي ربنا أو تحسني من نفسك)، هيبقى القرار ضعيف وسهل يتكسر. حاولي كمان تكتبي يوميًا 3 أسباب تخليكي عايزة تستمري في القرار ده، وتراجعيها كل صباح. ولو حسيتي إن الموضوع بيتكرر في حاجات كتير، ممكن يكون فيه حاجة أعمق زي الخوف من الفشل أو عدم وضوح الأهداف. في الحالة دي، ابدئي بتحديد قيمك الأساسية (زي الصدق، الالتزام، الراحة النفسية) واربطي كل قرار بقيمة منهم. لو عايزة تاخدي خطوة أكبر، ابحثي على فدني عن أسئلة مشابهة، هتلاقي تجارب ناس كتير بتتكلم عن نفس الموضوع وبتشارك حلول عملية. أنتِ قادرة تتغيري، بس التغيير بيحصل بخطوات صغيرة ومستمرة مش بقفزات كبيرة. لو حابة نتكلم أكتر عن قرار معين، أنا هنا.
تم النشر الثلاثاء، ٢٧ أكتوبر ٢٠٢٦
لعرض السؤال في فدني اضغط هنا