السلام عليكم، هو أولا التعميم مش صح والبشر في النهاية مختلفين في شخصياتهم وسلوكياتهم. لكن عامة السلوك اللي قلته مش مقتصر على النساء.. هتلاقي نفس السلوك في الرجال. تجارب كتير شفتها أو قرأت عنها، اللي بيحصل إن الرجل أيا كان درجة علاقته بواحدة، سواء ارتباط أو خطوبة أو حتى زواج.. طول ما هي مهتمة به وقايدة صوابعها العشرة شمع زي ما بيقولوا ودايما مستحملاه مهما عمل فيها بياخدها كشيء مسلم به وممكن يتطاول أكتر وأكتر وللأسف في حالات لما المرأة قلبت على النقيض وخسرها أو بقى حاسس بتغيرها وقوتها قصاده وإنه مبقاش فارق معها بيتحول هو للعكس. ممكن يكره واحدة بتجري وراه حرفيا عشان يحبها وبتحاول ترضيه بكل الطرق ويتجاهلها ويحب واحدة تانية بتتجاهله او مطلعة عينه أوبتعامله ببرود ولا بتعطيه وش وبيعمل المستحيل عشانها. ** نفس اللي وصفته في سؤالك بس مع اختلاف الجنس. *** والسلوك ده مش مرتبط بس بالعلاقات بين الرجال والنساء... أصلا أكاد من انتشاره أجزم إنه سلوك بشري عادي.. المضمون غير قيّم والحاجة صعبة المنال اللي بتحارب عشانها هي الغالية. **** جرب تلاحظ في علاقات الناس ببعض، هتلاقي ناس كتير بتحترم اللي بيستقوى عليها وميحترمهاش وتعامل المحترم بالعكس. هتلاقي الشخص اللي دايما بيسأل ويهتم ودايما في خدمة غيره وبيخاف عليهم، اللي بيحبهم دول سواء أصحابه أو أهله وقرايبه بيتجاهلوه ولا بيسألوا عنه في حين هم نفسهم بيسعوا دايما ورا رضا اللي بيتجاهلهم أو حتى اللي بيقسو عليهم. **** المشكلة إن غالبا كلنا بنعمل كده لاشعوريا... ممكن حتى تلاحظ إنك نفسك ممكن تكون بتعمل ده لاشعوريا مع العلاقات في محيطك. بتفضل صديق ممكن بيسأل عنك وناسي صديق على طول مهتم وهو اللي بيسأل. مش معنى كده إنك وحش لو كنت فعلا بتعمل كده، زي ما قلت ساعات مش بناخد بالنا وبنعمل ده لاشعوريا.
لعرض الإجابة في فدني اضغط هنا