اتخطبت لواحد وفشكلنا وحصل بعدها مشكلة .. هل صح اني اتخطبله تاني بعد ما اهله عرفوا؟

Question

انا بنت متربية ع القرءان و كنت معلمة قرءان و بروح مسابقات و اطلع مراكز ...اللي حصل اني اتخطبت و كنا بنحب بعض جدا و بسبب ما فشكلنا و انا ساعتها مكنش فيا عقل افكر فيه و بعديها بشهر اتصل بيا و عيطلي و للأسف نمنا مع بعض غصب عني انا عمري م كنت كده بس هو كان مسافر و مش هشوفه تاني كنت حاسة انه بيضيع مني ،بعد سفره ب٣ اسابيع انا البريود كانت اتأخرت عندي ف استغربت قولت اسأله لإنه اكبر مني ف اكيد بيفهم ف الحاجات دي اكتر كلمته قالي خير مفيش حاجة و متقلقيش انا مش هسيبك بس هاتي اختبار حمل و شوفي جبته و بعدها كان ف خطين واحد تقيل و التاني خفيف جدا قولتله كنا انا وهو خايفين م اهلي هو مكنش عنده مشكله ان اهله يجو و يخطبوني و اسافرله علشان لو ف حمل فعلا المهم كلم واحد صاحبه و قاله هنعمل عملية ننزله هو كان خايف علشان لو كصلي حاجة ف راح قال لأهله و بعدها بيومين و هما لسه بيدورو ع دكتور البريود جاتلي .....سؤالي هنا انا لسه بحبه وهو بيحبني. اهله كويسين ده اللي انا شيفاه وهو و اهله مرتبين انه لما بنزل مصر هنرجع نتخطب ....هل صح اني اتخطبله تاني بعد م اهله عرفو ولا لا انا بدعي ربنا انه يسامحني لإن الامتحان كان صعب عليا و بدعيله ان اهله يتفهمو حالتي كانت ازاي وقتها بس ممكن اهله يضايقوني بعدين..!؟خصوصا اني هتجوز ف بيت عيلة مامته و اخته و اخوه فوق و احنا تحت

Accepted Answer

أعتقد أن الحرام اللي حصل بينكم مكانش هو الحاجة الوحيدة الحرام في علاقتكم للأسف ولكن أكيد سبقه مقدمات كثيرة فيها انتهاك لحرمات الله لو واثقة أنك لما تتخطبي ليه أنه مش هيقرب منك ولا هيكون فيه أي علاقة بينك وبينه إلا كعلاقة الرجل الغريب عنك لحد ما يكتب الكتاب وحاسة أنه نادم على اللي عمله معاكي وعلى كل المقدمات اللي مهدت للموضوع د وأنه إنسان يستحق يكون زوج ليكي وأب لأبنائك فتذكري أن كون أهله يعايروكي دة مجرد احتمال قد لا يحدث وأنت أدرى بطبيعة أهله لأنك أنت اللي خالطتيهم وجايز طبعا ينسوا الموضوع تماما  وعموما واضح من كلامك أن أهله متفهمين الموضوع كويس أو على الأقل مفيش بوادر سيئة من ناحيتهم تجاهك

Answer

زى ما قولتى الاختبار كان صعب خليكى بقي فى الاختبار الحالى ...لو اهله مش كويسين كانوا من وقت ما عرفوا وكانوا هيحاولوا يضايقوكى بكلام حتى غير مباشر. قيمى الشخص تانى من الاول وشوفى هل يصلح يكون زوج واب ولا لا عشان متبقيش بنيتى غلطة على غلطة وعيد ى التحليل حتى لو البيريود جاتلك عشان تتأكدى ان نتيجة التحليل الاول صح ولا غلط .

Answer

بصى عشان نكون متفقين هو كدا مش كويس ان هو يطلب منك حاجه زى دى أو حتى يعمل معاكى كدا لأن انتوا عارفين اكيد ان دا حرام وماشاء الله بتقولى ان انتى كنتى معمله قران واكيد عارفه ان دا حرام جدا بس خلاص عملتوا الغلط واى انسان بيغلط ف عادى بس المفروض نتعلم من الغلط دا اولا كدا لازم يكون ف اتفاق بينكم ان ميكونش فيه اى تجاوزات لو اتخطبتوا تان لأن ادام حصل بينكم علاقه ف ممكن يطلبها تان أو يقولك حضن وهكذا ودا طبعا ف حد ذاته غلط ف انتى وهو الأول تتفقوا ع كدا ان خلاص ربنا حطنا ف اختبار صعب جدا وممكن يكون اللى حصل دا بسبب ان ربنا بيحبك يعن نجاكى من مشكله كبيره اوى فكرى كدا ف العقبات اللى كانت هتحصلك ف انتوا لو اتخطبتوا يكون ف بينكم حدود كبيره لان ادام حصل بينكم علاقه ف الموضوع ممكن يبق ايزى تان ف المفروض لو اتخطبتوا وطلب منك كدا تان تبعدى اصلا لان دا مش هيبق شخص كويس تمام دا اول بوينت البوينت التانيه وهى أهله انا شايفه ان أهله قمه الاحترام والإخلاق لأن لو حد غيرهم كان شافوكى مش كويسه ومكنوش هيوافقوا تبق ل ابنهم حتى لو هو اللى عمل كدا ف البوينت بتاع أهله دى مش تقلقى بس برده لازم يكون ف اتفاق بينكم يعن قوليله ان هو يتكلم مع أهله ويقولهم الموضوع يتنسى وهى امنتنى ع نفسها والغلط عليا انا ويكلمهم وكل حاجه بتيجى ب التفاهم وطبعا ربنا يحفظك بس لازم الانسان يتعلم من غلطه

اتخطبت لواحد وفشكلنا وحصل بعدها مشكلة .. هل صح اني اتخطبله تاني بعد ما اهله عرفوا؟

اجتماعية

زواج

علاقات

سؤال من احد أعضاء فدني

تم النشر الجمعة، ١٦ يونيو ٢٠٢٣

3 إجابة

13 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك